¹ Bara nana lika aisisna, kristian prisant nani saki blikaia ba dukia ra, yang mai wisni sim pali Galesha church nani ra wisatna ba baku man nani sin dauks, ² Wik bani yu pas pali ra, man nani kumi bani lalah wiria tnaya ra laki an suni bribas, kumi bani dia sipsma bakat. naha na dauks bara baku lika yang wamna taim man nani lalah pliki taukma apia. ³ Bara yang wamna taim ani uplika man nani mita bak sakma ba, baha nani mihta ra wauhkataya nani mangki, yang pali bui Jerusalem ra blikamna, bara baku lika man nani prisankam ba, wan muihni bahara nani ba ra witin nani mita bri si yabia. ⁴ Bara baku sin aitani pali kabia kaka yang palina sin witin nani wal wamna. ⁵ Yang man nani ra balam ni Macedonia bak luwi wamna taim. Kan Macedonia bak luwaisna, ⁶ Baku ban sin lukisna na man nani wal takaskaia li pihwa ba ra sin, bara baku lika man nani sip kama impakinki ra hilp aimunaia, ani ra yang waisna ba sut ra. ⁷ Kan uya brinki apia sa man nani ra piu kunku baman maikaiki si waia, baha mita bila aiwaki bas man nani wal taim wira kum takaski wamna, Dawan baku wibia kaka. ⁸ Sakuna yang Epesus ra takaskamna pentekus yua nani ba kat. ⁹ Baha ra yang maipara sans tara pain kum bara sa, Dawan warkka pain pali daukaia dukiara bara upla ailal baha mapara manhwi ba bara sa. ¹⁰ Bara nana ra Timoti balbia taim, man nani traikaiki witin ba man nani tilam ra liliam bris, kan witin ka ba Dawan warka dauki sa, yawal baku. baha mita man nani wina kumi sin witin ra bahki kulkbiara. ¹¹ Sakuna witin ba hilp muns, ai impakanka ra ai kupia kumi laka wal ban yang ra balbia, kan witin wan muihni wala wal balbia ba. ¹² Yang bila kaikisna, bara wan muihni Apolos ra kasak makabi kapri, wan muihni nani aikuki man nani ra bal mai kaikbia, sakuna nanara lika balaia apia win sakuna witin sans kum bribia tain man nani ra balbia. ¹³ Aihwaki bas, bara kasak lukan laka ra ban bapi bui banhwi bas. waitna bas. Karna kira bas. ¹⁴ Dia dia dauki kama ba latwan laka wal dauki bas. ¹⁵ Man nani pain pali nusma Estefanas watla bila uplika nani ba, kan witin nani sika Acaya tabaya ra pas upla nani Kristian takan ba, bara witin nani aiwina aiska ni Dawan uplika nani dukia dauki sa. ¹⁶ Bamna yang want sna, man nani sin bahmuna uplika nani ra bawi kulki kama, bara ani uplika nani witin nani wal wark taki upla ra hilp muni nani bara sin. ¹⁷ Estefanas, Fortunato bara Acaico sin yang ra balan ba mita, lilia sni; man nani apu kapram mita, witin nani wamtlika ra aimakan. ¹⁸ Witin nani ba yang ra Spirit mapara maisi nihkan sa, man nani maisam nihkan ba baku. baha sat uplika ba pain pali kulki bas. ¹⁹ Asia tasbaya Church ka, man nani ra ailakula maibliki sa. Aquila bara Prisila wal, bara witin watla ra daknika asla taki ba mita sin, Kristian lakula uya maibliki sa. ²⁰ Wan muihni sut mita lakula bliki sa panapan lamkula wi bas, kiawalan hulikira ni. ²¹ Yang Pal, mihti pali ni naha lakula ulbi mai blikuna. ²² Ani uplika Dawan Jisas Kraist ra latwan kaikras kaka, witin ba lahtubankabia.! ²³ Wan Dawan ka bal! Dawan Jisas Kraist mita man nani ra yamni mai munbia. ²⁴ Man nani sut ra Kraist Jisas ra Latwanka ba mai blikuna.