¹ TÖ̧Ä̧NÄ̧HUA̧ i̧huȩnȩ ttörö rȩbȩhui̧na̧'a̧ pä'inö ttörö: ² Ttö̧ja̧sa̧ i̧tti̧, ucumä ttö̧ja̧ ra̧huä̧rä̧tö̧ ttö̧'cä̧tȩ kö̧jä̧, jahuätömä totta pä'ömä tti'äremä ku̧nä̧rä̧tö̧, ja̧'hua̧nö̧ ja̧'a̧nä̧ topocotö; ja̧'hua̧ta̧'a̧nö̧ ttä̧ju̧cua̧ pä'ö'inä ttä̧ja̧mä̧ ku̧nä̧tö̧, ja̧'hua̧nö̧ ja̧'a̧nä̧ jahuätömä ä̧ju̧cuo̧co̧tö̧, juhua'amä pä̧i̧cuä̧tö̧ ttö̧ja̧ jo̧mȩttö̧. ³ Ja̧'hua̧nö̧ ja̧'a̧nä̧ ucu cutö'cömä, ttö̧ja̧sa̧ i̧tti̧, korojä̧ra̧'a̧ chä̧tö̧ jö̧nä̧ cuiäremä jo̧mȩnö̧ jȩpö̧ ku̧ni̧ ja̧'hua̧bö̧ jȩpö̧ ku̧nö̧ mo̧ro̧ to̧ttä̧ra̧'a̧nä̧ rä'opi, isopäi'önä korojä̧ rȩjȩra̧'a̧ to̧ttä̧ra̧'a̧nä̧ cui̧'chö̧nä̧ huȩdä̧cua̧, jahuätömä tottö'anö ja̧'a̧cö̧, ttö̧ja̧ jarodätö tta'anä. ⁴ Ucumä cuiäre rä'epö cui̧cuä̧cua̧jä̧ korojä̧ra̧'a̧ ttȩpö̧ mo̧ro̧mä̧ jahuätö to̧ttä̧ro̧mȩttö̧; rä'opächi ni̧pä̧ro̧mȩ to̧ttä̧ra̧'a̧nä̧ ya̧tȩ korojä̧ra̧'a̧ tȩpä̧cu̧ i̧'cha̧'a̧ jä̧'i̧nö̧'a̧nö̧. ⁵ To̧ttä̧ra̧'a̧nä̧ ttoecuäbä kä'co isäju 'tä̧'ȩpi̧ ja̧'hua̧nö̧ jȩpö̧ juäjunä topi. ⁶ To̧ttä̧ra̧'a̧nä̧, cuiäremä cu'upi'ca huȩnä̧u̧ bo'epi ja̧'hua̧ta̧'a̧nö̧ yo̧a'anä rä'epö icuitö. Cui'ä tto'ecui, rȩjȩ to'cu juiyäcua'anö̧, juhua'amä, Israel ttö̧ja̧rö̧ i̧jȩcuä̧ jö̧nä̧tä̧ chu̧ju̧nä̧cu̧ cua'attö̧. ⁷ Ja̧'hua̧nö̧tä̧ jȩpi̧nö̧sä̧, ttörö hueäjita'anötä̧. Ttömä mo̧ro̧ chiäre rä'epinö̧sä̧ korojä̧ra̧'a̧ ttȩpa̧ pä'ö 'cua̧rö̧nä̧ juha'atäcu nipä̧ro̧mȩmä̧ ttoecuäbä kä'co chumönä sa'u isäju 'tä̧'ȩpi̧nö̧sä̧. Chiäremä yodo rä'epinö̧sä̧ ja̧'hua̧nö̧ rä'epömä to̧ttä̧ra̧'a̧nä̧ chu'upi'canä huȩnä̧u̧ bo'epinösä̧. ⁸ Ja̧u̧nu̧ o'ca'a TÖ̧Ä̧NÖ̧HUA̧ mo̧ro̧ päia'a ucuocuinä̧cu̧sä̧, pa̧'a̧nö̧: ⁹ Ttö̧ja̧sa̧ i̧tti̧ Israel ttö̧ja̧mä̧, jahuätö ttö̧ja̧ jarodätömä jä'epätö: ¿Däje jȩ'cuä̧ttö̧? ¹⁰ Ji'ähuitö: TÖ̧Ä̧NÄ̧HUA̧MÄ̧ pi̧yȩ pä'ö: Ja̧u̧ 'cuä̧o̧pä̧cuȩ jiäcuähuämä pähuächa'ató Jerusalénttö ru̧hua̧rö̧'inä, ja̧'hua̧ta̧'a̧nö̧ Jerusalénnä ka̧cuä̧tö̧ o'catoi'önä̧rö̧ juhua'atäcu jahuätö ttippeyänä ka̧cuä̧tö̧ Israel ttö̧ja̧rö̧'inä." ¹¹ Ji'ähui: Ttömä 