¹ Tu̧ru̧hua̧ Tö̧ä̧nä̧hua̧ ojuisode aditö Salomón ö̧jä̧mä̧di̧nö̧mä̧ pa̧'a̧nö̧ ji̧na̧'a̧. Pi̧yemä̧ 'cuäopina̧'a̧ 480 a̧'ȩ jo̧mȩnä̧ recuina̧'a̧ ja̧unu̧ o'comenä Israel ötahuiyä ttö̧ja̧ Egipto rȩjȩttö̧ rättopinö̧ pänä, Salomónmä pa̧ja̧cuä̧nö̧ a̧'ȩ ruhuo hueinö pänä ji̧na̧'a̧ Israel ötahuiyänä, 'cä̧hua̧ Zif pättö pä̧nä̧ yaute a̧ȩttö̧ cä̧hua̧ttö̧ ta̧ju̧ päiomenä ji̧na̧'a̧. ² uode isode ru̧hua̧ Salomón aditinodemä u̧ru̧hua̧ Ö̧ä̧nä̧hua̧ ö̧jodemä ö'otocumä ttö̧ja̧ ta̧ju̧ ja̧u̧nö̧ tu̧mu̧ ji̧mu̧tȩ koromu̧ttö̧ to'cherenö jo̧mȩnä̧ otoinode jueöcumä, ja̧hua̧ta̧'a̧nö̧ jö'tojucumä tu̧mu̧ to̧mu̧rȩnö̧ 'cuä'o'önä tti̧jä̧pu̧ttö̧ huabo'checuänö ji̧na̧'a̧ ju'tojucumä. ³ Dios ö̧jo̧de pä̧'tȩcuä̧nö̧ ä'ähuäbä dȩa̧ ä̧cuo̧mȩnä̧ 'chä̧hui̧ö̧ cueächäcuähuomemä pa̧ja̧tä̧cuä̧hua̧'a̧ ji̧na̧'a̧ ttu̧mu̧ ji̧mu̧tȩnö̧ cueächähuomemä pa̧ja̧tä̧cuä̧hua̧'a̧ ji̧na̧'a̧ ttu̧mu̧ ji̧mu̧tȩnö̧ ja̧'a̧nä̧ huabo'checuänö o'otomä, Dios ö̧jo̧de öcähuemä, jueöcumä otoönänö ji̧no̧de pa̧ja̧cuä̧nö̧ 'cuönä koro öoto 'cä'conänö pätecuächönä ji̧na̧'a̧. ⁴ Ja̧u̧mä̧ juode isodenä ku̧ni̧nö̧ 'po̧ö̧a̧te huäose jö̧nä̧ jacuänä kä̧nö̧ toäcuähuate cähueönä aditinö u̧mi̧nä̧ ka̧cu̧ jö̧'a̧nö̧ mäcö̧ jacuänä ka̧cu̧mä̧. ⁵ Ja̧'hua̧ta̧'a̧nö̧ aditinö isodenä tto̧ȩpä̧rä̧bi̧ to'cönänö ä̧cuo̧mȩnä̧ isode i̧so̧ca̧ rö̧ä̧ca̧'i̧nä̧ aditinö koro o̧ca̧hui̧yä̧'i̧nä̧ ppo̧'ö̧ o'ca̧ jäyänä sobucuächönä. ⁶ Juode dȩa̧dä̧ i̧sä̧jä̧ rȩjȩmä̧ todäre metro ja̧'a̧nä̧ yabocunä 'cuäönä 25 centimetro jö̧nä̧ cäcuoräcu öcähuemä, kä'co päteö i̧sä̧jä̧mä̧ todäre metro ja̧'a̧nä̧ 27 centimetro öcähuemä. Ja̧hua̧ta̧'a̧nö̧ huäbodäcuä metro ji̧na̧'a̧ yabocu tu̧mu̧ to̧mu̧rȩnö̧ ja̧'a̧nä̧ ttö̧jä̧pu̧ttö̧ jiutenö öcähuemä, juode isode jayänä u̧mi̧mä̧ 'co̧ö̧nä̧ hui̧ä̧dö̧ icuähuinode jäyänä räbänä yu̧ȩpä̧rä̧'cä̧nä̧ huȩnä̧rö̧ juiyönä. ⁷ Isodemä inähuiyä jo̧mȩnö̧ 'cuiähuättö 'ca̧tö̧ adicuinode ji̧na̧'a̧. Cuä'ö ttadita'a'inä ra̧mi̧po̧ca̧'a̧ ji̧na̧'a̧, ö̧dä̧pä̧'quȩ ttö̧'co̧rä̧hua̧'a̧'i̧nä̧ koro cuoräu'inä rä̧mi̧po̧ca̧'a̧ ji̧na̧'a̧ juode isode ttaditinö pänämä. ⁸ Dios ö̧jo̧de ka̧hua̧ mo̧ä̧cha̧'a̧cu̧mä̧ apate ki̧na̧ doächahuate dȩa̧dä̧mä̧, ja̧u̧nö̧ o'comenämä 'cha̧huä̧chä̧cuä̧huä̧cä̧'i̧nä̧ ki̧na̧ kä'copäteö ppättia pä'ö, ja̧'hua̧ta̧'nö̧ kä'co päteötö 'cha'achö 'cuä'oö huä̧bo̧jä̧cuä̧ ra̧'a̧ pättia pä'ö. ⁹ Ja̧hua̧nö̧'tä̧ Salomónmä aditinö Dios ö̧jo̧de jo̧mȩnö̧ yoratehuächiönä päiönä, juode isode yorätetö cä'ädonömä cedro icui'quiyuttö ku̧ni̧nö̧ ja̧hua̧ta̧nö̧ dauhuiyä odä bäreuttö'inä. ¹⁰ Ja̧u̧ aditinö o̧ca̧hui̧yä̧ ca̧cua̧dä̧mä̧ rȩjȩ jö̧nä̧ ku̧nä̧'chö̧ ja̧u̧ odehuiyämä Dios ö̧jo̧de jacuä'inä, ya'atenämä todäre metro ja̧'a̧nä̧ 25 centimetronö̧ ju'tocumä; juode odehuiyä yö̧ȩpä̧ri̧na̧'a̧ cedro obuhuiyättö jurunä mo̧ä̧'chö̧ juiyäcua'anö. ¹¹ Tu̧ru̧hua̧ Ti̧ä̧nä̧hua̧ i̧huȩnȩ rȩbȩhui̧na̧'a̧do Salomonrö̧ pä'inödo: ¹² "pode isode cuaditäjode ö'tö'cömä, ttö huedönä amucuädö cui̧chö̧tö̧mä̧ ja̧'hua̧ta̧'a̧nö̧ surojö juiyönä jȩ'cuä̧cua̧jä̧, o'ca juiyönä ttö huedönä 'chänö, jahuätöcu, ja̧hua̧nö̧ jo̧mȩtä̧ jueö jäcua̧'a̧ cua'o Davidrö padinömä. ¹³ Ttömä chö̧jä̧cua̧sä̧ Israel ttö̧ja̧cu̧ ja̧hua̧ta̧'a̧nö̧ jaropiocö chä̧cua̧sä̧ jahuätörö". ¹⁴ Salomonmä ja̧'hua̧nö̧ jȩpu̧ aditö cä'ädinö juode isodenä. ¹⁵ Ja̧u̧nu̧ o'comenä ädita pä'ö cä̧mä̧di̧nö̧ juode isode räbiyä jacuänä cedro dauhuiyä odättö. Isode jacuättö cä̧mä̧dö̧ rȩjȩ jö̧nä̧ isode utora jubu cä'ädö, ja̧u̧mä̧ Cipre dau odiyättö suhuädiönä ppä'inö. ¹⁶ Ja̧u̧ aditinödo tu̧mu̧ jimutenö ja̧'a̧nä̧ koromöttö̧ pa̧ja̧cuä̧nö̧ o'che jo̧mȩnä̧ ja̧u̧nu̧ o'comenä'inä odehuiyämä rȩjȩ pä'i'önä rötinödo cedro dauhuiyättö jutoju'inä ja̧u̧ aditinö po̧ca̧ i̧so̧ca̧mä̧ suroju 'quȩcuo̧ca̧mä̧. ¹⁷ Yo̧ca̧tȩ jueipo̧ca̧ surojöttö 'quȩcuo̧ca̧ öotocumä ji̧na̧'a̧ ttö̧ja̧sä̧ a̧ma̧ to̧mu̧rȩ 'cuäönä ja̧'a̧nä̧ i̧jä̧pu̧ ji̧a̧tȩ 'co̧ro̧mu̧ huabo'checuänö. ¹⁸ Juode isode jacuä 'qui̧na̧'a̧do päcuäi cedrotä, cahuiyäba calabaza pähuä a̧'cua̧ jähuä 'co̧ä̧hui̧na̧'a̧ ja̧'hua̧ta̧nö̧ ȩ'u̧ttö̧ a̧'cua̧jä̧'i̧nä̧ 'cärächa'a jö̧nä̧. O'ca juiyönä jacuänä