¹ Bara traikaiki bas latwan laka brikaia, bara brinka pali sin bribas Spirit talan ka nani ba brikaia, kau pali ba lika man nani Dawan wina sturi bri aiwitniska aisaia sipsma nanis ma ba. ² Kan twisa sat sat aisi ba lika upla nani dukia ra aisaras sakuna Dawan ra aisisa. Kan upla kumi sin witin dia aisi ba sip tanka bribia apia, kan baha ba lika diara yukuan ra ba Spirit ra aisi sa. ³ Sakuna Dawan wina sturi nani brih aisi uplika ba, upla wala nani aisi sa, witin nani ra Spirit tanka ra yaka pawaia dukia ra, ta baikaia bara maisanikaia sin. ⁴ Bara twisa sat sat aisi uplika ba lika, witin silp baman Spirit tanka ra pawi sa. Sakuna Dawan wina sturi nani brih aisi ba lika Chuts uplika nani ra Spirit tanka ra yaban pawi sa. ⁵ Nana ra lika yang brinki pali sa man nani sut ba bila sat aihka aisika ma, sakuna ba sut ba purka ra kau brinki pali ba lika Dawan wina sturi nani brih aisaia ba. Ani uplika Dawan wina sturi nani yaban aisi ba lika kau pain sa, bila sat aihka aisaia ba wal, sakuna tila wina ban bila wala ba wina laki bila wala ra aisabia lika asla takan watla ba aitanka brinkabia. ⁶ Sakuna nana ra muihki nani yang man nani bankra balamna bila wala aisi, dia hilp ka brima ki. Sip hilp brima api, sakuna bankra Dawan mita diara kum yawan kaikbia dukia ra maiaisamna kaka lika, diara tanka kaikanka kum maiwisna kaka, apia kaka Dawan wina sturi kum brih aisuna kaka apia kaka smalkanka kum wal kaka lika sipsa. ⁷ Muisik pulaia dukia nani, plut apia kaka arp, binka sat nani dauki sa kaka, witin nani ba binka sat sat nani sip kanbra sa, ¿kan upla kum sip kabia ki tanka briaia plut apia kaka arp sapa binka sat sat wal kanbia kaka? ⁸ Trumpit bakat sin binka ba latan kanbras sa kaka suldadu kumi sin aikabaia sip ridi takbia apia witin war ra waia. ⁹ Baku sa man nani wal sin. twisam ni tankam briia bakat aisaras ma kaka, nahki upla ba walbia dia aisis ma sapa, ban aisi bahwi kama sakuna upla lika man nani ra sip tanka bribia apia. ¹⁰ Latan sa naha tasbara bila sat ailal nara sa, bara kasak pali sut ba aitanka brisa. ¹¹ Sakuna upla kum aibila ra aisi ba yang tanka briras na kaka, uplika ba mapara tringsar kum baku kamna, bara pana sin uplika ba, yang maipara witin tringsar kum baku kabia. ¹² Baku sin man nani wal: man nani Spirit tanka mapara man nani sins nani brin pali maidauki ba, kau pali traikaiki briaias ma, baku lika aitani kat church uplika nani ra yabrika pawbia. ¹³ Baku bamna ani uplika bila sat aihka aisi ba Dawan ra, kasak pali aipura suni makabaia sa baha bila aisi ba tanka param sakaia karnika yabia. ¹⁴ Kan yang na bila sat aihka kum ra puri sunisna kaka, kasak pali Spiritki ba lika aipura sauni sa, sakuna kupi lukra ba lika baha wina hilp kumi sin briras sa. ¹⁵ Ban kaka yang dia daukaiasna ki? Spiritki ni puri sunaia sna, bara baha ni baman apia, sakuna kupi lukra ni sin, Spiritki ni lawana nani aiwanaia sna, bara baha ni baman apia, sakuna kupi lukra ni sin. ¹⁶ Kan man ba Spiritkam ni baman Dawan ra mayun ra yabisma kaka, ¿Upla kum baha wali ba, nahki sip kabia "baku sa" maiwibia, bara tinkikam pura sunra bara man wal sip asla takbia apia, kan dia asisi ma ba witin tanka briras sa? ¹⁷ Tinkikam pura sun ra ba uya painkaia sip sa man nani mampara, sakuna uplikam wala ba Spirit mapara sip pawras. ¹⁸ Baha mita yang bui Dawa ra tinki wisna man nani purkamra bila sat sat aihka aisaia sipsna ba. ¹⁹ Sakuna prias dauki bara kau watsna, upla tanka briaia sip kaka bila matsip aisaia, upla wala nani ra sinm smalkaia dukia ra bila sat aihka ni bila 10,000 aisaia watlika ra. ²⁰ Muihki nani, tuktan