¹ Yan muihki nani man nani ra Spirit uplika baku sip mai aisaras, kuna winara uplika kum baku mai aisam na, tuktan suap kum baku kraist ra. ² Tiala laya ni maidakakri sip wina lika maikras kapri, kan kau wina piaia sip apia katma. An nanara kat sin kau sip apiasma. ³ Man nani kau winara iwisma. Kau man nani tilam ra pana pana lawan, laka barasa baku sin pana pana munsaban bukisma, ¿Kan man nani nuapiasma ki wina ra iwisma ba, an upla nani taukiba baku kau taukisma ma? ⁴ Kan kum bila wisa: yan Pal nina blikisna, wala nani wisa, yan lika apulus, ban kaka winara iwism uplika kum bakusma? ⁵ Ban kaka ya ba Apulus an ya ba Pal, witin nani sika alba nani man nani witin mitilka bak sika kasak lukram, kumi bani Dawan nahki kat warka yaban ba bakat. ⁶ Yan mankri, Apulus dakan, kuna Dawan sika yaban pawan. ⁷ Baku bamna manki ba sapa apia kaka dakiba ba sapa aitani kulkras sa. Sakuna Dawan sika yaban pawi ba. ⁸ Nanara manki ba wihki dahkiba sim sat sa, sakuna kumi bani ba aimana brisa aiwarka tanka bakat. ⁹ Kan yan wal lika Dawan warka uplika bauhwisna, manani lika Dawan naslasma, Dawan mita mai paskan ba. ¹⁰ Dawan tinki ka laka yan ra aikan bakat, smasmalkra kum papaskra ba baku, plamaika ba mankri bara wal nani baha pura ra makisa kuna upla kumi bani ba main kaikayasa nahki maki bakat, ¹¹ Upla kumi sin apusa plamaika wala mankaia witin ka baha Jisas Kraist bui mankras kaka. ¹² Nanara, van kra upla kun utlakum makbia bara plamaika kum mankbia kul ni, silvar ni, walpa klaklaura nani ni, tat ni, diara taia ni, apia kaka dia yuika ni, ¹³ ai warka tanka ba param sakan kabia, kan yu ingnika ba mita param sakan kabia. Kan pauta aswi mitilka bak param sakan kabia. Pauta aswanka mita kumi banira ba pliki sakan kabia ai warka dia daukan tanka nani bakat. ¹⁴ Kum kra warka tanka ba ban kabia kaka, baha uplika ba aima na kum bribia, ¹⁵ Kuna ban kra kum warka ba ami lubia kaka, baha uplika ba aiwarka ba tiubia, bara witin kaba nahki suahkwi takan kabia, nahki sip kabia baha pautika ba wina suahkwaia. ¹⁶ ¿Man na ni nuapiasma ki man ba Dawan timpil kasma ba, bara Dawan Spiritka ba man nani ra iwi ba? ¹⁷ Ya Dawan timpilka ba saukbia kaka, Dawan bui pana sin baha uplika ra sauhki tikan kabia. kan Dawan timpil ka ba hulisa ban kaka man nani sin huli maikulkan sa. ¹⁸ Upla kum sin aiwinara kunin munbia ra, nah yua nani ra upla kum man nani tilam ra uya sinskira luki sa kaka, sis witin ba kli sins apu kum baku kabia, baku lika witin sins laka ba pliki siskira takbia, ¹⁹ Kan nana tasba sinska laka ba Dawan mapara lika bahki sa, kan ulban sa: "KAN WITIN BUI SINSKI RA BARA BLIKI ALKISA AINATKA BAKAT". ²⁰ kli wisa: "KAN DAWAN NU SA UPLA SINSKIRA LUKAN KABA BAHKISA". ²¹ Ban kaka uplikam kum ra uya tara kul kanka yapara ma, kan diara sut ba man nani dukiam sa, ²² ban kra: Pal, apia kaka Apulus, apia kaka Cifas, apaia kaka tas ba na aiska kra, apia kaka raya kaya ba, apaia kaka prura kra, apia kaka nanara dukia nani, apia kaka naika balaia dukia nani kra. ²³ Diara sut ba man nani dukiam sa, kan man nani ba lika krais dukia atiasma an krais ba lika Gad dukia sa.