¹ TÖ̧Ä̧NÄ̧HUA̧ ttönä ucuocumä pä'inö: ² "Ttö̧ja̧sa̧ i̧tti̧, topi ra̧huä̧rö̧nö̧ Israel ttö̧ja̧ tti̧rȩjä̧ mö̧ä̧'cara̧'a̧cu̧ ja̧'hua̧nö̧ topö 'cuä̧o̧pä̧cuȩ ji'ähui. ³ Pa̧'a̧nö̧: ¡Israel ttö̧ja̧ mö̧ä̧'canä ka̧cuä̧tö̧ TÖ̧Ä̧NÄ̧HUA̧ Dios ucuocu ä̧ju̧cuä̧tu̧cui̧! TÖ̧Ä̧NÄ̧HUA̧MÄ̧ pa̧'a̧nö̧ pä'ö möä'quiyurö'inä, po̧ri̧yä̧'tä̧ päi'ome'inä, aje i̧sä̧rä̧ ro̧jo̧mȩ'inä ja̧'hua̧ta̧'a̧nö̧ pämäroppä päi'ome'inä: ¡Topätucui! Ucuturu curä i'cächösä ja̧'hua̧nö̧ ja̧'a̧ttö̧ ju'tojö jo̧mȩ pö̧nä̧mä̧ si'epö chicuä̧cua̧sä̧. ⁴ Ja̧'hua̧nö̧ ja̧'a̧ isotörö ku icu cuiyä'ijätucuomemä pparö icuähuäcua'a ja̧'hua̧ta̧'a̧nö̧ a̧'cua̧juä̧ o'ca'inä pparopö icuähuäcua'a juhua'atäcu cu̧ä̧nä̧hua̧tu̧cu̧ o'ca ä'ca jo̧mȩttö̧ cuahuaruhuä hua'inä̧tö̧rö̧mä̧ dochäu chi̧cuä̧cua̧sä̧. ⁵ Ttömä cu̧ä̧nä̧hua̧tu̧cu̧ o'ca ä'ca jo̧mȩ Israel ttö̧ja̧ttö̧ tto'co jähuä chutäcua̧sä̧ ja̧'hua̧nö̧ rutu ttihue'quiyumä isotörö kuhuähuä o'ca jäyänä chutä'chäcua̧sä̧. ⁶ Cu̧jä̧tu̧cuo̧mȩ pö̧nä̧mä̧, ötahuiyämä pparopö icuähuäcua'a ja̧'hua̧ta̧'a̧nö̧ ju'toju jo̧mȩ pö̧nä̧'inä si'epä'chö icuähuäcua'a, pa̧'a̧nö̧tä̧ isotörö ku icu iyähuome pönämä pparopö si'epö icuähuäcua'a. Ja̧'hua̧nö̧ ja̧'a̧ ja̧u̧ o'camä dörö icu si'epö icuähuäcua'a, cu̧ä̧nä̧hua̧tu̧cu̧ o'camä kä'conä 'torö icu ja̧'hua̧ta̧'a̧nö̧ cuaditähuätucumä si'epö icuähuäcua'a. ⁷ 'Coru juo'ächätömä cu̧'cä̧tȩtu̧cu̧nä̧ ttattähuäcuotö ja̧'hua̧nö̧ jo̧mȩ TTÖ̧Ä̧NÄ̧HUA̧MÄ̧ ujuru ku̧nä̧rö̧ päjimä jȩä̧cua̧ pä'ö cu̧huo̧juä̧tu̧cuä̧cua̧'a̧nö̧. ⁸ Ja̧'hua̧nö̧ ja̧'a̧nä̧ ucututtö ka̧cui̧pä̧tö̧rö̧mä̧ adiutä tta̧dä̧rä̧cua̧sä̧, ja̧'hua̧ta̧'a̧nö̧ curä tturohuähuomenä yotucunä̧mä̧ cu̧'cä̧tȩtu̧cu̧ttö̧ döttecuächäcuotö, ucutu koto ttidepiyu pönä cuipperecuächätucuomenämä. ⁹ Ja̧u̧nu̧ o'ca'amä jitö dö'ecuächäjätömä