¹ Ja̧'hua̧nö̧ ja̧'a̧nä̧ ucu ttö̧ja̧sa̧ i̧tti̧mä̧, redä'cattö 'quiecuä'a ji'cate ucutä cuiäre'ca päi'önä ȩmo̧po̧'ö̧ cuä'ca jo̧mȩ ruti. Ja̧u̧nu̧ o'ca'amä jahuä'canä̧tä̧ Jerusalén a̧'cua̧juä̧ huȩyu̧tu̧ ruti. ² Ja̧'hua̧ta̧'a̧nö̧ jahuä'canämä ötahuiyä tto'epi juhuatäcu ötahuiyä sobucuächönä 'quiyönä tto̧ȩpä̧rö̧nä̧. Ja̧u̧ ötahuiyära̧'a̧cu̧ 'cha'achö boi'äcuähuome aditö todeti ku̧ni̧ ja̧'hua̧ta̧'a̧nö̧ jäyänämä ä'ö kä̧cuä̧huä̧ orä rutä'chi. Dau oi bäreu ruti (Ma̧ä̧chö̧nä̧ kä'ö icuäcä) ja̧u̧ ötahuiyä jäyänämä. ³ Ja̧u̧ o'ca'amä ttu̧cuȩ da̧huä̧huä̧bä̧ cuoräuttö adicuäbä̧ ȩmi̧ cui̧ä̧rȩbä̧ päi'önä, ja̧'hua̧ta̧'a̧nö̧ ja̧huä̧bä̧dä̧mä̧ ötahuiyä ttoecuäbä cuoräuttö adicuäbä jä̧'i̧nö̧'a̧nö̧ jö̧nä̧ tto'epi, ucuttö'inä ötahuiyättö'inä kä'co päte'ö jo̧mȩ, ja̧'hua̧ta̧'a̧nö̧ jahuäbänämä ra̧huä̧ri̧pö̧nö̧ topi, jahuäbämä ttoecuäbä jä̧cua̧'a̧, ja̧'hua̧ta̧'a̧nö̧ ucu jä̧cua̧'a̧ jahuäbä tto'epö cuaditäcua̧mä̧. Ja̧u̧mä̧ Israel ttö̧ja̧rö̧ 'cuä̧o̧pä̧cuȩ i̧jȩcuä̧ jö̧nä̧tä̧ jä̧cua̧'a̧. ⁴ Ja̧u̧nu̧ o'ca'amä, u'ohuecu ja̧'a̧cu̧nä̧ cuä'ipö pä̧mä̧dö̧ ä'i ja̧hua̧ta̧'a̧nö̧ Israel ttö̧ja̧ surojö jȩttä̧'i̧jö̧mä̧ ja̧u̧nä̧tä̧ ruti; ucumä surojö jȩttö̧nä̧mä̧ huȩnȩcuä̧chä̧cua̧'a̧ cuä'ipö pä̧mä̧dö̧ cuä'ö mo̧ro̧ pa̧ja̧cuo̧mȩ jo̧mȩnä̧ Israel ttö̧ja̧ surojö jȩttä̧'i̧jö̧nä̧mä̧. ⁵ Ttötä huedäcujä̧ ya'ute mo̧ro̧mä̧ huȩnȩcuä̧cha̧'a̧ ya'ute a̧'ȩ jo̧mȩnä̧ tä̧bo̧cuä̧cuȩ: ¡390nö̧ mo̧ro̧! Pa̧'a̧nö̧tä̧ tä̧bo̧cuä̧cuo̧tö̧ Israel ttö̧ja̧ surojö jȩttö̧nä̧mä̧. ⁶ Cuä'ipö cuä'äji mo̧ro̧ beipächomenä, todäre päi'önä̧mä cu̧huo̧jua̧'a̧cu̧nä̧cu̧ cuä'ipö cuä'ajä̧, ja̧'hua̧nö̧ ja̧'a̧ ucumä Judá ttö̧ja̧ surojö jȩttä̧'i̧jö̧ huȩnä̧cuä̧chö̧nä̧ cuä̧cua̧jä̧ 40nö̧ mo̧ro̧ jo̧mȩnä̧. Ttötä huedäcujä̧tó ya'ute mo̧ro̧mä̧ ya'ute a̧'ȩ jo̧mȩnä̧ ja̧'a̧. ⁷ Jerusalén ötahuiyä jäyänä tto'epö icuähua'a huȩju̧ra̧'a̧cu̧ topi, ja̧'hua̧ta̧'a̧nö̧ cujo ö̧'ca̧tä̧huä̧ta̧ juiyojonä ja̧u̧ ötahuiyänä 'cuä̧o̧pö̧cuȩ ji'ähui. ⁸ Isopäi'önä porötä! isappä chu̧nä̧cu̧jä̧ kara'acu'inä̧ cupporächi'ö juiyäcua'anö ju̧huȩnȩ ku̧ja̧ pä'ö pätecuächäji mo̧ro̧ beipächome jubö. ⁹ Ȩmo̧po̧'i̧ cu̧cuä̧cuȩmä̧ trigo'inä, cebada u̧huä̧ju̧ ote'inä, frijol u̧huä̧ju̧ ote'inä, jȩru̧huä̧ ote'inä, millo u̧huä̧ju̧ ote'inä ja̧'hua̧ta̧'a̧nö̧ centeno u̧huä̧ju̧ ote'inä; jibatenätä̧ ȩnö̧ ku̧ni̧, ja̧u̧mä̧ cu̧cuä̧ päi'önätä̧ jȩ'cua̧jä̧ cuä'ipö cuä'ö mo̧ro̧ jö̧'a̧cuä̧tä̧. 