¹ Bamna upla kumi kasak lukan laka ra swapni sa kaka, ban tilamra bri bas, sakuna dia ai tanka ba dukiara lika wal aisi blauhpara. ² Tanka kumba lika naku sa: Upla manis ba lukisa witin nani sip sa diara sut ba piaia, kuna wala nani bara sa witin nani ba kasak lukan laka ra swapni sa, bara inmakan nani baman pisa. ³ Bamna ya plun sat sat pi ba mita upla kumi plun tila nani piras sa wisi bahki kulkaia apia sa; bara plun tila nani baman pi uplika ba mita plun sut pi uplika ba laka alsi daukaia apia sa, kan dawan mita baha uplika ba pat ai uplika saki brin sa. ⁴ ¿Man ba ya sma, upla wala dukia dadaukra laka aisi daukisma ba? Ai dawanka sa, witin ba buisa sapa, apia kaka kauhisa sapa. Bara uplika ba yaka pain bui kabia, kan Dawan lika sip sa witin ba yaka pain kaia. ⁵ Tanka wala ba lika naha: Upla tila nani lukisa yu kum ba kau tara sa ya wala ba wal, bara wala nani lukisa yua sut ba lika kumi. Bamna upla kumi bani ba ia kupia lukanka ba kat kaia sa. ⁶ Bamna upla kumi yua kum aihka saki kulki ba lika, Dawan dukiara sa. Bamna ani uplika plun satka sut piba, baha sin Dawan mayunaia dukiara pisa, kan witin mita dawan ra tingki wisa; bara ani uplika sin pluntila nani piras ba, baha sin Dawan mayunaia dukiara piras sa, bara witin mita sin dawan ra tingki wisa. ⁷ Yawan kumi bani ba ai wina kat man dkiara raya apia sa, bara wan dukiara sin pruras sa. ⁸ Baku bamna, yawan raya sakaka, Dawan dukiara raya sa; bara pruisa kaka, baha sin Dawan dukiara pruisa. Baha mita yawan raya kabia kra bara prubia kra, Dawan dukia sika. ⁹ Kan Kraist pruan bara kli sin raya takan, witin lika pruan nani bara raya nani wal Dawanka kaia. ¹⁰ ¿Kuna man, dia muni muihkam laka aisi daukisma ki? ¿Dia muni muihkam ba diara apia baku kulkisma? Yawan sut lika Kraist mawanra buaia sa, witin mita wan laka aisi daukbiara dukiara. ¹¹ Kan ulbanka ba wisa: "Yang rayaki dukiara swer lakisna, Dawan bila, upla bani ai lula krikbia yang maiwanra, bara upla sut param pali aisabia yang na Dawan sna. ¹² Baku bamna, yawan kumi bani wan tanka ba saki dawan ra param wibia. ¹³ Bba mita yawan pana pana wan walka taka aisi daukaia apia sa. sakuna, man nani wilin pali taks muihkam mina batakaia dukia ba daukaia apia, saurka laka ra sin yarka kauhbiara. ¹⁴ Yang kasak daira walisni diara saura kumi sin apu sa; Dawan Jisas ra kasak lukisna ba mita sakuna upla kum lukisa diara kum saura, bara sa witin mapara sika baha ba saura. ¹⁵ Bamna man ani pata pima ba mita muihkam mina batakisa kaka, ba kat lika man latwan laka apu sma tanka marikisma. Baku Bamna, plun sat kum kum piaia want sma ba mita, yarka upla kumi sin tiwbiara, kan baha tawan sin Kraist pruan. ¹⁶ Baha mita, sans yapara dia pain sa wi banhwisma ba tawar ninam ra saura aisaia. ¹⁷ Bamna dawan King aimaki ba laka lika piaia, diaia wal tanka apia sa, sakuna baha lika wan rayaka wapni briaia laka sa, bara kupia kumi laka bara lilia laka Spirit Hulikira bak yawan bri ba tanka sika. ¹⁸ Ya naha natka ra Kraist dukia dauki ba, witin ra Dawan mita pain kaikisa bara upla nani mita sin. ¹⁹ Baku bamna, kupia kumi laka dauki dukia nani ba nina blikpi, baha diara nani wal sip ba, wan walka wal pana pana hilp munaia spirit laka mapara pawaia dukiara. ²⁰ Dia dia pisma ba taka mita, yarka Dawan warka bahki ra tawbiara, plum sut lika klin sa, baha tanka ba param sa; sakuna dia dia pi ba mita upla wala mina batakisa kaka, baha lika saura sa. ²¹ Bamna pain sa yawan wina praia apia, wain sin diaia apia, bara wan muihni mina prukaia dukia kumi sin daukaia apia sa. ²² Kasak lukan laka brisma ba, dawan mawanra man pali mita bri kaia sma. ¡Lilia pali kabia baha uplika tanka tras kaiki bara witin ai kupia ra ai dara walisa patkas sa! ²³ Bamna ya plan kum pisa kaka pain lukras laka ra, witin ban pisa ba mita patkira takisa, ai kupia aiska ni piras bamna, kan diara sut kasat lukan laka wanki ba taka mita wan kupia aiska ni daukras ba, baha lika saurka laka sa.