1
Baha mita Dawan umpira kaikan laka briba mita, yang nani brih banri, yang nani swapi banras katna.
2
Baha watlika ra yang nani lulki swiri swira laka yabalka wina an yukui tauki ba wina. Yang nani kunin laka ra iuhras katna. Diara kask ba aisisna yang nani tainka ba. Upla sut kupia lukan kara manki swihri Dawan mawan ra.
3
Bara swaki sakan turka yamni ba paran apia sa kaka, baha nani ban tanis tiwiba uplika mapara prakansa.
4
Baha taka ba mita naha tasba dawanka ba mita nakra ba prakansa sinska ba kasak lukras bankra nahki witin nani sip kaikbia apia turi yamni smalkanka ingnika ba Kraaist prana kira ba. Witin lika Dawan lilka pali ba.
5
Yang nani wini tanka ba aisi upla ra smalkras sni, sakuna Jisas Kraist Dawan sa an yang nani lika manan albikamsna Jisas latwanka taka ba mita.
6
Ban sakuna Dawan Witin bui aisan ba: TIHMIA WINA INGNI BAIWBIA WITIN sika wan kupia nani ra ingni baku baiwan, baha lika Dawan Ingnika prana tanka ba wankaia Jisas mawankara.
7
Sakuna yang nani naha diara manakira na sumi nani bilara brisni, bara tanka prima baha karnika aihwa tara ba baha lika Dawan dukia kabia an yang nani wina apia.
8
Yang nani trabilra banwisna natka bani ra, sakuna pat pali lika ai alkras. Yang nani diara daukaia apu kapri, sakuna bila kaikanka apu baku lika apia.
9
Yang nani rau aisaukansa, sakuna ailulki aiswiras, yang nani aibatakan sa sakuna ai iki aitikras sa.
10
Yu bani yang nani brih twilki taukisna Jisas pruanka ba, baha mita Jisas raya kaba yang nani wini tara ra latan sakan kabia.
11
Yang nani raya ban wisnana ban takaskras twilki taukisna wini tara ra Jisas pruanka ba, baha mita Jisas raya kaba upla nani wina tara ra latan sakan kabia.
12
Baku bamna, prura aiwarka daukisa yang nani ra. rayakaya ba man nani ra aiwarka daukisa.
13
Sakuna yang nani sim kasak lukan laka Spiritka brih banwisna dia ulbanka bakat: YANG KASAK LUKRI, BAHA MITA " AISARI" yang nani sin kasak luki banri, an baha mita sin aisi bangwisna.
14
Yang nani nusna Witinka Dawan Jisas ba kli bukan. sakuna yang nani sim Jisas wal aibukbia, yang nani nusna Witin mita wan brih wabia man nani aimawankara.
15
Diara nani sut ba man nani painkam dukia ra, baku natkara naku kupia yamni laka ba upla ailal brin, kau ailal takbia tinki wiaia laka Dawan ra mayunaia.
16
Bahamna yang nani swuapi dring kaurasna, baku mika yang nani wini lata tani mapara aisawi tiwi kaka wini kupi mununta tani lika yua bani raya daukansa.
17
Ban sakuna naha wan trabilka isti minit kumi man dukia ba ridi wan dauki sa prana bankaia ra ba dukia ra kan kau tara wan dauki sa.
18
Ban sakuna yang nani naikra wal kaika ia dukia ba kat kaikrasna, baku apia baha nani dukia wan nakra wal kaikras ba, diara nani wan nakra wal kaikaia sip ba luwi waiki ra, sakuna diara wan nakra wal kaikras ba ban kayara dukia sa.