Capítulo 32 (Nanaitjaca vaken owirrona)
1
Nacapa cádanaco corrica Moise idia iorroco kjeeya naikjaolre njaji inaiki aimadan jiipana nakjoite, ikena naacaw Aarón ikjaolre, naaco lrirso: ''Warsena pino, pinaitjá-carro warso wadiotewa lriacarro wapjeya, ima jliaji atsia Moise, jliaji jitacada fá Egipto jipaite rikjoite, corrinatsa wanjí kjerrecani.''
2
Njite Aarón iaco narso: ''Jita napatjepi narsolri njaji ininai, iitonaipe, yenipenai njite yaawatsa norsona.''
3
Pjiomi njaji inaiki njeta naoyao njentada owirrope narsompe njeeni nacó, njite nadeena Aarón irso.
4
Jlipa naoyana njite lricodoetana tiyé ricó njite lriarro pada lricó vaken jinaapjia ricó. Njite njaji inaiki aimadan iaco: ''Shá Iraelnai, icatsa idioteca jliaji jitalri shá Egipto jipaite rikjoite.''
5
Njite Aarón icapa cadanaco nanaitjalri njaji inaiki aimadan, lrinaitja apana altar lrirsowalre jliaji vaacana njite lrinaitja pada yácoti, lriaco cayoji: ''Tjewaotsa wanaitja wacatiima taaca-carroa wa-Minalri nacó.''
6
Njite njaji inaiki aimadan nacafiawa tjewaijle piyompinaco toa njite nadee ofrenda imaodacakjeti naco. Ikena naofá naiñja, nairra tsakja, njite njenico neemao narrapá-carro najotaacá-carro macadatsa.
7
Njite JLIAJI IMINALRITI icaite Moise irso: ''Warsena pidiawa kjeyawa, oma njaji inaiki aimadan, njajji pjitaji Egipto jipaite rikjoite, oopi namatsicaacawa.
8
Kjeya namacaca jliaji Nonaalri nanaitjaca. Oopi nanaitja apana vaken njite naino maaficalri naacarro lrirso matsiadalri. Njite nacaite cayoji: ''Irael, icatsa idioteca jliaji jitatalri shá Egipto jipaite rikjoite.''
9
Njite Dio icaite Moise irso: ''Nocapa narso njaji inaiki aimadan. Picapa coji-perricana, paana inaiki aimadan padalreperrimi.
10
Corrin Nooma piyamitaca Njoa naoya. Noirroa jiwacawa nakjoete matsinaa pekirridalri, nowayacaketá carrona. Pinakjoite nakjaotsa Nonaitjaawatsa pacoa yacaalre macacoe.''
11
Mitsa Moise iomatsa imerroataca jliaji lri-MINALRI Dio. Lriaco lrirso: ''No-Minalri, ¿Coada kerroa pjia nakjoete njaji Pinaikite aimadan, njaji pjitaji Egipto jipaite rikjoite pjiida manaitja canaadalri shó.
12
Piwayaketa cadaa njaji Pinaikite aimadan, nacaiteotsa pinaco njaji egipcionai: Jlitana Egipto lrikjoite lriinó carrona awacada nacojle, lriwayaketá carrona jalredaoca ioyana. Jena kerroaca Pjia nakjoete njaji Pinaikite aimadan, pitecojleta piwaopiakje piomacawa piinoca njaji pinaikite aimadan.
13
Piwaada njaji yácoti Picaiteji pirsoperri Abraham, Issac njite Jacob irso , njaji picaiteji yácoti ajadalri sho, cayocaotsa neenipe imaimaca jiwirsida eeno yecoa nacope shó, njite picaite piacaotsa nanakjoite perri irso pjiomi jliaji jiipai picaiteji narso. Nayada caotsani caidalriwetsa.''
14
Niini corrinatsa Dio jirrapiteetaca njaji Lrinaikite aimadan cayoji Lricaite capisho nanacó.
15
Njite Moise idia yorrocoa jiipana nakjoite, lridee njaji yamaita nerrocawa njaji yácoti kjaidaperri. Nadana nanaco yamemape, lriekjoete njite lridajitjete.
16
Dio piatsa inaitja njaji lridanaope inaco, njite jliá minitsa idana njaji yácoti lrinacoperri.
