Ulbi Baiki Sakanka Tara 4
1
Nanara Spirit ba latan wisa, piu tnata ra upla tila ba kasak lukan laka wina tnaya ra tawbia, witin nani ba spirit kuni kira nani baman bila wali daukbia, Baha lika sitan insal ka pirit ka kunin kira wina smalkanka nani bali ba.
2
Bara kunin kira, mawan wal nani bara walbia, baha nani kupia lukras ba sin ayan angkan lapta ba baku sa.
3
Naha uplika nani smalkisa, marit takaia apia bara plun tila nani piaia ba sin saura sa. Sakuna Dawan mita sika naha pata nani na paskan, lalukra nani bara kasak tanka kakaira nani ba witin ra tinki yabi ningkara, pibia dukiara.
4
Diara nani sut Dawan mita paskan ba lika pain baman sa; diara kumi sin yawan saura kulkaia apaia sa, sakuna sut ba Dawan ra tinki wih piaia sa.
5
Kan Dawan bila ba bara wan pura sunra ba mita sin baha ba hulikira daukisa.
6
Naha smalkanka nani na wan muihni nani ra smalkisma kaka, man ba Jisas Krais napakanka pain kama. Bara kasak lukan laka bila nani ba wal baha smalkan ka pain nina blikram ba mita sin man sulkam pata pima.
7
Sakuna tasba uplika sturka tankas nani ba bila walpara. Man winan ba war yabi bas, Dawan ra luki kaia ba dukia ra.
8
Wan wina tara wark taki ba pain sa, sakuna Dawan ra lukikaia ba lika diara sut mapara kau pain sa. Kan baha diara wan kaia pramis wan munisa, tasbara raya iwikaia ba, bara naika raya briaia ba sin.
9
Naha na lika diara kasak palisa, bara upla sut naha kat kasak lukaia sa.
10
Naha dukia tawan sika yawan wark karna takisa, bara upla mita sin saura wan wisa, kan yawan na wan kaina ra diara briaia ba, Dawan rayakira kat brisa, bara witin sika upla sut sasakrika ba, bara kau pali lika kasak luki nani ba.
11
Naha dukia nani na man blikaisma bara tanka nani sin param smalkaisma.
12
Wahmasma bara wisi, upla nani mita yarka maikulkras kabiara, sakuna tankam ba ni lalakra nani ra la yabi bas, bilam aisisma ba wal, taukisma ba wal, latwan laka, kasak lukan laka bara suhnu laka sin.
13
Kan yang balra sna nara, ulbanka nani wina upla sut mawan ra aisikaika ia warka ka dauki ba, bara wan muihni nani ra sin ta baiki smalki bas.
14
Asla takan watla ra almukka nani, Dawan mita witin nani ra ingnika yaban bak, man puram ra ai mihta nani kahbi sins maikan ba, ban alki bri bas.
15
Naha dukia nani ba karna pali dauki bas, bara baku lika upla sut mita kaikbia, man nahki kainam ra auma ba.
16
Man pali winam bakat aman kaiki bas, bara smalkankam ba sin, naha nani ba ban dauki bas, man naha na daukma kaka, winam ba swaki sakma, bara upla nani man ra wali banhwi ba sin baku takbia.