¹ Ja̧hua̧nä̧ ja̧'a̧ Dios Baasarö to'ija̧'a̧cu̧ päö huȩnȩ rȩbȩhui̧na̧'a̧ Janani i̧tti̧ Jehúru; pä'inö: ² I̧sa̧ppȩttö̧tä̧ cä'epinösä̧ ucurumä, juhua'a jö̧ta'anö chumöhuäyotö Israel ttö̧ja̧ ttu̧ru̧hua̧ juȩ'i̧pa̧ päcui'önä chu̧ju̧ni̧nä̧cu̧jä̧ ucumä, ja̧'hua̧nö̧ ja̧'a̧nä̧ Jeroboam Nabat i̧tti̧ u̧mä̧ni̧yä̧nä̧tä̧ cui'ächäjijä̧. Ja̧'hua̧nö̧ jö̧ta'anö chumöhuäyotö Israel ttö̧ja̧ suronä jȩttö̧nä̧ jȩpä̧ji̧jä̧. Pä̧i̧cu̧nä̧ chu̧ra̧huä̧ri̧ya̧cu̧ pä'ötä jȩpä̧ji̧jä̧. ³ Ja̧'hua̧nö̧ jö̧ta'anö ucuru to'odejipö chi̧cuä̧cua̧sä̧ cuahuaruhuäcutä Nabat i̧tti̧ Jeroboam ojusode jȩpö̧ chicuinöta'anötä̧ jȩchä̧cua̧sä̧ ucu cuojusode'inä. ⁴ Pä̧huä̧rö̧jö̧'a̧nö̧ cua̧hua̧ru̧hua̧ ötahuiyättö 'corupäi'öttömä, ä̧hui̧ri̧tö̧tä̧ ttu̧cui̧'ä̧cua̧, ja̧'hua̧nö̧ jö̧ta'anö de'attö hua'ö icuttömä, mo̧ro̧jä̧ ppi̧yu̧tä̧ ttucui'ä̧cua̧. ⁵ Baasa koro aditinö'inä juhua'a jö̧ta'anö aditähuä ji̧nö̧'i̧nä̧ ujuru ji̧nö̧'i̧nä̧ ¿O'cajuiyönä huȩyu̧cua̧'a̧ ko̧ca̧'a̧ ta̧ji̧ Israel rȩjȩ ttö̧ja̧ tturuhuotö jȩtti̧nö̧'a̧nö̧tä̧ huȩyu̧tu̧ ku̧nä̧huä̧ cuyäru'tänämä? ⁶ Ja̧'hua̧nö̧ ja̧'a̧ Baasa jä̧'o̧tö̧cu̧tä̧ 'coru pä'i'inö ja̧'hua̧ta̧nö̧ Tirsa pättome 'turu tticuinäcu̧, ja̧'hua̧nö̧ ja̧'a̧ i̧tti̧ Elatä ru̧hua̧ ki̧'i̧pinö ö̧'ä̧'i̧jo̧mȩmä̧. ⁷ Ja̧'hua̧nö̧ ja̧'a̧nä̧ Dios ucuocuinö i̧huȩnȩ jiäcuähuä i̧sa̧ Jehú Hananí i̧tti̧nä̧ to'ija̧'a̧cu̧ jähuätä ji̧na̧'a̧ Baasarö'inä ahuaruhuärö'inä suronätä̧ jȩä'cha̧'a̧ttö̧ Dios ä'ca jo̧mȩttö̧, aditähuänä'inä suronä jȩpi̧nö̧ Dios pä̧i̧cu̧nä̧ ö̧ra̧huä̧rä̧pi̧ya̧rö̧ pä'ötä Jeroboam ahuaruhuärö 'cuäopinöta'anötä̧ jȩpö̧ icuiyarö pä'ö. ⁸ Juda ttö̧ja̧ tti̧rȩjä̧nä̧ Asa ru̧hua̧ ö̧ja̧'a̧ 26nö̧ du'o päi'omenä Baasa i̧tti̧ Ela Israel ttö̧ja̧ tti̧rȩjä̧nä̧ Tirsa pättome ru̧hua̧nä̧ huea pä'ö kä̧mä̧di̧nö̧, ja̧'hua̧nö̧ ja̧'a̧ todäre du'o jo̧mȩtä̧ ruhuomä hue'opo'inö. ⁹ Ja̧'hua̧nö̧ ja̧'a̧ Zimrí chutä umöhuäya̧ curä ruhuä ttu̧ru̧hua̧ curä caruquiyä ju'to jo̧mȩnä̧ hueähuä i̧sa̧ cuä'ö icuarö pä'ötä amöcuädinäcu̧, ja̧'hua̧nö̧ ja̧'a̧nä̧ Tirsa pättome ki̧nö̧ chutämä, a̧hua̧ru̧hua̧'i̧nä̧ tä̧'ä̧mä̧'chu̧'i̧nä̧ chutä umöhuäyotöttö juȩ'i̧pa̧ Arsa ojusodenä tirsa pättome. ¹⁰ 27nö du'o päi'omenä ASa ttö̧ja̧ ttu̧ru̧hua̧ päi'önä ru̧hua̧ hueö pänä, Zimri ichö cuä'ö icuinö, ja̧'hua̧nö̧ jȩpö̧ chutätä ru̧hua̧ päi'önä jȩpä̧cuä̧u̧ ruhuonä hue'inö. ¹¹ Ja̧'hua̧nö̧ ja̧'a̧ ru̧hua̧ päi'önä i̧rȩbȩhuä̧ji̧ o'comenä juhua'a jö̧ta'anö ruhuo dȩä̧cä̧nä̧ ö̧'ä̧mä̧do̧mȩnä̧, Baasa i̧tti̧mö̧ o'catoi'önätä̧ cuä'ö icuinö. Ya̧tȩ'i̧nä̧ ö̧ji̧pö̧ juiyönä̧tä̧, tö'cönänö ahuaruhuärö'inä, esecuä'ijä̧u̧ru̧'i̧nä̧. ¹² Zimrimä pa̧'a̧nö̧tä̧ be'epäjipö icuinö Baasa ahuaruhuä o'catoi'önä̧rö̧tä̧, Dios i̧huȩnȩ jiäcuähuä i̧sa̧ Jehúnä to'ija̧'a̧cu̧ jiähuinöta'anötä̧ Baasarö. ¹³ O'cajuiyönä Baasa suronä jȩi̧nö̧'i̧nä̧, i̧tti̧ Ela suronä jȩi̧nö̧'i̧nä̧, jitutä suronä jȩttu̧cu̧ jȩpi̧nä̧tö̧ Israel ttö̧ja̧ suronä jȩtti̧ya̧tö̧ pä'ö. Ja̧u̧ su̧ro̧nä̧ jȩttö̧nä̧tä̧ Israel ttö̧ja̧ ttu̧ru̧hua̧ Dios amisurächi'iyatö pä'ö. ¹⁴ Koro Ela jȩi̧nö̧, juhua'a jö̧ta'anö o'cajuiyönä jȩi̧nö̧mä̧, ¿O'cajuiyönä huȩyu̧tu̧ rutähuoca'a tä̧ji̧ Israel ttö̧ja̧ tturuhuotö jȩtti̧nö̧'a̧nö̧tä̧ huȩyu̧tu̧ ku̧nä̧huä'tänämä? ¹⁵ 27nö du'o päi'omenä juda rȩjȩ ttö̧ja̧ ttu̧ru̧hua̧ Asa ruhuonä huea'a, Zimri ruhuonä hue'a pä'ö kä̧mä̧di̧nö̧ ja̧'hua̧nö̧ ja̧'a̧ Tirsa ttö̧ja̧ tti̧rȩjä̧nä̧ koromöttönö to'cherenö mo̧ro̧tä̧ hue'opo'inö, curä ruhuä ttadicuipoa'anätä̧, filisteos ttö̧ja̧ ttiäre ötahuiyä Gibetóncu tturohuähua pä'ö. ¹⁶ Ja̧'hua̧nö̧ ja̧'a̧ curä ruhuä päjätömä ä̧ju̧cuo̧po̧'i̧nä̧tö̧, pa̧'a̧nö̧ pätta'a: Zimrimä to'ojicu suronä ucuocu ru̧hua̧rö̧, ja̧'hua̧nö̧ ucuocu ru̧hua̧rö̧ cuä'ö icuäji, ja̧'hua̧nö̧ ja̧'a̧ Israel ttö̧ja̧ o'catoi'önä ja̧u̧nu̧tä̧ mo̧ro̧ Israel ttö̧ja̧ tti̧rȩjä̧nä̧ ru̧hua̧ ö̧ja̧ pä'ö Omrirö huȩnä̧tö̧, curä ruhuä o'catoi'önä ttu̧ru̧hua̧rö̧ curä rohuähuäcuähuomettö̧. ¹⁷ Ja̧'hua̧nö̧ ja̧'a̧ Omrimä Gibetón ötahuiyättö 'cha'achinö, Israel ttö̧ja̧ o'catoi'önä