¹ Ja̧'hua̧nö̧ ja̧'a̧ Israel ttö̧ja̧ttö̧ tä̧mö̧ huotörö huotta pä'ö hue'inö, Jacob minä 12 huotö ahuaruhä 'cotöttö jue'ipätöttö'inä, ttahuaruhuättö ucuo ttö̧ja̧rö̧'i̧nä̧, Jerusalénra̧'a̧ttö̧ i̧sä̧ca̧ ttȩma̧ja̧ pä'ö David idepiyu Sión päi'önä. ² O'catoi'önä Israel ttö̧ja̧ttö̧ u̧mä̧tö̧mä̧ ru̧hua̧ Salomón ö̧'o̧mȩcu̧ 'chä̧hui̧'i̧nä̧tö̧ ja̧u̧nö̧mä̧ Etanim kä̧hua̧nä̧ ji̧na̧'a̧ ttö̧jä̧pö̧ttö̧ to'cherenö jo̧mȩnä̧ ja̧u̧nu̧mä̧ pä'cäri tteseu mo̧ro̧ ji̧na̧'a̧. ³ Yotäcu Israel ttö̧ja̧ttö̧ tä̧mö̧ jö̧nä̧ huotö kä̧jä̧tö̧mä̧ Dios i̧huȩnȩ jiäcuähuä ttö̧ja̧'i̧nä̧ hueähuä huȩnȩ ȩcä̧ca̧ cä'epinätö. ⁴ Levitas'inä Dios i̧huȩnȩ jiäcuähuä ttö̧ja̧'i̧nö̧ Dios ö̧jo̧ca̧ ippeyenä ka̧cu̧'i̧nä̧ o̧'ta̧hui̧yä̧ ucuo jähuä ka̧cu̧mä̧ ȩpi̧nä̧tö̧. ⁵ Ru̧hua̧ Salomóncu̧ o'catoi'önä Israel ttö̧ja̧ ji̧nä̧ yo̧mȩtȩ pä'i'ätucumä Dios ö̧jo̧ca̧ ä'canä ka̧cui̧nä̧tö̧, ovejastö̧rö̧'i̧nä̧ pä̧cä̧yu̧rö̧'i̧nä̧, ku icu iyähuä jȩpi̧nä̧tö̧. Juä̧nȩmä̧ ttö̧ja̧mä̧ juiyo recuinätö̧ pa̧ja̧cuo̧mȩ'i̧nä̧ juiyönätä̧. ⁶ Dios i̧huȩnȩ jiäcuähuä ttö̧ja̧mä̧ Dios ö̧jo̧ca̧ do'ädö ku̧ni̧nä̧tö̧ tu̧ru̧hua̧ ojusode ji̧nä̧ isocu surojötttö 'cäecuo̧ca̧ jacuä, Dios umöhuäyotö querubines ttujuabiyä dea'a ku̧ni̧nä̧tö̧. ⁷ Juätö querubinesmä ttujuabiyä sedetanö ka̧cui̧nä̧tö̧ juo̧ca̧ huä̧mȩ a̧ttä̧rö̧nä̧, hua̧mȩmä̧ dauhuiyä o̧'qui̧yä̧ hui̧na̧'a̧. ⁸ Ja̧u̧ dauhuiyä o̧na̧mä̧ rä'epö tticui'änö surojöttö 'cä̧ȩcuo̧ca̧nä̧ ja̧'hua̧nö̧ ja̧'a̧nä̧ toäcuähui'ocö jinö u̧mi̧ra̧'a̧ päi'ö́nämä jitä pi̧yȩ mo̧ro̧ jubö ja̧'hua̧nö̧tä̧ ki̧'i̧na̧'a̧. ⁹ Juo̧ca̧ jacuä korojuäi'inä juiyina̧'a̧, Moisésrö inä obi̧ tobir iyäcu ȩni̧nö̧tä̧ ȩqui̧na̧'a̧ Horebttö tu̧ru̧hua̧ Dios