¹ Ji̧yȩnö̧ pä̧nä̧ Jeroboam i̧tti̧ Abiasmä rö̧ä̧nä̧ na̧'a̧chi̧nö̧. ² Ja̧'hua̧nö̧ ja̧'a̧ttö̧ Jeroboamä irecuarö pä'inö, jitätä ä̧rä̧mi̧'ö̧ jerucui'ipö täi Silora̧'a̧, yajuhuamä Jeroboam irecua pättö juiyäcua'anö: Juhua'atä kö̧ Dios i̧huȩnȩ jiäcuähuä i̧sa̧ Ahiasmä, ja̧u̧tä̧ ji̧na̧'a̧ ttö ruhuonä chö̧jä̧cua̧'a̧ ji'ähuinömä. ³ Cumönä ȩpö̧ tai to̧mö̧rȩ jähuä pan o̧ppä̧'i̧nä̧, torta'inä i̧so̧'ta̧nä̧ ȩpö̧ mayaja'inä, ja̧u̧rö̧ cuiyaja, ja̧u̧nu̧ o'ca'a ji̧'qui̧cha̧hua̧rö̧ tocu jö̧nä̧ 'cuäopaja̧ pä'ö jäcuepaja. ⁴ Jeroboam irecuamä päjita'anö jȩpi̧nä̧ju̧; ä̧rä̧mi̧'ö̧ Silora̧'a̧ 'chi̧nä̧ju̧ Ahias ojusodenä ja̧u̧mä̧ juiyo uböecuächina'a ji̧na̧'a̧ ja̧'hua̧nö̧ ja̧'a̧ttö̧ ö'äriyämä ä̧to̧cä̧chi̧nö̧ ji̧na̧'a̧. ⁵ Täcö Ahiasrö tö̧ä̧nä̧hua̧ Dios ä'canäji̧tä̧ jiähuaja'a ji̧na̧'a̧, Jeroboam irecuamä kichacuajuto ki̧tti̧ na̧huä̧chi̧yä̧cua̧, jahuäjurumä ttö pädö'anötä cuädätaja, jahuäjumä jerucui'upö kichäcuaju. ⁶ Ahiasmä jahuäju kicha'a rä̧mi̧pa̧'a̧ ä̧ju̧cui̧'i̧pö̧ äpate ä'ca päjia'a päinäcua̧: Do'ächi'ö Jeroboam irecua, ¿Tta'anö karajunä jerucui'ipö cuichäja'attö? Tta̧'a̧nö̧ pä'ö surojö huȩnȩtä̧ jidähua'a pä'ö huȩ'ä̧hua̧sä̧. ⁷ Ppa̧'a̧chö̧mä̧ Jeroboanrömä pa̧'a̧nö̧tä̧ jicuähuaja, pa̧'a̧nö̧ pä'äji Israel ttö̧ja̧ ttö̧ä̧nä̧hua̧ Diosmä: Ttötä ji̧na̧'a̧ Israel ttö̧ja̧ttö̧ ȩmi̧nö̧mä̧ ru̧hua̧ jue'ipä kä̧nö̧ chu̧mö̧huäyotö Israel ttö̧ja̧rö̧ huecua pä'ö. ⁸ David ojusode jacuättö ruhuo ȩmö̧ icuäjisä, ttötä chiyinö ja̧'a̧ttö̧ ttö chumöhuä̧ya̧ David ji̧nö̧'a̧nö̧mä̧ huocöjä̧ ucumä, ja̧u̧mä̧ ttö huedinö'a̧nö̧tä̧ jȩpi̧nö̧, a̧mi̧so'qui jacuä o'cajuiyönötä̧, ttö to̧chä̧ro̧mȩ kä'cottömä adiunä̧tä̧ jȩpi̧nö̧. ⁹ Ja̧'hua̧nö̧ jo̧ca̧'a̧ ä'canä ki̧nä̧tö̧ttö̧'i̧nä̧ abonänö suronä jȩpä̧'i̧jö̧, korotö ttö̧ä̧nä̧huo̧tö̧ o'ca ku icu iyähuome aditö iyä'ijö, chuju'cö juiyönätä̧, ttörömä jäyänä̧tä̧ icuipö. ¹⁰ Ja̧'hua̧nö̧ ja̧'a̧ttö̧ Jeroboam ojusodenämä surojutä i'cächö ichäjisä, Jeroboan