Capítulo 36 (Iraelitanai nadeeca ofrenda nanaitjá-carro Dio iipanao)
1
Ikena Bezalel, Aholiab njite pjiomi njaji inaiki cayeca-perri Dio icadaji irso nayekawa nají-carro coajica nadejica pjiomi cocacatsa nadejirri niini Dio iipana lrico. Naa nirsewa ndejí-carro jliaji idejikjeti cayoji Dio inaa capisho nadejica.
2
Moise iwana lrikjaolrewa Bezalel, Aholiab njite pjiomi njaji inaiki cayecaperri Dio icadaji irso iyecati, njaji pomenaperri icaolre ricó naacarro nanaitja jliaji idejikjeti.
3
Njepa Moise ioya pjiomi njaji ofrenda itraelitanai yaaji nanaitjashopa jliaji Dio iipana. Njaji inaiki nadee minitoa Moise irso na-ofrendani piyompinaco icoami nacaolre rikjoite-dalri.
4
Njite nano pjiomi njaji inaiki cayecaperri ideji jliaji Dio iipana, nano nadejirri njiteo.
5
Njaji cayeca-perri iaco Moise irso: ''Njaji inaiki, aima calretsa nadeeca njaji wadejishopa wa-Minalri inaalri wanaitjaca.''
6
Njite Moise inaa nayamita njai inaiki wadee nadee pjaaca ofrenda nanaitja shopa Dio iipana. Njite njaji inaiki yami nadeeca ofrenda nadejishopa.
7
Lricoa narsoca nwayaketa shopa nadejica jliaji nadejirri.
8
Njite pjiomi njaji cayeca-perri nanakjoite nadeji jliaji nawacaaca carrodawa die yamacatimaca sho nanaitjaji jérriwai sho, tawalrekja neñaji jipolreperri, amolreperri, njite irraiperri sho njite nanaitja tsakja nanaco querobinai jinapjiami. Icatsa Bezalel idejicalreca, pada cayecá-dalri idejica.
9
Njaji yamacati-maca narso doce metro njite pamoyoa pja paita naco njawalripaca njite yamaita metro namacaiteca, Caimitsa pjiomi njaji yamacati-maca.
10
Bezalel iyata matsia nanacowaaca njaji cinco maca yamacati-maca, njite cayo tsakja lrinaitjaca njaji paana cinco maca tsakja.
11
Lripapi matsia neeñada shó jipolreperri shó njewidana nacojle njaji papoco yamacati-maca, cayo tsakja lrinaitjaca njaji papoco-perri tsakja.
12
Cincoenta wajle lripapica njaji yamacati initacape irrocawa, njite cincoenta wanle tsakja lripapica nawayacacawa njaji papoco yamacati-maca. Niini njaji lripapi shopana matsiacana nakjoete waaca.
13
Njite lrinaitja tsakja cincoenta jinacolricoti owirro shó lripapí-carro nanaco lriyatá-carro njaji yamacati-maca, niini pada sho catsa pacapa pjiomi jliaji nawacaaca carrodawa.
14
Bezalel inaitja nawacaaca carrodawa cabra íyo shó; lrinaitja once-maca namaimaca.
15
Trece metro njite pamoyoa pja lrinacojle paita nacó njawalripaca njite yamaita metro namacaiteca. Caiminitsa pjiomi njaji oncemaca.
16
Lriyata cinco maca papoco nacó njite sei maca papoco nacó.
17
Cincoenta wajle lripapica njewidana nacó njaji papoco, njite cincoenta wajle nacó tsakja nawayacacawa njaji papoco tsakja.
18
Bezalel inaitja cincoenta jinacolricoti narso bronce shó lriyata shopana pada carrotsa pjiomina.
19
Lrinaitja tsakja yamacatimaca carnero iyam shó naijetanda iiraidalri shó njite maaficalri iya matsiaperri shó naita shopa j,iaji nawacaaca carodawa.
20
Bezalel inaitja tsakja jaico acacia sho njaji nemetashopa jliaji nawacaaca carrodawa.
21
Nacoana njaji jaico narso pia coatro metro njite pamoyoa pja paita nacojle njawalripaca njite sesenta sei centimetro namacaiteca.
22
Nacoana njaji nerrocarronape narsoca njenacolrico nayata shopana. Cayominitsa lrinaitjaca pjiomi njaji jaico nawacaaca carrona icaona.
23
Cayo lrinaitjaca pjiomi nawacaaca carrodawa icaona: Ventena lripje atsialriemacawa.
24
Bezalel inaitja palraatape sho coarenta poco neema carronape njaji ventena lripjee. Yamapocope apana icaona yemacarronawa.
25
Lrinaitja tsakja ventena lripje pema icaona lrirso jliaji nawacaaca carrodawa inarroema kema lrirso jliaji nawacaaca carrodawa,
26
njite lrinaitja tsakja palraatape shó njaji coarenta poco neema carrodao njaji lripje, yamapoco apana icaona.
27
Njite lriwapji icaona jliaji nawacaaca carrodawa, jeerri shewa kema nacojle, Bezalel inaitja sei lripjewa.
28
Lrinaitja yaamana lritojiwi icaona lrirso jliaji nawacaaca carrodawa.
29
Njaji lripje lritojiwi nacope yaamanape lricadaacana, teecope naoyawaaca napocoda naco mitsa, matsia dekja nerrocawa njewidana nacó.
30
Ocho namaimaca njaji lripje, njite diesisei njaipoco, yamapoco apada lripje icaona.
31
Njite Bezalel inaitja jaico acacia shó lricoajaiwa, cincona pema icaona lrirso jliaji nawacaaca carrodawa,
32
cinco tsakja coajai pema icaona, cinco tsakja lriwapji icaonacawa, jeerri shewa kema nacojle.
33
Lrinaitja lricoajaiwa pamoyoadalri icaonada jiyapacada pjaawa lriparrema nacojle yamemape.
34
Lriñjeta nanaco nja coajai owirro shó. Lrinaitja njenacolrico owirro shó, yerrocawa njaji coajai jalripape njite lriñjetana owirro shó tsakjana.
35
Bezalel inaitja njaji yamacatimaca jipolremacape, amolremaca, írraimaca njite jérriwaimaca tsakja, lrinaitja tsakja querobinai jinapjia nanacó, pada yajicadaca idejicana.
36
Lrinaitja coatrona napjewa njaji yamacatimaca jaico acacia shó, njite lriñjeta owirro shó. Lrinaitja coatro narropocowa palraatape shó njite coatro mawapeti nanacope njaji topjí.
37
Lrinaitja tsakja pamaca lriitashopa lripananomao jliaji nawacaaca carrodawa, lrinaitja jipolremaca, amolremaca, írraimaca, njite jérriwai shó, pada yajicada idejicana jliaji inaitjalri.
38
Lrinaitja tsakja cincona lripje irsocape mawapeti, njite lriñjeta nanaco pjiomi owirro shó. Njite lrinaitja njaji cinco jliipoco bronce shó.