Juan_HRomeroC-pay_jhn_text

Capitulo 19

¹ Akashkuá Pilatoma Jesúsro sukuhí arpishku. ² Asã as tuka as ki´ri sikiyo. Ekalerma asãñaró tukri to Jesusñá kaowama purpura yarii artukri. ³ Ekaña te'kera ne'rí: "¡salve Rey pesh e'ró ti'kiri!" i ekalerma arpishka a'kakiri. ⁴ Akashkuá Pilato warki pesh wriharó ti'kakii: "Chaûwãwĩ tasña pe'kakaawá arani achihí panawá arihupiwaró tasma ña warki asnani artapu'tawã to ekañamaa". ⁵ Jesús tapaski corona to sikiró atukipaki kaowama purpurarii akashkua Pilato ñehí a ekaleró:"¡Chauwa, i arawaró!". ⁶ Akaró pare principal lerma i oficialri Jesúsña te'kri, ekalerma ña tapuri ñe'rí: "Porkuwãwĩ, porkuwawĩ!" Pilato ti'kakii a ekaleró: "Papewá sukuhwá porkuwãwĩ. Tasma ña warki asnani artapu'tawã a ekaña". ⁷ To Judíosma karkawarkri: "Pitasma ley as pitakachuwá, to ley askén yo yar ña'prá. Ekama onpe ekapeka ñehí patatishta ayerwãke". ⁸ Pilato weshkuma to ñe'hiro, ekama wẽ akatii. ⁹ Asaaña toki pesã ta chuler ña warki Jesús ñe hí: "¿Piã chi te'kisa?" Akashkuá Jesús intiki'tii. ¹⁰ Pilato akashkuá, ti'kii ekaró: "¿Pama takapashkutuwã tasña? ¿Akashki pama arihutuwã tasña, ata pum takashuwá eña pikasteshparó, atapum piporparó?" ¹¹ Jesús karkawarki: "Pama impikachituwã tas a aña tã'wã chata pipenrí, tõ'kerma, toya tatenhí kawishkima to ekama ñawarkí wê akachuwá". ¹² Ki yarma tõ ñaí Pilatoma aryo'tiírishkí, akaró to Judíosma peshña ishpakri: "Paí o arwãma aryokima. Pama tentawa arkí Cesar tishkutipé, as te'kerá a ekapeka rey tishkepe ña warkiroñehiro Cesar yó". ¹³ Ke pilato weshkuma aña'ró, ekama Jesúsro ara'na pe'ki achahaña achii to tribunalña pigrima apimmarii: "Sa tukerña", akaró Hebreoma, "Gabata". ¹⁴ Inkatama a ã te'kuama enkilerchẽ pascuachẽ, tawê serarii Pilatoma Judíosro ti'kakii: "¡chauwã, pi rey ma ña aaki!". ¹⁵ Ekalerma wa'rí: "¡Nelerpiro ékayo!" Pilato warki ti'kakii: "¿Inkashki naa porpasa pi rey ró?" pesã'tama parema karkawarkí: "Pitasma rey ma pitakachituwã Cesar peí". ¹⁶ Akashkuá Pilatoma Jesús kawishki a ekalero porkerpiró. ¹⁷ Jesúsro sukuri, ane'hí to pen prak pish ró, tõ'ña pakerma apinma "atape'haña karporka" ¹⁸ Ekalerma tõ'ña porkrii Jesúsro, arwãma pok yo aten as as Jesús araña ta pehí. ¹⁹ Pilatoma kakorska as kii i tuki pen prak pishña, tõ'na kokorskarii: "JESÚS NAZARET, REY JUDIOS PESH E Í". ²⁰ Judíos wê te'kera aweshkri to kakorskaró akaro tõ'ñama porkriñama kãã uyama erñarii. To kakarskama añaha hebreorii, latín i griegori. ²¹ Waripe to Pesã'tama Judíos pesh parema Pilato ti'kii: "Rey Judíos pesh e'ma kakorskuti", akuaró ñe'piró, Ekaña ñehí: "tasma Judíos Rey ra