¹ Upla sut ba wan tasba wihtka nani ra baman kara sa. Kan tasba witka kumi sin apu sa Dawan wina mangkras ba, bara tasba wihtka bara ba Dawan mita mangkan sa. ² Baku bamna, ya tasba wihtka mapara buisa kaka, witin lika Dawan la mangkan ba mapara buisa. Bamna ya tasba wihtka mapara ba, witin patkira takan sa, bara baha mita klala yaia aitani sa. ³ Kan tasba wihtka nani ba diara pain dauki uplika nani ra baura munaia mangkras sa, sakuna saura dauki nani ra lika. ¿Bamna man ba tasba wihtka nani sibrinka apu iwi kaia mai daukisa ki? pain bas, bara tasba wihtka nani ba mita pat ra mai dingkbia apia. ⁴ Kan tasba wihtka nani ba Dawan warkka daukisa man ra yamni mai munaia dukiara. Sakuna man saura daukisma kaka, sibri kaia sma, kan tasba wihtka nani mita patkas lika klala maikbia apia. Witin nani Gad warkka dauki ba mita, Saura dauki nani ra klala yabisa, witin nani briaia praiska ba kat. ⁵ Ba mita, aitani sa tasba wihtka nani ra bawaia. Klala briaia apia dukiara baman luki mita lika apia. Sakuna wan kupia klir lukanka wina baha ba yawan daukaia ba luki. ⁶ Baha tawan sin man nani diara lal mana nani aibapisma ba; kan tasba wihtka nani Dawan warkka daukisa. ⁷ Ya bani ra yabaia sma ba uplika ra yas. Dia lal mana nani aibapaia brisma ba, mahka aibaps; dia dia lal mana kaka. yaura pain kulkaia kaka pain kulks, kulkanka bri ba kulkanka ba yas. ⁸ Bamna upla kumi wal sin tras bribara, sakuna upla wala wal pana pana latwan kaikaia traska ba lika bri basi kan ani uplika mila upla wala ra latwan kaiki ba lika dia dawan laka wan wi ba sut daukan sika. ⁹ Dawan laka nani ba wisa: "Man marit laka sauhkpara, upla ikpara, upla dukia sin tumpara" sakuna naba nani na la bila wala nani sut ba naha bila nani wal asla prakan sa: "Upla wala ba man winam baku latwan kaikma". ¹⁰ Latwan laka bri uplika ba mita witin ai uplika ra sip saura munras sa: baku bamna, latwan laka ni la aiska ba daukaia sip sa. ¹¹ Naha sut tilara, yawan wan piua iwi na tanka luki bas, bamna kaiki bas yapan wina buaia piua rasa. Kan blasi kata ba wal nanara lika swaki wan sakan laka ba kau wan lamara palisa, yawan nan Dawan bila smalkan wali kasak lukan ba wal. ¹² Tihmia ba pat aihkika luan sa bara yu baiwaia baila sa; baha mita tihmia ra daukanka saura nuni ba mahka swiaia sa; bara suldiar kum baku war aiklabaia dukia nani ba buki bri baku, ingni praka ba yawan dimaia sa. ¹³ Kaknara wataukaia ba baku, painkira wataukpi. Yawan bla takbiara, bin dauki plun papira kabiara, taski laka daukbiara, lakas tara baku taukbiara, unsabaia bara misbara laka sin bribiara. ¹⁴ Sakuna, Dawan bisas Kraist ba ni war aiklabaia praka baku dims, bara winam brinka saura nani baman pliki dauki amyapah kaia upla natka kaia lukpara.