¹ Korotö umötö bö̧o̧sa̧tö̧ Israelttö ichäjätö ttörö topö jädepiyatö pä'ö TU̧RU̧HUA̧ Diosrö. ² Ja̧'hua̧nö̧ ja̧'a̧ TU̧RU̧HUA̧ Dios i̧huȩnȩ rȩbȩhui̧na̧'a̧ Ttörö pa̧'a̧nö̧ pä'ö. ³ Ttö̧ja̧sa̧ i̧tti̧ jahuätö umätö̧ tami'quinä ȩpä̧tö̧ yapare ttö̧ä̧nä̧huo̧tö̧rö̧ ja̧'hua̧nö̧ ja̧'a̧ttö̧ tti'ämä muchächinä̧u̧ surojönä̧tä̧ jȩttö̧nä̧. ¿Ja̧'hua̧nö̧ ja̧'a̧mä̧ ja̧'a̧tä̧ tocha'a jahuätö jä̧ttȩpä̧ra̧'a̧nä̧. jahuätömä Ttörö pätta pä'ö ja̧'a̧? ⁴ Ja̧'hua̧nö̧ ja̧'a̧ttö̧ pi̧yȩ ji'ähuitö jahuätörö ja̧'hua̧ta̧'a̧nö̧ pä'itö: TU̧RU̧HUA̧ Diosmä pi̧yȩ pä'ötó: O'catoi'önä umätö̧ Israel ojusodettö ttamiso'quinä ku̧nä̧rä̧tö̧mä̧, ja̧'hua̧nö̧ ja̧'a̧nä̧ ttamiso'quinä ido'qui jä̧'i̧nö̧'a̧nö̧ ttäcuotö surojönä ttamöcuäda'attö ttö̧ä̧nä̧hua̧ i̧jȩpö̧nä̧ ja̧'hua̧ta̧nö̧ ju̧huȩnȩ o'ca'a ichätö profeta ö̧jo̧mȩcu̧. Ttö Cu̧ru̧hua̧mä̧ chä̧dä̧tä̧cua̧sä̧ yapare ttö̧ä̧nä̧huo̧tö̧ jö̧nä̧. ⁵ Ttö pi̧yȩ jȩchä̧cua̧sä̧ pä'äjita'anö ppädädäcua'anö̧ cuami iso'quinämä Israelttö 'cä̧'ȩcuä̧chi̧nö̧ Ttöttö yapare ttö̧ä̧nä̧huo̧tö̧. ⁶ Ja̧'hua̧nö̧ ja̧'a̧ttö̧ Israel ttö̧ja̧rö̧mä̧ ji'ähui: TÖ̧Ä̧NÄ̧HUA̧MÄ̧ pi̧yȩ pä'ö: ¡Cuamöcuädätucu pärou icuätucui ja̧'hua̧ta̧'a̧nö̧ cu̧ä̧nä̧huo̧tö̧ tätähuä o'cattömä 'cä̧'i̧pä̧chä̧tu̧cui̧! O'cajuiyönä su̧ro̧tä̧cuä̧huä̧ jȩ'cuä̧'i̧jä̧tu̧cu̧ttö̧mä̧ cui'ätucumä kärächi'ätucui. ⁷ Isopäi'önä Israel ttö̧ja̧ttö̧ yotute ja̧'hua̧ta̧'a̧nö̧ ichäcuähuotö Israel ttö̧ja̧ tti̧rȩjä̧nä̧ ka̧cui̧pö̧ Ttörö icuipö, a̧'cua̧nä̧ tätähuä o'catä ö̧ä̧nä̧hua̧ jö̧nä̧ juo'epörömä ja̧'hua̧ta̧'a̧nö̧ ido'qui suronä jȩ'cu̧nä̧ ttoepo'qui cumönä cuä'ca jo̧mȩ rutähuöjä̧ ja̧'hua̧nö̧ jȩpö̧ profeta ö̧ja̧'a̧cu̧ 'chä̧nö̧ usu cuichäcusä, Ttötä CU̧'Ä̧NÄ̧HUA̧TU̧CU̧MÄ̧ Ttötätä chä̧dä̧tä̧cua̧sä̧. ⁸ Ttömä ja̧u̧cu̧ to'ija̧'a̧cu̧ jö̧nä̧ to̧chä̧cua̧sä̧ ja̧u̧rö̧mä̧ ja̧'hua̧ta̧'a̧nö̧ i̧jȩcuä̧ jö̧nä̧tä̧ pärotö chicuäcua̧ juhua'atäcu ji̧yȩtȩ pähuä jö̧nä̧tä̧, ja̧hua̧ta̧'a̧nö̧ jahuätö ttö̧ja̧ttö̧mä̧ si'epö chi̧cuä̧cua̧ ja̧'hua̧nö̧ jo̧mȩnä̧ ucutumä, Ttörömä TÖ̧Ä̧NÄ̧HUA̧ ja̧'a̧ pä'ö cu̧huo̧juä̧cuo̧tö̧jä̧. ⁹ Ya̧tȩ profeta ttöyaparehuäcumä, yaparetä ji'äu ja̧'hua̧nö̧ ja̧'a̧ Ttö, TTÖ̧Ä̧NÄ̧HUA̧ ja̧'a̧ ja̧u̧ profetarö uyapareunä jȩpä̧ji̧mä̧; Ttömä ja̧u̧rö̧ to'ija̧'a̧cu̧ jȩchä̧cua̧sä̧ ja̧'hua̧ta̧'a̧nö̧ Israel ttö̧ja̧ ttö̧jo̧mȩttö̧mä̧ si'epö chi̧cuä̧cua̧. ¹⁰ Jahuätömä surojö jȩttä̧ji̧tä̧ huȩnȩcuä̧chä̧cuo̧tö̧; profeta suronä jȩä̧ji̧'i̧nä̧ ja̧'hua̧ta̧'a̧nö̧ ja̧u̧ suronä jȩä̧ji̧ jä̧'ȩpä̧rä̧ji̧rö̧'i̧nä̧ huȩnȩcuä̧chä̧cua̧'a̧. ¹¹ Pa̧'a̧nö̧ jo̧mȩnä̧ Israel ttö̧ja̧mä̧ Ttö̧öttömä otomä 'cä̧'i̧pä̧cho̧co̧tö̧ ttäcuotö ja̧'hua̧ta̧'a̧nö̧ surojö jȩttä̧ji̧nä̧mä̧ jitötä'inä tta̧mö̧nä̧mä̧ surojue'ecuocotö ttäcuotö. Jahuätömä chumöhuäyotö jö̧nä̧tä̧ ttäcuotö ja̧'hua̧nö̧ ja̧'a̧ttö̧ Ttömä TTÖ̧Ä̧NÄ̧HUA̧ jö̧nä̧tä̧ chä̧cua̧sä̧. "Pi̧yȩ pa̧'a̧nö̧tä̧ TÖ̧Ä̧NÄ̧HUA̧MÄ̧ huäjuetö icu ji'ähuö." ¹² Ja̧u̧nu̧ o'ca'a TÖ̧Ä̧NÄ̧HUA̧MÄ̧ pa̧'a̧nö̧ ucuocu päinä̧cu̧sä̧: ¹³ Ttö̧ja̧sa̧ i̧tti̧, ja̧huä̧jä̧nä̧ ka̧cuä̧tö̧ Ttörö to'ija̧'a̧cu̧ suronä jȩttö̧ttö̧mä̧ jahuätörö Ttö to'ija̧'a̧cu̧ jȩpö̧, ttu̧cuä̧'inä 'chodipöttömä ja̧'hua̧ta̧'a̧nö̧ ppäi ttuhuähuä huedöttömä̧ juhua'atäcu ttö̧ja̧rö̧'i̧nä̧ isotörö'inä si'epö chicuttömä; ja̧'hua̧nö̧ jo̧mȩnä̧ ¹⁴ suro pitö huämetucuä umätö: Noé'inä, Daniel'inä ja̧'hua̧ta̧'a̧nö̧ Job'inä pi̧jä̧nä̧ ttö̧ja̧cu̧ttö̧mä̧ tta̧mö̧nä̧ tta̧'cua̧rö̧mä̧ toe'ächö juiyö'anö ja̧'a̧ adihuomenä tt'ja̧cua̧'a̧ttö̧. "pa̧'a̧nö̧tä̧ TÖ̧Ä̧NÄ̧HUA̧MÄ̧ huäjuetö icu ji'ähuö." ¹⁵ Huedöttömä de'a i̧sa̧ pä̧i̧cua̧rö̧ ja̧huä̧jä̧ rȩjȩra̧'a̧ juhua'amä ja̧'hua̧nö̧tä̧ tti̧tti̧mö̧ toönä̧tä̧ ttö̧ji̧pä̧cuo̧tö̧ ju̧huȩnȩmä̧ ya̧tȩ'i̧nä̧ cuäopö juiyäcua'anö jahuätö isotörö ye'ecu 'cuäopö juiyäcua'anö. ¹⁶ Ja̧'hua̧nö̧ ja̧'a̧ pitö huämetucuä umätö ttö̧ji̧nö̧ttö̧'i̧nä̧ jahuätötä ttö̧'cä̧tȩnä̧, ja̧'hua̧nö̧tä̧ huäjuetö icusä Ttö TÖ̧Ä̧NÄ̧HUA̧ Diosmä, juhua'attö ttö̧ji̧pö̧nä̧mä̧ jȩtö̧ juiyö'anö ji̧na̧'a̧ jitötä tti̧tti̧mö̧ u̧mä̧tö̧'i̧nä̧ ja̧'hua̧ta̧'a̧nö̧ nä̧tö̧'inä; jitötä tta̧mö̧nä̧tä̧'i̧nä̧ ttö̧ji̧pö̧ juiyönätä ji̧na̧'a̧, ja̧'hua̧nö̧ ja̧'a̧ttö̧ ja̧huä̧jä̧ rȩjȩmä̧ do'opö icuähuä jä̧'i̧nö̧'a̧nö̧tä̧ pärohuächina'a. ¹⁷ Ttö curä'chunä tturohuähua pä'ö i'cächö pädöttömä: Curä'chu, ja̧huä̧jä̧ rȩjȩnä̧ täi ja̧'hua̧ta̧'a̧nö̧ ta̧ju̧cuäyotörö si'epö icui juhua'atäcu de'a isotö juȩnȩ ka̧cuä̧tö̧rö̧'inä. ¹⁸ ja̧'hua̧ta̧'a̧nö̧, pitö huämetucuätä'inä ja̧huä̧jä̧ rȩjȩnä̧ ttö̧jö̧ttö̧mä̧, Ttö chö̧jö̧ta̧'a̧nö̧. ¹⁹ Ja̧'hua̧nö̧ ja̧'a̧ Ttömä huȩdä̧cua̧sä̧, märichei huȩdä̧cua̧sä̧ ja̧huä̧jä̧ rȩjȩra̧'a̧, ja̧'hua̧nö̧ ja̧'a̧ttö̧ chö̧'ä̧i̧ dadepä̧cua̧sä̧ pperecuächönä pä'ö hua'arenä̧tä̧ ja̧'hua̧nö̧ta̧'a̧nö̧ jȩchä̧cua̧sä̧ 'coru juottächönä umätö ja̧'hua̧ta̧'a̧nö̧ de'a isotörö'inä. ²⁰ Ja̧u̧nu̧ pä̧nä̧ ju̧huȩnȩ ttö̧ja̧cu̧ttö̧mä̧ Noé, Daniel ja̧'hua̧ta̧'a̧nö̧ Job pi̧jä̧nä̧, ttö̧ cusä, pä'ö TU̧RU̧HUA̧ Dios, jahuätö'inä jȩpo̧co̧tö̧ ppättäda pä'ö'inä tta̧mö̧nä̧ tti̧tti̧mö̧rö̧'i̧nä̧; jitöttö tta̧mö̧nä̧ tä̧ ttö̧ji̧pö̧ ja̧'hua̧nö̧tä̧ jȩa̧'a̧ adiu jȩtta̧'a̧ttö̧. ²¹ Ja̧'hua̧nö̧ ja̧'a̧ Ttö Cu̧ru̧hua̧ Dios pä'ösä pi̧yȩ: Ttö ja̧'hua̧nö̧ ja̧'a̧nä̧ ju̧huȩnȩ abonä̧nö̧ surojö pa̧ja̧cuä̧nö̧ ro̧ȩcuä̧ huȩdä̧cua̧sä̧ ppäi ttuhuähuä, curä rohuähuäcuähuä'inä ja̧'hua̧nö̧ ja̧'a̧ttö̧ ubo ttö̧ja̧sa̧'i̧nä̧ ja̧'hua̧ta̧'a̧nö̧ de'a isotö'inä totte'äcuotö. ²² ¡Ja̧'hua̧nö̧ ja̧'a̧nä̧! ji̧yȩtȩ korojuäi ki̧'i̧pä̧cua̧'a̧ ju̧huȩnȩnä̧mä̧, curättö ka̧cui̧pä̧jä̧tö̧mä̧ rättopäcuotö tti̧tti̧mö̧ nä̧tö̧cu̧, tti̧tti̧mö̧ u̧mä̧tu̧cu̧, jahuätö ucucu ttichomenämä, ucutä to'cuäcua̧jä̧, jahuätö ttö̧jö̧ ja̧'hua̧ta̧'a̧nö̧ jȩtö̧'i̧nä̧. Juhua'atäcu cua̧'cua̧tta̧cuȩcuä̧tu̧cu̧ adiunä cuesehuätucunä ro̧ȩcuä̧ttö̧'i̧nä̧ Ttö huedinö'anö Jerusalénra̧'a̧, ja̧'hua̧ta̧'a̧nö̧ korotö o'catoi'önä̧rö̧ ttö hue'inösä̧ ttö̧ja̧ ttabojähuä. ²³ ¡Curä ki̧'i̧pi̧nä̧tö̧ ttesehuächi'äcuotö tta̧mö̧nä̧ 'chä̧nö̧ topö ja̧'hua̧ta̧'a̧nö̧ jȩtto̧mȩttö̧'i̧nä̧, o'cajuiyönä cu̧huä̧juä̧cuo̧tö̧jä̧ ucutumä pi̧yȩmä̧ ttö jȩchi̧nö̧mä̧ ttaboi̧ya̧ jö̧nä̧ jahuäjuru, jȩcho̧cö̧mä̧ yapare jähuätä jä̧cua̧! pa̧'a̧nö̧tä̧ pä'ötó TU̧RU̧HUA̧ Diosmä.