¹ Ja̧hua̧nö̧ jö̧ttö̧mä̧, ucu, ttö̧ja̧sa̧ i̧tti̧, ttä 'cähuiyä'che 'cuittähua pä'ö jä̧i̧nö̧'a̧nö̧ so̧a̧'chu curä'chu 'chu'ädi, jahuä'chu nahuä'chunä cuhuo'che cuä 'cähuiyä'che'inä 'cui'ähui, ja̧hua̧nö̧ 'cuiu'ähui̧'ö̧'ca̧ ö̧a̧mȩca̧ rö̧nö̧ topu 'ca̧'ȩpi̧. ² Ocuränä 'cujui cuhu'che 'ca̧cuȩpä̧jo̧mȩttö̧ ya'ate ötahuiyä kä'co jo̧mȩ ji̧yȩnö̧ mo̧ro̧ pätecuächomejubu, ja̧hua̧ta̧'a̧nö̧ cuhuo'che 'cui'ö röti ötahuiyä jäyänä. Ja̧u̧nu̧ o'ca'a ki̧'i̧pä'chemä ju'tojucu icui isoppa coepächa, ja̧u̧nu̧ o'ca'a TTÖ rä̧dȩpä̧cua̧sä̧ curä'chu jahuätörö ro̧dȩpa̧ pä'ö. ³ Ja̧hua̧nö̧ ja̧'a̧nä̧ ttuhuo'che a̧'u̧cu̧nä̧ ȩmö̧ cu̧'ca̧tähuäppinä ti̧'a̧dö̧ rö̧nä̧hui̧. ⁴ Ja̧u̧nu̧ o'ca'a ttuhuo'chettö rö̧ä̧nä̧nö̧ ȩmö̧ ocurä kä'co cuoönä icui; Juorötä ocurämä yoähuäcua'a Israel ttö̧ja̧ ttö̧jo̧mȩcu̧." ⁵ TU̧RU̧HUA̧ TÖ̧Ä̧NÄ̧HUA̧MÄ̧ pa̧'a̧nö̧ pä̧'ö̧: "Ruhuäcuiyä pa̧ja̧cu̧nä̧ kä'co jo̧mȩmä̧ Pȩnȩtä̧ ja̧'a̧ Jerusalenmä, TTÖ pätetö chu̧ju̧ni̧no̧mȩmä̧, juȩnȩtä̧ ja̧'a̧ korotö tti̧rȩjä̧ sobucuächöna pädinomemä. ⁶ Ja̧hua̧nö̧ ja̧'a̧nä̧ jahuätömä kö'cocotö ja̧'a̧ jȩcu̧'ä̧tu̧cua̧ pädinö'inä ruhuäcuiyä pa̧ja̧cu̧nä̧ ttöarodö'anötä̧ jarodätö, jȩcu̧'ä̧tu̧cua̧ pädinö'inä jȩpo̧co̧tö̧ ppeyanä ka̧cuä̧tö̧ jö̧ta̧'a̧nö̧. Ttö̧ja̧mä̧ kö'cocotö jȩchä̧cua̧sä̧ pädinö'inä ja̧hua̧nö̧ ja̧'a̧ttö̧ pädinöta'anömä 'cho̧co̧tö̧." ⁷ Ja̧hua̧nö̧ ja̧'a̧ttö̧ TU̧RU̧HUA̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: "Ucumä ruhuäcuiyä pa̧ja̧cuä̧nö̧ttö̧'i̧nä̧ abonänö surojönä jȩpä̧ju̧ja̧ jcu̧'a̧ pädinöta'anömä jȩpo̧co̧ju̧jä̧, cuippeyanä ka̧cuä̧tu̧cu̧'i̧nä̧ esecu kä̧hui̧ pädinö'inä jȩpo̧co̧ju̧jä̧," ⁸ ja̧hua̧nö̧ ja̧'a̧ttö̧ TU̧RU̧HUA̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: "Topi, TTötä ja̧'a̧ ro̧dȩpä̧cua̧mä̧ ucuturu. TTö ro̧dȩpä̧cua̧sä̧ u̧cu̧ jacuanä pi̧jä̧ o'cajuiyönä totta pä'ö. ⁹ TTö yȩchä̧cua̧jä̧ jȩcho̧co̧jä̧'i̧jö̧ ja̧hua̧nö̧mä̧ pa'ajita'anömä jȩpo̧'cö̧ chä̧cua̧sä̧, pi̧jä̧ pa̧ja̧vcu̧nä̧ ro̧ttȩpö̧'a̧nö̧ ja̧'a̧nä̧'i̧nä̧. ¹⁰ Ja̧hua̧nö̧ ja̧'a̧ttö̧, ttä̧'o̧tö̧mä̧ tti̧tti̧mö̧rö̧ ttucuäcuotö ucu cuä'cajo̧mȩttö̧, ja̧hua̧ta̧'a̧nö̧ tti̧tti̧mä̧'i̧nä̧ ttä̧'ö̧tö̧rö̧ ttucuäcuotö, TTötä ja̧'a̧ ucunä ro̧dȩpä̧cua̧mä̧ ja̧hua̧nö̧tä̧ o'cajuiyönä pperettö chi̧cuä̧cua̧sä̧ ucuttu ka̧cui̧pä̧tö̧rö̧mä̧. ¹¹ Ja̧hua̧nö̧ ja̧'a̧nä̧, ji̧nä̧ cha̧'cua̧rä̧i̧mä̧, pa̧'a̧nö̧tä̧ pä'ö TU̧RU̧HUA̧ TÖ̧Ä̧NÄ̧HUA̧MÄ̧, isopäi'önäta̧ ucu ja̧'a̧ ja̧hua̧nö̧ ni̧yȩtö̧ icuäjumä surojö juiyönä jo̧mȩttö̧ a̧u̧tu̧ ichäjumä ucunätä̧ ka̧'a̧ jarodäcuähuämä, ja̧hua̧nö̧ ja̧'a̧ttä̧ TTötä ja̧'a̧ hui̧'ä̧mä̧ chi̧cuä̧cua̧mä̧ ucuturu; TTÖmä rejuiyönätä tochä̧cua̧sä̧ ucurumä, ja̧hua̧nö̧ ja̧'a̧ttö̧ TTÖmä ja̧'a̧tä̧mä̧ tochöjuiyä̧cua̧jä̧. ¹² Ucucu ka̧cua̧tö̧ttö̧mä̧ ju'totö hua'ö tticuäcuotö isotö ttu̧cui̧'ä̧u̧, jahuätömö ppa'i pä̧nä̧ päi'omenä ttucui'äcuotö cu̧'cä̧tȩttö̧. Korotömä ucuru sobutö curä'chuttu totte'äcuotö. Ja̧u̧nu̧ o'ca'a, TTötä pperetö chi̧cuä̧cua̧sä̧ pa̧hua̧rö̧jo̧mȩ tti̧'chö̧nä̧, chucurä'chu rä'epö jahuätörö'inä tto'ca'anä ru̧dä̧r'cua̧sa̧. ¹³ Ja̧u̧nu̧tä̧, chö̧'ä̧i̧mä̧ yorätehuächi'äcua'a, TTÖtä jȩchä̧cua̧sa̧ chö̧'ä̧i̧ jahuätörö maö̧nä̧. Ja̧u̧nu̧tä̧ chesehuä̧cua̧sa̧, jahuätömä ja̧u̧nu̧tä̧ ttu̧huo̧jua̧chi̧'ä̧cuo̧ttö̧ TTÖ̧, TTU̧RU̧HUA̧, chö̧'ä̧i̧cu̧ chucuocuäjimä jahuätönä jo̧mȩnö̧ pätecuächa'a. ¹⁴ TTötä jȩchä̧cua̧jä̧ cusuräunä ja̧hua̧ta̧'a̧nä̧ ucuru ttöjö'cö juiyönä tottäcuotö pi̧jä̧ pa̧ja̧cu̧nä̧ ka̧cuä̧tö̧mä̧ o'catoi'önä tottäcuotö ucu 'cuäcuopömä. ¹⁵ Ja̧hua̧nö̧ ja̧'a̧ttö̧. Jerusalenmä ro̧ȩcua̧ttö̧ pärohuächa'a topö ya̧ttä̧hua̧'chä̧cuo̧tö̧, o'cajuiyönä pi̧jä̧ pa̧ja̧cu̧nä̧ ka̧cuä̧tö̧rö̧ jiäcuähuia'a ye'ecunu ttö̧jo̧cua̧ pä'ö. ¡Tö ja̧'a̧ pä̧i̧cu̧nä̧ ucuru ro̧dȩpä̧cua̧mä̧ chö̧'ä̧i̧cu̧, ro̧dȩpa̧'a̧ topö ttu̧ttȩpä̧rä̧chi̧'ö̧nä̧. ¡TTö, CU̧RU̧HUA̧TU̧CU̧MÄ̧ pa̧'a̧nö̧ pä'ösä! ¹⁶ Ttötä huȩdä̧cua̧sä̧ ucuru ppä'i rä̧bȩu̧nä̧ ja̧hua̧nö̧tä̧ ucuru pärotö icu si'epö chi̧cuä̧cua̧sä̧. Ja̧hua̧nä̧ ja̧'a̧ttö̧, ppä'i rö'änä räbeunä jechäcuajä cu̧cuä̧ttö̧'i̧nä̧ 'to'opö icu. ¹⁷ Ppä'i ttuttunä huȩdä̧cua̧sä̧ ttusurähuäcuottö ucuru pä'ä'chö, ja̧hua̧nö̧ ja̧'a̧ttö̧, ucuma cu̧jä̧cua̧jä̧ cui̧tti̧mu̧'i̧nä̧ to'ötä. Isotöttö'inä ja̧hua̧ta̧'a̧nö̧ ttucuoja'inä ucunätä 'cuäopäcua'a, ja̧hua̧nö̧tä̧ Ttötä curä'chucu chi̧chä̧cua̧jä̧. TTö CU̧RU̧HUA̧TU̧CU̧MÄ̧ ja̧hua̧nö̧tä̧ jä̧cua̧'a̧ pä'ösä."