Capítulo 35 (Moise icaite narso njaji inaiki aimadan coajicaotsa naofacawa)
1
Moise iwaketa pjiomi njaji Irael poco, lriaco narso: ''Icatsa njaji yácpti wa-Minalri inaalrica inaitjaca.
2
Irso sei jalredaoca idenjí-carro, mitsa siete jalredaoca nacó, sábado lricó, ikatsa jliaji shenitandaca iá-carro matsiadalri Dio irso, iwafetpa-carro. Cocacadaotsa idenjí lri-rcoda jalredaocaca irsotsa icadaaca mayamini.
3
Corriwatsa itaita iwacaca tiyé iipana lrico iyanácarro iipana lrico lri-ricoda jliaji jalredaoca iwafeeta carroda lricó.''
4
Caaco Moise narso pjiomi njaji Iraelitanai poco, lriaco narso cayoji, icatsa njaji DIo inaalri wanaitjaca.
5
Pjiomi shá pomená-perri icaolre ricó, idee ofrenda wa-Minalri irso, owirro, palraata, bronce,
6
yamacatí jipolremape, amolre-perri, njite maaficalri íyo írraiperri, njite jérriwaikja matsiaperri; cabra itsicolre tsakja;
7
carnero íyam idatanda írraidalri, maaficalri íyam matsiaperri, jaico acacia,
8
kerosen lampara ítadao nacanashopa Dio iipana lrico, pomeníperri aceite icaonawa naaroshopa nañjetashopa, njite incienso pomeníperri,
9
jiipada ónice, njite paana pja jiipada cacoada perri nerroetaope sacerdotenai itsayan icóda nacópe.
10
Pjiomi njaji atsianai cayecaperri nanoatsa nanaitjá-carro njaji Dio inaalri shá inanacó,
11
jliaji panti iwacaaca carrodawa lritapje yaapiya, lriwaiwa, njepaaca carronao, jaico nerrocawao, napjee, tipjí, topji yema-carronao;
12
jliaji patowa njite njaji jaico pawakje carronao, jliaji lripanaita iinocawa maaficalri imatsicana ikjaote nite jñiaji yamacati iitacada naofacawa lricó.
13
Nadee jliaji mesa nasho njaji jaico pawakje shopani, pjiomi njaji lrinacó-perri, njite peetje icaitecada niinica Dio;
14
jliaji lampara jirricona njite njaji lricaonaperri, nadee tsakja lampara njite lriitadape,
15
nade incienso njite njaji nawakje shopani, aceite naiñjeta shopao njite incienso pomení-dalri; nawacaaca carrodao ipananomao irrocadawa yenonjiteo;
16
jliaji altar namjaita carrona maaficalri nite jliaji lridaana corrarra shodalri njite njaji jaico nawakje carronaoni, nja tsakja njaji nadejishopa niini, njite jliaji ooni yárrona macaapi njite lriofa carronao tsakja.
17
Nadee tsakja njaji cortina naita shopa lriyacalrecoa jliaji nawacaaca carrodao, njaji jaico njite nema-carronao, njite cortina lripananomao,
18
nadee tsakja topji nawacaaca carrodao ipananoma icaona njite lricaona jliaji lriyacalreecoa ipananoma, njite neeñadao napapishopana.
19
Nadee tsakja tsaya nanaitjanda matsia nadejishopa Dio iipana lricó, njaji tsaaya matsiaperri sacerdote Aarón irso njite narso njaji lrienipe nadejí-carro sacerdotenai shó.''
20
Njite pjiomi njaji iraelitanai naawa Moise ioya.
21
Pjiomi njaji pomenáperri icaikre ricó nadee-carro ofrenda Dio irso nanaitjá-carro jliaji nawacaaca carrodao, pjiomi njaji nadejishopao niini, njite nanaitjashopa njaji tsaaya matsiaperri.
22
Naapjiomiwa, atsianai njite inaitjepe tsakja, pjiomi njaji pomená-perri icaikre ricó. Nadee nanaapapi, shentadati, caapirroti, nanaapa pocoda nacope, pjiomi nanaitjaji owirro sho nadeecana. Pjiomi njaji inaiki nadeeca ofrenda Dio irso aima shó.
23
Pjiomi njaji irsocape pia yamacati jipolremaki, amolremaki, írraimaki, jérriwai matsiaperri, cabra
itsicolre, carnero íyam nairraitanda, njite maaficalri íyam matsiaperri, nadeena.
24
Pjiomi njaji iomacape iaca palraata, bronce, nadeena ofrendawa Dio irso, caitsakja njaji irsocape jaico acacia nadejishopa cocacatsa, nadee tsakjana.
25
Pjiomi njaji inaitjepe yajicape íñaca nadee tsakja njaji nañanimaca yamacati jipolreperri, amolreperri, írraiperri, naña tsakja jérriwaimaca.
26
Pjiomi njaji inaitjepe yajicape íñaca, néña cabra itsicolre.
27
Njaji njewidaapo naa jiipada ónice paana pja jiipada matsiaperri nerroetaope sacerdotenai itsayan icoda nacó;
28
nadee pomeniajaipe, njite kerosen lamapara iitadao, aceite najetashopa tsakja, njite incienso pomeniperri tsakja.
29
Njaji iraelitanai nadee ofrenda Dio irso nacaolre rikjoite, pjiomi njaji atsianai njite njaji inaitjepe inaitjepe pomenáperri nacaolre ricó, nadee pjiomi njaji nadejishopa jliaji Dio inaalri nadejica Moise nakjoite.
30
Moise iaco narso njaji iraelitanai: ''Dio iniwana Bezalel, Uri irri, Jur idakerri, Judá poco inakjoite dalri,
31
Njite Dio ipakjantacani Lricaolrini shó, Lriajikje shó, iyecati shó, njite pomená carroni,
32
lridejí-carro coandalricatsa idejikjeti, cayecadalri idejica owirri shó, palraata shó, bronce shó;
33
Nayoá-carro njite nacadaa jiipada njite yajicañpe idejica jaico shó matsiá, yajicape inaitjaca coandalricatsa icapacanaa nadejicalre nacó.
34
Dio icadaa Bezalel irso njite Aholiab irso, Ahisamac irri, Dan inakjoité-perri nají-carro nacanantaca.
35
Lricadaa tsakjana carrapiná carrona, nadaná-carro nadejicalre ricó, nacapa canaa nacó, nanomapikja tsakja yamacatio jipolreperri, amolreperri, rraiperri njite jérriwai shó tsakja, njite yajicape íñaca tsakja. Cayeca-perri pjiomi nacó, yajicape inaitjaca nacapacana pjiomi njaji nanaitjalri.