¹ TÖ̧Ä̧NÄ̧HUA̧ ttörömä pa̧'a̧nö̧ ucuocuinö, ² Ttö̧ja̧sa̧ i̧tti̧, ji̧yȩtȩ amöcuädö pähuä'inä ja̧'hua̧ta̧'a̧nö̧ ji̧yȩtȩnä̧ huȩnȩtö̧ ji'ähui Israel ttö̧ja̧rö̧mä̧. ³ Ji'ähui: TÖ̧Ä̧NÄ̧HUA̧MÄ̧ pi̧yȩ pä'ö: ya̧tȩ paré böomä ujuabiyä'inä böo ja̧'hua̧ta̧'a̧nö̧ otoö ja̧'a̧nä̧ uhuo'che'inä ki̧na̧'a̧ juhua'atäcu rö̧ä̧nä̧ i'queräu ku̧nä̧rö̧mä̧ Libanora̧'a̧cu̧ 'chi̧nö̧ ja̧'hua̧ta̧'a̧nö̧ cedro dau beipome 'chuöädinö. ⁴ Ja̧u̧mä̧ a̧na̧juȩ beipomenä 'te'ädö icuinö ja̧'hua̧nö̧ jȩpö̧mä̧ Canaán rȩjȩra̧'a̧ ȩpi̧nö̧; Ja̧u̧mä̧ ötahuiyättö ttöäre iyähuä ttö̧ja̧ ttö̧ja̧cuo̧mȩ ku̧ni̧nö̧. ⁵ Ja̧u̧mä̧ ja̧'hua̧ta̧'a̧nö̧ ja̧huä̧jä̧ rȩjȩttö̧mä̧ u̧huä̧ju̧ a̧'u̧cu̧nä̧ ȩmi̧nö̧ ja̧'hua̧nö̧ ȩmö̧mä̧ rȩjȩ cuähuä ppuruhuä̧jä̧nä̧ ku̧ni̧nö̧. ⁶ Ja̧'hua̧nö̧ ja̧'a̧ adiyä räreipina'a, rä'o'ömä uva dau pä'i'ö rȩjȩmä̧ a̧ttä̧chi̧'i̧na̧'a̧, Ä̧na̧jui̧yä̧mä̧ ja̧u̧ ö̧ja̧'a̧cu̧ kärächi'ina'a ja̧'hua̧ta̧'a̧nö̧ ihuehui appiyämä ja̧u̧ i̧dȩa̧'a̧ttö̧ böo päi'ina'a. Ja̧'hua̧nö̧ ja̧'a̧ttö̧ viña isade jö̧nä̧tä̧ pärohuächina'a juhua'atäcu ä̧na̧jui̧yä̧ ba'i'ö ja̧'hua̧ta̧'a̧nö̧ ppo̧ö̧ a̧dȩ räreipina'a. ⁷ Ja̧'hua̧nö̧ ja̧'a̧nä̧ ka̧ra̧ paré ujuabiyä böo ja̧'hua̧ta̧'a̧nö̧ ihui'che'inä rö̧ä̧nä̧ ku̧nä̧rö̧. Jahuäi uva po´tiyämä paré ö̧ja̧'a̧cu̧ kärächi'ina'a ja̧'hua̧ta̧'a̧nö̧ ä̧najui̧yä̧ ademä paré ö̧ja̧'a̧cu̧ setächi'ina'a ajiya iyepa'a bahuönä ku̧nä̧huo̧mȩttö̧mä̧. ⁸ Ja̧u̧ cuähuämä rȩjȩ a̧di̧huä̧jä̧nä̧ ku̧nä̧hui̧na̧'a̧ ajiya rö̧ä̧nä̧ acuome ppeyänä ä̧na̧jui̧yä̧ rärea pä'ömä ja̧'hua̧ta̧'a̧nö̧ u̧huä̧ju̧ huȩju̧nä̧ uva dau adihuäu ja̧ pä'ömä. ⁹ Ötahuiyä ttö̧ja̧rö̧mä̧ ji'ahui, TÖ̧Ä̧NÄ̧HUA̧ pa̧'a̧nö̧ pä'ö: ¿Cuiäremä rö̧cuä̧chä̧cua̧jä̧? ¿Que'opömä icuähuoca'a jä̧cua̧'a̧ ja̧'hua̧ta̧'a̧nö̧ u̧huä̧ju̧mä̧ 'to'ö icuähuoca'a jä̧cua̧'a̧ ojiyä joipächönämä ja̧'hua̧ta̧'a̧nö̧ o'cajuiyönä adiu a̧'cua̧cu̧nä̧ buo juoumä joi'oca'a jä̧cua̧'a̧? Ttöjo juruhuojo ja̧ pä'ö'inä ja̧'hua̧ta̧'a̧nö̧ ttö̧ja̧ recuätö jö̧ttö̧'i̧nä̧ ujucäcämä que'opömä icuocotö ttäcuotö. ¹⁰ Ja̧'hua̧nö̧ ja̧'a̧nä̧, ja̧u̧ ttu̧ju̧nö̧ o'ca'amä ¿Buo juoäcua'a? ¿Joi'oca'a jä̧cua̧'a̧ kä̧ru̧'coppa kä̧hua̧ räopa'acuttö ichö döomenämä? ku̧nä̧huä̧jä̧ rȩjȩmä̧ jä̧ttä̧jä̧tä̧ joi'äcua'a. ¹¹ TÖ̧Ä̧NÄ̧HUA̧ ttörömä pa̧'a̧nö̧ ucuocuinö, ¹² Jarodäcuähuä ttö̧ja̧rö̧ ucuocui: ¿Ucutumä jerupätö̧jä̧ pi̧yȩ rä'epö icu jiäcuähuämä? ¡Topittö! Babiloniattö ru̧hua̧mä̧ Jerusalénra̧'a̧ ichäji ja̧'hua̧nö̧ ichömä ru̧hua̧rö̧'i̧nä̧ i̧tti̧mö̧rö̧'inä ȩmi̧pä̧ji̧, ja̧'hua̧nö̧ ȩpö̧mä̧ chutäcu Babiloniara̧'a̧ i'cächa̧jä̧u̧. ¹³ Ja̧'hua̧nö̧ jȩpö̧ ru̧hua̧cu̧ ka̧cuä̧tö̧rö̧ pojopö ȩmi̧nö̧ ja̧u̧cu̧ todecuinö ja̧'hua̧ta̧'a̧nö̧ ya̧tȩ i̧mi̧nä̧ huȩnȩtö̧ pä'ö ku̧ni̧nö̧. Ja̧u̧mä̧ ttö̧ja̧ ja̧huä̧jä̧ttö̧ rö̧ä̧nä̧ juruhuätörö ȩmi̧pi̧nö̧, ¹⁴ ruhuo huettä'ijö ucuo tettähuoca'a jö̧ttö̧tä̧ ja̧'hua̧ta̧'a̧nö̧ ttä̧rä̧mö̧ juiyöttötä. Utodecuinönä 'chu̧'ä̧rä̧cuä̧huö̧tä̧ ö̧ji̧pä̧cua̧mä̧. ¹⁵ Ja̧'hua̧nö̧ ja̧'a̧nä̧ Jerusalén ru̧hua̧mä̧ hueähuä huȩnȩ jarodö hue'inö̧ chutä päö ȩcuä̧ ttö̧ja̧rö̧ Egiptora̧'a̧ tti'cha̧ pä'ö ca̧hua̧yu̧tu̧ru̧ ja̧hua̧ta̧'a̧nö̧ su̧rodo̧u̧ru̧ ȩmö̧ tti̧'cha̧ pä'ö. ¿Iso juottepäcuotó? ¿Ja̧hua̧nö̧ jȩpö̧mä̧ töipächö'anö̧ ja̧'a̧? ¿Töipächö'anö̧ ja̧'a̧ pa̧'a̧nö̧ jä̧cua̧'a̧ pättinö̧ji̧nö̧ jȩpo̧cö̧mä̧? ¹⁶ ¡Ttömä̧ kö̧sä̧! pa̧'a̧nö̧tä̧ pä'ö TU̧RU̧HUA̧ TÖ̧Ä̧NÄ̧HUA̧MÄ̧, isipäi'önä̧tä̧ 'corupäi'ä̧cua̧ ru̧hua̧ i̧rȩjä̧ttö̧mä̧ ru̧hua̧ ö̧jö̧nä̧ hueina̧cu̧ ja̧'a̧ttö̧, ruhuó hue'ö ö̧ja̧ pä'ö iyinö̧rö̧'inä̧ ö̧jö̧'coca'attö̧, ja̧hua̧nö̧tä̧ jȩtta̧ pä'ö pätecuächinö̧'inä̧ yȩo̧ca̧'a̧ttö̧. Ja̧u̧mä̧ 'corujuo̧ä̧chä̧cua̧ Babiloniattö̧tä̧. ¹⁷ Faraón umuhuäyotö suro̧do̧u̧ juruhuätucu ttö̧ja̧cu̧ ji̧nä̧ yo̧mȩtȩ pä'i'ö ttorohuähua pä'ö jȩttö̧ttö̧'i̧nä̧, ja̧u̧ru̧mä̧ ppädö juiyäcua'a̧ ttörohuähuomettö̧mä̧, Babilonia suro̧do̧u̧ dauhuiyättö ku̧nö̧ tto'epu ja̧hua̧ta̧'a̧nö̧ isä'ca 'ca̧tö̧ ttottepäcuotö recuätörö cuä'äu tticua pä'ö. ¹⁸ Jua'amä̧ ru̧hua̧ jȩchä̧cua̧sä̧ päinö̧ jȩo̧ca̧'a̧ttö̧. Ja̧umä̧ jahuätucu te'ähuinö̧ ja̧hua̧nö̧ jȩchä̧cua̧s pä'ömä̧, ja̧hua̧nö̧ jȩpi̧nö̧'ca̧'inä̧ to'í ja̧'a̧cutä̧ jȩpö̧.Ja̧u̧mä̧ tö'ipächo'cö jä̧cua̧. ¹⁹ Ja̧'hua̧nö̧ ja̧'a̧ TÖ̧Ä̧NÄ̧HUA̧ Dios pa̧'a̧nö̧ pä'inö: Ttömä 'cuäopönä̧tä̧ kö̧sä̧, ¿Ttömäcö̧ ji̧na̧'a̧ jueö huȩnȩ ji'ähuinömä ja̧u̧mä̧ ya'ocuäri̧nö̧ ja̧'hua̧ta̧'a̧nö̧ Ttö chiya pädinö'inä chutä 'to'ocu icuinö? Ja̧'hua̧nö̧ ja̧'a̧ttö̧ ¡Ttö chi'cächä̧cua̧sä̧ ro̧ȩcuä̧ huȩnȩ ja̧u̧rö̧! ²⁰ Chu̧ju̧nä̧rä̧cua̧sä̧ chiare po̧i̧ huo̧ä̧huä̧sa̧ ja̧u̧tä̧ u̧huä̧mȩnä̧, ja̧'hua̧nö̧ ja̧'a̧nä̧ ja̧u̧mä̧ chiäre huo̧ä̧huä̧sa̧nä̧ juäocuächäcua̧ po̧ya̧ jä̧'i̧nö̧'a̧nö̧. Ja̧'hua̧nö̧ ja̧'a̧ttö̧ ¡Ttö chi'cächä̧cua̧ Babiloniara̧'a̧, ja̧'hua̧ta̧'a̧nö̧ juhua'attö ro̧ȩcuä̧nä̧ pätetö ku̧nä̧huä̧cua̧jä̧ jittähuiya'anö jö̧ jiähuina'attö̧ ja̧u̧mä̧ Ttörö'inä ja̧'hua̧nö̧tä̧ jittähuiya'anö jö̧ ji'äu icuinö. ²¹ O'catoi'önä jo̧mȩnö̧ huo̧juȩcuo̧tö̧ su̧ro̧da̧u̧ curä'chu 'cui'ö icuähuotö. Ja̧'hua̧ta̧'a̧nö̧ ka̧cui̧pä̧jä̧tö̧mä̧ o'catoi'önä ttiperecuächäcuotö ka̧hua̧ räopa'acu'inä, kä̧hua̧ ma̧ä̧cha̧'a̧cu̧'i̧nä̧, kä̧hua̧ ieruhua'acu'inä, u̧huo̧jua̧'a̧cu̧'inä. ja̧'hua̧nö̧ ja̧'a̧ttö̧ ucutumä cu̧huo̧juä̧cuo̧tö̧jä̧ Ttötä CU̧RU̧HUA̧TU̧CU̧, Ttömä ucuocuinösä̧ pi̧yȩ 'cuäopäcua'amä̧. ²² TÖU̧RU̧HUA̧ Dios pa̧'a̧nö̧ pä'ö: ja̧'hua̧nö̧ ja̧'a̧ttö̧ Ttötö chȩpä̧cua̧sä̧ dauhuiyä ju'toju cedro ka̧cuo̧mȩ, ja̧'hua̧ta̧'a̧nö̧ Ttötä dauhuiyä chu̧ju̧nä̧cua̧sä̧ dauhuiyä ppo̧ö̧'i̧nä̧, Ttötä 'choräö icuipö, ja̧'hua̧ta̧'a̧nö̧ Ttötä chu̧ju̧nä̧cua̧sä̧ jo̧mȩtȩ dauhuiyä ju'toju jo̧mȩ. ²³ Ttötä chu̧ju̧nä̧cua̧sä̧ dauhuiyä Israel de'iyunä ä̧na̧jui̧yä̧'i̧nä̧ kä̧cua̧'a̧nö̧ ja̧'hua̧ta̧'a̧nö̧ u̧u̧ä̧ju̧'i̧nä̧ huȩjä̧cua̧'a̧nö̧, ja̧'hua̧nö̧ ja̧'a̧nä̧ ju̧huȩnȩnä̧mä̧ ttö̧ja̧cuä̧cuo̧tö̧ rȩjȩnä̧ cue'ächätö'inä, cu̧chi̧tö̧'i̧nä̧ ja̧'hua̧nö̧ ja̧'a̧nä̧ o'catoi'önä ttujuabiya ku̧nä̧rä̧tö̧mä̧ dauhuiyänätä̧ ttö̧ja̧cuä̧cuo̧tö̧ ja̧u̧tä̧ dauhuiyä ä̧na̧jui̧yä̧nä̧ ttä̧'ti̧yu̧ aditö ttiä ttötäcuotö. ²⁴ Ja̧hua̧ta̧nö̧ ttö̧ cu̧ru̧hua̧tu̧cu̧ DIOSMÄ o'cajuiyönä dauhuiyä ka̧cuo̧mȩmä̧ chu̧huo̧juä̧cua̧sä̧. Ja̧hua̧nö̧ ja̧'a̧nä̧ dauhuiyä otoumä jepuchicuacuasä ja̧hua̧nö̧ jecha'anä dauhuiyä ppo̧ö̧mä̧ ruhuipönä jechacuasä. Ja̧hua̧nö̧ ja̧'a̧nä̧ TTÖMÄ dau ajiya totoäcuähuäimä joipächönä jechacuasä ja̧hua̧nö̧ ja̧'a̧nä̧ dau joicuäimä ȩ'u̧cu̧nä̧ jȩcha̧cua̧sä̧. ttö̧ cu̧ru̧hua̧tu̧cu̧ pi̧yȩ pädäjimä jahuanö̧tä̧ 'cuäopäcua'a ttö jechacuasä