Capítulo 34 (Walripe jipadaitape nadanacawa njaji yaacoti kjaidaperri)
1
JLIAJI IMINALRITI iaco Moise irso: ''Pimatsieta yamaita jiipada nacayosho-perritsa njaji paana pia. Nodaná carroatsa nanaco njaji yácoti nodanaji pia nanaco njaaca paana pia, njaji pimakjalri.
2
Pimatsietaacawa piyompinaco pirrá carroatsa lrinaco jliaji Jiipana Sinai, piema carroatsa Nopeyajle Jiipana ipolricó.
3
Madeetsa piinai pikitsindao. Macadatsa náno njaji inaiki jiipana icodapi. Corrin tsakjaotsa nataita nadeeca naapirra naiñjá-carro jiipana ikjoemjete.''
4
Moise imatsieta yamaita jiipada nacayoshotsa njaji paana pia, njite lricafiawa piyompinaco toa jlirrá carroa Jiipana Sinai nacó, cayotsaji Dio inaa capisho lrinaitjaca. Moise idee njaji jiipada lricaapi ricó.
5
Dio iorrocowa iyadaoca nacó njite lriemawa Moise icodapi njite lricaite lrirso lriipitana cayoji:
6
Jliyapawa lricoemjete, lriaco ''JLIAJI IMINALRITI, JLIAJI IMINALRITI jiyapawa lricoemjete njite jliemata cayoji: ''IMINALRITI, IMINALRITI, jliaji Dio kjenaitetsa icapaca njite merroadalritsa, merroadalritsa kjeya njite pakjandalri ipeyokjeti, corridalritsa itecojleta yaaco,
7
corrin Lrimaodaca lriacoam ioya naoya njaji walricomanai caidalriwetsa, jliyapeta naoya namatsicana. Mitsa corritsa Lrimaodacaca namatsicana ioya njaji camatsicanaaperri. Lricadaotsa njerrapoitaca njaji neenipe njanirri imatsicanaa ikjaote, njite neenipe yénipe nacó, njaji madalricoma njite njaji coatro coma tsakja.''
8
Kjeya Moise iorrocoetaca jliwida jiipai nacojle lriá-carro lrirso matsiadalri.
9
Njite lriaco: ''Matsia cadaa picapaca norso, pjia No-Minalri, pinaitja matsiacalri pino wainai. Ajádalri tarraperrica jiwida njaji inaiki aimadan. Pjiyapeta waoya pjiomi wamatsicanaa, njite picoadata piyarropé-carro fa.''
10
JLIAJI IMINALRITI iaco lrirso: ''Picapakje, icaminaotsa Nonaitjaca pada yácoti piapiya. Nonaitjaotsa matsiadalri macapa canadalri napeyajle njaji inaiki aimadan, corridalritsa nacapa njaji inaiki jalredaoca lricoperri.Pjiomi njaji inaiki inakjoite-perri icapaotssa jliaji Nonaitjalriotsa, ima cafainadalritsa jliaji Nonaitalri iapiya.
11
Pjiepaotsa jliaji Nonaalri pinaitjaca panaya. Kjeyenatsa Nopeecó-carro ipeya njaji amorreonai, cananeonai, hititanai, ferezeonai, heveonai, njite jeboseonai.
12
Icapatsa ioyawa wadeotsa inaitjaca yaacoti naapiya njaji inaiki jiyapalriotsa niiniwa, wadeotsa nama kenakja inaitjaca imatsicanaawa naofa capoa iinai.
13
Mitsa, ipeecoatsa njaji altar narsolri, njite njaji jiipada caconaperri narso, ipeeco tsakjaotsa njaji Asera iemacarrona.
14
Corrin itaita iaca matsiadalri pada tairri dio irso, ima Njoá, IMINALRI, ''Cakerriakjé'' dalri iipitana, cakerriakje-dalrica Njoa.
15
Niini icapatsa ioyawa wadeotsa inaitjaca yaacoti naapiya njaji inaiki jalredaoca lricoperri, ima cayocana nacayosho njaji cawilreperrim narso njaji nadiote aimadan njite nainoacawa mayami nadiote irso. Njitenantja nainaica shá iñjá carro-nainai lrinakjoite jliaji nainonda nadiote irso,
16
njite jita tsakjantja irrinowa naitonaipe njite cawilre tsakjantja njaji itonaipe nadiote irso, njite nama tsakja cawilreca njaji yénipe nadiote irso aimadan.
