Juan_HRomeroC-pay_jhn_text

Capítulo 16

¹ "Ima i'ro yas ta'kaka awá Parowas atataskutipiwaró. ² Ekama siki kaoña kakaspaskerpiwá, akarã ke aema ke erña tishkuá ke ahí karmaskerma patatishta kawishki to katun. ³ Ekama ima yas ishkerpe akarõ atewata ta tus tasri tachãutuwãwĩ. ⁴ Ima i'ro ta'kakaawa, ke aê te'bonachema, Pamawá pi'ta'a'piwa tasña ta'kakaari i'rõ to ekaleró. Ima ña'tari i ta' kakaró tasma ki krisña payo a akariwã. ⁵ Akarõ tasma ke na awá taño tatunhikena, akashkuá, pani asnani takapẽ'lertuwã: "¿Pianeisá?" ⁶ Tõ'karo inkenkaa tasma ta'kakaarí i'ro yas, ta'pikakaawãwĩ, pi turusãró amesh ki musti. ⁷ Akarõ tasma yar ró ta'pikaowá: Eñaripiwa tas na aró tasma naparó, to akuansama te'tipé tas natama ã paña pika tumpawá. ⁸ Ahí eka te'kuma, to akuansama akamaspé i kuk chaparó akuarurii, erña ñawarkiró i justiciaró i apistichẽ. ⁹ I ñawarkirá inkenki akaró tasma yar ñe'lertuwá; ¹⁰ i justicia arí, tõ'karó tasma ta tusñaro na awá Pamawá ke tachõ utupiwá. ¹¹ i apistichẽma i akaró pe sã'tama i kuk chaparó ti'kakilerpé. ¹² We yas takachuwá ta'kakaparó, pama tõ'karo arihutupiwá. ¹³ Akaró ekama, akuansa yarma, te'kuma, ekaña ki tishki kawapé kri'ró, ekama akaró kapashtipe ekapé. Akaró ekana ti'kakipe i'ro weshkuma, ekaña ti'kakipe to te'kuaró. ¹⁴ Ekaña glorificatishpé, i'ka akẽsh ekaña to'pe taste'e'ró ekaña pañarowá. ¹⁵ Kri yasma ta tus akachuró to'ma tasteí tõ'karó, to akuansama to'pe to taste e'ro parowá ti'kakipiwá. ¹⁶ Ã as akina tish te'ki pama tachãutupiwa tika te'ki akina tish chii pamawa warki tachãupiwá". ¹⁷ Akashkuá, araba'ti as te'ki a ekapeka ñe'rí: "¿Ima iro ñewasa iĩ: "Ã as akina tish te'ki pamawa tachãutupiwá. Tika te'ki pamawá ã as akina pamawa warki tachãupiwpa", i tasma ta tusña naawá?" ¹⁸ Ekama ekape ñe'rí: "¿Ima i rõ ñe'wá: ã as akina tis?" ima ari partuwá i rõ ñe'wakena". ¹⁹ Jesús chẽi to ekarõ arkape'lerpirishkri ekaña ti'kakirii Pamawa i'ró arkapeiña wĩ iró ñahakena: "¿ã as ukina tisma, pamawá ta chã y tupiwá wêmaa akina tis te'ki tachã utupiwá?" ²⁰ Yar yar ta'pikaawá, panawa wa'nuwa aka'nupiwá, tõ'karo i kuk chaparma arartishpiwá; panawá ameshki wê pikachipiwá, iro to akatiwá ishkuama arariakupiwa. ²¹ Ima ahí to kortama aryewamá ekama ke amesh tishkuá ke aê ke erña te'kuá, ke yeas aryeuma, ekama to opanna kiima ke ameshtuwã, i'ka akẽsh ke arari tishkuá arwã as chiiraska i kuk chaparña. ²² Akẽshma ke pamawá inkatoma ke ameshkiñawĩ, akarõ tasma warki pichamawá pi turusama arari tishpé pi ararima asnani te'tipe pirkupiró. ²³ Tõ'chema panawa in takapautupiwá, yar yar ta' pikapawá pama irõ yar kapẽ ima ta tusrõ ekama pipenpiwá. ²⁴ Inkata chani pamawá in kapaũtitiñawĩ, tapinyo, akapaũwá pipenpiwa, to ararima yar tishpiró. ²⁵ Tasña pi ka pashkawá tañaba ka ayó, akaro ke tae ma ke te' bona ishkucí ke ta uwayoma ke kakapashtapa, tõ'karó atamakema ekaña ña eñayo ti'kaki a tusró. ²⁶ Tõ'chema a ekaró akapaupiwá ta pinyo i tasma ta'pikapawa arñeu kapaũwãwĩ ta tusró parõ'wá. ²⁷ Akẽsh tusma ekaña arakakiwá tõ'karo pamawá tarata kiñawĩ yar takaiñawĩ tasma ta tusñaro te'kari. ²⁸ Tasma ta tusñaro te'kari, tõ'karõ i chaparña te'kari warkia, tasma i chaparma tu'naishkawá i ta tusña naawá". ²⁹ Pesh araba'tama ñe'rí: "Chaiña, inkatama tasma kakapashkawá yarma: kapashkaishkiyá. ³⁰ Inkatama tõ'karó paí i yasma aricheiya, inpikachituwãwĩ asnani pikapẽ'tipé akarõ yar ñaparma patatishtaña chi te'kia. ³¹ Jesús karkawarki: "¿Inkama yarñeiya?" ³² Chaũ taema ke erya tishkuá Oô ha' ñahuti, ke te'bona, pama inkatama tis tis tishkupiwá, pa aspewa pikuoekaña, tas aspe tatu'naupiwá i'ka akẽshma tasma aspema a a'tawã tõ'karó ta tusña asken aakawá. ³³ Ta'pikaawá i yasró paro'ró tasñaro eña chaupiwá y chaparña pamawa anu'ka pikachi tuwãwĩ, akarõ tasma atapan wê takachuwá: Tasña i'chekaawa kuk chaparña.