¹ Ja̧u̧nu̧ o'ca'a Salomónmö̧ chutä ojusode aditinö 13 a̧'ȩ päi'omenä cä'ädö. ² Ja̧'hua̧nö̧ ja̧'a̧ isodemä̧ aditinö̧ Libanö dauhuiyä ka̧cuo̧mȩ öotocumä 45 metros jo̧mȩnä̧ ki̧na̧'a̧, käcuoräcumä̧ 22 metros ja̧'a̧nä̧ 'cuäo'önänö ki̧na̧'a̧, ju'tojucumä̧ 13 metros ja̧'a̧nä̧ 'cuäo'önänö ji̧no̧de, jueipä o'camä̧ pa̧ja̧cuä̧nö̧ 'chuä̧rö̧nä̧ cedro dauhuiyä o'cattö ku̧nä̧hua̧'a̧ttö̧ 'quitönä huinode. ³ Ja̧u̧ 'chuä̧rö̧ o'ca ju'tämä̧ cedro dauhuiyä odättö huä̧nä̧hui̧na̧'a̧ ja̧u̧ ki̧o̧pä̧rö̧mä̧ 45nö̧ o'ca ji̧na̧'a̧, ju'tä i̧sä̧jä̧ttö̧ ji̧jä̧cu̧ pönämö 15nö o'ca jo̧mȩnä̧ ku̧nä̧hui̧na̧'a̧ ja̧'hua̧nö̧ ja̧'a̧ icui'quiyu ju'tämä̧ cedrottötä huinode. ⁴ Yäecuä atemä̧ huäbodäcuä ohuänä̧ ku̧nä̧hua̧'a̧ ka̧cui̧na̧'a̧ ja̧u̧ ohuättömä̧ huäbate cupönä̧ yoräteunä̧ ö'ä ja̧'a̧cu̧ pönä ka̧cui̧na̧'a̧. ⁵ Ja̧'hua̧nö̧ ja̧'a̧ o'cajuiyönä̧ äpatiyä'i̧nä̧, icui'quiyu'i̧nä̧ yoräteunä pa̧ja̧cua̧'a̧ ji̧na̧'a̧, ja̧u̧mä̧ pä̧tȩcuä̧nö̧ pönä̧ ku̧nä̧hua̧'a̧ ka̧cui̧nö̧ huäbodäcuä ohuä jo̧mȩnä̧. ⁶ Salomónmä ji'cate jueipä'ca ku̧ni̧nö̧ öotocumä̧ 22metros ja̧'a̧nä̧ 'cuäo'önä ji̧na̧'a̧, öcähuecumä̧ 13 ja̧'a̧nä̧ 'cuäo'önä ji̧na̧'a̧. Pä̧tȩcuä̧nö̧mä̧ koro'ca'i̧nä̧ ki̧na̧'a̧, ja̧'hua̧nö̧ ja̧'a̧nä̧ ojutä̧ro̧mȩ'i̧nä̧ ki̧na̧'a̧. ⁷ Juȩnȩ yabonä̧ aditinö yo̧ca̧tȩ i̧so̧ca̧ chutä uruhuonä doächäcuähuoca̧mä̧ pa̧'a̧nö̧ pä̧huo̧ca̧'a̧ ji̧na̧'a̧. Ji̧nä̧ isocu ruhuo ruhuo kada'ca pä'ö; ja̧'hua̧nö̧ ja̧'a̧ttö̧ juo̧ca̧ttö̧mä̧ adiunä pä'ö ro̧ȩcuä̧tä̧ ki̧na̧'a̧. Juo̧ca̧ i̧so̧ca̧mä̧ huä̧mȩcu̧'i̧nä̧ dȩa̧'a̧cu̧'i̧nä̧ cedro odiyättö adicuina̧'a̧. ⁸ Chutä ä'ome imicunä jueipoca̧ ki̧na̧'a̧ ja̧'hua̧nö̧ ja̧'a̧nä̧ yo̧ca̧tȩ doächäcuähuoca̧'i̧nä̧ yoräteunä a̧di̧cuo̧ca̧ ki̧na̧'a̧. Salomónmä aditinö yodete isode faraón ittiju kojusode päi'önä̧ chutä irecua päi'önä̧ ȩmi̧nä̧cua̧. ⁹ O'cajuiyönä adicuämä̧ ji̧na̧'a̧ i̧nä̧huiyä micuäu juäittö ihueye ja̧u̧ juäitä 'cuiähuäcänä 'cui'ö pa̧ja̧cua̧'a̧ jö̧ta̧'a̧nö̧ jö̧nä̧, jacuänä'inä̧ u̧mi̧nä̧'i̧nä̧ yoräteunätä̧. ¹⁰ Dȩa̧'a̧nä̧ ppä'epö inähuiyä o'quimä̧ micuäu ji̧na̧'a̧, ja̧u̧ o'quimä bäreu ji̧na̧'a̧ 4 metros ja̧'a̧nä̧ 'cuäo'önä̧nö̧ ji̧na̧'a̧ koro o'quimä 3 metros ja̧'a̧nä̧ 'cuäo'önä ji̧na̧'a̧. ¹¹ Ja̧'hua̧nö̧ ja̧'a̧ juoröttö huä̧mȩcu̧mä̧ inähuiyä micuäu o'quinä adicuina̧'a̧, ihueye pajacua'a jö̧ta̧'a̧nö̧ jö̧nä̧. Ja̧'hua̧nö̧ ja̧'a̧nä̧ 'quiyö 'chuä̧rö̧ o'camä cedro dauhuiyä o'ca ji̧na̧'a̧. ¹² Ja̧'hua̧nö̧ ja̧'a̧ doächäcuähuoca̧ u̧mi̧nä̧ tto̧ȩpä̧rä̧bänä̧mä̧ ki̧na̧'a̧ huäbodäcuä ohuänä inähuiyättö 'cui'ö icu adicua'a ja̧'hua̧nö̧ ja̧'a̧nä̧ jihuätenämä̧ cedro dauhuiyä o'ca ki̧na̧'a̧, juhua'a jö̧ta̧'a̧nö̧tä̧ ji̧na̧'a̧ tu̧ru̧hua̧ ojusode jacuä doächäcuähuoca̧nä̧'i̧nä̧ isodenä doächäcuähuoca̧ jö̧ta̧'a̧nö̧tä̧ jö̧nä̧. ¹³ Ja̧'hua̧nö̧ ja̧'a̧ ru̧hua̧ Salomónmä hue'inö Hiramrö̧ Tirora̧'a̧ttö̧ icha pä'ö. ¹⁴ Ja̧u̧mä̧ Neftali ahuaruhuä 'cotöttö recua ki̧tti̧ ji̧na̧'a̧, ja̧u̧ jä'omä̧ bronce pähuättö adicuä i̧sa̧ pinö. Tirottö uhuäpächinö ji̧na̧'a̧ ja̧'hua̧nö̧ ja̧'a̧ttö̧ Hiramä amöcuädäcuähuättö'i̧nä̧ jȩä̧cuä̧huä̧ttö̧'i̧nä̧ huo̧juȩcu̧nä̧ huinö, ja̧u̧ 'quiyö juäi broncettö adicuämä o'cajuiyönätä̧ huo̧jui̧nö̧ ja̧'hua̧nö̧ ja̧'a̧ttö̧ ru̧hua̧ Salomónrö̧ i̧jȩcui̧nö̧. Churutä hueäjimä̧ o'cajuiyönä adicuämä jȩpi̧nö̧. ¹⁵ Hiramä̧ bronce isä'ca to'care ki'opö ku̧ni̧nö̧ ji'catepönä̧ öotocumä 8 metros ki̧na̧'a̧, ja̧'hua̧nö̧ ja̧'a̧nä̧ 5 