Juan_HRomeroC-pay_act_text

Capítulo 17

¹ Inkama akashkua toh ekaleri túkteshkerwa aâkrií kahá Anfípolis i'ka Apolonia ñarí, ekalerma na bori toh kahá Tesalónica ña, sinagoga as chiíña a Judio pecheâ. ² Pabloma, tohke ishkuaruriras, neí eka aâkriña, ân mai aâki tohña ti'kakií ekaler ró â kakoskaña. ³ Ekama aprihí toh kakaskaí akes kachawishkí ti'kakií â Cristo ôhsi ki'rií i'ka taishtaki toh õhri keña peshkeraña. Ekama ñehí: "I Jesús ñahaí taska pãwaró tohma Cristo í". ⁴ Akes Judíos tis nera atawehrí Pablo yo i'ka Silas yorí, akes griego weh tis i'ka kartawa tis í. ⁵ I'ka toh Judío ñah í weshker tiírishkerma, akes kawehlera akaiyó, arwã tis kasukúk rá warkuakeña ã ú'cha'ta, weh kaũwẽhrá, karesh ishkera ã kahaña. Úntrokera tani Jasón â kaôña, ekalerma kawishkerpiro ishkri tani ler ró Pablo i'ka Silas rí ã kahá chata lerñá. ⁶ Akashkua kapaskertihí, ekalerma nera na kapi chri'ri ã taniro Jasón i'ka aarki tislerí oficiales peshwaki'ña ã kahaña, wãhlerá: "I arwãí awartukerí i kúk ka asapa okake ña te'krií. ⁷ I arwã lerma toh Jasón kabokí warkua ishta lerá kare'maâ ã decreto í Cesar í; ekama ye'lera rey akuaro chunâ, Jesús ná". ⁸ Toh wrihalerma i'ka oficiales lerí ã kahá chata lerí weshkera akâirí i yas ĩ. ⁹ Akes toh oficiales lerma ishkera ã Jasón i'ka as lerwa tamihrí platôyó, akes katúnrí. ¹⁰ Toh kakaña chẽ pesh arkiña katúnrí Pabloro, i'ka Silas ri Berea ña. Akashkua ekalerma na bara tohña, nerí Sinagoga Judio pesh eña. ¹¹ Akes toh pesh eña lerií i'ka Tesalónica chata ma hô, í chatama en weshkrí ñahá pesamayá en ki'rá, kakoska en chera kapah kapah tohke chẽra akena riekana. ¹² I'ka tis karesh añah weshkrií, akes korta griegas tis í akes arwã wahá. ¹³ Akashkua toh Judíos Tesalonica chata lerma ari'lerií ke Pablo wa aâkrií Patatishta añahro ñehí ã Berea ña, ekalerma nerí añá wâlera wâ ki'eí ã wriha lerña. ¹⁴ Akashkua wãripé, toh pesh arkí lerima túnrí Pablo ro take ke, akes Silas ma asken Timoteoyo tawarkrí añá. ¹⁵ Atah ataha achawishkrí pakri Pablo ró karâ'rí toh kaha Atenas ña. Wãripe tohña pa akasteshkrí añá, eka lerma añah wesh krí inke ti'ka kilerpiri asrí tani leró Silas i'ka Timoteo rí wãpé te'kerpiró. ¹⁶ I'ka ke Pablo ma awaka ishkuari ekalero Atenas ña, eka akuasama akai i asa ârirí chẽí toh kabaró anipe ídolos. ¹⁷ Akes ekama ti'kakií toh sinagoga Judío pesh e'ña i'ka atah Patatishta arñehlerwá akes toh ú'chê' lerñawa atah aâkeryo añá. ¹⁸ Akes tis filósofos Epicúreos i'ka Estoicos ri ekayo atapukri. Tisma ñehrí: "¿Irô ñehwasa í ñâh ñâhtaí?" Akuama ñehrí: "Ekama anikena karwani toh pesh lero arbakerpiro dioses akuará", akes tohma ñehwasí ã Jesús ro toh ôhni wakatishkí. ¹⁹ Ekalerma sukúklera pakri Pablo ra toh Areópago i'ka ñehlerá: "¿Ari' parpi rishbarâ toh achawish wéhka pehkií ã ñehí aâkisí? ²⁰ I'ka pama pehkiâ yas ari'partu keñaâ unta súnta pakñá. Toh karí, ari¿parpirish barâ toh yas ñehií". ²¹ (Inkatama Atenienses kari'ró i'ka toh akua lerwa aña cherurií apero karweshkera i ishkerturií, akes ñehra weshkera toh yas wêhkaró). ²² Akashkua Pablo ma teshkí aâki Aerópago â'raña i'ka ñehí, "Pawaí arwãwa í Atenas riawiĩ, chaãwa pawaí i'ka religioso riawĩí i yas kari'ro ña. ²³ I'ka ña aâka kachaârí túk teshka akes yas chaãwa pa arñehlerñá, tasma altar as chaãchí kakoskaró: PATATISHTA ARI'PARTU AS. I'ka toh pawaí arñelerí i ari'lerturikiâ, tohyaí tas tá'kakaâí. ²⁴ Toh Patatishta kii í kukâ toh kari'ra chamari iñâ, Ekama Patatishtaí piriñarí i'ka kúkñawa, chituwa i kaôñama kaâma pesawayó. ²⁵ Ekachani arwarkertuwã arwã asawayomaâ, i'ka Eka akachuké yas, akes Ekama pataténhuá chaâpiró i'ka aúrí pesh kari'ró. ²⁶ Arwã asyó Eka kií kahá as pesh wrihá cherpiró i kúkña, chií âê'chẽ kachawishki pichẽ asrí kahá apí piâ chaâró, ²⁷ i'ka ekalerí prôhlerpiro Patatishta, akes tohkenama, ekama tohke ishkerma paskerpé. I'ka Ekama karâhrima chituwã untas aâhbariñama. ²⁸ Akes Ekarish chaparwa taminíhpra untasparí unta peshyó, i'ka atah eka â poetas ké, aké ñehuâ, akes untasparwa Eka a charwa parwa. ²⁹ Tohkarí, untasma anibará Patatishta acharwa, i'ka ameshpar tí patasteí eka â deida i anike sâ sewake, i'ka sâ kamasakerí, akes sâ kaâke askenake kaâro toh arwã ameskerké. ³⁰ Tohkarí, Patatishta âê akua kií ã ari'lertuí, i'katama Eka ñehua ã arwã, kari'ro kúk pitenta warkua ishkertipíro ké Patatishta prôhlerpiro. ³¹ Ima Ekama chẽwã âêchẽ te'kí Ekaâ í kúkña eñaras toh arwá Eka tukirish iña. Patatishtama eña ñehua i arwã kari'ro, ishpali ã õhrí keña peshkera". ³² Akes toh arwã lerí Atenas chata weshkerma ã watatishkua aâkri toh õhrí keraña, tisma akakô'rií toh Pablo ñehiró; i'ka akuama ñehrií: "Untasma pi weshkape wartapehí toh ñehirish aké". ³³ Akashkí tohke, Pablo ma kakas teshkí. ³⁴ I'ka tislerma atawêhlera ekaña añah weshkrií, akes Dionisio wa toh Aeropagita rií, i'ka korta as apí Damaris wa, akes akuawa ekaleryó.