¹ 18 a̧'ȩ päi'omenä ru̧hua̧ Jeroboam Nabat i̧tti̧ Abiammä ruhuo huea pä'ö kä̧mä̧di̧pä̧ji̧ Judas rȩjȩnä̧. ² Ja̧'hua̧nö̧ ja̧'a̧ huäbodäcuä a̧'ȩ päi'önä hue'inö ruhuo Jerusalénnätä̧. A̧ju̧ ki̧mi̧mä̧ micuinäju̧ Maaca jahuäjumä Abisalón kittiju ji̧na̧'a̧. ³ Surojutä o'cajuiyönä jȩpö̧ ki̧nö̧ chutä jä'o'inä jäyä jȩi̧ni̧yä̧cu̧ ja̧'a̧ ä̧cuo̧mȩnä̧tä̧ chutättö'inä; amiso'quittö'inä yorätehuoca'a ji̧na̧'a̧ u̧ru̧hua̧ Dioscumä, David amiso'quinä ji̧nö̧'a̧nö̧ jo̧ca̧'a̧ ji̧na̧'a̧. ⁴ David rö̧ä̧nä̧tä̧ repe'inö u̧ru̧hua̧ Diosrö lámpara tejädö ku̧nä̧hua̧'a̧ iyinäcu̧ Jerusalénnä; ja̧u̧nu̧ o'ca'inä i̧tti̧ cä'epö u̧ju̧nä̧cua̧ Jerusalénnätä̧. ⁵ Davidmä u̧ru̧hua̧ Dioscumä jueönä̧tä̧ ki̧nö̧ ji̧na̧'a̧, mo̧ro̧'i̧nä̧ ö̧jö̧'i̧nä̧ o'cajuiyönä̧tä̧, tȩa̧u̧nä̧ jö̧'i̧nä̧ ahuaruhuä o'cotöttö'inä ja̧'hua̧nö̧ jä̧cua̧'a̧. ⁶ Ja̧'hua̧nö̧ ja̧'a̧ curä päi'ina'a Roboamcu̧'i̧nä̧, ja̧'hua̧ta̧'a̧nö̧ Jeroboamcu̧'i̧nä̧ mo̧ro̧ jö̧ a̧'u̧cuä̧ o'cajuiyönätä̧ ö̧jö̧'i̧nä̧. ⁷ Koro'inä, Koro'inä jȩpi̧nö̧ jo̧mȩnö̧tä̧ Abiammä, o'cajuiyönätä̧ jȩpi̧nö̧ ji̧na̧'a̧, ¿Huȩyu̧tu̧ ku̧nä̧huo̧ca̧'a̧ tä̧ji̧ Crónicas cuyäru'tättömä Judattöhueähuä huȩnȩmä̧? Ja̧'hua̧ta̧'a̧nö̧ curä päi'ina'a jahuätö ttö̧'quȩtȩttö̧ Abiamcu̧'i̧nä̧ ja̧'hua̧ta̧nö̧ Jeroboamcu̧'i̧nä̧. ⁸ Ja̧'hua̧nö̧ ja̧'a̧ Abiammä 'corupä'i'inö chutä ö̧tä̧mö̧mi̧nä̧cu̧, ja̧'hua̧nö̧ ja̧'a̧ 'turu tticuinäcu̧ David ä̧ji̧no̧mȩ ötahuiyänä i̧tti̧ Asatä hue'inö jä'o ö̧ji̧nä̧mȩmä̧. ⁹ Veintenö jo̧mȩnä̧ Jeroboam Israel ttö̧ja̧ ttu̧ru̧hua̧, Asa kä̧mä̧di̧nö̧ ruhuo huea pä'ö Judá rȩjȩnä̧. ¹⁰ Ja̧'hua̧nö̧ ja̧'a̧ ruhuo hue'inö ji̧na̧'a̧ cuarenta uno a̧'ȩ jo̧mȩnä̧ Jerusalénnä; jä̧da̧mä̧ micuinä̧ju̧ ji̧na̧'a̧ Maaca, jahuäjumä Abisalón kittiju ji̧na̧'a̧. ¹¹ Asamä u̧ru̧hua̧ Dios toomenä