¹ Yang Krais ra kasak lukisna ba mita, kunin aisaras, diara kasak ba aisisna. Bara kup, lukanka ra, Spirit Hulikira tai brisa. ² Yua bani sarka laka kum brisna kupira ban latuan kum ban brisna. ³ Bara yang muhiki nani bara taiya nani sut ba mapara pain kaia sa kaka, kau yamni kabia yang na Krais wina ai dakbi saki lahtuban mununtara ra ai swibia. ⁴ Ju nani sut ba lika Israel kramka sa, bara Dawan mita baha nani ba ai luhpia baku saki brin. Bamna Dawan ai mawan pranakira ba wal witin nani tilara kan, bara wal la daukan laka nani ba yan, Musis laka ba, tempel priaska bara pramis ka nani sin. ⁵ Ju nani sut ba lika pas wan damika nani taka ba kyamka nani sa; bara ai Kyamka bak, wan wina laka ba kat Krais balan witin ka diara sut Dawan ka ba, bamna mayunan kabia ban kaiara, Baku kabia. ⁶ Sakuna Dawan Israel ra pramis nani munan ba aimankras lika apia: kan Israel kiamka sut ba lika Israel apia sa. ⁷ Bamna Ebraham kianka sut ba lika Dawan luhpia nani lika apia sa; kan Dawan mita Ebraham ra win: Aisak bak baman kyamkam nani brima. ⁸ Naha tanka wan marikisa upla kiamka tilara kaia baman ba mita kan Dawan luhpia wan daukras sai Sakuna Dawan mita pramis daukan ba kulki nani ba baman lika rait kiamka pali kulkisa. ⁹ Dawan mita Ebraham ra pramas munan ba lika naha sa: Naha yuara prais ka kat yang balamna, bara Sara lika luhpa waitna kum bribia. ¹⁰ Bara naha lika sut apia sa. Rubika luhpia waitna wal kan ba aisa kumi wina kata, wan damika Aisak. ¹¹ Sakuna naha tuktika waitna wal kau aisubi takras kan, bara witin nani dia pain apia diara saura sin kau daukras kan bara. ¹² Dawan Ribika va win: Luhpiam almuk ba ai muihni sirpi ha dukia daukbia. ¹³ Naha na sin dia ulban ka dia aisi yaba kat sa: Jekop ra latuan kaikri, kuna Isau ra misbara kaikri. ¹⁴ Baku bara, ¿yawan dia wibia? Dawan ba kasak apia sa ki? sip apia pali. ¹⁵ Kan Dawan witin mita Musis ra naku win: Yaura yang mita yamni kaikaia kapri ba, ban yamni kaikam na, bara yaura kupi swapri briaya kapri ba, yang ban kupi swapni brimna. ¹⁶ Baku bara, upla diara brin dauki ba apia kaka daukaya trai muni ba ba lika apia sa, Sakuna Dawan mita yamni kabia lika. ¹⁷ Bamna ulbankara Dawan mita Idsip kinka ra win: man bak karniki ba marikaya kin mai mankri, bara tasba aiska yang nini ba latan marikaya. ¹⁸ Baku bomna, yaura Dawan mito yamni kaya lukuya ba, witin mita yamni kaikisa, bara ya kupia daukaya lukuya ba, witin mita kupia karna daukisa. ¹⁹ Sakuna man ban ai wima: ¿Baku sa kaka, dia kan Dawan mita upla pat kira kulkis? ¿Ramna, ya sipsa witin witin ai kupia laka ba mapara buaia?. ²⁰ Bara man, upla, man ba yasma Dawan mapara unsabayasmaba? slaubla ni dikwika papaskra ra, sip saki wiyaia: Dia kan naku pali ai paskram? ²¹ Bamna dikwa papaskra ba mita Slaubla ni dia, dia witin brin dauki ba kat paskaya sip sa; Slaubla wiria brin bani, sip sa dukua kumi paskaya bamna, bara dikwa wala kumi paskaya dukiara. ²² Bamna Dawan lika ai latuan ka bara ai karnika tanka ba marikan dauki kan bara, witin wihka ai kupia alki tataski brin, baha uplika nani klala yaia bara apu daukaya aitani kulkan kan nani ba mapara. ²³ Baku bara, Dawan ai prana tara ba yawan bak marikaya lukan, yaura witin yamnika kaiki ba, bara yaurasin patitara yua wina pat rid, sakan ba, ai prana ba wina ai dukia bibria ²⁴ Bamna Dawan mita wan paiwan, Ju nani tila ba wina baman apia, Sakuna ju apia nani tila ba wina sin. ²⁵ Dawan witin Usias wahuka taya ra aisi ba baku: Yan upliki apia nani kan ba, yang upliki nani wimini; ani mair ka sin latwan kaikras katna ba, yang bituankira wimna. ²⁶ Man nani ba yang upliki nani apiasma wisala ba. baha sin pliskara witin wibia: Man nani ba Dawan rayakira luhpia nani sma. ²⁷ Sakuna Israel nani dukiara Aisiya naku win: Israel uplika nani ba lika sin kabu auhika baku kabia kra, sakuna baha ba wina wiria baman suaki sakan kabia. ²⁸ Kan Dawan lika naha tasba dia aisin ba kat daukbia tasba aiskara, bara isti pali sin. ²⁹ Baha sin Aisaya kau kainara ra aisin: Dawan karnika sut bri ba kiamka nani swiras kan kata, nanara, yawan lika Sadam bara Gumura ba wal baku kaia kan. ³⁰ Bamna yawan naha na dia wibia? Kan kasak lukan laka bak Dawan mita hidan nani ra param marihan patka wina pri Sakan laka ba yan, witin nani lika baha pri sakaia laka ba plikras kan. ³¹ Sakuna Israel nani lika, witin nani la lat daukaya kumi nina bliki kan Dawan mawan ra yamni kulkan kaia kan ba, bara witin nani ra baha laka kat mita sip yamni kulkras. ³² ¿Dia kan? kan witin nani lika kasak lukan laka ba brias kan, sakuna witin nani mita dia daukaya kan ba bak ni plikan. Baha mita mina prukaya walpaia ra ai mina prak, kahwi bangwisa, ³³ Ulbanka bara dia aisisa: Yang walpa tara kum Saian ra mankuna, walpa kum baha ra witin nani ai mina prakaia; ya bahara kasak lukbia ba, mawan swira takras kabia.