390nö̧ mo̧ro̧ jo̧mȩnä̧ cucuajá. ¹⁰ Ya'ute mo̧ro̧ cucuäcue öamäcämä̧ veinte ciclo jo̧mȩtä̧ jä̧cua̧'a̧ ja̧'hua̧nö̧ ja̧'a̧ttö̧ ya'ute mo̧ro̧ jo̧mȩ cucua pä'ö pa̧ja̧tu̧ ku̧nä̧huo̧mȩtä̧ cu̧cuä̧cua̧jä̧. ¹¹ Ja̧u̧nu̧ o'ca'a ajiyamä ya'ute litrottömä kä'co jo̧mȩtä̧ cuahuäcua̧jä̧, juhuoya'inä cuahua pä'ö pa̧ja̧tö̧ ku̧nä̧huo̧mȩtä̧ cuahuajá. ¹² !Ucumä Cebada u̧huä̧ju̧ ttucua'a jä̧'i̧ja̧'a̧nö̧ cucuajá, ja̧'hua̧nö̧ ja̧'a̧nä̧ ucumä jahuätö to̧ttä̧ro̧mȩttö̧ ttö̧ja̧ (ttitenä rȩdȩtö̧) cuȩtta̧já̧!" ¹³ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ pä'inö: "Pi̧yȩmä̧ huȩnȩcuä̧cha̧'a̧ Israel ttö̧ja̧ ttu̧cuä̧cuȩmä̧ ttu̧su̧ru̧tö̧ jä̧'i̧nö̧'a̧nö̧ jä̧cuȩ, ja̧'hua̧nö̧ jo̧mȩnä̧ ju̧huȩnȩtä̧ ka̧cuä̧tö̧ ji̧nä̧ yȩtȩtä̧ ucuocuätö ttö̧'cä̧tȩttö̧ kara'acu chȩpä̧cuo̧tö̧." ¹⁴ Ja̧'hua̧nö̧ päiyäcu ttömä pä'inö̧sä̧: "¡Ttöhue, CHÖ̧Ä̧NÄ̧HUA̧! Ttömä yoröiso su̧ro̧tä̧cuä̧hua̧ jö̧nä̧mä̧ huocö pä'ijösä! Ttömä yoröiso i̧sa̧ 'corujuo'ächörö'inä, de'a i̧sa̧ cuä'ö icuäcuru'inä cuocö pä'ijösä, mö̧ä̧ya̧ jö̧nä̧ chu̧ji̧no̧mȩttö̧ kä̧mä̧dö̧ jitä mo̧ro̧ jubö päi'önä, ja̧'hua̧ta̧'a̧nö̧ idepä surojumä yoröiso cuocö pä'ijösä!" ¹⁵ Ja̧'hua̧nö̧ pädiyäcu päinä̧cu̧sä̧: ¡Topittö! ttö̧ja̧sa̧ (ite) ttiyajueimä päcäyä itetä chiyäcujä̧ cu̧cuȩmä̧ ja̧u̧nä̧tä̧ cuȩttä̧cua̧'a̧nö̧." ¹⁶ Ja̧'hua̧ta̧'a̧nö̧ ja̧u̧mä̧ pinäcu̧sä̧: "¡Ttö̧ja̧sa̧ i̧tti̧! ¡Porötä! Jerusalén ttö̧ja̧ ttu̧cuȩmä̧ juhua'a yabonömä iyocö chä̧cua̧sä̧, ja̧'hua̧nö̧ ja̧'a̧ttö̧ jahuätömä tta̧'cua̧ tta̧'ȩcu̧ beipächäcua'a 'cua̧ra̧'a̧ pä'önätä̧ ttucuäcuotö juhua'atöcu ajiya'inä joipächäcua'a 'cua̧ra̧'a̧ pä'ö ye'ecunötä̧ ttahuäcuotö. ¹⁷ Isopäi'önä cuäcuähuä'inä ajiya'inä juiya'attö̧, ya̧cu̧nä̧ tti̧jä̧hua̧tu̧cu̧ tta̧'cua̧ rottecutä kä̧cua̧'a̧ ja̧'hua̧nö̧ jo̧mȩnä̧ suronä jȩö̧cuö̧huä̧ttö̧ ttijiyöhuächäcuyotö."