Israel i̧tti̧mö̧rö̧ ppädäcua'a päinöta'anötä̧ Egiptottö rättopinö. ¹⁰ Dios i̧huȩnȩ jiäcuähuä ttö̧ja̧ surojöttö 'cä̧ȩcuo̧ca̧ttö̧ rättopäji o'ca'a isoppa teoppa mo̧ro̧jä̧ra̧'a̧ttö̧ mȩyȩhui̧'ö̧ Dios ö̧jo̧ca̧ a̧ttä̧chi̧'i̧na̧'a̧. ¹¹ Dios i̧huȩnȩ jiäcuähuä ttö̧ja̧ isoppa mo̧ro̧jä̧ra̧'a̧ttö̧ mȩyȩhui̧'o̧mȩnä̧mä̧, ttiäre iyähuä'inä ttaditö juiyönä̧tä̧ ji̧na̧'a̧ juoppa a̧ttä̧chi̧'ä̧ja̧'a̧ttö̧. ¹² Salomónmä pä'inö: Chu̧ru̧hua̧ ucumä isoppa yo̧ä̧sa̧ joppanä chö̧jä̧cua̧sä̧ pä'inöjä̧. ¹³ Jitämä, täcö cuojusodemä aditäjisä, juodenämä 'cuäopönätä̧ cu̧jä̧cua̧jä̧. ¹⁴ Ja̧u̧nu̧ o'comenämä ru̧hua̧mä̧ o'ca'acu topö Israel ttö̧ja̧rö̧ ä'canä ka̧cuä̧tö̧rö̧'i̧nä̧ topö adiunä pähuänä pä'inö. ¹⁵ Pä'inö: tesehuätucua Israel ttö̧ja̧ ttu̧ru̧hua̧ Diosrötä chä'o David minärö ucuocuinö'anötä jȩpä̧ji̧ chä'orömä pa̧'a̧nö̧ pä'inö. ¹⁶ Egipto rȩjȩttö̧ räépö chicuinäu̧ttö̧mä̧ ya̧tȩrö̧'i̧nä̧ ȩmä̧cö̧ pinösä̧ ttö chojusode aditäcua̧rö̧mä̧, ja̧'hua̧nö̧ ja̧'a̧nä̧ chumöhuäya̧ Davidrötä ȩmi̧nö̧sä̧ ru̧hua̧ ö̧ja̧ pä'ö'inä Israel ttö̧ja̧ ttu̧ru̧hua̧ päi'önä. ¹⁷ Chä'o David amiso'quittötä esehuäri̧nö̧, tu̧ru̧hua̧ Dios ojusode adita pä'ömä. ¹⁸ Ja̧'hua̧nö̧ ja̧'a̧nä̧ Diosmä ttö chä'o Davidrö pä'inö. Ttö chojusode cuadita pä'ö cuȩsȩhuä̧rö̧mä̧ adihua'a. ¹⁹ Ja̧'hua̧nö̧ ja̧'a̧nä̧ ucumä ttö chojusodemä aditocö cuä̧cua̧jä̧, ucu cui̧tti̧ttö̧ ya̧tȩ aditäcua̧ ttö chojusodemä. ²⁰ Tu̧ru̧hua̧ Diosmä chä'o Davidrö ucuocu päinöta'anö päji, uruhuonä oinomemä ttötä pä̧mä̧di̧nö̧sä̧, ucurutä ucuotö jȩä̧cuä̧huode'inä aditäjisä. ²¹ Juode jacuä tu̧ru̧hua̧ ö̧jo̧ca̧'i̧nä̧ rötinösä̧, Egipto rȩjȩra̧'a̧ttö̧ rä'epö icuinö, jueunä pähuä