17
Manaitjatsa irsowawa idiotewa inaitjaji icodoetanda tsipalra shó.
18
Corriotsa imaodacá carroca lrioya jliaji Icatimataaca-cawa lrioya jliaji iñjacawa Petje Meewi-perritsa. Cayotsas nonaa capisho pjia, siete jalredaoca watsa iñjaca peetje mewiperitsa jlinaana lricó, keerri Abib nacó, ima keerri Abib naco piaca imotowa Egipto lrikjoite.
19
Pjiomi njaji jiicolriotsa iinaita Noyaapecana, coshoca njaji vaaca, buey njite oveja tsakja.
20
Njite jliaji borro yénipe initacana imotocawa irsotsa iwentacani apana cordero shó, mitsa corri cadaa icaoña lricoadawa, iesotsa ipokjontaca lrinorsiapji. Irsotsa icaoñaca nanaco njaji yénipe pjerritinaipe. Corrin coca itaita ínoca Noderse lricaapi yápiyatsa.
21
Sei jalredaoca watsa ideji, Mitsa iwafetawatsa siete jalredaoca nacó. Imoyeta cádanaco jiipai o imiwa cádanaco ipania, irsotsa iwafetacawa.
22
Irsotssa iwadaca jliaji Icatiimatacawa inita cádanaco iniwaca ipania trigo, njite iwayaketa cádanacoatsa iniwaca ipania pawalria iwayaca cádanaco.
23
Pjiomi njaji atsianai, narsotsa nánoca Nopeyajle, Njoa IMINALRI, na-Diote njaji Iraelnai, madalripia watsa pawalria nacó.
24
Nodewatsa njaji inaiki aimadan pacoa nacope pipeyajle njite Nomacaiteca jipaite jinaana. Corriotsa coca ioma sheewaca jipaite ricó ino cádanacoatsa Noikjaolre, Njoa IMINALRI Dio, Madalri pia watsa inaitjaca pawalria nacó.
25
Corrin itaita iaca Norso neerrana naco njaji maaficalri inoji Norso mojloi fie, Corrin itaita icadaaca lritem jliaji ipeti iñjanda Iwacaaca carroa lrico Pascoa lricó tewaijle icaona.
26
Ideotsa Noopana lricojle nanakjoite njaji ipanai iinaca matsiaperri initaji iniwaca. Corrin itaita iyanaca cabra yenipe jlidoa inia nacotsa.''
27
JLIAJI IMINALRITI iaco Moiose irso: ''Pidana njaji yácoti, ima Njoatsa icaite njaji yácaoti ajádalri shó Nocaiterri, njite Nonaitjaca pada yácoti piapiya njite Irael yapiya tsakja.''
28
Moise iofaa Dio iinai nirse coarenta jalredaoca njite coarenta deepi; corrin tsoo lriñjaca corrin tsakja lrírra ooni. Lridana nanaco njaji jipadaita njaji yácoti nanaitjashopa yácoti, njaji die yácoti Panaitjaope.
29
Moise idia cádanaco iorrocoa Jiipana Sinai nakjoite naapiya njaji yamaitade nerrocawa njaji yácoti nanaitjashopa yácoti lricaapi ricó, corrin lrianjí cacanalreca lriecoa nacó caaco cayami Dio yapiya.
30
Aarón njite njaji Iraelitanai nacapa cádanaco Moise, cacanalreca lriekjoa nacó, corrin naoma natsomitacani nafio capoa lriiwana.
31
Mitsa Moise iwana Aarón njite njaji iraelitanai jiwidaapo naacarro lrikjaolre. Njitew caacoca Moise napiya.
32
Njitena pjiomi njaji Iraelnai aimadan naawa Moise iderse, njite lricaite njemi njaji yácoti nanaitjaope Dio icadaji Jiipana Sinai nacó.
33
Yaami cayami caacoca Moise naapiya, lrirroeta pamaca yamacati lriecoa nacó.
34
Moise iaca icoam Dio ipeyajle caacó-carro Lriapiya, jlita mana lrioyao jliaji yamacati lriecoa nacoda akjerreca lrimoto njitewa. Lrimoto cádanaco lricaite narso njaji iraelitanai cocaca Dio inaa lricaiteca narso.
35
Iraelitanai icapa cádanaco melremelreca Moise iecoa nacó, lriita mana lriecoa yamacati shó tsenakja akjerreca lridia jliewawa caacócarro Dio yaapiya tsenakja.