Ulbi Baiki Sakanka Tara 13
1
Baku yang sin upla nani bila aisisni bara insal nani bila sin, sakuna, latwan laka apusna kaka lika, aisinki ba lika sin pali trum kum prukan kli kli bin tara dauki ba baku sa, Apia kaka, pantaia kum bin dauki ba baku sa.
2
Ban wibia kaka Dawan bila dahra nani ba aisaia sip kamna kra, dahra prakan tanka nani ba sut kakaira kamna kra, bara baku sin sins laka sat sat brikamna kra, il nani ba ai pliska wina kitbi sakaia kasak lukan laka ba wal aitani kat brikamna kra, sakuna latwan laka apusna kaka, yang lika bahki palisni.
3
Bara baku sin dia brisna ba upla nani ra yuamna kra, bara wini tara pali na sin angkbia wisi yabamna kra, sakuna latwan laka apusna kaka, baha sut ba bahki baman sa.
4
Latwan laka bri uplika ba wihka bila kaiki sa, bara upla yamni kira sa.
5
Latwan laka ba tatumra apia sa, aimayun ra apia sa, bara kakalra apia sa. Ai natka nani ba saura apia sa bara silp baman aidukia ra man sin plikras, aikupia babaikra apia sa bara upla ra lawi baman sin taukras.
6
Diara kasak apia nani dukia ra witin lilia takras, sakuna kasak tanka ba dukia ra lika lilia taki sa.
7
Latwan laka ba diara sut ba twilki sa, bara diara sut ba dukia ra kasak luki sa. Diara sut ba aikaina ra bila kaiki sa.
8
Latwan laka ba dantakras sa, sakuna Dawan wina bila nani bri aisan nani ba lika dan takan kabia, twisa aisanka nani ba sin dan takan kabia, bara diara tanka kaikaia ba sin dan takan kabia.
9
Kan yawan diara tanka kaiki ba wiria baman sa, bara Dawan bila dahra aisi ba sin wiria baman sa.
10
Sakuna kasak kira ba balbia bara wiria baman ba lap tiwbia.
11
Yang tuktan kapri piuwa ra, tuktan baku aisi katna, tuktan baku sin daihra wali katna, bara tuktan baku sin luki katna, sakuna almuk takri na ra, tuktan laka nani ba mahka swiri,
12
Baha sin natka ra nana ra yawan diara nani kaiki ba lika sim pali lukinglas kum ra kaiki ba baku sin lilka tihmu ba baku sa, sakuna baha piwa ra yawan pana pana wan mawan ba kaikbia. nanara lika yang wiria baman kaiki na , sakuna baha piua ra lika aiska pali kaikam na.
13
Sakuna nana ra lika diara yumhpa kum ban kaia ra bara sa: kasak lukan laka ba , wan kaina ra dia bila kaikaia laka ba, bara latwan laka ba sin, sakuna yumhpika wina kau tara ba lika latwan laka.