Ulbi Baiki Sakanka Tara 10
1
Muiki nani, yang pali kupi brinka ba, bara Dawan ra purisunisna ba sika Israel nani dukiara witin nani sut ba swaki saka laka ba alkbia.
2
Witin nani ilpkara aisaia sipsna, witin nani Dawan warka daukaya brinka ba tara pali brisa: sakuna baman baha brinka ba kasak tanka ni tanka briras sa.
3
Sakuna Dawan upla ra patka wina pri saki ba witin nani baha kaikras, baha mita witin nani ai natka bak swak takaya plikisa. Dawan daukan bara bauras kira.
4
Bamna Krais ra sika Musis laka aiska daukisa ba, bara ya witin ra kasak luki ba Dawan mita yamni kulkan sa.
5
Musis laka bak Dawan mita patkas kulkisa kaka, Musis mita naku ulban: Ani uplika la ba kat pain daukisa kaka, witin la ba mita raya kabia.
6
Kasak lukan mita Dawan kasak kira wan kulki ba lika naku wisa: Man kupiam ra wipara: Ya kasbrika pura ra uli wabia? Naha na lika, Krais kli mayara bri balaia tanka sa:
7
bara sin: Ya naha tasbaya munuhnta ra iwi wabia? Naha na lika, Krais ba yaka pruan nani tila wina ulibalaya tan ka sa.
8
Bamna dia, dia aisi ba? Dawan bila ba man lama pali kat sa, bilamra bara man kupiam ra kat sin. Naha bila na sika kasak lukan laka yang nani smalkisna ba.
9
Bara man bilam ni, Jisas ba kasak Dawan sa aisisma kaka, bara kupiam ra kasak lukisma Dawan mita Jisas ba pruan nani tila wina bukan man ba swaki mai sakan kabia.
10
Bamna wan kupia ni kasak lukisa Dawan mita kasakira wan kulkaia, sa tanka ba param aisisa, swaki wan sakaia.
11
Ulban ka ba wisa: Witin ra kasak luki uplika ba kumisin sin kunin munan kabia apia.
12
Bamna ju nani wih, ju apia uplika nani ba wal lika sat aihka apia sa; kan Dawan ba lika upla sut Dawanka sa, bamna ani uplika nani witin ai nina maks wini ba sut ra yabisa.
13
Kan albanka ba baku pali wisa: Dawan nina maki wini ba sut swaki sakan kabia.
14
Sakuna nahki Dawan nina maki winbia, witin nani ba witin ka ra kasak lukras kan ba? bara nahki kasak lukbia, witin nani Dawan aisin walras kan ba? bara nahki Dawan tanka smalk ka walbia, witin nani ra smalkaia uplika ba apu bamna?
15
Bara nahki sturi yamni ba smalkbia, blik ka wih smalkaia brih aula uplika mina nani ba painkira pali sa.
16
Sakuna upla sut lika swaki sakan sturka smalkan ka ba kat kasak walras. Baha lika Aisia aisi ba baku: Dawan ya mita wan smalkankara kasak lukan ki?.
17
Baku bamna, kasak lukan lakaka aula walan ba taka wina, bara wali ya balika Krais sturka sika.
18
Sakuna makabi walisni smalkan ka ba witin nani waltras kan ki? latan witin nani walan, Ulbanka ba wisa: Witin nani bila baikra ba tasba aiskara wan.
19
Sakuna kli aima wala yang makabi walisna: Ju nani ba dia naha na tanka briras kan ki? Taura Musis pali bila: Yang manani ra tawan lawan laka kum mang kamni, upla satka kumi nisan apia ba dukiara; bara baha nisan ka diara tanka briras ba dukiara mai munrika kupiam baikma.
20
Ninkara Aisias baha tila bak dimi, naku wisa: Ai plikras nani kan ba mita ai sakan; makabi walraskan nani ra, yang param takri ai kaikan.
21
Sakuna Israel nani dukiara Aisias naku wisas yu aiska mihti ba sakbri, kiama karna bara bila kal sin wali daukras uplika nani ra.