Capítulo 19 (Iraelitanai iocawa Sinaí lrico)
1
Madalripi kerri shapodam namoto cayami Egipto jipaite lrikjoite njaji Iraelnai, naocawa jalrapocolri Sinaí lricoda.
2
Naawa Refidin lrikjoite naocá carroa jalrapocolri Sinaí lricojle, njite naoca naofatoa lricodapi jliaji jiipana.
3
Moise jirrawa lrinaco jliaji jiipana, njite caacoca Dio lrirso lrinakjoite jliaji jiipana. lriaco lrirso: ''Picaiteotsa narso njaji Jacob ípaneta, njaji Iraelnai aimadan:
4
Icapjenina coajica Nonaitjaca narso njaji Egipto lricope, njite cadaana nodeeca shá pérri inapje nacó Nodee-carro shá Noikjaolrewa.
5
Njite panaya, jími cadaa noaco, shepa jliaji nocaterri irso njite inaitja inaitja cayoji noaco icaite capisho yaapiya, niniotsa noyarrope imatsiaca caotsa shá nanakjoite njaji paana inaiki imaimaca jalredaoca lricoperri, ima Noyaarropeca pjiomi njaji jalredaoca lricoperri.
6
Papoco sacerdotenai kjaidá perrica sha njite pacoa inaiki shenitaacacapewa Norso. Icatsaotsa njaji yaacoti pirsolriotsa picaiteca narso njaji nonaikite Iraelnai.''
7
Njite Moise iwakeeta njaji pekipenai caconaperri narso njaji inaiki aimadan. Lricaite jlimi narso pjiomi njaji yácoti Dio inaalri lricaiteca narso.
8
Njite pjiomi njaji inaiki njeepani pacoaca, naaco. ''Wanaitjaotsa pjiomi njaji wa-Minalri inaalri wanaitjaca.'' Njite Moise iawa Dio ikjaolre lricaité-carro Jlimi coajica naaco njaji inaiki aimadan.
9
JLIAJI IMINALRITI iaco Moise irso: ''Nonoatsa pikjaolre iyadaoca lricó njemí carroatsa njaji inaiki aimadan caaco cádanacoatsa Njoa piapiya, njeepá carro tsakjaotsa pjia caidalriwetsa.'' Njite Moise icaite Dio irso coajica naaco njaji inaiki aimadan.
10
JLIAJI IMINALRITI iaco Moise irso: ''Pidiá picaite njaji inaiki aimadan. Panaya njite tjewena, pienitaotsana Norsona, njite pinaotsa nacotsoca natayani.
11
Matsia carroenaotsana madalridaa nacó jalredaoca, ima madalridaa nacó Njoá, IMINALRI, noorroco caotsa lrinaco jliaji Jiipana Sinai.
12
Pikjenanataotsa lriwaida nacó jliaji jiipana naocacawa njaji inaiki. Picaiteotsa narso: ''Icapaotsa itsoomitaca jliaji Jiipana o inotaca jliaji jliipoco. Ima coca cadalotsa inotani lrirsotsa mayamicani.
13
Corriotsa inótá carroca jliaji inaiki. Irsotsa iinocani jiipada sho o iyawitacani. Maaficalri cada o inaiki cadaa lrirsotsa mayamicani. Njemi cádanacoatsa trompoeta imaolrena kjaida njite jalripa, icatsaotsa narsotsa natsomitaca jiipana ipocoda nacó.''
14
Moise iorrocawa jiipana nakjoite naikjaolre njaji inaki aimadan. Jlienita pjiomina Dio irso njite nacotsoco natsayan matsia.
15
Moise iaco narso: ''Imatsietacaotsawa madalridaa jalredaoca ipia; corriotsa imaa carroca ininai iapiya.''
16
Madalridaa jalredaoca nacoena, ikeena eenoca niini njite eeno iperronialre tsakja njite iyadaoca cadaocá-dalri iñampaca jliaji Jiipana, njite trompeta imaolrena kjemadalri njite jalripadalri tsakja. Pjiomi njaji inaiki aimadan natetjecawa nemaacawa lrico.
17
Moise idee njaji inaiki aimadan pemajle nemacawa ioya naacarro nacoadata Dio, njite naoca nemawa Jiipana ipocoda nacó.
18
Itacati rico lrimawa jliaji Jiipana Sinai padenirri ima Dio iorrococa niiniwa tiyé keetacadalri ricó. Iitacati jirra njitewa cayoji yocandati imacapishoa, njite canani kjaida jliaji Jiipana.
19
Njite kjaidacayao cádanaco trompeta imaolrena, Caaco Moise, njite Dio shepani njemicawa pjiomi.
20
JLIAJI IMINALRITI iorrocowa lripolrico nacó jliaji Jiipana, njite Lrinaa Moise jirracawa lrikjaolre. Njite Moise iá lriderse.
21
JLIAJI IMINALRITI iaco Moise irso: ''Pidia picaite njaji inaiki aimadan wadee natsomitaca nacapá-carro Njoa, wadee mayamica aima nanakjoite.
22
Picadaa natsomita Njoa njaji sacerdotenai njenitaaca carroa Norso, pinaa namatsietaaca-cawa nacoadatácarro Njoa, niini corriotsa noincana.''
23
Moise iaco Dio irso: ''Njaji inaiki aimadan corrin nataita natsoomitaca jliaji Jiipana, ima Pinaa piaca njoa nokjenanaatá-carro lriwaida nacó jliaji jiipana njoenitá carro Pirsona.''
24
JLIAJI IMINALRITI iaco lrirso: ''Warsena piawa naikjaolre njaji inaiki aimadan, njite pideotsa piinaiwa jliaji pipjerri Aarón, njite macadatsa njeyapa jliaji pikjenanatanda njaji sacerdotenai nanó-carro Noderse. Mitsa njeyapa cadani Noinoatsana.''
25
Cayotsa Moise iorroco naikjaolre njaji inaiki aimadan.