¹ Nana ra muihki man nani ra kupiam kraukisna, Swaki sakan sturka man nani ra mai smalkatna, baha sika man nani brisatma ba, bara bara ban bapi buisma. ² Naha sin smalkanka mita sika swaki maisakan sa, man nani ba dia mai smalkti bakat daukaia lukisma kaka, bahki pali lika kasak luki banhras ma kaka. ³ Baha bak sakan sturka ba yang pali brisatna ba man nani ra laki maikri: man nani ra mai smalkrisa Kraist ba wan saurka nani tawan pruan, ⁴ witin ka ba bikan kata bara yu yuhmpa ra kli buwan, dia ulbankara aisi ba baku; ⁵ Bara Pita ra latan takan bara Apastil wala nani tuelra ra sin. Bara baha ningkara Apastil wala nani ra sin, baha ningkara sin piuwa ra wan muihni nani 500 sin param takan. ⁶ Bara baha tila wina aihkika ba kau raya sa, bara tila nani pat pruan sin bara sa. ⁷ Baha ninkara Jems ra latan takan, baha wina Apasti sur ra. ⁸ Baha sut ningkara yang ra sin latan takan, yang na tuktan kumk ai piua aimakras kan aisubi takan baku kapri. ⁹ Kan yang na Apastil sut tila ra kau mayara sna, bara Apastil aimankaia sin aitani apia sni, kan yang pali sika Dawan watla ba rausauhki kapri ba. ¹⁰ Sakuna yang diasna ba lika, Dawan bui yang ra aikupia pihni brin ba mita; bara yang wal ai kupia yamni laka brin ba bahki ra tawras sa. sakuna yang sika Apastil nani sut purkara kau wark takri ba; baha ba yang pali lika apia, sakuna Dawan sika ai kupia yamnika laka ni yang wal ba. ¹¹ Baha mita yang katna sapa apaia kaka witin nani kata sapa, yang nani sturi yamni smalki mauhri mara man nani kasak lukram ba. ¹² Sakuna yang nani smalkanki ba, Kraist pruan wia kli buan tanka sa kaka, ¿Dia kan man nani tila wina tila nani wisa, pruan wina kli upla sip buras? ¹³ Bamna pruan wina kli buaia tanka ba apu sa kaka, Kraist sin kli buras sa. ¹⁴ Bara Kraist ba kli buras sa kaka, yang nani smalkisna sturka ba bahki sa, bara man nani kasak lukan laka brisma ba sin bahki sa. ¹⁵ Bara baku sa kaka, yang nani na Dawan witniska kuninkira nani sna, kan smalki bauri sa Dawan mita Kraist ba bukan; bamna pruan wina kli buaia tanka ba kunin sa kaka, ¹⁶ kasak apia sa Dawan mita Kraist ba bukaia. Kan pruan nani ba kli buras kaka Kraist pali sin kli buras kata. ¹⁷ Bara Kraist ba kli buras kan kaka, man nani kasak lukan laka brisma ba bahki sa; bara man nani lika kau ban saurkam nani tilara sma. ¹⁸ Bara baku sa kaka, Kraist ra kasak luki pruan nani ba sin tanis tiwan sa. ¹⁹ Kraist bak wan kaina ra diara briaia luki ba naha tasba ra raya iwi na baman sa kaka, yawan lika upla sut tila wina kau umpirkira nani ba sika. ²⁰ Sakuna Kraist ba lika Pruan nani tila wina buwan sa, pruan nani kli buaia daknika tila wina witin sika ma tawahkia sika ba. ²¹ Kan upla kum taka ba mita prura ba tasba ra balan ba baku, upla kum taka mita pruan nani kli buia tanka ba balan. ²² Adan daukan ba mita upla sut pruan ba, baku sin, Kraist daukan ba mita upla sut raya kabia. ²³ Sakuna kumi bani ai pliska mankan bakat: Kraist ba sut tila ra tahwakia mankan sa, baha ningkara Kraist mita raya daukan nani ba witin balbia ba kat. ²⁴ Bakat lika piuwa ba aimakbia, bara Kraist mita king laka ba Dawan aisa ba mihtara mangkbia. ²⁵ Naha sika witin bui la nani sut ba tanka aiska daukan kabia, karni ka alki bara karnika dauki ba sut purkara. Kan Kraist ba king kaia sa, Dawan mita ai waihla nani sut ai mina nani mununhta ra mangkbia ba kat. ²⁶ Kau lasa waila kum sauhki tikan kabia ba lika prura sika. ²⁷ Kan, "DAWAN DIARA SUT BA KRAIST MINA MUNUNTARA MANKI SWIN SA". sakuna Ulbanka ra wisa: "DIARA SUT BA MANKAN SA", witin karnika mununhta ra mangkan sa, bara latan sa Dawan lika baha tila ra dimras, kan witin sika diara sut ai mina nani mununhtara mangkan bamna. ²⁸ Bara diara sut Kraist mununhtara yang bawan kabia, bara Kraist pali Dawan luhpia ba sin Dawan mununhta ra bawbia, witin diara sut ai mina munhtata yan bawan ba, bara baku Dawan ba king aimakbia upla nani sut purara. ²⁹ Apia kaka, ¿Dia pali daukbia ki baha nani pruan nani mita tahbi daukan ba? pruan nani sika pruan nani tila wina bubia apia sa ¿ban kaka witin nani diamata witin nani ba aitahbi taki sa? ³⁰ ¿Ban kaka diakan yang nani ba piua bani trabil ra sna? ³¹ ¡Piuwa bani prura wal prawisna! Naha na