¹ TÖ̧Ä̧NÄ̧HUA̧MÄ̧ pä'äjita'anö ttörömä pa̧'a̧nö̧ ucuocuinö, ² "¿Däje tö'cö ucuocua'a päcuätö ucumä, pi̧yȩ ji̧yȩtȩ pähuä Israel ttö̧ja̧ ttötö'cömä ja̧'hua̧ta̧'a̧nö̧ pä'a: Ttä̧'o̧tö̧mä̧ uva a̧'tö̧ cuätö ja̧'hua̧ta̧'a̧nö̧ tti̧tti̧ ttacumä beipächäu̧. ³ Ttömä kö̧sä̧, Pi̧yȩ ja̧'a̧ TÖ̧Ä̧NÄ̧HUA̧ huäjuetö jiähuömä, isopäi'önätä̧ ji̧yȩtȩ'inä juiyäcua'a pi̧yȩ pähuä huȩnȩtö̧ päcua pä'ömä Israel ttö̧ja̧rö̧mä̧." ⁴ ¡Topittö! Yotucu pönä Tta̧'cua̧rö̧mä̧ Ttönätä̧ ka̧'a̧, ttä̧'o̧tö̧'inä tti̧tti̧mö̧'inä tti̧tti̧mö̧'i̧nä̧ tta̧'cua̧rö̧mä̧ Ttönä̧tä̧ todehua'a! A̧'cua̧rö̧nä̧ suroju jȩpö̧mä̧ 'korujuoächa̧cua̧! ⁵ ¿ Tta̧'a̧nö̧tä̧ pätöanö jä̧ttö̧ ja̧u̧ jueönätä jepurumä ja̧hua̧nö̧ ja̧'a̧ttö̧ jȩä̧cuä̧huä̧ i̧nä̧ adiunä jö̧ i̧nä̧ jueö jahuä inä, ⁶ ja̧hua̧nö̧ ja̧'a̧nä̧ ja̧u̧mä̧ mu̧ä'ca ju'tättu i̧nä̧ cuocu ja̧cua̧, Israel ttoju isodenä ka̧cuä̧tö̧ tätähuä o'caru i̧nä̧ u cäepumä tou juiya̧cua̧, ja̧hua̧nö̧ ja̧'a̧nä̧ oju isode jäyänä käjuru inä suronämä jepo̧cu̧ja̧cua̧, irecua ihua kirö̧ pä̧nä̧ i̧nä̧ tö'cö päiocu jacua? ¿ ja̧u̧ ubomä jueönätä pähuä i̧sa̧ tä̧ji̧? ⁷ ¿Tocu pättö'anöttö ya̧tȩ ttö̧ja̧sa̧ ya̧tȩrö̧'i̧nä̧ suronä jȩpu̧ huehuepocörömä, ja̧hua̧ta̧'a̧nö̧ ja̧u̧nu̧ chi̧yä̧cua̧sä̧ pä'ö ö'ärohuinömä i̧mi̧ppotäcurumä ppa̧'a̧dö̧ jua'atäcu ttunäu̧cuajueimä ppäi ttu'äturu ttu̧cuȩtä̧ i̧yömä ja̧hua̧ta̧'a̧nö̧ ttö̧'ca̧tä̧huä̧ta̧ jui'ätörö 'ca̧tö̧ru̧mä̧? ¿Ja̧u̧ ttö̧ja̧sa̧mä̧ adihuomenä jȩpu̧? ⁸ ¿Tocu pättö'anöttö ya̧tȩ ttö̧ja̧sa̧ pärätä ö'ärohuäjomettö'inä abonänö ttimitarö pä'ocörumä ja̧hua̧ta̧'a̧nö̧ churutä ppädarö pä'ötä rö̧ȩnä̧ pä'ö iyocörumä? Ja̧u̧mä̧ adihuomenä jȩpu̧ pättäcu ja̧hua̧ta̧'a̧nö̧ ka̧ra̧ ka̧ra̧nö̧cu̧mä̧ cättädi'oca'a tteseta pä'ötä hue'ö ku̧ni̧nö̧. ⁹ Ja̧u̧ ttö̧jö̧sa̧mä̧ Ttö huedötä jepu̧ kö̧ ja̧hua̧ta̧'a̧nö̧ Ttö huedötä päö'a̧cuä̧ ucuotö jȩpu̧ kö̧, Ja̧'hua̧nö̧ ja̧'a̧ttö̧ ttö̧ja̧sa̧ adiu jȩpu̧ru̧mä̧ pa̧'a̧nö̧ jäcua̧ pähuächa'a: ¡Ja̧u̧mä̧ i̧sopäi'önätä̧ ö̧jä̧cua̧! Pi̧yȩ ja̧'a̧ TÖ̧Ä̧NÄ̧HUA̧ huäjuetö icu jiähuömä ¹⁰ Ja̧'hua̧nö̧ ja̧'a̧nä tamöcuädätucua ja̧u̧ i̧tti̧ jarodö ttö̧ja̧rö̧ cuä'äu icuru u̧ju̧nä̧ru̧ttö̧mä̧ ja̧hua̧ta̧'a̧nö̧ pȩnȩ huȩyu̧cuä̧ttö̧'i̧nä̧ a̧bonänö jȩpu̧mä̧, ¹¹ Jä'omä jau̧ jueimä jȩo̧ca̧'a̧ ji̧na̧'a̧nä̧, ja̧u̧mä̧ mu̧ä̧'ka huämettö̧ cuä̧nö̧ pu̧ ja̧hua̧ta̧'a̧nö̧ a̧hua̧ru̧hua̧ irecuaru suronä jȩpu̧, ¿Tocu pätta'anöttö ja̧u̧ ötö'cömä? ¹² Pide ttö̧ja̧sa̧mä̧ usurä isotörö ja̧'hua̧ta̧'a̧nö̧ recuä rö̧jä̧u̧rö̧ 'cho'ipä'chö nä̧u̧cuä̧rö̧ ja̧'hua̧ta̧'a̧nö̧ chi̧yä̧cua̧jä̧ päjimä ppa̧'a̧do̧cö̧, ja̧'hua̧nö̧ jȩpö̧ tätähuä o'ca ka̧'a̧cu̧ topömä, to'ija̧'a̧cu̧tä̧ surojutä jȩpö̧, ¹³ pärätä i'ärohuomenämä, i'ärohuome yabonänö ttimitarö pä'ö ja̧'hua̧nö̧ jȩpö̧ iyömenämä rö̧ä̧nä̧ ppädäcu, ¿Ja̧u̧ ttö̧ja̧sa̧mä̧ ö̧jö̧'a̧nö̧ ja̧'a̧ tä̧ji̧? ¡Ja̧u̧mä̧ yöröisotä ko̧cu̧ jä̧cua̧! Ja̧u̧mä̧ 'corujuoächäcua̧, ja̧u̧mä̧ chutä amönä pa̧ja̧tö̧ jȩä̧ji̧tä̧ jä̧cua̧'a̧, juhua'amä ja̧u̧ su̧ro̧tä̧cuä̧huä̧ o'ca juiyönä jȩä̧ja̧'a̧ttö̧. ¹⁴ !Ja̧'hua̧nö̧ ja̧'a̧nä̧ topittö! Pide ttö̧ja̧sa̧ i̧tti̧rö̧ u̧ju̧nä̧rö̧ttö̧mä̧, i̧tti̧mä̧ jä'o jȩi̧nö̧mä̧ o'ca juiyönä to̧ä̧cua̧ ja̧'hua̧nö̧ ja̧u̧ toa'anä, ja̧u̧mä̧ ja̧u̧ jähuämä jȩpo̧cö̧. ¹⁵ Ja̧u̧ i̧tti̧mä̧ möä'ca ju'tättömä cuocö ja̧'hua̧ta̧'a̧nö̧ Israel ttö̧ja̧ ttö̧ä̧nä̧huä̧'ca'inä boyu̧cu̧mä̧ tipocö juhua'atäcu a̧hua̧ru̧hua̧ ircuarö'inä suronämä jȩpo̧cö̧, ¿Ja̧u̧ ötö'cömä tocu pättö'anöttö̧? ¹⁶ Ja̧u̧ i̧tti̧mä̧ ya̧tȩrö̧'inä usurä ȩmä̧u̧nä̧mä̧ jcȩpo̧cö̧, ttiya pä'ö jȩä̧cuä̧huä̧'i̧nä̧ 'cho'ipä'chocö, ja̧'hua̧ta̧'a̧nö̧ ttu̧nä̧u̧cuä̧ji̧'inä. Ja̧'hua̧nö̧ jȩtta̧jueimä ppäi ttu'ätörö ttu̧cuȩtä̧ iyö juhua'atäcu ttö̧'ca̧tä̧huä̧ta̧ jui'ätörömä ttö̧'ca̧tä̧huä̧ta̧ 'ca̧tö̧. ¹⁷ Ja̧u̧ i̧tti̧mä̧ ya̧tȩrö̧'inä usurä ȩmä̧u̧nä̧mä̧ jȩpo̧cö̧, pärätä i'ärohuäjimä yabonänömä ttimitarömä