¹ Salomón Dios öjode aditö cä'ädinödo, ja̧'hua̧nö̧ ja̧'a̧ o'cajuiyönätä̧ jo̧mȩ päi'önä. Ru̧hua̧ chutä ö̧jode'inä. ² Tu̧ru̧hua̧ Dios i̧jȩpi̧nö̧do Salomónrö todäre päi'önä, Gabaón ötahuiyä uhuahua jä̧'i̧nö̧'a̧nö̧tä̧. ³ Ja̧'hua̧nö̧ ja̧'a̧ Dios pä'inö: ttöcu cucuocua'amä ä̧ju̧cui̧nö̧sä̧ jȩcu̧'i̧nä̧ juȩnȩtä̧ kö̧sä̧, ttö chiminä 'cuäopönätä̧ kä̧cua̧'a̧ chö'äriyä'inä, ja̧'hua̧nö̧ ja̧'a̧nä̧ chamiso'qui'inä 'cuäopönä mo̧ro̧ chö̧jä̧cua̧sä̧ juȩnȩtä̧. ⁴ Ja̧'hua̧nö̧ ja̧'a̧ ucu cuä'o David chä'ca jo̧mȩ ki̧nö̧ ucu'inä chä'ca jo̧mȩtä̧ kö̧jä̧, cuamiso'qui yorätehua'a jȩpi̧ o'cajuiyönä ttö pädömä, ucuotönö ttö huedömä. ⁵ Ttö chö̧jä̧cua̧sä̧ ruhuonä huecuo'inä Israel ttö̧ja̧cu̧'i̧nä̧ 'cuäopönätä̧, ucu cuä'o Davidrö chucuocuinö'a̧nö̧, pä'inösä̧ todepö juiyä̧cua̧sä̧ ubo cuahuaruhuä o'cotöttö'inä ruhuonä hueähuome Israel ttö̧ja̧ttö̧'i̧nä̧. ⁶ Ja̧'hua̧nö̧ ja̧'a̧nä̧ cu̧ni̧chi̧'ä̧tu̧cu̧ttö̧mä̧ cui̧tti̧mö̧cu̧'i̧nä̧, hueähuä huȩnȩ ji̧nö̧'i̧nä̧ ttö cuä'catucu jo̧mȩ chö̧jä̧cua̧sä̧, korotö ttö̧ä̧nä̧huo̧tö̧rö̧ esetö ttö'ä ja̧rȩyu̧ pä'i'ö jahuätörö jjȩ'cuä̧tu̧cu̧ttö̧'i̧nä̧. ⁷ Ttö rȩjȩ chiyinäjä̧ttö̧mä̧ 'to'opö chi̧cuä̧cua̧sä̧ Israel ttö̧ja̧rö̧; ja̧'hua̧nö̧ ja̧'a̧ pi̧yȩ jähuänä ttö chiminä 'quȩi̧pä̧cha̧'a̧, ttö chiärettömä ji̧yȩtȩ uhuähua'a, Israel ttö̧ja̧mä̧ i̧jȩcuä̧ päi'önä kä̧tö̧ o'catoi'önä ötahuiyä ttö̧ja̧ jö̧nä̧. ⁸ Dios ö̧jode ki̧na̧'a̧ adiunä, o'catoi'önä jäyodenä 'cuäopätö'inä pättä'chipönä päi'äcua'a, ja̧'hua̧ta̧nö̧ pättäcuotö: ¿Däje pä'ö jȩi̧na̧'a̧ttö̧ po rȩjȩnä̧mä̧ ja̧'hua̧ta̧'a̧nö̧ pode isodemä? ⁹ ja̧'hua̧ta̧nö̧ pättäcuotö: Tu̧ru̧hua̧ Diosrö däje pä'ö jaroti'ina'attö̧ jö̧nä̧, Egipto rȩjȩttö̧ rä'epö icuinö̧rö̧mä̧, korotö ttö̧ä̧nä̧huo̧tö̧rö̧ teseta'attö̧, ja̧'hua̧ta̧nö̧ esetipö huettö jȩta̧'a̧ttö̧, ja̧'hua̧nö̧ ja̧'a̧ttö̧ tu̧ru̧hua̧ Dios ö'cächinö jahuätö o'catoi'önä̧rö̧ pocu surojomecu̧. ¹⁰ 20 a̧'ȩ jo̧mȩnä̧ Salomón Dios ö̧jodeínä todäre jo̧mȩnä̧ ötahuiyä cä'ädinö̧. ¹¹ Hiram, Tiro ru̧hua̧mä̧ 'cä̧chö̧ iyinö Salomónrö̧ cedro dauhuiyä, ja̧'hua̧nö̧ ja̧'a̧nä̧ oro'i̧nä̧, ru̧hua̧ Salomón Hiramrö iyinö veintenö jo̧mȩ ötahuiyä Galilea rȩjȩnä̧. ¹² Ja̧'hua̧nö̧ ja̧'a̧ Hiram Tirottö rä'opinö ötahuiyä toipa pä'ö Salomón iyäjome, ja̧'hua̧nö̧ ja̧'a̧ töju'quipiyunä ji̧nä̧u̧. ¹³ Ja̧'hua̧nö̧ ja̧'a̧ pä'inö: ¿Däje ötahuiyä cuiyäcusättö̧ pi̧yȩmä̧, chu̧jä̧hua̧? ja̧'hua̧nö̧ ja̧'a̧ i̧mi̧ o'ö ku̧ni̧nö̧ Cabul rȩjȩ pä'ö, jitä pi̧yȩ mo̧ro̧ jubö ja̧'hua̧nö̧tä̧ micuome. ¹⁴ Hiram hue'ö icuinö ciento veintenö talentos jo̧mȩ oro. ¹⁵ Ru̧hua̧ Salomón Dios ö̧jode ttadita pä'ö