kasak pali sa, man nani ra paran kasak maiwi sni, baku daukisna Jisas Kraist wan Dawan ba nina ra. ³² ¿Dia yang na win takisna ki, upla baku kaikanka kat lika, yang Epesus ra lika daiwan kraskira wal aikla bri, bruan nani ba, pruan nani tila wina bubia apaia kaka? "Yawan na plun pibia bara di bia bara yauhka titan yawan prubia bamna". ³³ Man nani kunin maimunbia ra: "Wan panika saura ba mita wan laka pain nani ba sauhki sa". ³⁴ ¡Sinskira atia bas bara! ¡rayaka wapni kat raya iwi bas!, bara kli sin saura daukpara ma. Kan man nani tilam wina upla kum kum ba Dawan ra kakaira apia sa. Naha na aisisni swiram maiduakbia dukia ra. ³⁵ Sakuna bankra upla kum makabi walbia: ¿Pruan nani ba nahki buwi sa? ¿Wina tara ba dia sat kabia ki? ³⁶ ¡Man nani ba Sinskas! Man tasbara saumuk mangkuma ba ra, Baha ba pruisa dunsa ba raya kaia mata. ³⁷ Mangkisma ba lika wina tara ba kabia apia sika, sakuna baha ba lika sauhmuk ka ba sika, baha ba wina sipsa plawar ma takaia apaia kak diara sat wala takaia. ³⁸ Baha ningkara Dawan mita baha ma ba witin dia wina tara wat bakat yang pawisa; bara ma bani ba sin wina tara ra yang alki sa. ³⁹ Wina tara sut ba sin satka apaia sa, upla nani wina tara ba sat aihka sa, bara, daiwan nani wina ba sat wala sa, tnawira nani wina ba sin sat aihka sa, bara baku sin inska wina nani ba sin sat aihka sa. ⁴⁰ Baku sin kasbrika pura ra wina tara sat aihka nani bara sa, bara tasbara sin wina nani sat aihkas bara sa, sakuna kasbrika pura ra nani mayun ra ba prana aihka sat ka kum sa, wihki tasbara na wal, sat wala sa. ⁴¹ Lapta ingnika prana ba sat wala sa bara kati ingnika prana ba sat wala sa, an slilma nani prana ingnika ba sin sat wala sa. Bara slilma nani tilara sin ingnika sat sat bara sa. ⁴² Pruan nani kli buaia ba sin baku sa, sukuaia dulkia kum tasbara biki sa, bara kli pruras dukia kum bui sa. ⁴³ Upla mita saura kulki diara kum biki sa, bara prana kira dukia kum buisa, diara kum swapniki ra kum bikisa bara diara karnakira kum buisa. ⁴⁴ Spirit apu wina tara kum bikisa, bara Spirit bri wina tara kum vbui sa, Spirit apu wina tara bara sa kak, Spirit bri wina tara sin bara sa. ⁴⁵ Baku bamna ulbankara wisa: "PAS UPLA ADAM BA RAYA KA BRI UPLIKA KUM BRI TA KAN". Sakuna Adam wala ba lika rayaka yabi Spiritka sa. ⁴⁶ Spirit ba taura balras kata sakuna Spirit apu ba taura sa ninkara Spirit dukia ba balan sika. ⁴⁷ Pas upla ba tasba sika kan, tasba yuia wal paskan kan, sakuna waitna wala ba lika kabrika pura wina balan sika, ⁴⁸ Baku bamna tasba uplika nani ba lika baha uplika tasba ni paskan kata ba baku sa, bara kasbrika purara uplika nani ba lika witinka kasbrika purara ba wina ba wal baku sa. ⁴⁹ Yawan nana ra baha uplika tasba ni paskan kata ba wan talia ba baku naika piua sin witin ka kasbrika purara ba wal sin wan talia kabia. ⁵⁰ Muihki nani nanara naha na maiwisni, wina bara tala ba wal sip Dawan kinka aimaki bara sip aidukia bribia apia, kan ani dukia aisawi ba sip bankaia dukiara aidukia briras sa. ⁵¹ ¡Sakuna! dahra prakan kum na wals: Yawan sut lika prubia apia sakuna sut aihka wan lakan kabia. ⁵² Wan nakra klipan kumi ba baku, yawan ba sat wala takan kabia, bara las trumpit ba inbia, pruan nani ba bukan kabia bara kli prubia apia. ⁵³ Kan yawan ra prui dukia ba, ban kaia pruras dukia ba ni ai kwalka baku dimaia sa, Bara wan wina tara prui na, bankaia ra pruras dukia ba ni ai kwalka baku dimaia sa. ⁵⁴ Bara yawan wan iwan kara saura ra kira tanka ba, sip kli saura daukras laka ba bribia. Yawan wan wina pruaia laka briba sip kli pruras ra tawbia kaka, baku mika aimakan kabia Ulbankara dia ulbi swin ba: "PRURA BA SAUHKI TIKAN SA PURA LUWANKA BA MITA". ⁵⁵ "¿PRURA PURA LUWAIA KARNIKA BRIKATMA BA ANIRA SA? ¿PRURA YANG NANI SAIRKA PASKAIA KARNIKA ANIRA SAKI?" ⁵⁶ Saurka mita sika prura yawan ra wan sarka paskaia aikarnika yabi ba, bara la almuk ba mita saurkara baha karnika yabisa. ⁵⁷ Sakuna Dawan ra tomki pali yabisa kan witinka wan Dawan Jisas Kraist mitilka bak pura luwanka wanki ba. ⁵⁸ Baku bamna muihki laitwankira nani ban bapi bara pirwras kira banhwi bas, piu bani Dawan warka ba kau ban dauki bas, kan man nani kaikisma Dawan wal asla wark daukisma ba lika bahki apia sa.