¹ To' Pablo ma yesti aki chei to' pesh atawehiakriña ama ti'kakií, "Ta arkiwá tasma chaawá Patatishta awakiña to' eña ishkri krihro ama to' che'rií". ² To' sumo Sacerdote ma Ananías ti'kakii to' asken aakri ekayó to' ña asapaña krihleruri. ³ Ekakes Pablo ma ti'kii, "Patatishta pirkatehpé paró, pared, kamasãi. ¿Pama achaha ishkiyá ti'takaupira ley yó, akãnshkua ñehiya tarkatehlerpiró, a ley tahyó?" ⁴ To' ahleri asken aahkrii ekayó ñehrii, "¿Akenai to' ñahwarki ti'kii to' suma sacerdoteró Patatishtai?" ⁵ Pablo ma ñehi, "Tasma arihtahari ta arkiwá ekama sumo sacerdoteri. Akema kakaskaro achihi, PAMA ÑAH WARKI NAHUTIPÉ SÃ A'TAIERI PA CHIIÑA". ⁶ Ekakes Pablo ma ti'ri atawehiachiri Saduceoslerii to' akuama Fariceos leri, ankrá arihwai to' anleriro awakawá wakatishkerpiró inkatama ti'takii aakerwá". ⁷ Ekakes ekama ñehi iró, ishkera ñehrii to' Fariseos yó Saduceos ri, to' pesh wrihama tis tisneri. ⁸ Akema Saduceos ma ñehlerwá wakatishkertuná, ángeles chani, kuansa chani, to' Fariseos aríhlerwá yas krihroi. ⁹ Akãnshkuá ki'lera wakrií tapurá escribas tis cheleruri to' Fariseos yó ta istakera ñahwarki ñehrii: "Untasma tisnani pasbartihi to' arwayó. ¿To' kuansa as ma to' ángel ró un kapashki ekaró". ¹⁰ Ekakes ta ishtakuama a'ka anukrii, pesa a'ta chanama akatii to' Pablo ma tas kerpirii eka rish, ekakes ti'kakii asaró monokera sukuhlerpiro ata punyó to' pesh atawehiachi'riyó, ata punyó pakerpiró. ¹¹ Akãnskua to' Señor ma akakaña asken aaki ti'kii, "akati úti, akema pama ñehuriras tas rish to' Jerusalén ña, akema pakupé piñahro to' Roma ña". ¹² Ekakes arahkiwá tish kuama, Judíos tis ki'rii to' pesh wrihayó ñehrii a warkuaró to' ekaró ishkera e'lertipiró to' nachani ama Pablo amaskertanii. ¹³ Ekama ka kreshleri añaleri ki'rii pesh wrihayó. ¹⁴ Ekama ki' nerii sacerdotei chuwawá ama ñehrií, "untasya tu' bri to' warkuá a'ka awikiña, tisnani a'bartihiri to' Pablo amaskertanii. ¹⁵ Inkitama, akenai to' atawehiachiriña ti'kilerpiró pesãa'taró payó monohpiró, akaró pawai uwãri eyrupiwa. Akarike untasma, che'aaka piwá ki' amaskapiró eka te'kuaha". ¹⁶ Akaro ekama ti'kii Pablo apa'charó weshki ekama to' acechoña aakri, ekama atapunyó nei aishki, Pablo ró. ¹⁷ Pablo ma, centuriones as ró arwahni, "i ye erwaró papiró pesa ohtaña, to' ma iña as akachuwá pé a ishpiró". ¹⁸ Akãnshkuá centurionma to' ayerwaró sujuhi paaki asoahtaña ti'kii: "To' Pablo prisionerochataña tarwarni, tarkapei pe'paró i ye erwaró. Ekama tis akachuwá pi ishpiró". ¹⁹ To' saahtama asawaña sukuhi paki to' tisna tokertuña nei arkapeo: "¿Iro ta ishpirishkuasa?" ²⁰ To' yeerwãma ñehi: "To' Judíos ma ata akri kapei pakerpiró cha Pablo pakerpiró to' atawehlerña, akaro ekama nei arkapehlerpiró to' wari ishkriró. ²¹ Akaro neuti ekayó, akaro arwa ka ukua as chilerwá ekaro awakera. Ekapé warkuá ishkri, tisna tokertihi eka amaskertani. Akaro inkatama che' aakri, to' te'piro awakera. ²² Ekakes asa ahtama to' ye erwaro tuhi, akaró wishki achiwishkuaakri: "Asnani ta' kaotipé iyas ta ishkuriró". ²³ Ekakes ekama centuriones pok karwahni ñehi: "Asã awá pok prohuwá kara nelerpiró to' Cesarea ña, to' arwa tawah ukuá as wá to' ohlahyó, lancero awá pok kri. Pama apaskerpé to' men aki wakerña". ²⁴ Ekakes ti'kakii peshwakua uwalerpiro to' Pablo ta weachipiró, chelera pakerpiro to' pesa ahta Félix ña. ²⁵ Ekakes ekama kakaski i awikaas: ²⁶ "To' Claudio Lisias ma a'ka tishpiró to' pesaahta Félix ró, ti'ki piró. ²⁷ I arwama to' Judíos ña suku'ri to'ña aaki amaskerpirurii to' ekayó, ekakes tas nabonama eka aakriña asaña salva' kakaari, tasma eyrari to' kaauya Romano chatarii. ²⁸ Tas ma arihparishkari to' kresh ñehlerurii akaro pakari atawehlerña. ²⁹ Tasma eyrarurii ekama ti'kelerurii arkape'lera ishkeruri to' leyyó, akaró chitirii ti'kilertihiwaakri ekayó to' onnaró arkatishki sakerpiri. ³⁰ Ekakes ta tunnelera arihari akachururii to' arwayó, akaro tasma uwãri tu hari, akanshkua tasma achiwishkari to' ti'kileruriró pe'kerpiró to' kargo kakachiwaruriró ekaña pi presenciayó. Tasma naawá". ³¹ Akaro to' asama añah weshkri. Ekama to' Pablo ro, sukuhra pakrii ãkakaña Antípatris. ³² Ekakes arahkiwáma, to' asã wrihama arwaro tunnelera ohlahyó nelepiri ekayó ekama wartapehí te'kerpiri fortaleza ña. ³³ Ekakes to' arwã ohlayó te'bori to' Cesareaña to' awikawáro pawishkri asaa'taró, ekama to' Pablo ro pukpeshkrii. ³⁴ Ekakes asãa'tama to' awikwará aweshki, ekama arkapei i provinciariakana to' Pabloi. Ekakes arihii Cilicia chatari, ³⁵ ñehi: "Tasma che' piwesh pa pisukapashta te'bolerma ñaha" Ekakes ekama ti'kii kaakerpiri to' krih ñehriró, Herodes asa ahtari.