wá" ²² Pilato ñe hí: "Iro kakorskarima, ke kakorkarii". ²³ Tika to asã wrihama Jesúsro porkrii, ekalerma su kuri ka õwaró kra ka ki'rí: kra as asãn asró i kaowama, inkatama to kaowa ara porkama akachitirii, atẽsh as peki ki'rí. ²⁴ Waripe a ekapeká ñe'rí:"Wâ'barti, i'ka akẽsh anu'pra ka'pra tãró ara pash kueka". Ima tu'teshkua yar tispiriró to kakorskaró to ñe'waró: "KAWISHKERA KRA KILERA TAKA OWAÑA AAÑA ANU'KERA TUKRI". ²⁵ Ima asã wrihaña yas ishkrí Jesús akakiró, a õn akakiró, Maria Cleofas akawarii. Maria Magdalenama askén a akrii pen parak pishña to Jesús e'ro. ²⁶ Jesús a kakiro chẽ uma i araba'torasma arakiwarurii erña aakuaruri Ekaña ti'kii akakiró: "¡Korta, piñerwã chaû!" ²⁷ Akashkua eka ti'kii to araba'taro: "¡Chãû, pi kaki!" Tõ'chema to araba'tama akaoñaro pakí. ²⁸ Tika to Jesúsma, akaro ekama yas arichewarurii akaro inkatama yar tishpirii, apishti kri kakorskama, ñe hí: "Tas tokishtaiwa". ²⁹ Aka musti as atoká akamewaró tukri tõ'ña tõ'karo ekalerma esponja as tukrii toka akamewaro tukri to isapoyo asapañaro pakera wishkri. ³⁰ Jesús ke aso toka akame akamaskuma, eka ñehí ke: "kri'ro yar tishkuá" Ekana asãró manokí i akuansaro wishki. ³¹ Akashkuá Judiosma, akaro kilerchẽrii, tõ'karo to apeshkaoma chiler tipiro pen prak pish ña to Sábado chẽ (Tõ'karo to Sábado ã ã eñarii), Pilataro akape'ri akapuk kra'chelerpiró barkerpiro. ³² Akashkua asã wrihama te'kera pesh kapu'ro kakracherí ki'ma arwas as arwã pokri asken porkriro Jesúsyo. ³³ Jesúsña nelerma ekalerma ke Jesúsro ke onnirii to'karishki akapu'ma krelertirii. ³⁴ Akashkuá, asã as te'kí asuro por kí sa'kii porkayo, waripekii uri asori apas kí. ³⁵ Taña chẽima ekaña ñehí, to ña'ma yar i ekama ariwa iro ñehima yar tishki pawaha yar ñahupiwaró. ³⁶ ³⁷ I'ka akaró yas tishkri to kakorskama yar tishpiriró: "APAÑAS ASPEKA CHANI ÕSKATÃHI". Warkiã, kakorskama ñe'wá: "EKAMA CHELERPE ÉKARO, TAÑA KRA PU'PESH KRIRO". ³⁸ Waripe te'ki yasma, José Arimatea ma, Jesús araba'tarii, (Akashkua katiri te'kí Judíosro kakatiwarurii), Pilatoro arkapẽi Jesús apeshkaoro papirishki Pilato ta' wishkí. Tõ'kema Joséma nei Jesús apeshkaoro pakí. ³⁹ Nicodemowá te'ki, ki as tishki to kakaña nete'ki Ekamá ani as mirra Sábila uincho'tí as pe'ki awá as atenarii. ⁴⁰ Akema to apeshkaoma pakri to Jesús e'ró abrika asyo wartrurii proprokiwayo tõ'ke pesh ariarii to Judíosma tãro onlermaa. ⁴¹ Inkatoma tõ'ñama to por kriñama jardin as chuwarurii: to Jardinñama kanso' wei karii asnani Õskertururii. ⁴² Tõ'ma aema to kilerchererurii Judíos pesh e'ró to kanso'ma e'ñarii Ekalerma Jesúsro pishkri to asá aña.