Ttörö ttamöcuädäcuotö, korojä̧ra̧'a̧ ȩpö̧ tticuinäu kä̧nö̧mä̧, Ttömä cha̧'cua̧ tta̧dȩcuä̧cua̧sä̧ todärenä amöcuädö Ttöttö 'cä̧tti̧pä̧chi̧no̧mȩnä̧, ja̧'hua̧ta̧'a̧nö̧ tätähuä o'ca ucuo te'äu jȩtti̧no̧mȩnä̧. Ja̧u̧nu̧ o'ca'a jahuätömä tti'ämä i̧jȩcuä̧cua̧'a̧ o'cajuiyönä su̧ro̧tä̧cuä̧huä̧ surojö jȩtta̧'a̧ ttöjö'cocötä. ¹⁰ Ja̧'hua̧nö̧tä̧ Ttömä TTÖ̧Ä̧NÄ̧HUA̧ ja̧'a̧ pä'ö ttu̧huo̧juä̧cua̧sä̧. Pi̧yȩmä pa̧'a̧nö jo̧mȩttö̧ surojömä jahuätörö chi̧'cä̧chä̧cua̧sä̧ pä'inösä̧. ¹¹ TÖ̧Ä̧NÄ̧HUA̧MÄ̧ pi̧yȩ pä'ö: ¡Cumötu̧cu̧nä̧ 'pȩ'ö̧ kä̧nö̧ ja̧'hua̧ta̧'a̧nö̧ cu̧jä̧pö̧tu̧cu̧nä̧ 'cuȩ'cu̧ kä̧nö̧! Pä'ätucui: ¡Ujutuhue! O'cajuiyönä surojö su̧ro̧tä̧cuä̧huä̧ Israel ttö̧ja̧ jȩtti̧nö̧nä̧mä̧! Isopäi'önä jahuätömä curänä'inä, ppäinä'inä märicheinä'inä ma̧ttä̧mä̧cuo̧tö̧. ¹² Oto kö̧mä̧ märicueinä ma̧ä̧mä̧cua̧ ja̧'hua̧ta̧'a̧nö̧ tö'cö kö̧mä̧ curättö toe'ä̧chä̧cua̧. Jitö totte'ächa'nä ka̧cui̧pä̧tö̧mä̧ ppäittö hua'ö tticuäcuotö. Pa̧'a̧nö̧tä̧ jahuätörö chu̧ra̧huä̧rö̧mä̧ iso juo̧dȩpä̧cua̧sä̧. ¹³ Ja̧'hua̧nö̧ jo̧mȩnä̧ isopäi'önä TÖ̧Ä̧NÄ̧HUA̧MÄ̧ ja̧u̧tä̧ ja̧'a̧ pä'ö cu̧huo̧jui̧pä̧cuo̧tö̧jä̧, cuahuaruhuä 'coru juo'ächäjätö tätähuä o'ca jäyä isotörö ku icu iyähuome'inä, ju'toju po̧ri̧yä̧'ta̧ päi'ome'inä, möä'ca päjure'ca'inä ja̧'hua̧ta̧'a̧nö̧ dau ȩ'u̧cuäi kada'ca'inä juhua'atäcu oi bäreu kada'ca'inä, jahuätö incienso pättöjuei tätähuä o'canä ttujuhuä'ijome ttö̧'ȩja̧'a̧ to'cuätucuomenä. ¹⁴ Ttömä chumönä cuä̧dä̧cua̧sä̧ ja̧'hua̧ta̧'a̧nö̧ rȩjȩmä̧ ttö̧ja̧mä̧ to̧ä̧jä̧tä̧ ja̧'hua̧ta̧'a̧nö̧ icuicuä̧jä̧ jö̧nä̧tä̧ jȩchä̧cua̧sä̧, de'a jui̧yä̧ttö̧ kä̧mä̧dö̧ Diblat ötahuiyä jubö cä'ädö jitö ttö̧ja̧cuo̧mȩmä̧ o'ca juiyönätä̧. Ja̧'hua̧nö̧ jo̧mȩnä̧ jitömä isopäi'önä TÖ̧Ä̧NÄ̧HUA̧MÄ̧ ja̧u̧tä̧ ja̧'a̧ pä'ö ttu̧huo̧jui̧pä̧cuo̧tö̧jä̧."