¹ Ya̧tȩ ubo Dios u̧mö̧huä̧ya̧ u̧ru̧hua̧ i̧huȩnȩ päö'anö 'chä̧hui̧'i̧nö̧ Judattömä Bet-el jubö, ja̧'hua̧nö̧ ja̧'a̧ Jeroboammä ku icu iyähuome ki̧nö̧ a̧mȩu̧ juäi ku icu iya pä'ö. ² Ja̧u̧mä̧ u̧ru̧hua̧ i̧huȩnȩ päö'anö ku icu iyähuomemä to'ija̧'a̧cu̧ ucuocu pä'inö: ku icu iyähuome, ku icu iyähuome jö̧nä̧ pa̧'a̧nö̧ pä'äji chu̧ru̧hua̧mä̧ David minä ahuaruhuättö ya̧tȩ ji̧'qui̧cha̧hua̧ u̧huä̧pä̧chä̧cua̧ Ja̧u̧mä̧ Josía pä'ö o̧ttä̧cua̧. ja̧u̧tä̧ jä̧cua̧'a̧ usurä ȩmä̧huä̧cua̧mä̧ sacerdotes huotö ju'toju jo̧mȩttö̧ ucurumä a̧mȩu̧ juäi ku icu ttiyö'anö jö̧nä̧ i̧yä̧cua̧mä̧ ja̧'hua̧nö̧'i̧nä̧ ja̧'a̧nä̧ ucurumä ttö̧ja̧ ttihue'quiyutä jä̧cua̧'a̧ ku icu ttiyäcua'amä̧. ³ Ja̧u̧nu̧tä̧ mo̧ro̧ Dios u̧mö̧huä̧ya̧mä̧ ji̧yȩtȩ i̧jȩcuä̧ iyö pä'inö: Pi̧yȩ ja̧'a̧ i̧jȩcuä̧ chu̧ru̧hua̧ ucuocuäjimä; pi'ca ku icu iyähuä'camä toe'ächäcuä'ca, ja̧'hua̧nö̧ jö̧ta̧'a̧nö̧tä̧ ä̧ya̧ri̧sa pi'ca jö'tä huȩju̧mä̧ isoyatä pä'i'ö toe'ächäcua. ⁴ Ji̧yȩnö̧ pä̧nä̧ ru̧hua̧ Jeroboamä ä̧ju̧cui̧nö̧ Dios umöhuä̧ya̧ to'ija̧'a̧cu̧ ucuocua'a Bet-elnä kä'camä toe'äcuä'ca pä'ö. Ja̧'hua̧nä̧ ja̧'a̧ ru̧hua̧mä̧ u̧mö̧ cä'epö ku icu iyähuä'cattömä pä'inö: "Dios umöhuä̧ya̧rö̧mä̧ 'chu'ädätucui" jö̧nä̧, ja̧'hua̧nö̧ ja̧'a̧ to'ija̧'a̧cu̧ pä'ö kä̧nö̧ u̧mö̧ cäepäjä̧mu̧mö̧ joi'inäcu̧ yorisotä ya̧huo̧pö̧ juiyönätä̧ päi'önä. ⁵ Ja̧'hua̧nö̧ ja̧'a̧ ku icu iyähuä'ca ppo̧u̧cu̧tä̧ päi'önä dirächipinä'ca, ja̧'hua̧nö̧ jö̧ta'anö ä̧ya̧ri̧sa'inä juä'canä huäsamä isoyatä jö̧nä̧ päi'ina'a. Dios umöhuä̧ya̧ u̧ru̧hua̧ hueäji huȩnȩ jiähuäjimä isopäi'önätä̧ 'cuäopina'a. ⁶ Ja̧'hua̧nö̧ ja̧'a̧ ru̧hua̧mö̧ ädätö pä'inö Dios u̧mö̧huä̧ya̧rö̧: Ucuru jä'epösä cu̧ru̧hua̧ cu̧ä̧nä̧hua̧ Diosrö jäcuepa pä'ö, ttö chumö adihuächi'a pä'ö. Ja̧'hua̧nö̧ ja̧'a̧ Dios umöhuä̧ya̧mä̧ u̧ru̧hua̧rö̧ jä'epinö. Ja̧'hua̧nö̧ jäepomenä ru̧hua̧ u̧mö̧mä̧ yotäcu adihuächi'inämö pä'äji jä̧ji̧'a̧nö̧tä̧ jö̧nä̧ päi'inäcu̧. ⁷ Ja̧u̧nu̧ o'ca ru̧hua̧mä̧ pä'inö Dios umöhuä̧ya̧rö̧ ttöcu ichi chojusodera̧'a̧ cu̧cuȩmä̧ aunö cu̧cuä̧cua̧jä̧, ja̧'hua̧nö̧ ja̧'a̧nä̧ ji̧yȩtȩ mippounä chi̧yä̧cua̧jä̧ päinäcu̧. ⁸ Ja̧'hua̧nö̧ ja̧'a̧ Dios u̧mö̧huä̧ya̧mä ru̧hua̧rö̧ pä'inö; Cuojusode jähuä ju'tome cuiyöttö'inä ucucumä ichocusä, i̧ri̧si̧'i̧nä̧ cuocösä ajiya'inä ahuocösä poröttömä päinä̧cu̧. ⁹ Pa̧'a̧nö̧tä̧ jö̧nä̧ huȩ'ä̧hua̧sa̧ chu̧ru̧hua̧ttö̧mä̧, ja̧u̧mö̧ ttörö pä'inö i̧ri̧si̧'i̧nä̧ cucuä, ajiya'inä cuahuä, mänä cui̧'chä̧mä̧nä̧mä̧ ppa̧cuä̧chä̧. ¹⁰ Ja̧'hua̧nö̧ ja̧'a̧ttö̧ koromä mänänätä ppa̧'ä̧chi̧nö̧ Bet-elra̧'a̧cu̧ i̧chä̧jä̧mä̧ mä̧nä̧nä̧mä̧ ppa̧'a̧cho̧cö̧ pinö. ¹¹ Ja̧u̧nu̧ pä̧nä̧ Betelnä̧mä̧ ya̧tȩ bö̧o̧sa̧ huȩ'ä̧hua̧ ki̧nö̧ ja̧u̧rö̧mä̧ chutä i̧tti̧mö̧ ichö jittähuinäcu̧ o'cajuiyönä Dios umöhuä̧ya̧ jȩä̧ji̧mä̧ ji̧yȩnö̧ mo̧ro̧ Bet-elttö, ttä'orömä ji'ähuinätö ru̧hua̧ ucuocuäji huȩnȩ'i̧nä̧. ¹² Ttä'omä jä'epinö: ¿Ti̧mä̧ mä̧nä̧nä̧ i̧huä̧jä̧ttö̧? pä'ö. Ja̧'hua̧nö̧ ja̧'a̧ i̧tti̧mö̧mä̧ mä̧nä̧ i̧jȩpö̧ jittähuinäcu̧ Dios umöhuä̧ya̧ Judara̧'a̧ttö̧ i̧chä̧cuä̧hua̧ ppa̧huä̧jä̧mä̧ mä̧nä̧mä̧. ¹³ Ja̧'hua̧nö̧ ja̧'a̧ ttä'omä̧ i̧tti̧mö̧rö̧ pä̧'i̧nö̧: mo̧ro̧jä̧nä̧ huäcuähuöya huȩnȩtu̧cui, jahuätömä̧ jo̧mȩnö̧ jȩpi̧nä̧tö̧ mo̧ro̧jä̧rö̧mä̧ ja̧'hua̧nö̧ ja̧'a̧ttö̧ huȩ'ä̧hua̧ bö̧o̧sa̧ ja̧u̧nä̧ huä̧mä̧di̧nö̧. ¹⁴ Ja̧'hua̧nö̧ ja̧'a̧ Dios umöhuä̧ya̧ o'ca'anä rä'opächö 'chi̧nö̧, Ja̧'hua̧nö̧ ja̧'a̧ ja̧u̧rö̧mä̧ po̧cui̧pi̧nö̧ mä̧ji̧yä̧ dau kada'ca ö̧a̧'a̧ jäepinäcu̧: ¿Ucutä täji̧ Dios umöhuä̧ya̧ Judara̧'a̧ttö̧ ichäjimä? Ja̧'hua̧nö̧ ja̧'a̧ ja̧u̧mä̧ ädätinö A̧'a̧ ttötäsä pä'ö. ¹⁵ Ja̧'hua̧nö̧ huȩ'ä̧hua̧ bö̧o̧sa̧mä̧ pä'inö: Ttöci ichi chojusodera̧'a̧ i̧ri̧si̧ cucua. ¹⁶ Ja̧u̧mä̧ jua'a yabocu ädätinö: Ucucumä ppa̧dä̧chi̧yä̧cua̧sä̧ ucucumä chichiyä̧cua̧sä̧ i̧ri̧si̧'i̧nä̧ chucuiyä̧cua̧sä̧, ajiya'inä cha̧hui̧yä̧cua̧sä̧ poröttö ucucumä. ¹⁷ Chu̧ru̧hua̧ i̧huȩnȩttö̧mä̧ pa̧'a̧nö̧ jö̧nä̧ huȩ'ä̧hua̧sä̧ i̧ri̧si̧mä̧ cucuä. Ajiya'inä cuahuä juhuoröttömä mänä cui̧chä̧mä̧nä̧mä̧ ppacuhuä̧chä̧. ¹⁸ Ja̧'hua̧nö̧ ja̧'a̧ bö̧o̧sa̧mä̧ pä'inö: Ttä'inä huȩ'ä̧hua̧sä̧ ucuta'anö ja̧'hua̧nö̧ ja̧'a̧ttö̧ Dios umöhuä̧ya̧ isoppa hua̧mä̧ ttörö ucuocu pä'äji cuojusoder'a̧'a̧cu̧tä̧ ppa̧'ä̧di̧rö̧ i̧ri̧si̧ ucua pä'ö, ajiya'inä ahua pä'ö pa̧'a̧nö̧ pä'ö yapare jiähuinäcu̧. ¹⁹ Ja̧'hua̧nö̧ ja̧'a̧ Dios ja̧u̧cu̧tä̧ ppa̧'ä̧chi̧nö̧, ja̧'hua̧nö̧ ja̧'a̧ ja̧u̧tä̧ ojusodettömä u̧cuȩ'i̧nä̧ cuinö, ajiya'inä ahuinö. ²⁰ Ttu̧cuȩ rötö cuäcuähuodänä ttö̧'o̧mȩnä̧ u̧ru̧hua̧ i̧huȩnȩ rȩbȩhui̧na̧'a̧ ppa̧huä̧chä̧chö̧nä̧ päjinä. ²¹ Ja̧'hua̧nö̧ ja̧'a̧ huȩ'ä̧hua̧mä̧ ji'ähuinö Dios umöhuä̧ya̧ Judara̧'a̧ttö̧ ichäjirömä päinäcu̧: Cu̧ru̧hua̧mä̧ pa̧'a̧nö̧ pä'ö u̧ru̧hua̧ i̧huȩnȩ'i̧nä̧ jarodö, u̧ru̧hua̧ Dios churutä pätetö hueäji'inä jȩpo̧cö̧. ²² Ja̧'hua̧nö̧ ja̧'a̧ttö̧ ppa̧'ä̧chä̧ji̧jä̧. i̧ri̧si̧'i̧nä̧ cuäjijä̧, ajiya'inä ahuäjijä̧ cu̧ru̧hua̧mä̧ cucuó päinomettö̧ cuäjijä̧, ja̧'hua̧nö̧ ja̧'a̧ttö̧ ucu cuidepämä doächiyäcua'a cuä̧do̧tö̧ mi̧nä̧ huattomemä. ²³ Dios umöhuä̧ya̧ cuä̧nö̧'i̧nä̧ auínä cädomenä ja̧u̧ ppa̧huä̧chö̧nä̧ jȩpä̧ji̧mä̧ mö̧rö̧ba̧nä̧ huä̧cuä̧huä̧mä̧ jo̧mȩnö̧ jȩpi̧nö̧. ²⁴ Ja̧'hua̧nö̧ ja̧'a̧ Dios umöhuä̧ya̧ mä̧nä̧nä̧ i̧hui̧nö̧, ja̧'hua̧nö̧ i̧huo̧mȩ mö̧ yähui rä'o'ö cuä'ö icuinäcu̧. Ja̧'hua̧nö̧ ja̧'a̧ idepämä jȩpö̧ icuähua'atä mänänä pina'a. Ja̧'hua̧nö̧ ja̧'a̧nä̧ mö̧ yähui'inä mö̧rö̧ba̧'i̧nä̧ ji̧nä̧ yo̧mȩtȩ ka̧cui̧nä̧tö̧ o'co jähuä pȩjo̧mȩmä̧. ²⁵ Ja̧'hua̧nö̧ ja̧'a̧ u̧mö̧tö̧ 'cuätopomenä topinätö̧ ttö̧ja̧ i̧sa̧ idepämä mänänä do'opö icuähua'a pa̧'a̧. Ja̧'hua̧nö̧ ja̧'a̧ mä̧ yähuimä juhuene idepä po̧mȩtä̧ ki̧nö̧. Ja̧'hua̧nö̧ ja̧'a̧ huȩ'ä̧hua̧ bö̧'o̧i̧sa̧ ö̧jo̧mȩ ötahuiyänä rȩbȩu̧mä̧ tottäji huȩnȩ ji'ähuinätö̧. ²⁶ Huȩnȩ ä̧ju̧cuo̧mȩnä̧ huȩ'ä̧hua̧ bö̧'o̧i̧sa̧mä̧ mä̧nä̧ttö̧ ppa̧huä̧chö̧nä̧ jȩpi̧nö̧ pinömä pä'inö: Ja̧u̧ ubomä isopäi'önä Dios umöhuä̧ya̧ ja̧'a̧ ja̧u̧mä̧ u̧ru̧hua̧ hueömä jarodinö. Ja̧'hua̧nö̧ ja̧'a̧ttö̧ u̧ru̧hua̧mä̧ mö yähuirötä iyö u̧ju̧ni̧nä̧cu̧ ja̧'a̧. Ja̧u̧tä̧ 