¹ Pä'äjita'anö, TÖ̧Ä̧NÄ̧HUA̧ ttönä ucuocumä pä'inö: ² Ttö̧ja̧sa̧ i̧tti̧, Israel ttö̧ja̧rö̧ 'cuä̧o̧pä̧cuä̧ ji'ähuätö profetarö to'ija̧'a̧cu̧ ji'ähui, juhua'atäcu jacuäde'änä amöcuädö 'cuäopäcuä̧ ji'ähuätörö pa̧'a̧nö̧ ji'ähui: "TÖ̧Ä̧NÄ̧HUA̧MÄ̧ i̧huȩnȩ ä̧ju̧cuä̧tu̧cui̧. ³ TÖ̧Ä̧NÄ̧HUA̧MÄ̧ pi̧yȩ pä'ö: ¡Jahuätu jerupätö Profetatöhue, jitötä tta̧'cua̧ru̧hua̧ oipa'acu 'chä̧tö̧hue, ja̧'hua̧nö̧ ja̧'a̧nä̧ yoröiso topocotö pä'ijätö! ⁴ Israel ttö̧ja̧, ucu cuahuaruhuä profetatö̧mä̧ de'a rȩjȩ jui̧yä̧jä̧ isotö jä̧'i̧nö̧'a̧nö̧ juo'ächinätö̧. ⁵ Ucutumä Israel ttö̧ja̧ ttö̧ja̧cuo̧mȩ jäyänä ttoecuäbä rireina'amä aditö cuicuätucumä pä'ocotö pä'ijätöjä̧, TÖ̧Ä̧NÄ̧HUA̧ u̧mo̧ro̧ mo̧ro̧ curä rȩbȩhuo̧mȩnä̧ ttocuecuätucua pä'ömä. ⁶ Ttö̧ja̧mä̧ iso jo̧cö̧tä̧ i̧jȩcuä̧cha̧'a̧ topätö, ja̧'hua̧nö̧ jo̧mȩttö̧ yapare jähuätä ji'ähuätö, pi̧yȩ ja̧'a̧ pättömä: "Pi̧yȩ pa̧'a̧nö̧ TÖ̧Ä̧NÄ̧HUA̧MÄ̧ huäjuetö icu ji'ähuö." Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ huȩo̧co̧ö̧ täcuotö, ja̧'hua̧nö̧ ja̧'a̧nä̧ jahuätö jittähuömä isopäi'önä jö̧nä̧ ttö̧ja̧'i̧nä̧ ttesehuipönä jȩttä̧cuo̧tö̧. ⁷ ¿Yapare jähuätä i̧jȩcuä̧cha̧'a̧mä̧ topocötö pä'ijätö ja̧'hua̧nö̧ topö yaparetä ji'ähuocotö pä'ijätö, ucumä tocu päcuättö: "Pi̧yȩ pa̧'a̧nö̧ TÖ̧Ä̧NÄ̧HUA̧MÄ̧ huäjuetö icu ji'ähuö, Ttötämä chucuocuoco̧u̧ ja̧'a̧nä̧mä̧? ⁸ Ja̧'hua̧nö̧ ja̧'a̧ TÖ̧Ä̧NÄ̧HUA̧ Diosmä pa̧'a̧nö̧ pä'ö: juhua'amä to'cuätucumä yapare jähuätä to'cuätucua'attö, ja̧u̧ yapare jähuätä ji'ähuätöjä̧, ja̧'hua̧nö̧tä̧ TÖ̧Ä̧NÄ̧HUA̧MÄ̧ jȩä̧cua̧ to'ija̧'a̧cu̧tä̧ ucuturumä. ⁹ Ja̧'hua̧nö̧tä̧ to'ija̧'a̧cu̧tä̧ jȩchä̧cua̧sä̧ profeta yapare i̧jȩcuä̧chö̧ jähuä topätörömä, ja̧'hua̧ta̧'a̧nö̧ yapare jähuä ji'huätörömä. Jahuätömä Ttö chumöhuäyotö ca̧ca̧cu̧ ttö̧'ȩjo̧mȩmä̧ pȩjo̧co̧tö̧ ttäcuotö, ja̧'hua̧ta̧'a̧nö̧ tti̧mi̧mä̧ juiyacua'a Israel ttö̧ja̧ tti̧mi̧ huȩyu̧tu̧ rutähuä'tä'inä, juhua'atäcu Israel ttö̧ja̧ tti̧rȩjä̧nä̧'i̧nä̧ do'ächiocotö