metros ja̧'a̧nä̧ 'cuäo'önä̧nö̧ ki̧na̧'a̧. kä'co päte'ö jo̧mȩmä̧ pö̧jä̧'quȩ isappänä pa̧ja̧cua̧'a̧ ki̧na̧'a̧. ¹⁶ 'chuä̧rö̧ o'ca jȩi̧nö̧mä̧ todäre jo̧mȩnä̧ ji̧na̧'a̧; broncettö ȩttö̧ icu 'quiépö a̧'cua̧tö̧ cädinö̧mä̧; ji'cacu pönämä 2mtros ja̧'a̧nä̧ 25 cm. jo̧mȩnä̧ ki̧na̧'a̧ ju'tojucunä. ¹⁷ Ji̧sa̧tȩmä̧ cuoräu appiyättö 'torö a̧'cua̧tö̧ ku̧nä̧hua̧'a̧ ki̧na̧'a̧ icui'quiyö u ju'tämä̧. Ja̧'hua̧nö̧ ja̧'a̧ttö̧ ji'cate pönämä 7nö tädö appiyä ki̧na̧'a̧. ¹⁸ Ji'cacu pönämä rö̧nä̧huä̧mä̧ a̧ttä̧chi̧na̧'a̧ tohuäre jo̧mȩnä̧ ppo̧ö̧ juäittö, juhua'a jö̧ta̧'a̧nö̧tä̧ jȩpi̧nö̧ koro rö̧nä̧huä̧'i̧nä̧. ¹⁹ Kä'co päte'ö icui'canä ru̧nä̧huä̧mä̧ Lirio dau ta'anö jö̧nä̧ a̧'cua̧cu̧nä̧ ki̧na̧'a̧, 1 metros ja̧'a̧nä̧ 8 cm jo̧mȩnä̧. ²⁰ Todäre icui'quiyö ju'tä ru̧nä̧huä̧nä̧mä̧ 200nö̧ ppo̧u̧ obamä tohuärenä ki̧na̧'a̧ ya'acunä ki̧na̧'a̧, ya'acunä rö̧nä̧huä̧ jä̧ji̧ ippeyenä̧, ja̧u̧mä̧ cuoräuttö adicuä̧sa̧ u̧mi̧nä̧ ka̧cui̧no̧. ²¹ Hiramä cä'epinö icuiquiyö ucuo isode kä'co jähuä, ja̧'hua̧nö̧ ja̧'a̧ icui'ca u̧huo̧jua̧'a̧cu̧nä̧ cäepäjä'ca imimä o'inö̧ Jaquin pä'ö, ja̧u̧mä̧ pa̧'a̧nö̧ pä'ö pähuä ji̧na̧'a̧ (Chu̧ru̧hua̧tä̧ ja̧'a̧ jȩpö̧mä̧) pä'ö; jua'a jö̧ta̧'a̧nö̧ icui'ca ö'ohue ja̧'a̧cu̧nä̧ cäepäjä'ca i̧mi̧mä̧ o'inö Boaz jö̧nä̧ ja̧u̧mä̧ pa̧'a̧nö̧ pä'ö pähuä ji̧na̧'a̧, (ja̧u̧ ya̧tȩnä̧tä̧ ja̧'a̧ tujuru ka̧'a̧) pä'ö. ²² Icui'quiyö u ju'tämä̧ ku̧ni̧nö̧ Lirio dauhuiyä jö̧ a̧'cua̧rö̧ adicuä, ja̧'hua̧nö̧ ja̧'a̧ttö̧ icui'quiyu adicuä jä̧ji̧mä̧ täcö cä'ädi. ²³ 'Quiyö juäittö isoyä pä'i'ö huerächönä jȩpö̧ aditinö ajiya rö̧nä̧rä̧cuo̧mȩmä̧ järobunö jö̧nä̧ ji̧na̧'a̧, ja̧'hua̧nö̧ ja̧'a̧ pa̧ja̧cuä̧ttö̧mä̧ 4 metros ja̧'a̧nä̧ 'cuäo'önänö