sirpi nani baku luki kapara, saura daukaia ba mapara lika tuktan nani baku bas, sakuna lukan kam ba mapara lika upla almuk baku bas. ²¹ La wauhkataya ra naku ulban sa: "NAHA NISANKA RA BILA AIHKA NANI AN UPLA TRINGSAR BILA BAK SIN AI SAMNA. SAKUNA BAKU KABIA SIN WITIN NANI BILI WALBIA APIA". Dawan baku wisa. ²² Baku bamna bila sat aihka nani aisaia sinska ba lalukra apia ba mapara sain kum sa, sakuna lalukra nani ba mapa ra lika baku apia sa. sakuna Dawan wina sturi nani brih aisaia sinska ba lalukra nani mapa ra sain kum sa, lukras nani ra lika baku apia sika. ²³ Baku bamna church uplika aiska ba asla takan bara kumi bani bila sat aihka aisisa kaka, bara lan apu uplika tila nani lalukra apia nani bal dimuya kaka, ¿Aisi banhbia apiaki man nani ba lamla saura takan sa? ²⁴ Bara man nani sut ba Dawan sturka ba aisisma bara man nani tilam ra upla lukras kum apia kaka aut uplika kum dimbia kaka, ban witin aitanka pain bribia lukisma ki, dia witin man nani wina waluia bara. Witinka ba aisi laka daukankabia man nani dia wisma bakat. ²⁵ Bara aikupia ra dia yukuki ba sut ba param sakan kabia, baha tanka brin ba mita, witin ba aimawan ra kahwi ailula kriki Dawan ra mayunbia sika, bara witin kaba param pali aisabia Dawan ba rait pali kasak man nani tilara sa. ²⁶ ¿Bamna, muihki nani tanka na naku sa? Asla takisma bara upla kum ba lawana nani pura sunra nani ba brisa, wala ba smalkanka nani, wala ba Dawan wina diara kum param saki madikan ba, wala ba bila tringsar nani ra sturi yamni kum aisaia. Man nani ba diara sut daukaiasma bara baku lika asla takan watla uplika nani bara yaka pawaia sa. ²⁷ upla kum bila sat aihkara nani aisaia kaka, upla wal apia kaka yumhpa baman aisaia sip sa, bara kumi kumi ra aisaia sa, bara tila nani aisi ba upla wala kum mita bila wala ra tanka param aisaia sa. ²⁸ Sakuna baha tila ra upla kumi sin sip tanka ba param aisaia sip apu sa kaka, kau kanra yamni kabia asla takuia bara upla kumi sin diara aisaras kabia, bara kumi bani aikupia wal aisabia bara Dawan ra sin. ²⁹ Baku sin Dawan wina sturi nani brih aisaia kaka, upla wal apia kaka yumhpa aisabia, bara wala nani lika dia aisiba tanka pliki kaiki kabia. ³⁰ Sakuna Dawan mita upla wala kum tilara iwi bara diara kum saki madikuia kaka, pas uplika kata sap pali takaia sa. ³¹ Bamna baku man nani sut Dawan wina sturi nabni brisma ba, sipsma kumi kumi ra aisaia, bara baku lika sut lan takbia, bara aimaisa nikan kabia. ³² Dawan wina sturi nani brih aisi nani ba ai Spiritka nani ba yaka bawaia sa. ³³ Kan Dawan ba kupia kumi Dawan ka sa, tanis sturban laka Dawanka lika apia. Naha na sika asla takanka sut ra la baku swinsa. ³⁶ Mairin nani ba church ra sap pali kaia sa, kan witin nani ra lika aisiaia aitani kulkras sa, kiama lihni nani kaia sa, Muisis laka wi ba baku. ³⁴ Witin nani diara kum lantakan dauki sa kaka, utlara waka aimaia waina ra makabi walbia, kan mairin kum uya aitani apia sa church ra aisaia ba. Pain damra walaias ma ³⁵ ¿Dawan bila ba man nani wina takrikras? ¿Bara baku sin man nani baman pliki briram apia? ³⁷ Bara man nani tilam ra ban kra upla kum silp Dawan sturka aisasara apia kaka, Spirit mita yaban brisa baku aidahra walisa kaka, aitani luki kulkaia sa, dia man nani ra ulbisna na Dawan laka bila sa. ³⁸ Sakuna aitani luki kulkras sa kaka, pana sin witin ra aitani luki kulkaia apia sa. ³⁹ Baku bamna muihki nani traikaiki bas, Dawan wina sturi nani brih aisaia sip takaia, bara baku sin bila sat aihka ra aisaia, baku dauki bas takaskras kira. ⁴⁰ Bara diara sut ba pain laka bara wapni laka ni dauki kama.