Capítulo 24 (Dio inaitja tsenakja yácoti Iraelnai iinai)
1
Njite jliaji IMINALRITI icaite Moise irso lriá-carro Lriderse, njite Lrinaa lrideeca Aarón, Nadab, Abiú njite setenta pekipenai caconaperri Irael lricoperri, naacarro matsiadalri Norso tekjoitetsa.
2
KIcaamitsa Moise itaita itsoomitaca Njoa. Corrin dekja nataita nja paana, corrin tsakja nataita njerracawa njaji inaiki aimadan.
3
Moise yaa icaite njaji yácoti wa-Minalri icaiteji lrirso narso njaji inaiki aimadan, lricaigte gtsakja njemi coajica lrinaaca yácoti kjaidaperri nacó. Njite pjiomi njaji inaiki aimadan naaco lrirso pacoacatsa pjiomi: ''Wanaitjaotsa pjiomi njaji wa-Minalri icaiterri warso.''
4
Njitedalri Moise idana pjiomi njaji waMinalri icaiteji. Njite piyompinacotoa Moise inaitja apana altar jiipana itajida nacó, njite lricadaa docena jiipada yemawa pkjawa, ima nacaite nanaco njaji doce poco Iraelnai.
5
Njite lrimeenaca padape yempetipetoa nainó-carro maaficalri Dio irso imaodacakjeti nacoda, niini nainoca Lrirso buey.
6
Moise iwaketa pamoyoa lrirranami njite lricadaani poncherapi ricó, njite lriitem pamoyoa lriwitsicani altar nacó.
7
Njite Moise jliaji Paperra nadanacawa njaji yácoti kjaidaperri lrilee carroni kjemá narso njaji inaiki aimadan, njite naaco lrirso: ''Wanaitjeniotsa pjiomi njaji wa-Minalri icaiterri. Fetaotsa lriaco matsia.''
8
Njite Moise iwaketa njaji írranati njite iwitsicaca nanaco njaji inaiki aimadan. Lriaco narso: ''Icatsa jliaji írranati Dio inaitjashopa yácoti yaapiya, Lriaca irso yácoti Lrinaitjaoda yaapiya nasho njaji lricaiterri.''
9
Njitedalri Moise, Aarón, Nadab, Abiú njite njaji
setenta pekipenai caconaperri Irael lricoperri njerrawa jiipana nacó.
10
Pjiomi njaji nacapaca Iraelnai iDiote. Nacapa jlipa yapjite lripjoacawa, pacoa nanaitjanda jiipada zafiro shó, jalraamidalri eeno shodalritsa icapacanaa.
11
Corri kerroaca Dio narso njaji caconaperri Iraelitanai. Nacapa Dio, njite naiñja, nairra tsakja.
12
JLIAJI IMINALRITI iaco Moise irso: ''Pjirrawa Noderse jiipana nacojle njitre piofatoatsa nirsewa. Noá carroatsa pirso njaji jipadaitape, njaji yácoti kjaidaperri njite njaji yácoti inaitjaope Nodanaji irso, picananta carroatsana.''
13
Niini Moise jirrawa lrirsodalri Josué yaapiya lrinaco jliaji jiipana Dio iyada.
14
Moise icaite pia narso njaji pekipenai caconaperri: ''Atsaotsa iwapa fa a kjerreca wadia waocawa ikjaolre. Aaón njite Hur watsa iofaa yaapiya. Coca cadaa irso pada yácoti pada ikjoete, picadaa watsa naaca naikjaolre.''
15
Ikena Moise jirracawa lrinaco jliaji jiipana, njite iyadaoca iitacani.
16
Njite Dio imatsiaca melremelredalri iorrocowa lrinaco jliaji jiipana Sinai, njite iyadaoca iitacani sei jalredaoca. Njite siete jalredaoca naco, Dio ina Moise iyadaoca lrikjoite.
17
Tiyee kjaidadalri shoca Dio icapacana jiipana ipolrico nacó natjí ricó njaji iraelitanai.
18
Moise shewa iyadaoca lricó njite jlirrawa jiipana nacó. Moise iofawa jiipana nacó coarenta jalredaoca njite coarenta deepi.