Capítulo 25 (Njaji ofrenda Dio iipana icaona)
1
Caaco JLIAJI IMINALRITI Moise irso, Lriaco lrirso:
2
''Picaite narso njaji iraelitanai njepá-carro Norso pada ofrenda coandalri catsa nanakjoite pomenápe icaolre ricó nanaitjá-carro. Pjia watsa jipa njaji ofrenda Noikjaote.
3
Njite, icatsaotsa njaji ofrenda nalriotsa pirso: owirro, palraata, njite bronce;
4
yamacati jipolrémaca eeno, amolremaca, njite iiraimaca; jerriwaikjape matsiaperri, cabra iiyo,
5
carnero íya idatanda írraidalri shó, maaficalri íyam matsiaperri, njite jaico acacia tsakja;
6
lámpara iitadao kerosen iglesia icamarrao, aceite pomeniajaipe waijeta shopao njite incienso pomení-perri icaona;
7
jiipada ónice, njite ppana pja jiipada matsiaperri, irroetaope sacerdotenai itsaya nacó njite jliaji nacadnda natsayan icóda nacó.
8
Picadaa nanaitjaca Norso noopapanao, Nofá-carroatsa napecolrico.
9
Pirsotsa pinaa nanaitjaca cayoji nocañjata capisoatsa picapa jlinaana jliaji Noopana njite naicaona njaji lriitada tsakja.
10
PInaitja tskjaotsa pada patowa jaico acacia sho. Paita metro njite die centimetro pja lrinacojle jliwalripaca, sesenta sei centimetro lrimacaiteca, njite sesenta sei tsakja lriyenonca.
11
Piñjetaotsa owirro matsiadalri shó lridanjite nacó njite lriwawalrico tsakja, njite pinaitjaotsa lrinomapikjao owirro sho lrinomapi nacó.
12
Pinaitjaotsa lrirso coatro jlieni poco owirro shó, njite pirroetaotsana lritojiwi nacó nacoanáa lrinaco jliaji patowa, yamapoco pema njite cayo tsakja pema.
13
Pirraotsa yaamana jaico acaciapo njite piñjetaotsa nanaco owirro shó.
14
Pjietaotsa njaji jaicoapo patowa sheni naco pema, njite pema tsakja iwakje shopani.
15
Niinipetsaotsa njaji jaico patowa sheni nacó, corriotsa jitá carroca lrioyana.
16
Picadaotsa patowa iwawalrico njaji yácoti kjaidaperri wanaitjashopa yácoti Nocadalriotsa pirso.
17
Pinaitjaotsa lripanaitawa jliaji inocawa maficalri imatsicanaa ikjaote owirro matsiadalri shó. Paita metro njite die centimetro pja lrinacojle jliwalripaca, sesenta sei centimetro lrimacaiteca.
18
Pinaitja tsakjaotsa yaamana querobinai owirro sho iñanda martillo shó picadaope yemawa lripanaita nacó jliaji iinocawa maaficalri imatsicana ikjaote.
19
Pinaitjaotsa apana querobin lripanaita nacó jliaji iinocawa maaficalri imatsicana ikjaote, njite apana pema nacó. Picadaotsa lrirroa lrinacotsa jliaji lripanaita nacó jliaji iinocawa maaficalri imatsicana ikjaote.
20
Njaji querobinai narsotsa njerretaca yenonrse njaji nanapje, naitá-carro jliaji iinocawa maaficalri imatsicana ikjaote nanapje shó. Njaji querobinai narsotsa neemacawa nakjoetewaaca njite nacapaca lrinacojle jliaji iinocawa maaficalri imatsicana ikjaote.
21
Icadaotsa lripanaita jliaji iinocawa maaficalri imatsicana ikjaote patowa iicao, njite lriwawalrico jliaji patowa picadaotsa njaji yácoti kjaidaperri Nocadaalri pirso.
22
Icatsaotsa caacoca Njoa piapiya, lripanaita nakjoite jliaji iinocawa maaficalri imatsicana ikjaote, napecolrikjoite njaji kerobinai yémalriwa lrinaco jliaji patowa yácoti kjaidaperri yárroda, Nocaité-carro pirso pjiomi njaji nonaalri picaiteca narso njaji Irael yénipenaipe.
23
Pinaitja tsakjaotsa paita mesa jaico acacia shó. Noventa centimetro watsa jliwalripaca , njite coarenta cinco centimetro lrimacaiteca njite sesenta cinco centimetro lriyenonca.
24
Piñjetaotsa lridajite nacó njite lriwawalrico owirro matsiadalri shó. Pinaitjsa tsakjaotsa lrinomapiwa matsia owirro matsiadalri shó.
25
Pinaitja tskjaotsa lrinomapiana nacó jliaji mesa papoco lrinomakjawa ocho centimetro imacaiteca, njite pinaitjaotsa lrinomapikja nacoda owirro shó.
26
Pinaitjaotsa coatro jlinacolrico poco owirro shó, picadaotsana nanaco njaji natonjiwi nacó, naacawa njaji lricawaapa.
27
Njerroatsa njaji jlinacolrico lrinomapi nacó pataitacawa pjeetaca jaico nerricoda njaji jlinacolrico padeecarroni.
28
Pirra tsakjaotsa jaico acaciana, njite piñjetaotsa nanaco owirro shó itaita carroatsa iwakjeca jliaji mesa nasho.
29
Pinaitjaotsa owirro shó njaji jaicofipe, njite nacamorriashopa tsakja; pinaitja tsakja poncherapipe njite taza macaapipe nacadaa carrodao nairraoda nanakjoite njaji ofrenda.
30
Caidalritsaotsa picadaaca jliaji peetje icaitecada níinica Njoa Nopeyajle mesa nacó.
31
Pinaitja tsakjaotsa lampara jirricona owirro matsiaperri shó piñanda martillo shó. Njite pinaitjaotsa lriemacawa, lricawapa, lriiwi shoperri, copadape shoperri njite njaji lriwawalricoperri owirro sho, njite picadaotsana pada capishotsa pjiomina.
32
Jliaji lampara jirricona lrirsoatsa sei lrinaapa; Madalrina pema, madalrina tsakja pema.
33
Nacoana njaji lrinaapa narsoatsa madalrida jaico almendro iiwi shoperri, cawawalricoperri njite njaji lriwidape lriwawalriperri.
34
Jliaji lampara icawapa lrirsoatsa coatro jaico almendro iiwi shoperri, cawawalricoperri njite njaji lriwidape lriwawalriperri.
35
Pirroetaotsa njaji jaico iiwi shoperri nayataaca-cawa nacoana njaji lamparana inaapa.
36
Jliaji lampara jirricona, naapiya njaji lrinaapa narsotsa apanatsa pjiomi, corridalritsa payatandacan, caishopa owirro minitsa pjiomini nañanda icapacanao martillo shó.
37
Njite pinaitjaotsa siete lampara picadaopena lrinaco, nacaná-carro lrinakjoitena jliaji lampara jirricona.
38
Njaji nerrocawa njaji lampara njite naofacawa narsotsa owirro minicatsa pjiomi.
39
Trentatre kilo sho owirro pinaitjaotsa pjiomi jliaji lampara jirricona njite pjiomi njaji lrinacoperri iawa.
40
Picapaotsa matsia piicao pinaitjá-carro cayotsaji Nocañjata capisho picapa lrinaco jiipana naco pia.