Capítulo 33 (Dio inaa naacarro pjawa)
1
JLIAJI IMINALRITI iaco Moise irso: ''Warsa pjena piawa naapiya njai inaiki pjitaji Egipto jipaite lrikjoite. Yaawa lrinacojle jliaji jiipai nocaiterri pia yácoti ajádalri sho Abraham irso, Isaac irso njite Jacob, nocaite cádanaco narsó: ''Nocaite cádanaco Noacaotsani narsi njaji pinakjoité-perri.''
2
Nomeenacaotsa Noajeleni ipeyajle, njite jlitacaotsa njepaite ioya njaji cananeonai, amorreonai, hititanai, ferezeonai, heveonai njite njaji jeboseonai.
3
Yaawatsa lrinacojle jliaji jiipai matsiadalri, matsiacawa pataoñaca vaaca, njite capanianacawa tsakja. Corriotsa Noácarroca iinai, ima tarraperrica jiwida lricoca shá. Noino daotsa shaa inipolricó.
4
Njaji inaiki njemi cádanaco njaji yácoti inonaperri, inonaana njite corrin njeeta nanacoa patjepi.
5
Dio iaco pia Moise irso: ''Picaite narso njaji iraelitanai: ''Tarrá-perrica jiwidalrico-ca sha. Noá cadantja ínai caidatsaji, Noinontja shá. Niini panaya jita yoyawa ipatjepi nowaopia- carro coajicaotsa nonaitja yaapiya.''
6
Niini njaji iraelitanai corrin njeeta nanaco patjepoi shoperri Jiipana Horeb nakjoite.
7
Moise inaitja pada pana pantita pemajle lrioya jliaji naofacawa, teeco lrioya. Lricadaa lriipitanao, panti nawacaaca carrodao. Pjiomi njaji itatjcape Dio iinai coca catsa naawa lri-ricoda jliaji pantipoco, teecodalri naoya.
8
Moise yaa cádanacoa lri-ricoda jliaji pantiita, pjiomi njaji inaiki na neemawa pantita ipananoma lricojle, nacapa Moise irso a kjerreca jlienawa pantita lricó.
9
Moise sheewa cadanaco manawa lri-ricoda jliaji pantida, pada iyadaoca jalripadalri yorroco manawa pantida ipananoma iicao, njite caacoca Dio Moise iapiya.
10
Njite njaji inaiki nacapa cádanaco mana jliaji iyadaoca pantida ipananoma iicao, njenico manawa naacarro matsiadalri lrirso nacoanaa.
11
Caaco cádanaco mana Dio Moise yaapiya nacapaaca manawa nakjoete waaca, cayoji caaco capisho pada lrikitsindaji yaapiya. Njite Moise idia manawa naofacawa lrico toa, Mitsa jliaji lrirsodalri Josué, Nun irri, pada yempetitoa, lriofa manawa lri-ricoda jliaji pantida.
12
Moise iaco Dio irso: ''Pjimi norso, cayo pia picaiteca norso: ''Pidee njaji inaiki piinaiwa,'' Mitsa corrin picaite njoa cocacaotsa pimeenaca yaawa noinai. Njite picaite, ''Noajintsa pjia matsia, matsia Nocapaca pjia.''
13
Matsia cadaa picapaca njoá, picañjata nocapa Piapowa notaitá-carro pja noajica Pjia njite matsia-carro minitsa picapaca norso. Njite piwaopia pinaikite aimadan-ca njaji.
14
Njite Dio sheepani: ''Njoá tsaotsa yaawa piinai, njite Nocadaotsa piwafetá-carro.''
15
Noise iaco Dio irso: ''Corri cadatsa Pjiatsa yaawa wainai, mjetatsa fa ajaiteji.
16
Ima corri cadaa pjiatsa wainai, ¿coajintja noají njite njaji pinaikite aimadan yaji watsa matsia catsa fa pipeyajle? Pino cadatsa wainai niniotsa wataita teecojleca fáa naoya njaji apaana inaiki jalredaoca lricoperri.''
17
Wa-MInalri iaco Moise irso: ''Nonaitjeniotsa jliaji pitatjalri noinai, matsia capoa nocapaca pirso, njite Noají capoa matsia pjia.''
18
Njite Moise iaco Lrirso: ''Pinaitja matsiacalri picañjata nocapa pimatsiaca melremelredalri.''
19
JLIAJI IMINALRITI iaco: ''Nocadaotsa jliyapawa pipeyajle jliaji kjena shopa nocapaca shá, njite Nocaiteotsa jimi noipitana ''IMINALRITI'' pipeyajle. Kjenaa watsa Nocapaca lrirso jliaji Nomanda nocapaca kjenaa irso, corriotsa nonaitjá-carroca maatsi lrirso jliaji kjenaadalritsa Nocapaca irso.
20
Mitsa wa-Minalri iaco lrirso: ''Corriotsa picapá carroca noecoa, corritsa cafí carroca jliaji icapacada Njoa.''
21
Lriaco pja JLIAJI IMINALRITI: ''Alriji apafe Nocodapi; piemaotsa lrinaco jliaji Jiipada macádalri.
22
Jliyapa cadana toatsa jliaji Nomatsiaca Melremelredalri, Nocadaotsa pjia jiipada ipatakja lricó njite Noitacaotsa piicao Nocaapi shó a kjerreca Njoyapawa.
23
Njite Njotaotsa nocaapi pioya, niniotsa picapa nodajite, mitsa corriotsa picapa Noecoa.''