Capítulo 26 (Nanaitja nawacaaca-carrodao)
1
Pinaitjaotsa jliaji iwaaca carrodawa die maki sho nanaitjanda jeerriwai shó, yamacati jipolreperri sho, amolreperri njite írraiperri tsakja irsocape querobinai nanaco. Jliaji idejikjeti njaa inaitjani njaji yajicapetsa idejica matsia.
2
Pacoacaogsa njawalripaca njaji yamacatimaca, doce metro njite pamoyoa pja paita inacojle njawalripaca, njite do metro namacaiteca.
3
Cinco yamacatimaca nayataaca watsa matsia nanacowaaca, cayo tsakja pema.
4
Inaitjaotsa njenio njaji yamacati nanomapi nacó pemajlete yamacati jipolre-perri shó. Cayominitsa inaitjaca njaji papoco yamacati tsakja.
5
Pinaitjaotsa cincoenta njenio nanaco njaji papoco yamacati, njite cayó tsakjaotsa nanaco njaji papoco piketemperri, matsia catsaotsa nerrocawa nakjoetewaaca.
6
Pinaitja tsakja owirro shó cincoentafi ipatoetashona matsia nanacowaaca, pacapá carroatsa pada capishotsa pjiomi.
7
Pinaitjaotsa once maca iñaji cabra iiyo shó lritapjewa jliaji iwacaaca carrodao.
8
Trece metro perri njite pamoyoa pja paita naco njawalripaca nacoanaa, njite yamaita metro namacaiteca. Pacoaca watsa namacaiteca pjiomi.
9
Iyataotsa matsia nanacowaaca njaji cinco maca; cayo tsakjaotsa inaitjaca njaji sei maca. Itsikji watsa jliaji sei maca shopa lriekjoete jliaji lritapje
10
Pinaitjaotsa cincoenta sheniti nanomapi nanaco njaji iniitacape irrocawa yamacati, njite cincoenta tsakja nanaco njaji papoco.
11
Pinaitja tsakjaotsa bronce shó cincoenta ipatoitacape nanaco njaji njeeni, niniotsa pacapacana pada capishotsa pjiomi.
12
Jalripa paaca jliaji yamacati lritapje icaonadalri, niniotsa jliaji lrimacanda pjaa icadaa catsaotsa lrirroa lriiwapji naco jliaji iwacaaca carrodawa.
13
Niniotsa matsiaca lritsipjenaapi jliaji iwacaaca carrodawa yameema, coarenta cinco centimetro pema cayo tsakja pema. Matsiawatsa lritaacacawa.
14
Pinaitjaotsa lridanawa carnero íyam shó nañjetanda írraidalri shó lritawajle icaona jliaji corricawatsa pacap imatsicanaati, njite pamaca maaficalri íyam matsiaperri nakjoiote iitashopa lriicao.
15
Pirraotsa capatsipe njaji jaico acacia, piemetaotsa mayacan nemawa pirroetashopa njaji yamacati matsiaperri iwacaaca carrodao icaona.
16
Coatro metro njite pamoyoa pja lrinaco paita naco njawalripaca, sesenta cinco centimetro namacaiteca.
17
Pinaitjaotsa nawedawa njaji jaico matsia carroatsa nayataacawa nanacowaaca. Caiminitsa inaitjaca pjiomi njaji jaico iwacaaca carrodawa icaona.
18
Pirraotsa vetetaita atsialriema icaona,
19
Pinaitjaotsa palratape sho coarenta poco neema carronawa njaji jaico capatsitaperri. Vente namaimaca njaji lripje niniotsa yamapocope watsa apana lrimacarrona icaona, irsocape matsia nawedawa.
20
Pinaitja tsakjaotsa venteta jaico capatsitaperri inarroema naco icaona lrirso jliaji iwacaaca carrodawa,
21
njite njaji nanaitjaji palrataitape sho coarenta poco nema carronawa.
22
Njite lridajitjete icaona lrirso jliaji panti, jeerri shewa kemajle, inaitjaiotsa seita jaico capitsiperri.
23
Pirraotsa yamaita lritojiwi icaona lrirso jliaji panti iwacaaca carrodawa.
24
Picadaotsa nemawa pacoaca napocoda nacó njaji jaico capatsiperri. Njite pinaitja njenacolricowa njewidana naco nepapi carrona inaco. Caiminitsa inaitjaca njaji panti tijiwi.
25
Pirraotsa ochona jaico capatsitaperri, njite dieciséi nemacarro poco. Yamapoco apana icaona nanaitjaji palraatape shó.
26
Pimatsieta cincona jaico acia cocolriedeo. Cinco pema icaona nemacarronao njaji panti ipje,
27
cinco cocolriede pema icaona lrirso jliaji panti nawacaaca carrodaw, njite cincona tsakja jeerri shewa kema icaona lrirso jliaji panti nawacaaca carrodawa.
28
Njite njaji cocolriede pamoyoaperri narso njaji jaico capatsiperri, narsotsa njeyapa pjaacawa pema nacojle.
29
Iñjetaotsa nanaco njaji jaico owirro shó. Inaitjaotsa njenacolricowa owirro shó, icatsaotsa njaji napapi carronawa njaji cocolriede, njite iñjeta tsakjaotsa njaji cocolriede owirro shó.
30
Inaitjaotsa jliaji Panti Iwacaaca carrodawa cayotsaji Nocaite capisho pirso jiipana nacojle.
31
Inaitjaotsa pamaca yamacati tawalrekja jipolredalri shó, amolredalri njite írraidalri tsakja. Inaitjaotsa nanaco querobinai. Njaotsa inaitja njaji inaiki cayeca perritsa.
32
Icadaotsa njerroa coatrona jaico acacia naco iñjetampe owirro shó. Njaji jaico narsotsa narsoca irroetacawana inaitjaji owirro shó, njite coatro poco nema carronao nanaitjaji palraatape shó.
33
Irroetaotsa njaji yamacatimaca nanaco njaji nerrocawa, inaitjaji owirro shó, njite imatsietaotsa lriofawa jliaji patowa yácoti kjaidaperri iarroda lridanamjite jliaji yamacati. Jliaji yamacati, icatsaotsa jliaji lrioyawaaca dalrica jliaji patawajle matsiacawa lrioya jliaji corricawatsa pacapa imatsicanaati.
34
Icadaotsa jliaji iarrocawa írranati imatsicanaa ikjaote lricao jliaji patowa yácoti kjaidaperri yárroda, jliaji icadaalri corricawatsa pacapa imatsicanaati.
35
Icadaotsa jliaji mesa pemajletsa lrioya jliaji yamacatimaca. Jliaji lampara jirricoda icadaotsa lriemawa lricoemjeteo, atsialriema nacojle lrirso jliaji iwacaaca carrodawa. Inarroemjete watsa lriemawa jliaji mesa.
36
Pinaitja tsakjaotsa pamaca iitashopa lripananoma jliaji panti. Yamacati jipolremaca shoatsa inaitjani, amolrema shó njite írraimaca sho tsakja, njite inaitjaotsa lrinomapio jerriwai iwanikjasho matsia.
37
Irraotsa cincona jaico acacia iñjetampe owirro shó, irroeta-carro jliaji yamacati Njaji irroetashopana, inaitjaotsana owirro shó, njite inaitjaotsa cinco poco nema carronawa bronce shó.