ja̧u̧cu̧ 'chi̧nä̧tö̧, Tirsa ötahuiyä'inä tto'epinä̧tö̧ rohuäu tticua pä'ö. ¹⁸ Ja̧'hua̧nö̧ ja̧'a̧ Zimri ötahuiyä ttö̧ja̧rö̧ 'chu'ädö ttu̧ju̧na̧ja̧'a̧ toomenä, ru̧hua̧ ojusode jacuä do'ächinö ja̧'hua̧nö̧ ja̧'a̧ isodenä ocurä rȩdȩtö̧ kuhuö icu 'coru pä'i'inö. ¹⁹ Pi̧yȩmä̧ 'cuäopina'a chutä suronä jȩä̧'i̧ja̧'a̧ttö̧ juhua'a jö̧ta'anö suronä aditä'ija'attö Dios ä'ca jo̧mȩttö̧, ja̧'hua̧ta̧'a̧nö̧ Jeroboam u̧mä̧ni̧yä̧nä̧tä̧ 'chä̧nö̧ icuinö, suronä jȩä̧'i̧jö̧ta̧'a̧nö̧tä̧ suronä jȩpi̧nö̧, Israel ttö̧ja̧ suronä jȩtti̧ya̧rö̧ pä'ötä jȩpi̧nö̧. ²⁰ Zimri aditähuä ji̧nö̧ttö̧ ki̧'i̧pinö, juhua'a jö̧ta'anö suronä jȩpö̧ ru̧hua̧ Elarö cuä'ö icua pä'ö amöcuädinömä ¿O'cajuiyönä huȩyu̧cua̧'a̧ ko̧ca̧'a̧ tä̧ji̧ Israel rȩjȩ ttö̧ja̧ tturuhuotö jȩtti̧nö̧ta'anö huȩyu̧tu̧ ku̧nä̧huä̧ cuyäru'tänämä? ²¹ Ja̧'hua̧nö̧ ja̧'a̧ Israel ttö̧ja̧mä̧ ta'arenä päi'önä 'cä'ecuächinä̧tö̧. Ju'totö ttö̧ja̧ 'cä̧'ȩcuä̧chi̧nä̧tö̧mä̧ Ginat i̧tti̧ Tibnicu 'chi̧nä̧tö̧ ru̧hua̧ päi'önä ttu̧ju̧na̧ pä'ö, korotö 'quȩ'ȩcuä̧chinätömä Omricutä 'chi̧nä̧tö̧. ²² Ja̧'hua̧nö̧ ja̧'a̧nä̧ Omricu 'chi̧nä̧tö̧mä̧ Tibni-Ginat i̧tti̧cu̧ 'chi̧nä̧tö̧rö̧ cuä'ö icuinätö̧, ja̧'hua̧nö̧ jö̧ta'anö Tibni'inä hua'ö icuinö, Omritä ru̧hua̧ pä'i'inö. ²³ 31nö du'o päi'omenä ru̧hua̧ Asa huea'a juda ttö̧ja̧ tti̧rȩjä̧nä̧, Omri Israel ttö̧ja̧ tti̧rȩjä̧nä̧ huea pä'ö kä̧mä̧di̧nö̧, ja̧'hua̧nö̧ ja̧'a̧ tomöre jähuä päia'anä ttö̧jä̧pö̧ttö̧ to'cherenö du'o jo̧mȩnä̧ hue'inö, ja̧'hua̧nö̧ ja̧'a̧nä̧ koromöttönö to'cherenö du'o jo̧mȩnä̧ hue'inö Tirsa rȩjȩnä̧. ²⁴ Ja̧'hua̧nö̧ ja̧'a̧ Omrimä 66nö jo̧mȩnä̧ plata ä̧mä̧cö̧nä̧ Semerö mitinö rȩjȩ Samaria rȩjȩnä̧, ja̧'hua̧ta̧nö̧ juȩnȩmä̧ ötahuiyä 'quiyönä aditinö, ja̧u̧ aditäji ötahuiyämä Samaria pä'ö o'inö, Semer imi jinötä̧ pä'äji rȩjȩ u̧ru̧hua̧ pinö imi. ²⁵ Ja̧'hua̧nö̧ ja̧'a̧ Omrimä Dios ä'ca jo̧mȩttö̧ rö̧ä̧nä̧ suronä jȩpi̧nö̧, hueäcua'a ä'canä hue'inätö̧ttö̧'i̧nä̧ abonänö suronä jȩpi̧nö̧. ²⁶ Nabat i̧tti̧ Jeroboam