ji̧na̧'a̧. Ju'tojucumä̧ 2 metros ja̧'a̧nä̧ 25cm ji̧na̧'a̧, ja̧'hua̧nö̧ ja̧'a̧nä̧ järobunö jö̧ pa̧ja̧cuä̧mä̧ 13 metros ja̧'a̧nä̧ 'cuäonä ki̧na̧'a̧. ²⁴ I̧so̧'ta̧ Broncettö adicuo̧'ta̧ dȩa̧'a̧mä̧ ku̧ni̧nö̧ tohuärenä calabaza pähuä a̧'cua̧rö̧nä̧ jö̧ oba, tomöre jähuämä ya'ute pa̧ja̧cuo̧mȩ ju'tome pönätä̧ ji̧na̧'a̧ ja̧u̧mä̧ ya'utetä päi'önä aditö ku̧nä̧huä̧ ji̧nö̧ ajiya huerächomecu̧mä̧. ²⁵ Ajiya huerächö ri̧na̧'a̧ pä̧cä̧yu̧ 12nö̧ huotö ttu̧huä̧mȩnä̧ ja̧'hua̧nö̧ ja̧'a̧nä̧ jacuäcumä ki̧na̧'a̧ pa̧ja̧cuä̧nö̧ jo̧mȩnä̧ ki̧o̧pä̧rö̧ juäi'i̧nä̧, ja̧'hua̧nö̧ ja̧'a̧ pä̧cä̧yu̧ huä̧mȩtucuämä̧ to̧pä̧ri̧nä̧tö̧ norte ra̧'a̧cu̧ korotö pä̧cä̧yu̧ huä̧mȩtucuämä̧ to̧pä̧ri̧nä̧tö̧ sur ra̧'a̧cu̧ korotö pä̧cä̧yu̧ huä̧mȩtucuämä̧ to̧pä̧ri̧nä̧tö̧ kä̧hua̧ räopa'acu, juhua'a jö̧ta̧'a̧nö̧ korotö huä̧mȩtucuämä̧ pä̧cä̧yu̧mä̧ to̧pä̧ri̧nä̧tö̧ kä̧hua̧ ma̧ä̧cha̧'a̧cu̧ päte'ö. ²⁶ Ajiya huerächome ijihuä ö̧rö̧ä̧mä̧ ji̧na̧'a̧ 8 cm jo̧mȩnä̧ ja̧u̧ jäyänämä̧ lirios ȩ'u̧ a̧'cua̧rö̧nä̧ jȩpö̧ adicuina'a. Ja̧'hua̧nö̧ ja̧'a̧ ju̧huȩnȩmä̧ ki̧na̧'a̧ 44 mil litros jo̧mȩnä̧ ajiya acuome ji̧na̧'a̧. ²⁷ Jueipä o'camä̧ broncettö̧ 10nö jo̧mȩnä̧ jȩpö̧ ku̧ni̧nö̧ ja̧u̧ ji̧yȩcu̧ pö̧nä̧ öotocumä ki̧na̧'a̧ 1 metros ja̧'a̧nä̧ 80 cm jo̧mȩnä̧ öcähuecumä juhua'a jö̧ta̧'a̧nö̧ öcähuecumä ki̧na̧'a̧ 1 metros ja̧'a̧nä̧ 80 cm jo̧mȩnä̧ ja̧'hua̧nö̧ ja̧'a̧nä̧ ju'tojucumä̧ 1 metros ja̧'a̧nä̧ 35 cm jo̧mȩnä̧ ki̧na̧'a̧. ²⁸ Icui'quiyönä̧ adicuämä pi̧yȩ ji̧na̧'a̧: abiyämä 'ca̧tä̧hua̧'a̧ ki̧na̧'a̧ ja̧u̧ a̧'cua̧tö̧ ku̧nä̧huä̧cu̧ ka̧cui̧nö̧. ²⁹ Ja̧'hua̧nö̧ ja̧'a̧ abiyä jä̧ji̧nä̧mä̧ tta̧'cua̧jui̧yä̧ ka̧cui̧na̧'a̧: Mo̧ yähui a̧'cua̧juä̧'i̧nä̧, pä̧cä̧yu̧ tta̧'cua̧juä̧'i̧nä̧, querubines