pä'ocö, i'ärohuäjittö'inä rö̧ä̧nä̧mä̧ ppädarömä pä'ocö, ja̧'hua̧nö̧ jȩtta̧jueimä ja̧u̧mä̧ Ttö huedötä ucuotö ja̧'hua̧ta̧'a̧nö̧ Ttöttö hueähuä huȩnȩ päö'a̧cuä̧tä̧ jȩpö̧, ja̧u̧ i̧tti̧mä̧ jä'o surojö jȩi̧nö̧ jähuänämä to'e'ächocö jä̧cua̧: ¡Ja̧u̧mä̧ isopäi'önätä ö̧jä̧cua̧! ¹⁸ Jä'omä, isopäi'önätä̧ usurä ttȩmä̧u̧nä̧ jȩpi̧nö̧ korotörömä 'cho'ipä'chötä ja̧'hua̧ta̧'a̧nö̧ ö̧jä̧hua̧rö̧ nä̧u̧cuä̧rö̧tä̧ juhua'atäcu ahuaruhuärö adihuomenätä̧ jȩpi̧nö̧, ja̧u̧mä̧ suronä jȩi̧nö̧nä̧tä̧ toe'ächä̧cua̧. ¹⁹ Ja̧'hua̧nö̧ ja̧'a̧nä̧ ucumä pä'öjä̧: "¿Tta̧'a̧nö̧ pä'ö i̧tti̧mä̧ jä'o jȩi̧nö̧ jähuänämä usurä ȩmä̧huo̧cö̧ttö̧? Isopäi'önä i̧tti̧mä̧ a̧di̧huo̧mȩtä̧ jȩa̧'a̧ttö̧ ja̧'hua̧ta̧'a̧nö̧ jueö huȩnȩtä̧ juhua'atäcu o'cajuiyönä Ttö huedö huȩnȩtä̧ hua'adö u̧ju̧na̧'a̧ttö̧ Ja̧u̧mä̧ jȩpö̧. ¡Ja̧u̧mä̧ isopäi'önätä ö̧jä̧cua̧! ²⁰ Surojö jȩpö̧tä̧ jä̧cua̧'a̧ corujuoächä̧cua̧mä̧, jä'o suronä jȩä̧ji̧nä̧mä̧ i̧tti̧mä̧ ro̧'ȩcuo̧cö̧ jä̧cua̧ ja̧'hua̧ta̧'a̧nö̧ i̧tti̧ surojö jȩä̧ji̧nä̧mä̧ jä'omä ro̧'ȩcuo̧cö̧ jä̧cua̧. Adihuomenä jueönä jȩö̧mä̧ adihuä i̧sa̧ pä'ötä pä̧huä̧cua̧ juhua'atäcu surojö jȩö̧ttö̧mä̧ surojömä chunätätä kä̧cua̧'a̧ ²¹ Ja̧'hua̧nö̧ ja̧'a̧nä̧ Suropätömä surojö jȩttä'ijö̧ cä'ädächö, Ttö huedinönä̧ päö'anö 'chä̧tö̧rö̧mä̧ ja̧'hua̧ta̧'a̧nö̧ adihuomenä juhua'atäcu jueö jähuänä 'chö̧mä̧, isopäi'ötä̧ ö̧jä̧cua̧ ja̧huanö jo̧mȩttö̧ 'corojuo'ächocö jä̧cua̧. ²² O'cajuiyönä suronä jȩpö̧ surojö jȩi̧nö̧mä̧ ja̧u̧ru̧mä̧ to'ija̧'a̧cu̧mö̧ a̧mö̧cuädäcuähuoca'a jä̧cua̧'a̧. Ja̧u̧mä̧ jueö jähuänätä̧ ö̧jä̧cua̧, jȩpö̧ ö̧ja̧'a̧ttö̧. ²³ ¿Suropätö 'corujuottächa'amä Ttömä chesehuäcua'a? Pi̧yȩ ja̧'a̧ TÖ̧Ä̧NÄ̧HUA̧ huäjuetö icu jiähuömä. ¿ja̧'hua̧ta̧'a̧nö̧ u̧mä̧nä̧ttö̧ 'cä̧'i̧pä̧chö̧ttö̧mä̧ ja̧u̧mä̧ ö̧jö̧ juiyö'anömä̧ jo̧ca̧'a̧? ²⁴ Ja̧hua̧nö̧ ja̧'a̧nä̧ ya̧tȩ huȩnȩ juiyönä kö̧ jäyäcu kä̧'i̧pä̧chö̧ suronä yȩö̧ttö̧mä̧ ja̧hua̧ta̧'a̧nö̧ ö̧ ä̧na̧hua̧ öjö'cocomenä yȩö̧ttö̧mä̧ korotö jarodätö jȩttö̧tä̧ yȩpö̧mä̧, ja̧'hua̧nö̧ jö̧ttö̧mä̧ ¿ja̧u̧mä̧ ö̧jä̧cua̧? O'cajuiyönä huȩnȩ juiyönä ö̧ji̧nö̧mä̧ amucuadö juiyö'anä ja̧'a̧ ttörö'inä. Ja̧'hua̧nö̧ ja̧'a̧ttö̧ ja̧u̧ suronä jȩä̧ji̧mä̧ hua'arenätä i̧mi̧tä̧huä̧cua̧. ²⁵ Ucumä pä'öjä: ¡Tu̧ru̧hua̧ u̧mä̧nä̧mä̧ yapare mänätä̧ ja̧'a̧! ¡Ä̧ju̧cuä̧tu̧cui̧ Israel ttö̧ja̧! ¿TTÖ chu̧mä̧nä̧ ja̧'a̧ yapere mänämä? ¿ucutu cu̧mä̧nä̧tu̧cu̧ mä̧'cö̧ ya̧prȩ mä̧nä̧mä̧? ²⁶ Ya̧tȩ adiunä kä̧'i̧jö̧ surojönä jȩö̧ttö̧mä̧, suronä jȩpö̧kä̧nä̧ ja̧u̧nä̧tä̧ 'corujuo'ächöttömä, ja̧'hua̧nö̧tä̧ ja̧u̧mä̧ suroinä jȩä̧'i̧jö̧nä̧tä̧ 'corujuo̧'ä̧chä̧cua̧. ²⁷ ja̧'hua̧nö̧ ja̧'a̧nä̧ ja̧tȩ suronä jȩä̧'i̧'ö̧ttö̧ ö̧'ä̧i̧ttö̧ cä̧'i̧pä̧chö̧ amonätä amucuädö adiunä jȩö̧ttö̧mä̧, ja̧'hua̧nö̧ jö̧ttö̧tä̧ pi̧jä̧ttö̧ a̧'cua̧rö̧ ö̧jä̧cua̧. ²⁸ Ja̧'hua̧nö̧ ja̧'a̧ topötä sorojöttö 'cä̧'i̧pä̧chö̧ jȩö̧ttö̧mä̧. ja̧u̧mä̧ a̧'cua̧rö̧ä̧ o̧jä̧cua̧ cuä'ö icuähuocö jä̧cua̧. ²⁹ Ja̧'hua̧nö̧ ja̧'a̧nä̧ Israel ttö̧ja̧mä̧ pä'inätö̧: ¡Tu̧ru̧hua̧ amucuädinömä̧ pätetö päinö'anö jo̧ca̧'a̧! ¿Ja̧hua̧nö̧mä̧cö̧ ji̧na̧'a̧ Israel ttö̧ja̧ ttamöcuädömä? Ucu cuamucuädömä ja̧'hua̧nö̧mä̧cö̧. ³⁰ Ja̧'hua̧nö̧ ja̧'a̧ttö̧ ¡Ttö ro̧dȩpä̧cua̧sä̧ u̧mä̧tö̧ ya̧cu̧nä̧rö̧ ucututä Israel ttö̧ja̧ jȩ'cuä̧tu̧cu̧nä̧tä̧! TÖ̧Ä̧NÄ̧HUA̧ Diosmä pa̧'a̧nö̧tä̧ ji'ähuinö! suronä jȩpä̧jä̧tö̧jä̧ pä'ö ja̧'hua̧ta̧'a̧nö̧ jaropi'ätucui suronä jȩ'cui̧nä̧tu̧cu̧ jä̧u̧tä̧ jȩ'cui̧nö̧ ji̧nö̧tä̧ surojuoepäcu ucurutä. ³¹ Do'opö icui ucutä cuamönä o'cajuiyönä suronä jȩ'cui̧nö̧ ji̧nö̧; pärohuächö ucu cuamiso'qui jareo'qui ja̧'hua̧ta̧'a̧nö̧ ja̧rȩpa̧ cua̧'cua̧ru̧hua̧rö̧ ¿Tta̧'a̧nö̧ pä'ö hua'ö cuicuätucua'anö ja̧'a̧ttö̧ ucutumä Israel ttö̧ja̧cu̧mä̧? ³² Ja̧'hua̧nö̧ ja̧'a̧nä̧ Ttömä esehuocösä hua'aremä ya̧tȩ 'corujuoächa pä'ömä. Pa̧'a̧nö̧tä̧ ji'ähuinö TÖ̧Ä̧NÄ̧HUA̧ Diosmä, ja̧'hua̧nö̧ ja̧'a̧ttö̧ pärocuäcutä amöcuädö kä̧tu̧cui̧.