i̧'chi̧no̧mȩnä̧tä̧ cue'ächinö, ja̧'hua̧nö̧ jö̧ta'anö Israel ttö̧ja̧ suronä jȩttö̧nä̧ suronä jȩpi̧nö̧, tätähuä'ca esetö Dios pä̧i̧cu̧nä̧ ö̧ra̧huä̧ri̧ya̧rö̧ pä'ötä jȩpi̧nö̧. ²⁷ Koro Omri suronä jȩi̧nö̧, o'cajuiyönä jȩi̧nö̧, ja̧'hua̧nö̧ jö̧ta'anö ujurunä jȩä̧'chi̧nö̧mä̧ ¿O'cajuiyönä huȩyu̧cua̧'a̧ ko̧ca̧'a̧ tä̧ji̧ Israel rȩjȩ ttö̧ja̧ tturuhuotö jȩtti̧nö̧ta'anö huȩyu̧tu̧ ku̧nä̧huä̧ kuyäru'tänämä? ²⁸ Ja̧'hua̧nö̧ ja̧'a̧ Omrimä hua'ö icuinö, o'co jähuämä Samaria rȩjȩnä̧tä̧ ttu'turinäcu̧, ja̧u̧ ruhuonä hueä'ijomemä i̧tti̧ Acabtä hue'inö. ²⁹ 38nö du'o päi'omenä Asa huea'a Juda ttö̧ja̧ tti̧rȩjä̧nä̧, Acab Omri i̧tti̧ huea pä'ö kä̧mä̧di̧nö̧ Israel ttö̧ja̧ tti̧rȩjä̧nä̧. ³⁰ Ja̧'hua̧nö̧ ja̧'a̧ Acab Omri i̧tti̧ Israel ttö̧ja̧ tti̧rȩjä̧nä̧ Samaria rȩjȩnä̧ 22nö̧ du'o jo̧mȩnä̧tä̧ hue'inö. Ja̧'hua̧nö̧ ja̧'a̧nä̧ Acab Omri i̧tti̧mä̧ Dios ä'ca jo̧mȩttö̧mä̧ suronätä̧ jȩpi̧nö̧, ä'canäji̧ ruhuonä hue'inä̧tö̧ttö̧'i̧nä̧ abonänö suronä jȩpi̧nö̧. ³¹ Ja̧'hua̧nö̧ ja̧'a̧nä̧ Jeroboam Nabat i̧tti̧ suronä jȩi̧nö̧ta'anö jȩa̧'a̧nä̧ ja̧u̧ru̧mä̧ surojoca'a jä̧'i̧nö̧'a̧nö̧tä̧ ji̧na̧'a̧, abora̧'a̧tä̧ suronä jȩö̧mä̧. Sidonio ttö̧ja̧ ttu̧ru̧hua̧ Et-baal ittijuru Jezabelrö, irecua päi'önä ȩmi̧nö̧ ja̧'hua̧nö̧ jȩpö̧ Baalrötä ö̧ä̧nä̧hua̧ 'cua̧rö̧nä̧ ucuo te'ähuinö. ³² Ja̧'hua̧nö̧ ja̧'a̧ i̧sa̧rö̧ cuä'ö icu kuhuö icuähuome'inä aditinö juhua'a jö̧ta'anö. ³³ Ja̧'hua̧nö̧ Acab Asrá a̧'cua̧juȩ'i̧nä̧ aditö ku̧ni̧nö̧, ja̧'hua̧nö̧ jȩpö̧ Acab korotö o'catoi'önä Israel rȩjȩttö̧ ruhuotö ä'canä hue'inä̧tö̧ttö̧'i̧nä̧ abonänö suronä jȩpi̧nö̧, Israel ttö̧ja̧ ttu̧ru̧hua̧ Dios ami surächi'iyarö pä'ötä jȩpi̧nö̧. ³⁴ Acab, Hiel Betel ttö̧ji̧nö̧ pä̧nä̧, Jericó ötahuiyä pä'äjita'anö aditinö, ä̧cuo̧mȩnä̧ i̧tti̧ Abiram a̧'cua̧rö̧ micuähuächa pä'ö rȩjȩnä̧ ppäecuä̧rö̧ o'ca aditö ku̧ni̧nö̧, juhua'a jö̧ta'anö i̧tti̧ röjinä i̧sa̧ a̧'cua̧rö̧ micuähuächa pä'ö äpate odiyä'inä ku̧ni̧nö̧, Dios i̧huȩnȩ päö'anötä̧ Nun i̧tti̧ Josuénä ucuocuinö'anö.