jȩpi̧nö̧, chutä ö̧jode jö̧nä̧tä̧, ju'tänä isode'inä ja̧'hua̧ta̧nö̧ Jerusalén tto̧ȩcuä̧rä̧'ca'inä, ja̧'hua̧nö̧ Hazor'inä, Meguido'inä ja̧'hua̧ta̧'a̧nö̧ Gezer'inä. ¹⁶ Egipto ru̧hua̧ faraón ja̧'hua̧ta̧'a̧nö̧ Gezer-rö ȩmo̧po̧'ö̧, ku̧ni̧nö̧, hua'aretä iyinö (cuäcuäpö icuinö) Cananeosnä ka̧cuä̧tö̧rö̧ ötahuiyänä, ja̧'hua̧nö̧ ja̧'a̧ Salomón iyinö chutä ittijuru irecua päi'önä. ¹⁷ Salomón si'epö icuinö juiyönätä̧, Gezer ja̧'hua̧nö̧ ja̧'a̧nä̧ Bet-horón'inä. ¹⁸ Baalat, ja̧'hua̧ta̧'a̧nö̧ Tdmor'inä rȩjȩ de'a juiyä̧jä̧nä̧. ¹⁹ Ja̧'hua̧ta̧'a̧nö̧ o'catoi'önä ötahuiyä'inä Salomón ö̧ju̧nä̧rö̧ ätahuiyä ppo̧u̧nä̧nö̧ jö̧'i̧nä̧ bäreu'inä, cäruquiyä'inä ötahuiyä ttö̧ja̧'i̧nä̧, cabayu̧tö̧'i̧nä̧, ja̧'hua̧ta̧'a̧nö̧ Salomón o'cajuiyönä Jerusalén'inä aditinö, o'cajuiyönä rȩjȩ uruhuo päi'önä jo̧mȩ. ²⁰ O'catoi'önä̧tä̧ ötahuiyä ttö̧ja̧ ka̧cui̧pi̧nä̧tö̧ Amorreosnä̧tä̧, Hetos'inä, Ferezeos'inä, Heveos'inä ja̧'hua̧ta̧'a̧nö̧ Jebuseos'inä, jahuätömä tti̧tti̧mö̧mä̧cö̧ ji̧na̧'a̧ Israel ttö̧ja̧mä̧. ²¹ Chutä i̧tti̧mö̧ ka̧cui̧pi̧nä̧tö̧ rȩjȩnä̧tä̧ jahuätömä röjinä̧tä̧, Israel ttö̧ja̧ tti̧tti̧mö̧mä̧ jȩttö̧ juiyönä huinätö̧, Salomón jȩpi̧nö̧ jahuätörö adicuä ttö̧ja̧ jö̧nä̧ jitä pi̧yȩ mo̧ro̧ jubö. ²² Ya̧tȩ'i̧nä̧ Israel ttö̧ja̧ tti̧tti̧mö̧rö̧ huettö adicuä ttö̧ja̧ jö̧nä̧'i̧nä̧ Salomón jȩpo̧cö̧ pinö, jahuätörö curä rohuähuäcuähuä ttö̧ja̧ jö̧nä̧tä̧, ppä̧'ä̧dä̧rä̧tö̧'i̧nä̧, príncipes jö̧nä̧ huotö'inä, capitanes jö̧nä̧ huotö'inä, comandantes jö̧nä̧ pä'ähuotö'inä jahuätö ttöcaruquiyä'inä ttö̧ja̧ cabayu̧tu̧cu̧'i̧nä̧. ²³ Salomón juȩ'i̧pa̧ jö̧nä̧ ki̧nö̧ ja̧'hua̧ta̧'a̧nö̧ to̧ä̧rä̧cuä̧huä̧ i̧sa̧tä̧ jö̧nä̧ öäre adicuättö'inä quientos cicuentas, ötahuiyä ttö̧ja̧'i̧nä̧ aditö ka̧cui̧nä̧tö̧. ²⁴ Faraón ittiju 'cha'achi'ö ki̧nä̧ju̧ ötahuiyänä David ö̧ji̧no̧mȩ isode Salomón aditinome; ja̧'hua̧ta̧nö̧ aditinö ji̧na̧'a̧ ju'toju lsode kö̧nä̧. ²⁵ Salomón ya'ute a̧'ȩttö̧mä̧ huäbodä jomenä öäre iyähuä iyinö cuä'ö icu iyähuome u̧ru̧hua̧ Diosrö, ku icunö Dios ä'ca jome, ja̧u̧nö̧ o'ca'atä isode'inä cä'ädinö. ²⁶ Ru̧hua̧ Salomón huoi'quiyö'inä aditinö Ezión-geber, ji̧nä̧ yo̧mȩtȩ ka̧'a̧ Elotcu mar rojo jäyoto, Edom rȩjȩnä̧, ²⁷ Hiram ja̧'hua̧nö̧ ja̧'a̧ hue'ö icuinö jahuätörö öäre adicuä ttö̧ja̧rö̧, marinerotö̧rö̧'i̧nä̧ aje rö̧o̧tonä 'cha̧'a̧dä̧ to̧pä̧rö̧ huo̧juȩcu̧nä̧ huotörö'inä, Salomón öäre adicuä ttö̧ja̧rö̧'i̧nä̧. ²⁸ OOfir dauhuiyä'inä ja̧'hua̧ta̧'a̧nö̧ 'chi̧nä̧tö̧ juorö ȩmi̧nä̧tö̧ oro'inä, cuatrociento veinte talentos jo̧mȩ'i̧nä̧, ja̧'hua̧ta̧'a̧nö̧ ru̧hua̧ Salomónrö i'chächö iyinä̧tö̧.