tta̧'cua̧juä̧'i̧nä̧ ki̧na̧'a̧, a̧'cua̧tö̧ ku̧nä̧huä̧ jä̧ji̧ icui'quiyö ju'tämä yä̧hui̧tö̧'i̧nä̧, pä̧cä̧yö̧'i̧nä̧ ttuhuäme ja̧'a̧cu̧'i̧nä̧ tti̧dȩa̧'a̧ ja̧'a̧cu̧'i̧nä̧ pa̧'a̧nö̧ jö̧nä̧ ki̧na̧'a̧: korottö̧'inä korottö̧'inä do'ädö ku̧nä̧hua̧'a̧ ka̧cui̧na̧'a̧. ³⁰ Yo'tacu pönämä̧ ki̧na̧'a̧ pa̧ja̧cuä̧nö̧ jo̧mȩnä̧; ö̧jä̧pö̧ o'camä kä'co päte'ö a̧jui̧yä̧'i̧nä̧ ka̧cui̧na̧'a̧ broncettö adicuä, ja̧'hua̧nö̧ ja̧'a̧nä̧ ttumö töcäcuähuä deamä kiopä̧ri̧na̧'a̧ pa̧ja̧cuä̧nö̧ öyöca̧ri̧ jo̧mȩnä̧ kara'anä̧'i̧nä̧, kara'anä̧'i̧nä̧ ka̧cui̧na̧'a̧ a̧'cua̧tö̧ ku̧nä̧huä̧mä̧. ³¹ Ttumö töcähuä ämä a̧'cua̧tö̧ ku̧nä̧huä̧ jacuä ki̧na̧'a̧ ja̧u̧mä̧ huä̧mȩ huä̧mȩcu̧ räopina'a 45 cm jo̧mȩnä̧ ja̧u̧ ämä järobönö jinö. Ja̧'hua̧nö̧ ja̧'a̧nä̧ ppädärö jähuämä̧ 68 cm jo̧mȩnä̧ ji̧na̧'a̧ Ä jäyänämä abiyä a̧'cua̧tö̧ ku̧nä̧hui̧na̧'a̧ ja̧u̧mä̧ kara'anä'i̧nä̧, kara'anä'i̧nä̧ yorätehua'anä järobönö jo̧cö̧ ji̧nö̧. ³² Pa̧ja̧cuä̧nö̧ ö̧jä̧pö̧ o'camä ka̧cui̧na̧'a̧ abiyä dȩa̧'a̧ jo̧mȩ, ö̧jä̧pö̧ o'canä kärächö o̧juä̧mä̧ kada'cattö chuä̧rö̧nä̧ ka̧cui̧na̧'a̧. Ja̧'hua̧nö̧ ja̧'a̧ ö̧jä̧pö̧ o'ca ji'cate pönämä 68 cm jo̧mȩnä̧ ki̧na̧'a̧. ³³ Ö̧jä̧pö̧ o'camä carucä ö̧jä̧pö̧ o'ca jö̧ta'anötä̧ ji̧nö̧ i̧sä̧juä̧'i̧nä̧, rayo'i̧nä̧, ö̧jä̧pö̧ o'ca o̧tta̧'i̧nä̧ ȩttö̧ icu adicuä ji̧nö̧. ³⁴ Ja̧'hua̧nö̧ jö̧ta'anö̧ pa̧ja̧cuä̧nö̧ i̧sä̧ta̧ abiyämä pa̧ja̧cuä̧nö̧ ö̧yö̧'ca̧ri̧ jo̧mȩ ji̧yȩcu̧ pönä ka̧cui̧na̧'a̧ pi̧yȩcu̧mä̧ ji̧yȩtȩ jähuätä päi'inö. ³⁵ Jueipä'ca ju'täcumä̧ ki̧na̧'a̧ järobönö jȩä̧cuä̧hua̧'a̧ 22cm jo̧mȩnä̧, ja̧'hua̧nö̧ ja̧'a̧ ki̧o̧pä̧ro̧mȩ'i̧nä̧, i̧sä̧ta̧ abiyä'i̧nä̧ huä̧mȩmä̧ ya'ute jähuätä päi'önä jȩpö̧ ku̧nä̧hui̧na̧'a̧. ³⁶ Ki̧o̧pä̧rö̧ o'ca beipome ju'tä'inä i̧sä̧ta̧ abiyä ju'tä'i̧nä̧. Hirammä be'epö ku̧ni̧nö̧ querubinesrö'i̧nä̧, mö yä̧hui̧tö̧rö̧'i̧nä̧, ojyä'i̧nä̧ ku̧nä̧'chä̧cuä̧hua̧'a̧ jäyämä tu̧ju̧nu̧'a̧nö̧ jo̧mȩmä̧. ³⁷ To̧mö̧re jähuä jueipä o̧'ta̧mä̧ ȩttö̧ icu adicuä ji̧nö̧ ja̧u̧mä̧ ö̧rö̧ä̧ttö̧'i̧nä̧, öadihuättö'i̧nä̧ yoräteunä̧tä̧ a̧'cua̧cui̧nö̧. ³⁸ Hirammä jȩpi̧nö̧ tomöre jähuä ttu̧mö̧ töcäcuähuä'i̧nä̧ 'quiyö juäi broncettö ja̧u̧ ji̧yȩcu̧ pönämä ya'ute pa̧ja̧cuo̧mȩ ja̧'a̧nä̧ 80 cm. jo̧mȩnä̧ ji̧na̧'a̧ ja̧'a̧hua̧nö̧ ja̧'a̧ 880 litros jo̧mȩnä̧ ki̧na̧'a̧ ji̧na̧'a̧ ya'ute o̧'ta̧ pönämä. ³⁹ Diosrö ucuocuäcuähuode u̧huo̧jua̧'a̧cu̧ ja̧'a̧nä̧mä̧ ku̧ni̧nö̧ ji̧mö̧tȩ jähuä o̧'ta̧hui̧yä̧, ja̧'hua̧nö̧ ja̧'a̧nä̧ ö'ohuecu ja̧'a̧cu̧mä̧ ku̧ni̧nö̧ jimöte jähuä ajiya acu oba ö̧yö̧'ca̧ri̧ jo̧mȩ u̧huo̧jua̧'a̧cu̧ ja̧'a̧nä̧ Diosrö ucuocuäcuähuodettömä kä̧hua̧ räopa'acuttö ja̧'a̧nä̧ ö'ohuecu ji̧na̧'a̧. ⁴⁰ Hirammä juhua'a yabocu aditnö uri oba'i̧nä̧, quirähuä oya'i̧nä̧, o̧'ta̧hui̧yä̧'i̧nä̧ pa̧'a̧nö̧ jö̧nä̧ cä'ädinö o'cajuiyönä adicui'amä ttu̧ru̧hua̧ ojusodettö ru̧hua̧ Salomónrö pätecuächinömä. ⁴¹ Tu̧huo̧jö̧'a̧nö̧ ja̧'a̧ to'care icui'quiyö'i̧nä̧, to̧'ta̧rȩ i̧so̧'ti̧yö̧ jä̧ro̧bö̧nö̧'i̧nä̧ ja̧u̧mä̧ a̧'cua̧tö̧ ku̧nä̧huä̧ ji̧na̧'a̧. Juhua'a jö̧ta̧'a̧nö̧ to̧sa̧rȩmä̧ a̧'cua̧tö̧ ku̧nä̧hua̧'a̧ ki̧na̧'a̧ o̧'ta̧hui̧yä̧mä̧. ⁴² Ja̧'hua̧nö̧ ja̧'a̧ 400nö̧ ppähuö juäimä tomöre jähuä ji̧na̧'a̧ jisacu pönämä. To̧'ta̧rȩ i̧so̧'ti̧yu̧ järobönä jö̧nä̧ juä̧o̧pä̧rö̧nä̧ rö̧ja̧ pä'ö ji̧nö̧ icui'quiyu u ju'tä jo̧mȩ. ⁴³ Ja̧'hua̧nö̧ ja̧'a̧nä̧ tomöre jähuä ji̧na̧'a̧ kada'ca jähuäcu ttu̧mö̧ töcäcuähuäcumä. ⁴⁴ Ajiya a̧'cuo̧'ta̧'i̧nä̧, pä̧cä̧yö̧ 12nö̧ huotö deanä 