'cuä̧o̧pä̧cuȩ ucuturu i̧jȩcuä̧ jö̧nä̧tä̧ hua̧sä̧. Ttö jȩchä̧'i̧jö̧mä̧, jitörö'inä ja̧u̧tä̧ jȩä̧cuä̧huä̧cua̧'a̧; jahuätömä ko̧ro̧jä̧ra̧'a̧ tti̧rȩbȩhua̧'a̧ juorö rättopö juiyönä̧tä̧ ttö̧jö̧nä̧rä̧cuo̧tö̧. ¹² Ru̧hua̧ jahuätö jahuätö ttö̧'cä̧tȩ kö̧mä̧ ttiäre ttu'upi'quiyunä yo̧mȩcu̧ ttu̧huä̧du̧huö̧nä̧ u̧huȩnä̧cuä̧u̧, ja̧'hua̧nö̧ ja̧'a̧ ötahuiyä ttoecuäbänä rottopäcuotö. Jahuätömä isäju 'tä̧ttȩpä̧cuo̧tö̧ ja̧'hua̧nö̧ 'tä̧'ȩpö̧ ju̧huȩnȩnä̧tä̧ ttiäre rä'epö tticuäcuotö. Ja̧u̧mä̧ i'ämä tto̧ȩcuä̧rä̧cua̧, ja̧'hua̧nö̧ ja̧'a̧ttö̧ rȩjȩmä̧ topöcö jä̧cua̧. ¹³ Ja̧u̧rö̧ chumapayä setädä chicuäcua̧sä̧, ja̧'hua̧nö̧ chichomenä ja̧u̧mä̧ chumapayä jacuä ȩqui̧pä̧cua̧; ja̧u̧nu̧ o'ca'amä Babilonía ötahuiyära̧'a̧cu̧ chi'cächä̧cua̧, Caldeas ttö̧ja̧ ttidepiyucu, ja̧'hua̧nö̧ ja̧'a̧nä̧ ja̧u̧mä̧ topöcö jä̧cua̧. Ja̧u̧mä̧ ju̧huȩnȩtä̧ hua'ö icuäcua̧. ¹⁴ Ttö'inä jahuätö o'catoi'önä̧ ippeyänä ka̧cuä̧tö̧ ja̧u̧rö̧ ppättädö'anö huotörömä o'cajuiyötä pperetö chi̧cuä̧cua̧sä̧ ja̧'hua̧ta̧'a̧nö̧ umöhuäyotö o'catoi'önä̧rö̧ ja̧'hua̧nö̧ jȩpö̧ o'ca'anä huȩdä̧cua̧sä̧ cuä'ö tticuarö pä'ö. ¹⁵ Ja̧'hua̧nö̧ jo̧mȩnä̧ jahuätömä Ttörömä Ja̧u̧mä̧ TTÖ̧Ä̧NÄ̧HUA̧ ja̧'a̧ pä'ö ttu̧huo̧juä̧cuo̧tö̧, ttö̧ja̧ ttö̧'quȩtȩ pperetö chicuomenämä ja̧'hua̧ta̧'a̧nö̧ ja̧huä̧jä̧ rȩjȩ jä̧ttä̧jä̧ pperetö chi̧cuä̧u̧mä̧. ¹⁶ Ja̧'hua̧nö̧ ja̧'a̧nä̧ yotucu pönärö̧mä̧ curättö'inä, ppäittö'inä ja̧'hua̧ta̧'a̧nö̧ suroju 'cuäopöttö'inä ttö̧ji̧pö̧nä̧ jȩchä̧cua̧sä̧, o'cajuiyönä su̧ro̧tä̧cuä̧huä̧ jitötä jȩtti̧nö̧ Ttö chȩpä̧u̧ tti̧rȩbȩhuä̧jä̧ pönä jittähuäcua'anö Ja̧u̧mä̧ TTÖ̧Ä̧NÄ̧HUA̧ ja̧'a̧ pä'ö." ¹⁷ TÖ̧Ä̧NÄ̧HUA̧ ttönä ucuocumä pä'inö: ¹⁸ "Ttö̧ja̧sa̧ i̧tti̧, Cu̧cuä̧ ye'ecunä̧nö̧ cuiti ja̧'hua̧ta̧'a̧nö̧ ajiyamä yecuecunä ja̧'a̧nä̧ cua̧'cua̧ ro'ecunö ahui. ¹⁹ Ja̧u̧nu̧ o'ca'a Israel ttö̧ja̧rö̧ ji'ähui: TÖ̧Ä̧NÄ̧HUA̧MÄ̧ Jerusalén ötahuiyänä ka̧cuä̧tö̧ ttötö'cömä pi̧yȩ pä'ö ja̧'hua̧ta̧'a̧nö̧ Israel ttö̧ja̧ tti̧rȩjä̧nä̧ ka̧cuä̧tö̧rö̧'inä: "Jahuätömä ye'ecunö ttu̧cuä̧mä̧ ttucuäcuotö ja̧'hua̧ta̧'a̧nö̧ ajiyamä ttö̧'ä̧huö̧ kä̧nö̧ ttahuäcuotö, täcö ja̧huä̧jä̧nä̧ ka̧cuä̧tö̧mä̧ rä'epö icuähuäcuotö, ju̧huȩnȩ ka̧cuä̧tö̧ o'catoi'önä suronä jȩttö̧ jähuänä. ²⁰ Ja̧'hua̧nö̧ ja̧'a̧ttö̧ ötahuiyä ttö̧ja̧cui̧no̧mȩmä̧ toäcua'a ja̧'hua̧nö̧ jo̧mȩnä̧ rȩjȩmä̧ pä'äji jinöta'anö surächächäcua'a; Ja̧u̧mä̧ TTÖ̧Ä̧NÄ̧HUA̧ ja̧'a̧ pä'ö ttu̧huo̧juä̧cua̧'a̧nö̧." ²¹ Pä'äjita'anö, TÖ̧Ä̧NÄ̧HUA̧ ttönä ucuocumä pä'inö: ²² Ttö̧ja̧sa̧ i̧tti̧, ¿Ucumä tta̧'a̧nö̧ pähuätä cu̧ju̧nä̧rä̧ttö̧, Israel ttö̧ja̧ pi̧jä̧nä̧ ka̧cuä̧tö̧mä̧ pä'ätö: Recuó mo̧ro̧ 'cuäopa'a ja̧'hua̧ta̧'a̧nö̧ i̧jȩcuä̧chi̧nö̧mä̧ hueyecua'a? ²³ Jaa̧'hua̧nö̧ ja̧'a̧ttö̧ Jahuätörö ji'ähui: TÖ̧Ä̧NÄ̧HUA̧MÄ̧ pi̧yȩ pä'ö: Pa̧'a̧nö̧ pättömä yabonömä pättä'chu juiyönä jȩchä̧cua̧sä̧ ja̧'hua̧ta̧'a̧nö̧ Israel ttö̧ja̧'i̧nä̧ pä'äjita'anömä pä'ocotö ttäcuotö. Jahuätörö ji'ähui: Mo̧ro̧mä̧ täcö tö'cöhuächäja'a i̧jȩcuä̧chi̧nö̧mä̧ ji̧yȩcu̧pö̧nä̧ iso juoäcua'a. ²⁴ Ja̧'hua̧nö̧ ja̧'a̧ttö̧ Israel ttö̧ja̧ ttö̧'cä̧tȩttö̧mä̧ ttesehuächi'önä yaparetä i̧jȩcuä̧chö̧mä̧ ja̧'hua̧nö̧ jo̧ca̧'a̧ttö̧'i̧nä̧ märipänä toäcuähuämä yabonömä i̧jȩcuä̧cho̧ca̧'a̧ jä̧cua̧'a̧. ²⁵ ¡Juhua'amä Ttötä TTÖ̧Ä̧NÄ̧HUA̧TÄ̧ chucuocua'attö̧ ja̧'hua̧ta̧'a̧nö̧ Ttö chucuocumä jȩpö̧sä̧. 'Cuäpäcua'a pä'ö jidähuäjimä recui'oca'a jä̧cua̧'a̧. ¡Pi̧yȩmä̧ ucu cu̧mo̧ro̧ chu̧cuo̧cuä̧cua̧sä̧, jarodäcuähuä ttö̧ja̧ ja̧'hua̧nö̧ ja̧'a̧ttö̧ chucuocuäjimä jȩchä̧cua̧sä̧! Pi̧yȩ ja̧'a̧ TÖ̧Ä̧NÄ̧HUA̧ huäjönä ji'äu icumä." ²⁶ Pä'äjita'anö, TÖ̧Ä̧NÄ̧HUA̧ ttönä ucuocumä pä'inö: ²⁷ Ttö̧ja̧sa̧ i̧tti̧ topittö, Israel tttö̧ja̧mä̧ pä'ä'ijätö: Ja̧u̧n i̧jȩcuä̧chö̧ toömä jitätämä 'cuäopocö jä̧cuȩ, ja̧u̧mä̧ yodoji 'cuäopäcuȩ ji'äu. ²⁸ Ja̧'hua̧nö̧ ja̧'a̧ttö̧ jahuätörö ji'ähui: TÖ̧Ä̧NÄ̧HUA̧MÄ̧ pi̧yȩ pä'ö: Chucuocumä recui'oca'a jä̧cua̧'a̧, ja̧'hua̧nö̧ ja̧'a̧nä̧ chucuocuäjimä isopäi'önätä̧ jä̧cua̧'a̧." Pi̧yȩ ja̧'a̧ TÖ̧Ä̧NÄ̧HUA̧ huäjönä ji'äu icumä."