cui̧tti̧mö̧ u̧mä̧tö̧rö̧'i̧nä̧, cumöhuäyotä tti̧tti̧mö̧rö̧'i̧nä̧, o'catoi'unä Israel ttö̧ja̧ tti̧tti̧mö̧rö̧'i̧nä̧, si'epö chicuäcua̧sä̧, ja̧u̧nu̧ o'comenä Jeroboam ojusodenä ttucuäre juatädö tticua'a jä̧'i̧nö̧'a̧nö̧ si'epö chi̧cuä̧cua̧sä̧. ¹¹ Jeroboam ahuaruhuä 'cotöttö ötahuiyä jacuättö 'corupä'i'ätömä, ä̧hui̧ri̧tö̧tä̧ ttucuäcuotö, meje'cara̧'a̧ttö̧ 'corupä'i'ätömä, ju'toju ppi̧yu̧tä̧ ttucuäcuotö, ttö Dios päda'attö jä̧cua̧'a̧. ¹² Ucumä ä̧rä̧mi̧'ö̧ cuojusodera̧'a̧ täi, ötahuiyära̧'a̧ docuächi'ö ji̧yȩnä̧tä̧ ji̧'qui̧cha̧hua̧mä̧́ 'corupäi'ä̧cua̧. ¹³ O'catoi'önä Israel ttö̧ja̧mä̧ ttajahuäcuotö, 'corupäi'iyä̧u̧, ja̧u̧rö̧mä̧ rȩä̧dö̧ tticuäcuotö, Jeroboam ahuaruhuättömä ja̧u̧tä̧ jä̧cua̧'a̧ rȩä̧dö̧ tti̧cuä̧cua̧mä̧, ja̧u̧mä̧ Israel ttö̧ja̧ ttö̧ä̧nä̧hua̧ Dios ä'ca jo̧mȩttö̧ adihuä i̧sa̧ jo̧mȩttö̧. ¹⁴ Diosmä Israel ttö̧ja̧ ttu̧ru̧hua̧ ka̧ra̧rö̧ ö̧ju̧nä̧cua̧, ja̧u̧mä̧ Jeroboam ahuaruhuä 'cotörö jȩpö̧ i̧cuä̧cua̧ jitä pi̧yȩnä̧tä̧, pi̧yȩmä̧ jitätä jä̧cua̧'a̧. ¹⁵ Diosmä Israel ttö̧ja̧rö̧ ya'opö i̧cuä̧cua̧ na̧ja̧'quȩnä̧ ajiyanä 'cuäoi'a jä̧'i̧nö̧'a̧nö̧, ja̧u̧mä̧ Israel ttö̧ja̧rö̧ ȩmö̧ i̧cuä̧cua̧ rȩjȩ adihuäjä̧ ttä̧do̧tä̧ mi̧nä̧rö̧ iyinäjä̧mä̧, Eufrates aje abó päte'ö pperetö i̧cuä̧cua̧, Asera ka̧'u̧cuä̧'i̧nä̧ ttadita'attö̧ Diosmä öjö'cö juiyönä jä̧cu̧. ¹⁶ Israel ttö̧ja̧rö̧ iyö i̧cuä̧cua̧ Jeroboam suronä jȩä̧ji̧ mi̧cuämä, ja̧u̧mä̧ Israel suronä jȩttö̧nä̧'i̧nä̧ jȩpä̧ji̧. ¹⁷ Ja̧'hua̧nö̧ ja̧'a̧ Jeroboam irecuamä ä̧rä̧mi̧'ö̧ tö'ipächinäju̧, Tirsara̧'a̧ttö̧ ichö apäte ä'ca cuäjomenä ji̧'qui̧cha̧hua̧mä̧ 'corupä'i'inö. ¹⁸ Ja̧u̧ru̧mä̧ o'catoi'önä Israel ttö̧ja̧ rȩä̧dö̧ tticuinäcu̧ Diosrö pä̧huä̧rö̧jo̧mȩnä̧, ja̧u̧ päinö'a̧nö̧tä̧, chutä umöhuä̧ya̧ i̧huȩnȩ jiäcuähuä i̧sa̧rö̧ jiähuinö'anötä̧ ¹⁹ O'cajuiyönä Jeroboam uruhuonä jȩi̧nö̧'i̧nä̧, örohuähui̧nö'i̧nä̧, täbo cuyäru'tä huȩyu̧cui̧'i̧na̧'a̧. ²⁰ Jeroboam 22nö a̧'ȩ hue'inö 'corupäi'omenä jä'orö tticuinömȩtä̧ tticuinäcu̧, ja̧u̧ o'comenä i̧tti̧ Nadabtö ruhuo hue'inö. ²¹ Salomón i̧tti̧ Roboamä̧ 41nö̧ a̧'ȩ hua̧ kä̧mä̧di̧nö̧ Judas ttö̧ja̧rö̧ huea pä'ömä, 17nö a̧'ȩ jo̧mȩnä̧ Jerusalénä hue'inö, Ja̧u̧ ötahuiyämä Diostä 'quȩ'ȩpö̧ u̧ju̧ni̧no̧mȩ o'catoi'önä Israel ahuaruhuä 'cotörö chutä iminä ucuotö jȩtta̧rö̧ pä'ö, a̧ju̧mä̧ micuinäju̧ Naama pä'ö Amonitä isaju. ²² Judas ahuaruhuä 'cotömä suronä jȩpi̧nä̧tö̧ ttu̧ru̧hua̧ Dios ä'ca jo̧mȩttö̧, ö'ä'inä öjönä jȩtti̧nä̧cu̧, ttö̧do̧tö̧ mi̧nä̧ suronä jȩtti̧no̧mȩttö̧'i̧nä̧ abonänö suronä jȩpi̧nä̧tö̧. ²³ Jahuätömä ucuotö jȩä̧cuä̧huä̧ o'ca'inä aditinätö̧, tta̧'cua̧jui̧yä̧ o'ca'inä, Asera ka̧'cua̧juä̧'i̧nä̧, mö̧ä̧'quiyö ju'toju'inä de'a'inä, dauhuiyä ka̧cuo̧mȩcu̧. ²⁴ Ja̧'hua̧ta̧'a̧nö̧ sodomitas'inä ka̧cui̧nä̧tö̧ juä̧jä̧ rȩjȩnä̧mä̧, jitörö pä̧huä̧rö̧jö̧ jȩpi̧nä̧tö̧ Israel ttö̧ja̧ rä'epö icuinäu̧mä̧ jahuätö jȩttö̧'a̧nö̧tä̧ jȩpi̧nä̧tö̧. ²⁵ Ji̧mö̧tȩ a̧'ȩ ru̧hua̧ Roboam hueomenämä, Egipto ru̧hua̧ Sisacmä Jerusalén ttö̧ja̧rö̧ rohuäu 'chi̧nö̧. ²⁶ Dios ojusodettö rö̧ä̧nä̧ micuäujuäi ȩmi̧pinö, ru̧hua̧ ojusodenä ka̧cu̧'i̧nä̧, Salomón orottö ku icu escudo jö̧nä̧ aditinö'inä ädoipinö. ²⁷ Recuo ji̧nö̧ o'ca'a ru̧hua̧ Roboamä broncettö escudo obi aditinö, ja̧u̧mä̧ ötahuiyänä tta̧'ä̧rä̧tö̧ tturuhuotörö iyä'chinö, jahuätömä ru̧hua̧ ojusode äpate ä'ca tta̧'ä̧rä̧tö̧ ji̧na̧'a̧. ²⁸ Dios ojusode jacuä ru̧hua̧ doächomenä, tta̧huä̧rä̧cuä̧huä̧ ttö̧ja̧tä̧ ttȩpi̧nö̧. Ja̧u̧nu̧ o'comenä tta̧huä̧rä̧cuä̧huä̧ ttö̧ja̧cu̧ ttȩpi̧nö̧. ²⁹ Ru̧hua̧ Roboam hueinö'inä, o'cajuiyönä jȩi̧nö̧'i̧nä̧ ¿Täbo huȩnȩttö̧ cronica cuyärö judas ttö̧ja̧ttö̧ ruhuonä ttö̧ji̧nö̧ huȩyu̧cui̧'o̧ca̧'a̧ ji̧na̧'a̧ tä̧ji̧? ³⁰ Roboam'inä, Jeroboam'inä 'cuäopönätä̧ rohuäu ka̧cui̧nä̧tö̧. ³¹ Roboam 'corupäi'omenä jä̧do̧tö̧ mi̧nä̧cu̧tä̧ ttötinäcu̧, David idepiyunä, a̧ju̧ ki̧mi̧nä̧ Maama pä'ö micuinäju̧ amonitas isaju ji̧na̧'a̧, ja̧u̧nu̧ o'comenämä i̧tti̧ Abiamtä̧ hue'inö.