ttäcuotö. ¡Ja̧'hua̧nö̧ jo̧mȩnä̧ Diostä ja̧'a̧ TÖ̧Ä̧NÄ̧HUA̧MÄ̧ pä'ö cu̧huo̧juä̧tu̧cuä̧cua̧sä̧.! ¹⁰ Pi̧yȩ jähuänä, ja̧'hua̧ta̧'a̧nö̧ chumöhuäyotörö 'cä̧tti̧pä̧chö̧nä̧ jȩpö̧mä̧ pä'ätöjä̧: "¡Huȩnȩ juiya'a!" Huȩnȩmä̧ juiyoca'anä, jahuätömä ttoecuäbä aditö redehuanä tuttepäcuotö. ¹¹ Ttoecuäbä tu'epätörö ji'ähui: juäbämä maächäcuäba; ajiya juruhuoya ichäcua'a, Ttömä huȩdä̧cua̧sä̧ ajiya i̧sa̧ppȩ juäbä maächö̧nä̧, ja̧'hua̧ta̧'a̧nö̧ juäbä pparächi'önä kä̧ru̧'coppa juruhuoppa'inä. ¹² Topittö ttoecuäbä maächä̧cua̧'a̧, korotömä ucuturu pättätucuoco, ¿Tȩnȩ ka̧'a̧cuä̧ redähua cutätucuähuamä? ¹³ Jahua'anö ja̧'a̧ TU̧RU̧HUA̧ TTÖÄNÄHUA̧ pi̧yȩ päö: TTÖTÄ chi̧ä̧i̧nä chi'cächäcua̧sä̧ juiyó sä̧ru̧huoppamä, jahua'anö j'a̧tö ajiya'inä suädiäcua'a ido'quiyä'inä ka̧ppȩppȩnö ma̧'a̧cua̧'a̧ chami surútu siepu chicuapä'ö. ¹⁴ Jahuata'anötä̧ TTÖTÄ rȩjȩ käö siepu chicua̧'cua̧sä̧ ucutu ttoepu huaditinätu̧huäbä o'cahuiyämä jahua'anö jȩpu̧ huä 'cä'cotä ttöjö̧nä jȩchä̧cuo̧tö̧. Pa'anötä̧ mo̧tta̧cha̧cuo̧tö,ucutuinä jahuätö o'catoinä ttö'cä̧tȩnätä̧ siepu icuähuotö pähuiähuotöjä.Jahua'anö pä̧i̧ä̧u̧tä̧ ucutumä cu̧huo̧juä̧chi̧cuo̧tö̧jä̧ PIDETÄ ja̧'a̧ päö TU̧RU̧HUA̧MÄ. ¹⁵ Jahuata'anötä̧ TTÖTÄ chujurunä siepu chicua̧'cua̧sä̧ ttoecuäbämä jahuata'anötä̧ jahua'a tuepinätö̧rö̧'i̧nä. Pa'anö pädäcua̧sä̧ ucuturumä: " Ttoecuäbämä täkö huiya'a, tuepinätöpitö'inä toa'a. ¹⁶ Israeltö profetas huinätö'inä toa'a Jerusalén ötö'cö huȩnȩ juiya'a topätöjä päö jihuinätö̧'inä, Huȩnȩmä juiyönä kä̧cuä̧huä̧mä juiya'a! Pa̧'anö̧tä̧ uhuocu jiäu TU̧RU̧HUA̧ TTÖÄNÄ̧HUMÄ." ¹⁷ Ja̧'hua̧nö̧ ja̧'a̧ ucu, ttö̧ja̧sa̧ i̧tti̧, cui'ä i̧jȩcui̧ ötahuiyä ttö̧ja̧ isajuru suronätä̧ jijähuä'cha'a yajutä kamöcuädötä, jahuäjuru jue'epö icu ji'ähuätucuiju. ¹⁸ Ja̧'hua̧nö̧ ja̧'a̧ttö̧ pä'ätucuiju TÖ̧Ä̧NÄ̧HUA̧ Dios pa̧'a̧nö̧ pä'ö: ¡Äyoo ucutuhue märipä pö̧jä̧ta̧ttö̧ 'tö̧'ä̧tuhue cumöca̧ca̧nä̧ cu̧nä̧huä̧tu̧cua̧ pä'ö, ja̧'hua̧ta̧'a̧nö̧ märipä pö̧jä̧ta̧ttö̧ 'tö̧'ä̧tö̧ ppö̧'ä̧tö̧rö̧'inä, tä̧mö̧rö̧'inä ttunä cu̧huä̧nä̧huä̧tu̧cua̧ pä'ö, ja̧'hua̧nö̧ jȩpu̧ ttö̧ja̧ ttuju'cächi'önä, ¿Ucutu ttö chumöhuäyotö ttöjö'cächi'önä jȩ'cuä̧tu̧cua̧'a̧ jitötä jitötä tta̧'cua̧ru̧hua̧nä̧mä̧ ttöjipäcua'a? ¹⁹ Ucutumä suronä jȩpi̧nä̧tö̧jä̧ ucuotäcuähuome'inä cucuotätucupca'a Ttörö'inä, Ttö chumöhuäyotörö'inä harina i̧sa̧ppȩ'inä cumönä̧tä̧ cacuopö ja̧'hua̧ta̧'a̧nö̧ pa̧ppä̧'inä a̧'u̧cu̧nä̧tä̧, ttö̧ja̧ hua'ö tticu juiya'anö̧ huotörö cuä'äö cuicuätucua pä'ö, ja̧'hua̧ta̧'a̧nö̧ ttö̧jö̧ juiya'anö huotörö ttö̧ja̧ pä'ö jȩpä̧'chä̧tö̧jä̧, Ttö chumöhuäyotö yapare huȩnȩ icuähuätucu ttö̧ja̧hui̧ya̧tö̧ pä'ö. ²⁰ Ja̧'hua̧nö̧ ja̧'a̧ttö̧, TTÖ̧Ä̧NÄ̧HUA̧MÄ̧ pa̧'a̧nö̧ pä'ö: Ttömä ku'cocösä ppi̧yu̧rö̧ 'chuttäda'a jä̧'i̧nö̧'a̧nö̧ ucutu märipä jähuäcu jȩpö̧ a̧'cua̧tö̧ ttö̧ja̧ tta̧'cua̧rö̧ 'chucuädätucua pä'ö jȩ'cuä̧tu̧cua̧'a̧mä̧. Ja̧'hua̧nö̧ jo̧mȩttö̧ ttujohuiyämä 'choräu chicuäcuotöjö̧; ttö̧ja̧ ppi̧yu̧rö̧ jä̧'i̧nö̧'a̧nö̧ 'chuttäda jä̧'i̧nö̧'a̧nö̧ 'chu̧cuä̧dä̧tu̧cuä̧u̧rö̧mä̧, Ttömä jahuätörö juorö rä'epö chi̧cuä̧cua̧sä̧. ²¹ Ttömä cu̧huȩnä̧huä̧tu̧cu̧ o̧ta̧mä̧ 'chodipä̧cuä̧u̧jä̧, ja̧'hua̧nö̧ 'cho'ipö chumöhuäyotörömä cumötö̧cu̧ttö̧mä̧ rä'epö chi̧cuä̧cua̧sä̧, yabonö ucutu 'chu̧cuä̧rä̧tu̧cua̧'a̧nä̧ ttu̧ju̧juiyäcua'anö. Ttö ja̧'a̧ CU̧Ä̧NÄ̧HUA̧CU̧TU̧ pä'ö cu̧huo̧juä̧tu̧cuä̧cua̧mä̧. ²² Isopäi'önä ucutumä ttö̧ja̧ adiu jȩpä̧tö̧ tta̧mö̧cuädö yapare ji'ähuä'chö mȩya̧dö̧ icuätöjä̧, Ttömä jahuätörö meya̧dö̧ chicuatö pä̧do̧co̧u̧rö̧, suronä jȩpö̧rö̧mä̧ yabonö̧ jȩpö̧ a̧'cua̧rö̧'inä ki̧'i̧pö̧ juiya pä'ötä ki'opätöjä̧. ²³ Ja̧'hua̧nö̧ jo̧mȩttö̧ ucutumä juhua'a yabonö yapare i̧jȩcuä̧chö̧mä̧ topocotö cuäcuotöjä̧ ja̧'hua̧ta̧'a̧nö̧ yabonömä ji'ähuocotö cuäcuotöjä̧ juhua'amä Ttö chumöhuäyotörömä cumötö̧cu̧ttö̧mä̧ rä'epö chi̧cuä̧cua̧sä̧. Ttö ja̧'a̧ CU̧Ä̧NÄ̧HUA̧CU̧TU̧ pä'ö cu̧huo̧juä̧tu̧cuä̧cua̧mä̧.