päinö'a̧nö̧tä̧. ²² Ja̧u̧nu̧ o'comenä Salomónmä tu̧ru̧hua̧ Dios ä'ca jo̧mȩ i̧sa̧rö̧ ku icu juä̧ca̧ äcanä kä̧mä̧di̧nö̧, o'catoi'önä Israel ttö̧ja̧ ttä'ca jo̧mȩttö̧, u̧mö̧ mo̧ro̧jä̧ra̧'a̧cu̧ cä'epinö. ²³ Pa̧'a̧nö̧ pä'inö: Israel ttö̧ja̧ ttu̧ru̧hua̧ Dios ucu'anö hua̧mä̧ ka̧ra̧mä̧ toa'a mo̧ro̧jä̧'i̧nä̧ pi̧jä̧ dea'a'inä kö̧ päcumä jueötä jȩpö̧jä̧, chumöhuäyotö huotörömä, ucumä pa̧ja̧cuo̧mȩ juiyönätä̧ repecu i̧jȩcuä̧ i̧sä̧jä̧, ttamiso'qui jacuättö ucunätä̧ 'chä̧tu̧ru̧mä̧. ²⁴ Ttö chä'o David cumöhuäya̧ pinörö̧mä̧ iso jönä päcuinöta'anö jȩpi̧nö̧jä̧, ucuocu päcuinö'anö cumönä me'ö̧ isopäi'önätä̧ jȩpö̧jä̧ pi̧yȩ mo̧ro̧ jubumä. ²⁵ Jitämä Israel ttö̧ja̧ ttö̧ä̧nä̧hua̧ Diosjä̧ ttö chä'o Davidrö päcuinöta'anötä̧ jȩpi̧. Pa̧'a̧nö̧ pä'inöjä̧: Ucu cui̧tti̧mö̧ chä̧'ca̧nä̧ ttu̧'ȩpä̧rö̧nö̧ tti̧'chö̧ttö̧mä̧, ucu cui̧'chä̧'i̧jö̧ta'anö, yorö'iso ucu cui̧tti̧mö̧ttö̧ Israel ttö̧ja̧rö̧ ruhuo huetta pä'ömä hueyecuoca'a jä̧cua̧'a̧. ²⁶ Ja̧'hua̧nö̧ ja̧'a̧ jitämä, Israel ttö̧ja̧ Ttu̧ru̧hua̧ Diosrö, jä'epösä chä'o cu̧mö̧huä̧ya̧ Davidrö jȩchä̧cua̧sä̧ päcuinö jinö, iso juoäcua'anö. ²⁷ ¿Isopäi'önä ja̧'a̧ tä̧ji̧ pi̧jä̧ huä̧mȩ ö̧ja̧cua̧'a̧mä̧? ji̧'qui̧cha̧nö̧'i̧nä̧ mo̧ro̧ji̧yä̧ ju'toju 'chu̧huä̧ro̧co̧cu̧jä̧, ttö chaditnädenämä cu̧ju̧ juiyö'anötä̧ hua̧jä̧. ²⁸ O'cajuiyönä̧tä̧ ttö cumöhuä̧ya̧ jädepömä ppä̧cuä̧dä̧cua̧jä̧, chu̧ru̧hua̧ Dios, ttö cumöhuä̧ya̧ cuä'ca jo̧mȩttö̧ huopönö jädepömä ä̧ju̧cu̧jä̧. ²⁹ 'Cuäopönätä̧ mo̧ro̧'i̧nä̧ yodo'inä to̧pä̧rö̧ kö̧jä̧ pode isode huä̧mȩ'i̧nä̧ jacuä'inä, ucumä pä'inöjä̧: "Ttö chimimä kä̧cua̧'a̧" ttö cumöhuä̧ya̧ poruttötä jädepömä ä̧ju̧cu̧jä̧. ³⁰ Ja̧'hua̧nö̧ ja̧'a̧ttö̧mä̧ ttö cumöhuä̧ya̧ jädepömä ä̧ju̧cu̧jä̧, cuahuaruhuä Israel ttö̧ja̧ jättepö'inä, juätömä porötä jättepäcuotö, ucumä cu̧jo̧mȩttö̧tä̧ cuä̧ju̧cuä̧cua̧jä̧, mo̧ro̧ji̧yä̧ttö̧ cuä̧ju̧cu̧ttö̧mä̧ suronä jȩttö̧mä̧ unichi'i. ³¹ Ya̧tȩ a̧hua̧ru̧hua̧rö̧ suronä jȩpä̧ji̧'ca̧ iso pähuänä, cuä'ca jo̧mȩ i̧sa̧ ucuoja ku icu iyähuomȩttö̧ pä̧cua̧. ³² Ucumä mo̧ro̧jä̧ra̧'a̧ttö̧ ä̧ju̧cu̧ jȩ'cuä̧cua̧jä̧ cumöhuä̧ya̧rö̧ suronä jȩpö̧jä̧ pä'ö ucuocuttömä, ja̧u̧rö̧mä̧ suronä jȩä̧ji̧ a̧'u̧cuä̧ ro̧cuȩpä̧cua̧jä̧. ³³ Ucu cumöhuäyotö Israel ttö̧ja̧ suronä jȩttä̧ji̧ micuä ttaboiyotö suronä jȩpä̧cuä̧huo̧tö̧ ttö̧jo̧mȩnä̧, pä'äjita'anö ucu cuiminä suronä jȩttä̧ji̧ jä'epö ttichäcuotö pode cuojusodettö. ³⁴ Ucumä mo̧ro̧jä̧ra̧'a̧ttö̧ ä̧ju̧cu̧mä̧ suronämä jȩ'cui̧yä̧cua̧jä̧ cuahuaruhuä Israel ttö̧ja̧rö̧mä̧, ttä̧do̧tö̧ mi̧nä̧rö̧ cuiyinäjä̧ra̧'a̧ ppa̧cuä̧dä̧cua̧jä̧. ³⁵ Ucuru suronä jȩtto̧mȩnä̧ mo̧ro̧'i̧nä̧ mu̧ȩcuä̧chö̧ ajiya'inä ichö juiyönätä jö̧ttö̧mä̧ pä'äjita'anö pocu cuojusodettö cui̧mi̧nä̧ jä'epö ttichäcuotö ttidepänä suronä jȩttä̧ji̧ 'cuäopa pä'ö. ³⁶ Ucumä mo̧ro̧ji̧yä̧ttö̧ cuä̧ju̧cuä̧cua̧jä̧, cumöhuäyotö suronä jä̧ttä̧ji̧mä̧ ro̧cuȩpö̧ jui̧yä̧cua̧jä̧ cuahuaruhuä Israel ttö̧ja̧rö̧mä̧, jueö mänänä tti̧'chö̧nä̧tä̧ ocuipä̧cua̧jä̧, ajiya'i̧nä̧ ichönätä̧ jȩ'cuä̧cua̧jä̧ rȩjȩ cuiyinäjä̧nä̧mä̧. ³⁷ Pi̧jä̧ttö̧ päi rȩbȩu̧ttö̧mä̧; suroju 'cuäopäcua'a tti'ettiyunä mä̧rä̧cä̧yu̧'i̧nä̧, ä̧ca̧u̧'i̧nä̧ ttucuäcuotö ttaboiyotö'inä cuahuaruhuärö tti̧rȩjä̧ 'chottipäcuotö, ttötahuiyä jä̧'i̧jo̧mȩttö̧ kä̧nö̧, koro tottocö jä̧'i̧jö̧'i̧nä̧ 'cuäopäcua'a. ³⁸ Ja̧u̧nu̧ o'comenä cuahuaruhuä Israel ttö̧ja̧ suroju 'cuäopä̧u̧ pode