jueönätä̧ jȩpi̧nö̧, jä̧do̧ David minä jȩi̧nö̧ta̧'a̧nö̧tä̧. ¹² Tidepä hueö jȩpö̧ ka̧cuä̧tö̧rö̧ ötahuiyä rö̧o̧mȩ rä'opö icuinö sodoma ji̧nö̧'a̧nö̧ jo̧mȩttö̧, ja̧'hua̧ta̧nö̧tä̧ tätähuä o'ca o'catoi'önä esetö jȩpi̧nä̧tö̧ jä̧do̧tö̧ mi̧nä̧'i̧nä̧ ja̧'hua̧nö̧tä̧ jȩpö̧ ka̧cui̧nä̧tö̧ ji̧na̧'a̧. ¹³ Jä̧da̧ Maaca'inä yajutä jähuä päi'önä jȩpi̧nä̧ju̧ ji̧na̧'a̧, ruhuaju jö̧nä̧ kö̧ja̧ pä'ö, ka̧'cua̧juä̧'i̧nä̧ esetö ucuotönö tturuhuaju jö̧nä̧. Asamä jȩpö̧ icuinö ka̧'cua̧juä̧ jö̧'i̧nä̧ ja̧'hua̧nö̧ ja̧'a̧ kuhuö icuinö möä'ca rȩjȩ pämäroppä jö̧nä̧ jo̧mȩttö̧. ¹⁴ Bäreu jähuä ko̧mȩmä̧ rö̧o̧mȩmä̧ 'cho'ipocotö pinätö̧; Asamä amiso'quittömä jueönätä̧ ki̧nö̧ u̧ru̧hua̧cu̧mä̧ o'cajuiyönä ö̧jö̧'i̧nä̧. ¹⁵ Dios ö̧jodenä̧ i'chächu ku̧ni̧nö̧ jä'o'inä huo̧juä̧chi̧'ö̧mä̧ aditähuättömä ȩpö̧ ku̧ni̧nö̧, ja̧'hua̧nö̧ ja̧'a̧ ja̧u̧'i̧nä̧ ȩpö̧ ku̧ni̧nö̧: Oro'inä plata'inä ja̧'hua̧nö̧ ja̧'a̧mä̧ ahuähuä o̧'ta̧'i̧nä̧. ¹⁶ Asa'inä ja̧'hua̧ta̧'a̧nö̧ Baasa'inä Israel ttö̧ja̧ ttu̧ru̧hua̧. Jahuätö ttö̧'quȩtȩttö̧ curä päi'ina'a o'cajuiyönä hue'ö ttö̧jo̧mȩttö̧. ¹⁷ Ja̧'hua̧nö̧ ja̧'a̧ 'cha'ächö Israel ttö̧ja̧ ttu̧ru̧hua̧ Baasamä ucuotäcuähuä juiyönä Judanä, ja̧'hua̧ta̧'a̧nö̧ Ramá ötahuiyä rättopächö juiyönä'inä, dottächö juiyönä'inä ki̧na̧'a̧ ya̧tȩ'i̧nä̧ Asattömä, Judá rȩjȩ ru̧hua̧. ¹⁸ Asamä Dios ö̧jodenä ka̧cu̧ o'cajuiyönä ȩmi̧nö̧ plata'inä ja̧'hua̧ta̧nö̧ oro'inä rö̧ä̧nä̧ micuäu ka̧cui̧pi̧nö̧, ru̧hua̧ ojusodettö'inä rö̧ä̧nä̧ micuäuttö. Ȩpö̧ iyinö öäre adicuä ttö̧ja̧rö̧, ja̧'hua̧nö̧ ja̧'a̧nä̧ hue'inö Ben-adadrö, Tabrión i̧tti̧, Hezión i̧tti̧ ji̧na̧'a̧ Siria rȩjȩ ru̧hua̧, ja̧u̧mä̧ ki̧nö̧ ji̧na̧'a̧ Damasconä pä'inödo: ¹⁹ Ji̧nä̧ yo̧mȩtȩ kä̧hui̧ ttöcu'inä ja̧'hua̧ta̧'a̧nö̧ ucutä'inä ttö chä'inä, ucu cuä'o'inä ttö̧ji̧nö̧ ji̧nö̧'a̧nö̧; topihuä ttömä huȩdä̧cua̧sä̧ ji̧yȩtȩ iyähuä platanä'inä ja̧'hua̧ta̧'a̧nö̧ oro'inä. Tö'ipächi ji̧nä̧ yo̧mȩtȩ ku̧jo̧mȩttö̧ ttu̧huȩcuä̧nä̧tä̧ Baasa Israel ttö̧ja̧ ttu̧ru̧hua̧ttö̧. ²⁰ Ben Adadmä ä̧ju̧cui̧nö̧ ru̧hua̧ Asarö ja̧'hua̧nö̧ ja̧'a̧ hue'ö icuinö su̧ro̧da̧u̧ tturuhuotörö jue'ipotö, jahuätömä rohuähuinä̧tö̧ ötahuiyä rö̧o̧mȩ Israelttö. Ja̧'hua̧ta̧nö̧ 'chu'ädnätö̧ Ijónrö̧'i̧nä̧, Danrö̧'i̧nä̧, Abel de Bet Maaca ja̧'hua̧ta̧nö̧ o'catoi'önä Cineret, ji̧nä̧ yo̧mȩtȩnä̧ o'catoi'önä Neftali i̧rȩjä̧ttö̧ ji̧na̧'a̧. ²¹ Baasamä ä̧ju̧cui̧ pa̧'a̧nö̧ jö̧nä̧, cä'ädi'inö aditähuä'inä korotö'inä tteseunä ö̧jä̧'i̧jo̧mȩttö̧, Tisa rȩjȩnä̧tä̧ ppa̧'ä̧chi̧nö̧. ²² Ja̧'hua̧nö̧ ja̧'a̧ ru̧hua̧ Asamä o'catoi'önä̧rö̧ Judás rȩjȩnä̧ ka̧cuä̧tö̧rö̧ huopinö ca̧ca̧ti̧pinö. Ya̧tȩ'i̧nä̧ 'chä̧hui̧'o̧cö̧ pinö inähuä o'qui'inä, ja̧'hua̧ta̧nö̧ dauuiyättö'inä Baasa aditinöttö̧mä̧, ja̧'hua̧nö̧ ja̧'a̧nä̧ ru̧hua̧ Asamä aditinö ji̧na̧'a̧ jahuätö Benjaín ö̧jo̧mȩ mö̧ä̧'ca tta̧huä̧rä̧cuä̧huä̧ ttö̧ja̧'i̧nä̧ ttö̧jo̧mȩ ji̧na̧'a̧. ²³ Koro'inä jo̧mȩnö̧ jȩpi̧nö̧ ji̧na̧'a̧ Asamä ja̧'hua̧nö̧ o'cajuiyönä juruhuinö, o'cajuiyönä̧tä̧ koro'inä jȩpi̧nö̧ ji̧na̧'a̧, ja̧'hua̧ta̧'a̧nö̧ ötahuiyä bäreu'inä aditinö ji̧na̧'a̧ ¿Huȩyu̧tu̧ ku̧nä̧hui̧'o̧ca̧'a̧ ji̧na̧'a̧ tä̧ji̧ cronicas cuyäru'tänämä hueähuä huȩnȩ Judáttö'inä? Öbuecuächinö jo̧mȩ jubö a̧'ȩ jo̧mȩnä̧ na'achi̧nö̧ ji̧na̧'a̧, ö̧jä̧pö̧ jo̧mȩ. ²⁴ Ja̧'hua̧nö̧ ja̧'a̧ Asamä 'corupä'i'inö jä̧do̧tö̧ mi̧nä̧ 'turu tticuinä̧cu̧ jä̧do̧ ö̧ji̧no̧mȩ David ötahuiyänätä̧; ja̧'hua̧ta̧'a̧nö̧ i̧tti̧ Josafat jä'o hueinome ki̧'i̧pinö. ²⁵ Jeroboam i̧tti̧ Nadabmä ruhuonä huea pä'ö kä̧mä̧di̧nö̧ Israel ttö̧ja̧rö̧ todäre a̧'ȩ hueinö o'ca'a ru̧hua̧ Asa Judáttö; ja̧'hua̧nö̧ ja̧'a̧ todäre