17
Josué jimi cádanaco coajica nawanetaacawa njaji inaiki aimadan, lriaco Moise irso: ''Pjemica paa capishoa oowi rico anji waofacawa lricó.''
18
Mitsa Moise iaco lrirso: ''Corritsa njomica nacantaca njama capoa nacoema, corrin tsakja inonaa coapana, icaamitsa njomirri nacantaca.
19
Moise itsomita jliaji naofacawa toa, njite lricapa jliaji vaken nanaitjanda njite narrapajica njaji inaiki aimadan. Kerroa Moise pekirritsa. Ikena lriocaca njewao lricaapi rikjoite njaji yamaitade yácoti kjaidaperri irrocawao llripocoda nacó jliaji jiipana.
20
Jlipa jliaji vaken nanaitjanda njaji inaiki aimadan, lrimjaitani njite lriwititani matsia lritaipenatsa, njite lriarro ooni ricojle. Ikena lrica nairraoni njaji Iraelnai.
21
Njite Moise itatja jimio Aarón iinai, lriraco: ¿Cocao namatsicanaa pirso njaji inaiki aimadan, ima pimaca nanaitjaca namatsicanawa pekirridalri?''
22
mNjite Aarón shepani: ''Merroatsa pjia nokjoete nominalri, piajintsa coanperrica inaikica njaji, ipeyocapeca inaitjaca maatsirri.
23
Naaco norso: ''Pinaitjá warso wadiotewa lriacarro wapjeyajle, ima jliaji atsia Moise, jliaji jitacada fá Egipto jipaite rikjoite, corrinatsa wanjí a kjerrecani.''
24
Niini noaco narso, ''coca cadaa irso owirro nanacoperri jlitaca lrioyaoni.'' Naa norso njaji owirro njite nocodoetani tiyee ricó, njitena lrimotoa jliaji vaken.''
25
Moise icapa corriketsa pataita njaji inaiki, Corri piaca Aarón itaita yemaca nakjoete, njite naoma necaaca lrikjoete njaji lricoema shoperritsa.
26
Njite Moise yemawa pjewacawa lrirso jliaji naofacawa toa, lriaco narso: ''Pjiomi njaji iomacapetoa jliaji WAMINALRI, íno noikjaolre. Njite pjiomi njaji Levitanai naaca Moise ikjaolre.
27
Njite lriaco narso: Cayo lricaiteca jliaji wa-Minalri, na Diote njaji Iraelnai: Icoanantsa shaa atsianai, jita imatsetani njite yaawa napanaitepe lrico nacoana njaji ikitsiñape, nakitsiñapeji, nacodapoperri ikjaolre iinocarrfona matseeta shó.''
28
Njaji Levitanai nanaitja cayoji Moise inaa capishona. Naino tre mil inaiki jliadaa.
29
Njite Moise iaco narso njaji Levitanai: ''Idejicaotsa WAMINALRI irso panaya, ima iaca nakjoete njaji yénipe, ikitsiñape tsakja, niniotsaDio iáwatsa irso matsiadalri lrikjaote.''
30
Tjewaijlena Moise iaco narso njaji inaiki aimadan: ''Opi inaitja imatsicanao pekirridalri. Panayaotsa njorracawa wa-Minalri iderse, wadetsantja jliitaca ioya jliaji imatsicanaati inaitjalri.''
31
Moise iawa Dio ikjaolre, njite lriaco lrirso: ''No-Minalri, njaji inaiki aimadan oopi nanaitja namatsicanai pekirridalri, ima nanaitjaca apana vaken owirrona.
32
Niini panaya, picadaa jliyapaca pioya namatsicanaa; corri cadaa pinaitja, pjiata noipitana lrioya jliaji paperra pidanalri.''
33
JLIAJI IMINALRITI iaco Moise irso: ''Pjiomi njaji inaiki inaitjalri imatsicanao nokjoete, njoata caotsana nopaperran ioya.
34
Panaya pidienawa, pidee njaji nonaikite lrinacojle jliaji nocaiterri pirso, Picapaotsa noajele iáwatsa pipjeya. Coancaojli cadaotsa njorrapiteetana, namatsicanaa ikjaote watsa nonaitja cayona.''
35
Niini Dio imeenaca naikjaolre pada maatsidalri lrikjaote jliaji vaken natatjalri, aarón inaitjalri narsó.