yori'iso uhuähuoca'a ji̧na̧'a̧do u̧mi̧nä̧mä̧. ¹⁹ Salomonmä jo̧mȩnö̧ aditinödo juode isode o̧ca̧hui̧yä̧ jacuamä ku̧ni̧do U̧ru̧hua̧ ö̧ä̧nä̧hua̧ adiu pä'a ucuocu u̧ju̧ni̧nö̧ huȩnȩ hua'adö ötacua'a pä'ö juȩnȩtä̧. ²⁰ Juo̧ca̧ jacuämä tu̧mu̧ ji̧mu̧tȩnö̧ juänä co̧ro̧mu̧ttö̧ pa̧ja̧cuä̧nö̧ jo̧mȩmä̧ ö'otocumä, juo̧ca̧ ä̧cuo̧mȩnä̧ i̧so̧ca̧ jö̧ta̧'a̧nö̧tä̧ ji̧na̧'a̧ öcähuecumä, ja̧hua̧ta̧'a̧nö̧ ju'tojucu'inä. Salomonmä isode räbiyä o'ca juiyönä tä̧rö̧ aditinödo oro pacuiottötä: ja̧hua̧ta̧'a̧nö̧ Cedrottö mechö aditinö Diosrö iyähuä'ca'inä. ²¹ Salomonmä Dios ö̧jo̧de jacuä o'ca juiyönä päcuäi orottö mȩchö̧ aditinö, ja̧hua̧ta̧'a̧nö̧ u̧mi̧nä̧ mu̧ȩcuä̧sä̧mä̧ cärenäsa̧mä̧ orottö ji̧na̧'a̧ pa̧tȩcuä̧nö̧'i̧nä̧ mȩchä̧hui̧na̧'a̧ orottö. ²² Ja̧u̧ aditinö juode Dios ö̧jo̧de jacuä ca̧cu̧ o'ca juiyönä aditinö orottötä cädome jubu pä'iönä, Juo̧ca̧ jacuä jähuä Diosr iyö rötähuä o̧ca̧hui̧yä̧'i̧nä̧ odiyä'inä päcuä'i orottö mȩchö̧ aditinö. ²³ Salomonmä aditinö ta̧ju̧ querubinörö̧ olivo dauttö, ya̧cu̧nä̧ ppa̧ja̧cuä̧nö̧ metro ja̧'a̧nä̧ 'cuä'o'önänö jö̧nä̧ ju'tojumä, jacuänä i̧so̧ca̧'i̧nä̧. ²⁴ Ya̧tȩ qurubin ujuabämä ji̧na̧'a̧do todäre metro jo̧mȩnä̧ ja̧'a̧nä̧ icuä'o'önä 25 centimetronö ö'otomä. Ja̧hua̧ta̧'a̧nö̧ ca̧ra̧ querubin'inä ä̧cuo̧mȩnä̧'i̧sa̧ jö̧ ta̧'a̧nö̧ ju'tojucu'inä ö'otocu'inä. Ja̧hua̧nö̧ jo̧mȩnä̧ ya̧tȩ ujuabä päjurettö karabäcu ö'otomä pa̧ja̧cuä̧nö̧ ja̧'a̧nä̧ 'cuä'o'önä. ²⁵ Ja̧u̧ ca̧ra̧ querubin ujuabä öröämä pa̧ja̧cuä̧nö̧ metro ja̧u̧nä̧ 'cuä'o'önä. Jahuä ta̧ju̧ querubin tö̧ro̧ä̧'i̧nä̧ ttöoto'inä yorätehuinätödo, tta̧'cua̧juä̧'i̧nä̧. ²⁶ Ya̧tȩ querubin ö'otomä ji̧na̧'a̧ pa̧ja̧cuä̧nö̧ metro yabocunänö ka̧ra̧'i̧nä̧ ä̧cuo̧mȩnä̧'i̧sa̧ ta̧'cuä̧juä̧'i̧nä̧. ²⁷ Salomonmä querubinrömä surojötttö 'quȩcua̧ca̧nä̧ ku̧ni̧nö̧do. Ttujuabiyämä idäppänö jö̧nä̧ ku̧ni̧nö̧do, ya̧tȩ ujuäbä räbänä yo̧ȩpä̧rö̧nä̧ ja̧hua̧ta̧'a̧nö̧ ka̧ra̧ querubin ujuabä korobä räbänä yo̧ȩpä̧rö̧nä̧ ttujuabiyä pä̧tȩcuä̧nö̧ yo̧ȩpä̧rö̧nä̧ ka̧cui̧nä̧tö̧do surojuttö 'quȩcuo̧ca̧ kä'co päteö jö̧nä̧. ²⁸ Salomonmä querubinörö päcuäi orottö 'tärö aditinödo. ²⁹ Ja̧u̧mä̧ o'ca juiyönä isode rabiyänämä sobucuächönä i̧huȩnȩ ucuocua'a jö̧nä̧ querubin tta̧'cua̧juä̧tä̧ 'co̧ö̧ aditinö. ³⁰ Salomonmä isode rȩjȩmä̧ orottö jihuocuachönä rötonö todäre cueönä u̧mi̧nä̧'i̧nä̧ jacuänä'inä o̧ca̧hui̧yä̧ o'ca juiyönä. ³¹ Salomon isode apatiyä olivo dau odiyättö jacuänä doächäcuähuä o̧ca̧ apate'inä aditinödo. ditel'inä, ja̧hua̧ta̧'a̧nö̧ apate rönähuä'ca'inä ji̧mö̧tȩ jo̧mȩnä̧ o̧ca̧ 'torähuina'ado. ³² Pa̧'a̧nö̧ jȩpu̧ aditinö apatiyä tatere oliva dau adiyättö, ja̧hua̧ta̧'a̧nö̧ ja̧u̧mä̧ querubin tta̧'cua̧jä̧ dau odiyä huä̧mȩ 'co̧'i̧nö̧ huäri i̧so̧i̧ jä̧i̧nö̧'a̧nö̧ jö̧ a̧'cua̧juä̧'i̧nä̧ ȩ'u̧ o̧tti̧ a̧'cuä̧jä̧ 'cärächa'a jö̧nä̧. Ja̧u̧mä̧ ttäropinö orottö querubinrö'inä huäri o̧i̧ jä̧i̧nö̧'a̧nö̧ jö̧'i̧nä̧ orottö 'täropinödo. ³³ Pa̧'a̧nö̧ jȩpi̧nö̧do Dios o̧jö̧de doächäcuome oliva dau odiyä ji̧na̧'a̧ pa̧jä̧cuä̧nö̧ o̧ca̧nä̧ sacuina'a ja̧hua̧ta̧'a̧nö̧ cipres dau odiyättö adicuina'ado tatere apatiyämä. ³⁴ To̧jä̧rȩ o̧ji̧yä̧ apate ji̧na̧'a̧ cärächönä ja̧'hua̧ta̧'a̧nö̧ karate apatemä tojäre ojiyä ji̧na̧'a̧ cärächönä. ³⁵ Ja̧u̧mä̧ odiyänä huä̧mȩ isotö ta̧'cua̧juȩ'co̧i̧nö̧do querubinörö'i̧nä̧, huäri o̧i̧ jä̧'i̧nö̧ a̧nö̧ jö̧'i̧nä̧ ȩu̧ o̧tti̧ 'cärächönä jö̧'i̧nä̧, ja̧hua̧ta̧'a̧nö̧ orottö ttaropinödo 'co̧ö̧ aditäjimä. ³⁶ Ja̧u̧mä̧ aditinö jacuänämä huäbodäcuänä pä'i'önä inähuiyä jo̧mȩnä̧ 'cui'ö adicuättö ja̧hua̧ta̧'a̧nö̧ ji̧mä̧tȩnä̧ pä'i'önä ji̧na̧'a̧ cedro icui'quiyu. ³⁷ Tu̧ru̧hua̧ Tö̧ä̧nä̧hua̧ ö̧do̧demä rȩjȩ kada'camä pä̧ja̧cuä̧nö̧ a̧'ȩ jo̧mȩnä̧ pä'ina'a zif kä̧hua̧nä̧ käda'camä. ³⁸ Tu̧mu̧ to̧mu̧rȩnö̧ ja̧'a̧nä̧, a̧'ȩ jo̧mȩnä̧ Bul kä̧hua̧ pä̧nä̧, tu̧mu̧ ji̧mu̧tȩ ja̧'a̧nä̧ ko̧ro̧mu̧ttö̧ huäbo'checuänö pä'iomenä, juode isodemä jo̧mȩnö̧ cädäcuähui'ina'ado isodemä p'a̧nö̧ ttadija pä'ö i̧huȩyu̧ti̧nö̧'a̧nö̧tä̧. Salomonmä ttu̧mu̧ ji̧mö̧tȩnö̧ ja̧'a̧nä̧ kormu̧ttö̧ yo'chenö a̧'ȩnö̧ recuina'ado juode Dios ö̧jo̧de aditinö pänämä.