cuojusodettö ttumö cä'epö jättepäcuotö. ³⁹ Ucumä mo̧ro̧jä̧ kä̧nö̧ cuäju̧cuä̧cua̧jä̧, suronämä jȩ'cu̧jui̧yä̧cua̧jä̧, ya̧cu̧nä̧rö̧ jȩttä̧'i̧jö̧ a̧'u̧cuä̧tä̧ cui̧yä̧cua̧jä̧, ucutä ja̧'a̧ttö̧ ttö̧ja̧ ta̧mi̧so'qui jacuä huo̧jua̧mä̧. ⁴⁰ Ja̧'hua̧nö̧ ja̧'a̧ttö̧ ttä̧do̧tö̧ mi̧nä̧rö̧ cuiyinäjänämä ye'ecunätä ttö̧ja̧ pä'ö ja̧,a̧. ⁴¹ Ja̧'hua̧nö̧ ja̧'a̧nä̧ i̧chä̧cuä̧hua̧'i̧nä̧ cuahuaruhuä Israel ttö̧ja̧ huocotö ja̧'a̧nä̧ ko̧ro̧jä̧ rȩjȩra̧'a̧ttö̧ i̧chä̧cua̧ ucu cuiminämä. ⁴² Buo cuimi ttä̧ju̧cuo̧mȩnä̧ cumöpi̧yä̧'i̧nä̧ cuojohuiyä'inä cujuru ttä̧ju̧cuo̧mȩnä̧, podera̧'a̧ttö̧tä̧ jä'epö ttichäcuotö. ⁴³ Ucumä mo̧ro̧ji̧yä̧nä̧ cu̧mȩttö̧ cuä̧ju̧cuä̧cua̧jä̧ o'catoi'önä ucuru huopönö jä'epätörömä ppäcuädäcua̧jä̧, ja̧'hua̧nö̧ o'cajuiyönä ppäcuädomenä ttu̧huo̧juä̧cua̧jä̧, Israel ttö̧ja̧ ucuru ttucuotö'anötä̧ ttucuotäcuotö pode ttö chaditodera̧'a̧tä̧ ucuru jä'epö ttichäcuotö. ⁴⁴ Cuahuaruhuä ucutä huecuä̧mä̧nä̧ 'chä̧nö̧ ttaboiyotörö rohuäu tti̧'chö̧ttö̧mä̧, jua'attö ötahuiyäcu kärächi'ö jättepäcuotö ucu cui̧mi̧nä̧, ttö chaditinode cuojusodettö. ⁴⁵ Ucu mo̧ro̧ji̧yä̧nä̧ kä̧nö̧ cuä̧ju̧cuä̧cua̧jä̧ jättepömä jitörötä 'cuäopömä ppä'ädi. ⁴⁶ Cuä'ca jo̧mȩttö̧ suronä jȩttö̧ttö̧mä̧ (¿Ya̧tȩ'i̧nä̧ suronä jȩpo̧cö̧mä̧ toa'a tä̧ji̧) jahuätörömä cu̧ra̧huä̧ra̧'a̧nö̧ ta̧ji̧, ttaboiyotörö iyö icu tti̧rȩjä̧ra̧'a̧ ttȩmi̧pö̧nä̧. ⁴⁷ Jahuätö jitörötä ttȩmi̧pi̧nä̧jä̧ra̧'a̧ ppa̧'a̧di̧'ö̧, pärou icu ucurutä jättepöttömä pa̧'a̧nö̧ pä'ö chu̧ru̧hua̧ ucu cuä'ca jo̧mȩttö̧ suronä jȩpä̧jä̧tö̧jä̧. ⁴⁸ Ttamiso'qui jacuä'inä, tta̧mö̧cuädönä'inä pärou icu tta̧mö̧cuädöttömä ttaboiyotö tti̧rȩjä̧ra̧'a̧ttö̧, jua'attö kä̧nö̧ ttä̧do̧tö̧ mi̧nä̧rö̧ cuiyinä̧jä̧ra̧'a̧cu̧ topö jättepäcuotö, ttötahuiyära̧'a̧cu̧'i̧nä̧, ttö cuojusode chaditinodera̧'a̧cu̧. ⁴⁹ Adiu cuidepiyönä kä̧nö̧ cuä̧ju̧cuä̧cua̧jä̧ jättepömä, o'cajuiyönä jättepömä ppä'äditö. ⁵⁰ O'cajuiyönä ucuru suronä jȩtti̧nö̧mä̧ unichi'iyitö ucuru suronä ttucuocuäji'inä, jȩttö̧'i̧nä̧ ja̧'hua̧nö̧ jo̧mȩnä̧ ttaboiyo rȩrö̧jö̧nä̧ tottäcuotö. ⁵¹ Jahuätömä ucutä cuahuaruhuä ja̧'a̧ ucutä cuȩmi̧nä̧u̧ ja̧'a̧, Egiptora̧'a̧ttö̧ rä'epö cuicuinä̧u̧ curäunä ȩttä̧huo̧mȩttö̧. ⁵² To̧pä̧rö̧nö̧ kä̧hui̧ cumöhuäya̧ jädepö'inä cuahuaruhuä Israel ttö̧ja̧ jättepö'inä, cuäju̧cu̧mä̧ huopinö jättepömä cuädätäcua'anö̧. ⁵³ Jahuätö pi̧jä̧ ttö̧ja̧'i̧nä̧ i̧mi̧cu̧nä̧ 'quȩ'ȩpö̧ cuȩmi̧nä̧u̧, cumöhuäya̧ Moisésrö päcuinöta'anötä̧, Egipto rȩjȩttö̧ rä'epö icuinöjä̧ chu̧ru̧hua̧ Dios. ⁵⁴ Salomón Diosrö ucuocu o'cajuiyönä jäepäji o'ca'a ku icu iyähuä'ca ä'ca ihue'quiyönä pä̧mä̧dö̧ mo̧ro̧jä̧ra̧'a̧cu̧ umö cä'epinö. ⁵⁵ O'catoi'önä Israel ttö̧ja̧rö̧ pä̧i̧cu̧nä̧ ucuocu adiunä pähuä pä'inö. ⁵⁶ Adihua'a chu̧ru̧hua̧ cumöhuäyotö Israel ttö̧ja̧rö̧ eseäcuähuä cuiyömä, o'cajuiyönä päcuinöta'anö cumöhuä̧ya̧ Moisésrö. Ucumä 'cuäopönä to'epocö pinöjä̧. ⁵⁷ Tö̧ä̧nä̧hua̧ Dios ucumä ujutucutä ku̧jä̧, tä̧do̧tö̧ mi̧nä̧cu̧ cu̧ji̧nö̧'a̧nö̧tä̧, ji̧'qui̧cha̧nö̧'i̧nä̧ jaropi'ocöjä̧. ⁵⁸ Tamiso'qui jacuä tesehuärönätä̧ jȩpi̧tö̧, ucu cumä̧nä̧nä̧tä̧ ti̧'chö̧nä̧, huȩyu̧tu̧ huecuinönätä̧ ttö̧jö̧nä̧, tä̧dä̧tö̧ mi̧nä̧rö̧ huecuinöta'anö̧tä̧. ⁵⁹ Pi̧yȩtä̧ ja̧'a̧ chu̧ru̧hua̧rö̧ jädepömä mo̧ro̧'i̧nä̧ yodo'inä 'cuäo'önä tta̧huä̧ra̧ pä'ö, umöhuäyotörömä̧ ahuruhuä Israel ttö̧ja̧rö̧'i̧nä̧ 'cuäopömä. ⁶⁰ Ja̧'hua̧nö̧ ja̧'a̧ttö̧ pi̧jä̧ ttö̧ja̧ o'catoi'önä ttu̧huo̧juä̧cuo̧tö̧ ya̧tȩtä̧ ja̧'a̧ Diosmä, ka̧ra̧mä̧ toa'a pä'ö. ⁶¹ Ja̧'hua̧nö̧ ja̧'a̧ttö̧ ujutumä Diosrö esetö tu̧jä̧tu̧cua̧ tu̧ru̧hua̧ huȩyu̧tu̧ hueinö jinötä̧ esetö, jitä pi̧yȩ mo̧ro̧ jȩpö̧ tö̧jö̧'a̧nö̧tä̧. ⁶² Ja̧'hua̧nö̧ ja̧'a̧ ru̧hua̧mä̧ o'catoi'önä Israel ttö̧ja̧cu̧ ji̧nä̧ yo̧mȩtȩ pä'i'ö ttiäre iyähuä iyinätö̧ ttu̧ru̧hua̧rö̧tä̧. ⁶³ Salomón esecu iäre iyähuä iyönö, tu̧ru̧hua̧ Diosrö, 22 milnö pä̧cä̧yö̧rö̧'i̧nä̧, 120 mil ovejastö̧rö̧'i̧nä̧, ja̧'hua̧nö̧tä̧ ru̧hua̧mä̧ o'catoi'önä Israel ttö̧ja̧cu̧ tu̧ru̧hua̧ ojusodettö aditinätö̧. ⁶⁴ Ja̧u̧nu̧ mo̧ro̧ ru̧hua̧mä̧ tu̧ru̧hua̧ ojusode äpate ä'ca isotöttö, juoröttö ku icu ttiäre iyähuä iyönö, jȩru̧huä̧ ote ku icu iyähuä'inä, a̧dȩmä̧ eseäcuähuä iyähuä ji̧na̧'a̧, tu̧ru̧hua̧ ä'ca jo̧mȩ bronce i̧so̧'ta̧mä̧ juiyo a̧'u̧cui̧nö̧'ta̧, jȩru̧huä̧ o̧dö̧'i̧nä̧, a̧dȩ isoya eseäcuähuä ttiäre iyähuä'inä ttiya pä'ömä. ⁶⁵ Ja̧u̧nu̧ mo̧ro̧mä̧ Salomónmä pä'cäri jȩpi̧nö̧ o'catoi'önä Israel ttö̧ja̧cu̧, recuätö ca̧ca̧cui̧nä̧tö̧ Hamat ötahuiyä kä̧hua̧ räopa'acuttö'inä, Egipto rȩjȩ kä̧hua̧ ma̧ä̧cha̧'a̧cu̧ttö̧'i̧nä̧, pi̧yȩmä̧ tu̧ru̧hua̧ ä'ca jo̧mȩttö̧ ji̧na̧'a̧, ä'canämä tti̧jä̧pö̧ttö̧ todärenö mo̧ro̧ ja̧u̧nu̧ o'ca'a'inä ttö̧jä̧pö̧ttö̧nö̧ todärenö ji̧na̧'a̧ o'cajuiyönämä (4nö mo̧ro̧ ji̧na̧'a̧). ⁶⁶ Ttö̧jä̧pö̧ttö̧ huäbodäcuä mo̧ro̧ jä̧ji̧ o'ca'a Israel ttö̧ja̧mä̧ täcö pene jubutä ja̧'a̧ pä'inö, jahuätömä ru̧hua̧rö̧ adiunätä̧ pä'inätö̧, ttoju odehuiyära̧'a̧ ppa̧'a̧chö̧mä̧, juiyo ya̧'a̧huä̧rö̧nä̧ esehuinätö̧, ttu̧ru̧hua̧ Diosrö esehuinätö̧ u̧mö̧huä̧ya̧ Davidrö jȩi̧nö̧'i̧nä̧, ahuaruhuä Israel ttö̧ja̧rö̧ jȩi̧nö'i̧nä̧ amucuädö.