Juan_HRomeroC-miq-HN-miskitu_rom_text

Ulbi Baiki Sakanka Tara 15

¹ Bamna yawan kasak lukan lâka ra karna banhwi ba mita swapnikira nani swapnika ba wan karbanka pali baku brih twilki kaia sa, bara yawan wan kupia lâka baman lika luki kaia apia sa. ² Yawan kumi bani wan muihni kupia lâka daukaia sa, witin ba pain kabia dukiara bara kasak lukan lâka ra sin pâwbia dukiara. ³ Kan Kraist pali sin ai kupia lvka baman plikras kan; sakuna ulbanka dia aisi ba kat ai mapara takan: "BAHA NANI MITA SAURA MAI WI KAN NANI BA YANG PURIRA KAUHAN SA". ⁴ Bamna patitara piua wina dia dia ulbanka ra aisin ba, baha lika yang nani ra ai smalkaia dukiara ulban, wihka bila kaikaia lâka bri ba mita bara ulbanka nani mita wan maisa nihki ba mita, wan kainara diara briaia ba luki kabia. ⁵ Dawan sika wihka bila kaikaia lâka bara maisa nihkan lâka wanki ba, bamna witin mita hilp mai munbia walka wal sim baku baman luki kaia Kraist Jisas tânka ba kat. ⁶ Baku mika man nani sut kumi baku prais wan Dawan Jisas Kraist Dawan ra bara Jisika ra sin mayuni kama. ⁷ Baku bamna man nani pana pana walkam ba muihkam baku bris sim kraist mita Dawan pranara yawan wan brin ba baku. ⁸ Yang dia aisisna ba lika Kraist balan Ju nani dukia daukaia bara baku Dawan narikan sa witin mita wan damika nani ra pramis daukan ba tnata alkan sa, bara marikisa Dawan ba ai pramiska kat kasak daukisa. ⁹ Kraist sin balan Ju apia uplika nani sin Dawan ra mayunaia ai kupia phni ba mita, ulbanka wi ba baku: " BAHA MITA JU APIA UPLIKA NANI TILARA DIMI MAMYUNAMNI LAWANA NANI SIN MAN NINAM RA AIWANAMNI". ¹⁰ Bara ulbanka wala ra sin wisa: " JU APIA NANI DAWAN UPLIKA NANI BA AIKUKI LILIAM BANHWI BAS". ¹¹ Plis wala ra sin wisa: " JU APIA UPLIKA NANI SUT DAWAN RA MAYUNI BANHS". ¹² Prapit Aisaya sin ulban: " JESE KIAMKA WINA URHWI BAL TAKBIA NISAN NANI PURA WIHTKA AIMAKAIA BAL TAKBIA, BAHA NANI SIN WITIN RA BILA KAIKI KABIA". ¹³ Bamna Dawan bui man nani ra bila kaikaia lâka maiki ba, lilia bara kupia kumi lâka ni mai bila kalkanka sin uya naikbia Spirit Holikira karnika ba mita. ¹⁴ Muihki nani, yang kasak daira walisna, man nani lika kupia yamni lâka bara diara tânka kaikaia lâka ni sin aibanhram palisma bara pana kupiam kraukaia lâka sin brisma. ¹⁵ Sakuna naha wahkataya na wal yang sibrin âpu param pali diara tila nani man nani ra ulbisma amya tiwbia apia ba mata. Naha daukisma Dawan kupia yamni bâk adar aikan ba mita. ¹⁶ Jisas Kraist dukia dadaukra baku Ju apia uplika nani talara wark daukira, Baha warkka ba lika Dawan sturka yamni swaki wan saki ba aisi smalkaia, Ju apia uplika nani ba Dawan ka, prisant kumi baku yaka paim briaia dukiara Spirit Holikira mita holi sakan bamna. ¹⁷ Bamna Kraist Jisas ra kasak lalukra sna ba mita, âiyapah pali Dawan warkka daukisma. ¹⁸ Kraist yang bâk diara daukan ba purara kau pura praki lika aisamna apia, Ju apia uplika nani ba yarka Dawan bila wali daukaia dukiara, Naha na ban tnata kat takan, bila aisi ba baman apia kuna diara dauki ba mita sin. ¹⁹ Wark aihka nani bara sain nani karnika ba ni Dawan Spiritka karnika ba mita sin, Kraist swaki wan saki struka ba baku bara sim baku plis wala nani sutra bara Iliara tasbaya kat sin. ²⁰ Baku sika trai kaikri swaki sakan lâka struka ba smalkaia Krais nina kau walras pliska nani ra, upla wala mita pat playa kum bapan purara utla paskamnara sia. ²¹ Sakuna ulbanka ra wi ba baku: " WITIN AI STURKA WALRAS KAN UPLIKA NANI BA BUI KAIKBIA, BARA BAHA NANI WITIN TANKA PAIN BRIBIA". ²² Naha tâka mita aima manis yang bui man nani mai kaikaia waia lakuna ba ra sip apia takri. ²³ Kuna nunara naha tasbaya sut ra warkki ba sut daukri sa, bara pat mani ailal man nani wal kan ai dauki kan bamna. ²⁴ Yang lukisna Ispail kuntrika ra waia impakamna man nani mai kaikaia bara aikuki lilia aitani bribia ba ningkara man nani yabalki daukma Ispail kuntrika ra waia. ²⁵ Sakuna nanara pali yang lika Jerusalem ra auna bara prisant kumi sin bri auna wan muihni nani bahara banbwi bara yaia. ²⁶ Kan Macedonia wina bara Aicaya uplika nani sin lukan lalah sakaia bara wan muihni umpira nani Jerusalem re bâra banhwi ba nani ra blikaia. ²⁷ Bamna witin nani mapara naha daukaia ba aitani lukata kan witin nani lika baha uplika nani ra tras bri kan yaia. Ju uplika lalukra nani mita Spirit warkka pain baukan ba Ju upia uplika nani aikuki yuri brin bara nanara aitani kan Macedonia bara Aicaya uplika nani Ju lalukra nanu ra wina tara hilpka ba yaia. ²⁸ Baku bamna naha bisniska na sut daukamna bara lalahka na Jersulamen lalukra nani bâra ba mihta ra mangkamna ningkara yang Ispail kuntrika ra wain impakamna bara baha piva ra man nani sin mai kaiki luamna. ²⁹ Man nani ra wamna bara kasak daira walisna, Kraist mita yamni wan muni ba smalkankani ai yamnika ni aibahbia. ³⁰ Muihki nani yan bui man nani ra mamkabisma wan Dawan Jisas Kraist ba tanka bara Spirit wina latwan lâka wanki ba dukiara sin, aiklabanka ra yang wal asla taki kama bara yang maita sin Dawan ra puram sunma. ³¹ Dawan ra puram suni makabi bas, lukras uplika nani Judia ra banhwi ba mihta wina ai dakbi sakbia bara naha prisantka Jerusalem ra wan muihni nani ra brih auna na, baha nani pain luki bribia. ³² Bara baku mika Dawan wantsa kaka, man nani ra liliakira wamna bara, bara mai kaiki ris sin brimna. ³³ Kupia kumi Dawan ba, man nani sut wal kabia. Baku kabia.