'chu̧'ä̧rä̧tö̧'i̧nä̧. ⁴⁵ Uri oyu'inä quirähuä oya'inä, o̧'ta̧hui̧yä̧ bäreu'inä pi̧yȩ o'cajuiyönä järemä. Ja̧'hua̧nö̧ ja̧'a̧ Hirammä aditinö, tu̧ru̧hua̧ ojusodettö ru̧hua̧ Salomónrö pätecuächinömä broncettö särutu icuähuä ji̧na̧'a̧. ⁴⁶ Ru̧hua̧mä̧ o'cajuiyönä redä'cattö ȩttö̧ icu aditinö Jordán aje pämäroppättömä, ju̧huȩnȩmä̧ Sucot'inä, Saretán'inä 'quȩtȩ ji̧na̧'a̧. ⁴⁷ Broncettö adicuä järeäcuähuämä juiyö rö̧ä̧nä̧ ji̧na̧'a̧, ja̧'hua̧nö̧ ja̧'a̧ Salomónmä täcö a̧'cua̧ tta̧'ȩcuo̧cö̧ pinö juhua'a ⁴⁸ Salomónmä hueinö jinö koro ku̧nä̧rä̧cuä̧huä̧ adicuä u̧ru̧hua̧ ojusode ka̧cui̧nö̧ ji̧nö̧ pa̧'a̧nö̧ pähuä: orottö adicuä'ca ku icu iyähuome, orottö adicuodä pan o̧ppä̧ rutähuodä ji̧na̧'a̧ u̧ru̧hua̧rö̧ ucuotö. ⁴⁹ Ocurä kunähuäcä'inä päcuäi orottö adicuäcä ji̧na̧'a̧, ja̧'hua̧nö̧ ja̧'a̧ u̧huo̧jua̧'a̧cu̧ i̧sä̧mö̧nä̧mä̧ jimöte jähuä ki̧na̧'a̧, ö'ohuecu ja̧'a̧cu̧mä̧ jimöte jähuä ki̧na̧'a̧ surojö juiyoca̧ pä̧tȩcuä̧nö̧ jo̧mȩ. Juhua'a jö̧ta̧'a̧nö̧ ȩ'u̧'i̧nä̧ tejädäcuähuä ocä'inä, 'cuiocuä ocä'inä päcuäi orottö adicuä ji̧na̧'a̧. ⁵⁰ O̧'ta̧hui̧yä̧'i̧nä̧, uri oyu bäreu'inä, o̧'ta̧hui̧yä̧ bäreu huȩ'chä̧cä̧ bäreu'inä, incesarios'inä päcuäi orotä jinö. Ja̧'hua̧nö̧ ja̧'a̧nä̧ surojö juiyoca̧ äpate isodänä runähuäya'inä, juhua'a jö̧ta̧'a̧nö̧ u̧ru̧hua̧ ojusode kä'co päte'ö äpate isodä'inä orotä jinodä. ⁵¹ Pa̧'a̧nö̧tä̧ jö̧nä̧ beichina'a o'cajuiyönä adicuä ru̧hua̧ Salomón hueinömä u̧ru̧hua̧ ojusode jähuä pä'ö. Ja̧'hua̧nö̧ ja̧'a̧ttö̧ Salomómmä ȩpi̧nö̧ jä'o David ö̧ca̧ca̧ti̧nö̧ ji̧nö̧mä̧ or'inä, plata'inä, o̧'ta̧hui̧yä̧'inä, ja̧'hua̧nö̧ ja̧'a̧ o'cajuiyönä hua'adö rutinö ihueye hua'adö rutähuome u̧ru̧hua̧ ojusodenä.