Juan_HRomeroC-pay_act_text

Capítulo 24

¹ Tika ã onki as te'ki, Ananíasma to pare ki'rima, arñata as rií arwalerma Tértulo rí to'ñaró nebori. I arwã lerma pesã'ta as ró pe'krí Pablo irishki'kena. ² Ke Pablo ahí awakiña a akuama to' pesã'taawakiñaró, Tértuloma ki' tishki ti'kiakí to pesã'taro ti'kií: "Parishki eña aabrí; to' pe'kima eña piña' pe'kuá pita kauya ñaró; ³ akarishki to'kri kaparkama eña inken te'kiñawĩ to kri irõ ĩrishkiyas excelentísimo Félix. ⁴ Akén to'kenma wê peshka a'tapa, tasma eña pikapaãwã katira ta'ñaweshkerpiró. ⁵ Akẽsh untasmawá i arwã asró artapu'prí pesh wakua as i i asma krí'ró kamini'chewá to' Judíos i kri kuk chaparñá akailerpiró. Ekama asã'ta as i to secta Nazarenoleró. ⁶ Ekama tõ'wã sikin kaoña ñe'hí akashkuá suku'bra tõ'karo ña'ta'kaabirishbrí toh pitaste to ley ñe'wakén. ⁷ Akarõ Lisiasma, to oficialma, akaiwá a'ka tishki te'ki pita'kulertirí untas sawañá. ⁸ Pitatunhuwawĩ pañaró. Ahí pama Pablo ñe'hĩró i kri a aya ñehĩró, pama, tõ'wã, pama arihupé irõ ta'kabarkena". ⁹ To Judíosma Pabloro ti'kirí, tõ'wã ñe'rí i kri yasma yarrií. ¹⁰ Akãro ahí to pesã'tama Pabloro karwãni kapashpiró, Pablo karkawarkí: "Tasma arihawá inkén kuí wê'lerá pama juez as riya i kaãuyañá akén ña' heña ta'pikapawá parõ. ¹¹ Pama chaenkaupé ke ukuá pok ãn as ke tu'teshkuá to Jerusalén ña chẽ tawecharichẽ arña'paró; ¹² ahí ekalerma sikin kaoña tar tapakrí, tasma asnaniyo anu'tarií, tasma akai karpastawá sikin kaañacharí, kãuya ña chãrí. ¹³ Ekalerma akamaskertipé to ñe'riró toh ekalerma inkatama tasyo ishkerwá tasñaró. ¹⁴ Akãró tasña eña ñahawá aken ñehiken to ta'ña to ekalerma apinma sectaí, to'chẽma ta'ró tasma Patatishtaró kawishkawá to kekerima. Tasma eñarawa to krí ley a akriró to Profetas kakorskriñá. ¹⁵ Tasma takachuwá Patatishta akennaró takachuwá, to'kén to arwãlerma tõ'wa awakerwá, to' wakatishkerchẽ te'pichẽ to' onni apishkerña, askén, eñalerma to warkuaishkerwá. ¹⁶ Ima i'rõ, tasma a tapún takachuwá amesh eña takachipiró kabis Patatishta awakiña toh arwãlerñarí. ¹⁷ Inkatama, tiká kuí wê teshkí tasma kawe'tekarií kãaya tarwarkerpiró to platoma pitatenlerpikén. ¹⁸ Ahí tas irõ ishkama, akualerma Judíos to Asia tartapukrí akatika asñá kauskerpiró to sikin kaoñá, ima pesh wrihá wêtanleryó kasna ishkeró. ¹⁹ I arwãlerma ima ke kí ne akrishkí inkatama paña'ró nahupiro to ekalerma tasñaró ñelerpiró ôo ekalerma irõ kakachuma. ²⁰ Ho to'kerma ĩ arwãlerma ĩrõ ñawarkiró ne'rishkí ekalerma artapukrí ahí tesh aakarishkí Judíos concilio awakiña; ²¹ akina ke erñama to yar asñama tas ñaharí taña a'kayó ahí tesh aakama ekapesh aarañá: ima wakuatishkerchẽi to onni apishkerñá ke inkata tasñá ti'takiakerwá parishkirowahá". ²² Akashkuá Felixma, tarõ eña archiwishkrí to taha ñaharó, to tauwẽriñawa taishpakí. Eka ñehí: "Ahí to comandantema Lisias Jerusalénña chii chreí, tasña ña'pa ta irõ ti'pikilerkena". ²³ Akashkuá ekaña centuriónro ti'kii Pablo chaenkilerpiró, eña tarstesh we piró asnani to tentawalerwá chẽ kaû'lertipiró irõ akachituma wishkerpiró. ²⁴ Tiká ã asma, Felix Drusiliayo te'ki akawa ekayo', Judia korta as rii, i ekama Pablo rishki nei; wẽshki to' ekarõ cristo Jesus fe'ro; ²⁵ Akarõ ahi ke Pablo tis kapashikima to' justicia aaña'ro; to' dominio apeshkaoro; to' ki'pina, te' kuachẽ, Felix akatii i ñeh: '' Inkama nau'. Akarõ tikama tas ã warki takachuma Pirwa'pa,'' ²⁶ Tõ'chẽ akennama, ekama Pabloró awakaishkrí plato wishkerpiró, akenma akinama ekaña katúnhí ekayo kapashkrí. ²⁷ Akarõ ke kuí pok tu'teshkuama, Porcio Festo pesã'ta tishkí Felix tika te'kiã, akarõ to Felixma, suku'pirishkí Judíos pesh e'rõ, aken tõ'kenma Pabloma ke cha en kilertirií.