'co'copö icu cuä'ö icuarö pä'ö, chutä u̧ru̧hua̧ i̧huȩnȩ päjita'anö jö̧nä̧ 'cuäopa pä'ö. ²⁷ Ja̧'hua̧nö̧ ja̧'a̧ i̧tti̧mö̧rö̧ ucuocu pä'inö: mö̧rö̧ba̧nö̧ huä̧cuä̧huo̧mȩ cä'epö huȩnä̧tu̧cui̧ttö̧ ja̧'hua̧nö̧ ja̧'a̧ jahuätömä jo̧mȩnö̧ jȩpi̧nä̧tö̧. ²⁸ Ja̧'hua̧nö̧ ja̧'a̧ huȩ'ä̧hua̧ bö̧'o̧i̧sa̧mä̧ rä'opächö i̧'cho̧mȩnä̧ po̧cui̧pi̧nö̧ o'co jähuämä mänänä do'opö icuähua'atä pȩja̧'a̧. Mö̧ yähui'inä, mö̧rö̧ba̧'i̧nä̧ ji̧nä̧ yo̧mȩtȩ ka̧cui̧nä̧tö̧ o'co jähuä pä̧jo̧mȩ cuocö päji pinö. Juhua'a jö̧ta'anö mö̧rö̧ba̧rö̧'i̧nä̧ surojuo'epocö päji pinö. ²⁹ Ja̧'hua̧nö̧ ja̧'a̧ huȩ'ä̧hua̧ bö̧'o̧i̧sa̧mä̧ Dios umöhuä̧ya̧ o'co jähuä ȩmö̧ cä'epinö, ja̧'hua̧nö̧ cä'epäji'ca̧ mö̧rö̧ba̧ ju'tä cä'epö huänö emipinö ötahuiyära̧'a̧cu̧ ppa̧'ä̧chö̧ ja̧u̧ru̧ 'cuäopäji ajuäu 'turu icuarö pä'ö. ³⁰ Churutä pätecuächinome u'turinäcu̧, ja̧'hua̧nö̧ ja̧'a̧ ja̧u̧rö̧ ajuäö pä'inö: Juiyodi̧ barahua'a ttö cha̧hua̧ru̧hua̧hu̧e. ³¹ Ja̧u̧nu̧ o'ca' 'turu icuäji'ca̧mä̧ i̧tti̧mö̧rö̧ ucuocu pä'inö: Ttö 'corupädi'omenämä 'turucuicuätucuattöja̧ Dios umöhuä̧ya̧rö̧ 'turu tticuinometä̧ ja̧u̧tä̧ ihue'quiyucutä ji̧nä̧ yo̧mȩtȩ ca̧ca̧tö̧ cutätucuaja̧ pä'inö. ³² Koro pä'chäcuähuä'inä juiyönä isopä'önätä̧ pätecuächäcua'a ja̧u̧ jiähuinömä u̧ru̧hua̧ hueäji huȩnȩ Bet-elttö ku icu iyähuoca̧ toe'a pä'ö, ja̧'hua̧nö̧ jö̧ta'anö Samaria rȩjȩ ötahuiyä ju'toju jo̧mȩ ka̧cuä̧'i̧jö̧mä̧ o'cajuiyönätä̧ toechäcuätä ja̧'a̧ pä'ö. ³³ Jeroboam pi̧yȩ o'cajuiyönä suronä ö̧jö̧mä̧ pärou icuocö pinö, ja̧'hua̧nö̧ jo̧ca̧'a̧ ya'utecutä hue'ö ku̧nä̧'chi̧nö̧ sacerdotes huotö pätti'önä suronä jȩpä̧tö̧rö̧ ja̧'a̧nä̧ surojö juiyö ötahuiyä ju'toju jo̧mȩttö̧mä̧. Pä̧huä̧rö̧jö̧'a̧nö̧ sacerdotes hua̧ päi'önä chö̧ja̧ pä'ösä pä'ömä ja̧u̧tä̧ ji̧na̧'a̧ täcö sacerdotemä ju'toju jo̧mȩttö̧mä̧. ³⁴ Pi̧yȩtä̧ ji̧na̧'a̧ suronä jȩä̧cuä̧huä̧ päi'önä ji̧nö̧mä̧ Jeroboam ojusodettö ja̧'hua̧nö̧ ja̧'a̧ttö̧ ja̧u̧ttö̧tä̧ mo̧'o̧po̧'ä̧chö̧ toe'ächinö pi̧jä̧ rȩjȩ huä̧mȩttö̧mä̧.