a̧'ȩ jo̧mȩ hue'inö Israel ttö̧ja̧rö̧'i̧nä̧. ²⁶ Ja̧u̧nä̧ suronä jȩpi̧nö̧ ji̧na̧'a̧ Dios toomenä jä̧do̧tö̧ tti̧'chi̧no̧mȩnä̧tä̧ 'chi̧nö̧ ji̧na̧'a̧, ja̧'hua̧nö̧ ja̧'a̧ suroju jȩpi̧nö̧ Israel tta̧ja̧rö̧'i̧nä̧. ²⁷ Baasa, Ahias, i̧tti̧ Isacar a̧hua̧ru̧hua̧ pi̧nö̧ ji̧na̧'a̧, ji̧nä̧ yo̧mȩtȩ pä'i'ö pä'ä'chäcuähuipinätö̧ Nadabcu; Baasamä cuä'ö icuinö Gibetón rȩjȩttö̧, filisteos ttö̧ja̧ ttö̧ja̧cuo̧mȩ, ja̧'hua̧nö̧ ja̧'a̧ Nadab o'catoi'önä Israel ttö̧ja̧mä̧ ku̧nä̧ri̧nä̧tö̧ ttoecuächönä Gibetónttö'inä. ²⁸ Baasamä cuä'ö icuinö ji̧na̧'a̧, Nadabrö huäbodäcuä a̧'ȩ päi'omenä ru̧hua̧ Asa hue'ö ö̧jo̧mȩnä̧ Judea rȩjȩttö̧, ruhuo ru̧hua̧ ö̧ja̧ pä'ö. ²⁹ Baasamä ru̧hua̧ pä'i'inö cuä'ö icuinö o'catoi'önärö̧ Jeroboam ahuaruhuärö. ya̧tȩ'i̧nä̧ a̧'cua̧rö̧ juiyönätä̧; ji̧yȩtȩ'i̧nä̧ ki̧'ö̧ juiyönä Diosmä ucuocuinö i̧huȩnȩ jiäcuähuä i̧sa̧rö̧ Ahiasrö Silonita ttö̧ja̧ i̧sa̧rö̧. ³⁰ Jeroboam suronä jȩi̧nö̧mä̧ suroju jȩpi̧nö̧ ji̧na̧'a̧ Israel ttö̧ja̧rö̧'i̧nä̧, ja̧'hua̧nö̧tä̧ jȩpi̧nö̧ ji̧na̧'a̧ Diosrö'inä Israel ttö̧ja̧rö̧'i̧nä̧. ³¹ Nadabmä̧ o'cajuiyötä ja̧'hua̧nö̧ jȩpi̧nö̧ ji̧na̧'a̧ ?¿Huȩyu̧tu̧ ku̧nä̧hui̧'o̧ca̧'a̧ ji̧na̧'a̧ tä̧ji̧ cronicas cuyäru'tänämä Israel ttö̧ja̧rö̧ hueähuä huȩnȩttö̧mä̧? ³² Asacu'inä, Baasacu'inä Israel ttö̧ja̧ ttu̧ru̧hua̧ curä rohuäu ka̧cui̧nä̧tö̧ ji̧na̧'a̧ yoräteönä̧tä̧ tturuhuonä. ³³ Huäbodäcuä a̧'ȩ hue'inö ru̧hua̧ Asa Judá rȩjȩnä̧, ja̧'hua̧nö̧ ja̧'a̧ Baasa, Ahias i̧tti̧ ruhuo huea pä'ö kä̧mä̧di̧nö̧ o'cajuiyönä Israel rȩjȩnä̧ ka̧cu̧ttö̧'i̧nä̧ öäretä päi'ina'a. Ja̧'hua̧nö̧ ja̧'a̧ veincuatro a̧'ȩ jo̧mȩ hue'inö. ³⁴ Jȩö̧mä̧ surojutä jȩpi̧nö̧, Dios to̧ä̧rö̧mä̧ ä'cattö Jeroboam i̧'chi̧nö̧ta'anötä 'chi̧nö̧ jjna̧'a̧, ja̧'hua̧ta̧'a̧nö̧ suräjutä oipö icuinö Israel ttö̧ja̧rö̧'i̧nä̧.