Capítulo 18 (Jetro, yaa icapa Moise iderse)
1
Jetro, sacerdote madian lricó, Moise iñjawerri, jlimica pjiomi coajica Dio inaitjaca Moise ikjaote njite lrikitsiñape Iraelnai aimadan ikjaote tsakja. Jlimica wa-Minalri jitaca njaji Iraelnai Egipto lrikjoite.
2
Jetro, Moise iñjawerri, jlipa lridee rsoaji Sefora, Moise iino, ima Moise imeenaca piacano rsonirri iipana lricojle,
3
lridee tsakja njaji yamada lrienipe; Gersón lriipitana jliaji pada, ima Moise icaite piaca: ''Ima tekjoite-dalrica njoa njepaite ricó njaji apanatsa inaiki.''
4
Eliezer lriipitana jliaji pada, ima Moise icaite piaca: ''Noferrinaipemi iDioteca jliaji ikitsindatalri njoa. Lriyomjetaca njoa Faraón imatsetani ioya.''
5
Jetro, Moise iñjawerri, iocawa Moise iderse naapiya njaji lrienipe njite lriito, Moise iino naofacawa lricotoa jalrapocolri ricó Dio iawacada nacojle.
6
Lriaco Moise irso: ''Njoa, piñawerri Jetro, nonoca piderse naapiya njaji pienipe njite piino.''
7
Moise imoto icoadata lriñjawerri, lricoajawa lrikjaolre, njite lritsootsoca lricacoda nacó. Natatjacawa narsowaaca coajicana njite njewawa pantita lricojle.
8
Moise icaite lriñjawerri irso coajica Dio inaitjaca Faraón irso njite egipcionai irso matsiá-carro njaji Iraelnai, njite pjiomi njaji jirrapitinaaperri njeyapalri inacó nano cayawa inipolrico, njite coajica wa-Minalri iyomjetana.
9
Catiima Jetro jimica nanaco njaji matsiaperri wa-Minalri inaitjalri Iraenai ikjaote, coajica Lriyomjetacana naoya njaji egipcionai.
10
Jetro icaite: ''Waaca matsiadlri WAMINALRI irso, ima Lriyomjetaca shá egipcionai ioya njite Faraón ioya tsakja, njite Lriwataca njaji aimadan egipcionai ioya.
11
Panaya dekja noají kjaidadalri pjaaca jliaji IMINALRITI naoya njaji idolonai, njite Dio iyomjeta njaji Lrinaikite Iraelnai naoya njaji egipcionai jirrapiteta kjeti ioya.''
12
Jetro, Moise iñjawerri, idee ofrenda lrimjaitanda njite lriino maaficalri Dio irso. Aarón njite pjiomi njaji pekipenai caconaperri Irael lricope náno naiñja Dio ipeyajle Moise iñjawerri iapiya.
13
Njite tjewaijle, Moise iofá jími narso njaji inaiki aimadan njite lricaité-carro naacona. Njaji inaiki aimadan neemawa Moise iwaida nacó, piyompinaco nakjoite atee deepi nacojle.
14
Njite Moise iñjawerri icapa cádanaco jliaji Moise inaitjalri naikjaote njaji inaiki aimadan, lriaco lrirso: ''¿Cocao jliaji pinaitjalri naapiya njaji inaiki aimadan? ¿Coada pideji pjiwacatsa njite njaji inaiki aimadan natsomita pjia piyompinaco nakjoite atee deepi nacojle?''
15
Moise iaco lriñjawerri irso: ''Njaji inaiki aimadan náno noderse natatjá-carro njemio naicaowa coaji carro Dio ikitsindatana.
16
Nainoaca cádanacoa nakjoete waaca, náno noderse. Njite nocaiteca coajica nanacó, njite nocanantana njaji Dio inaalri wanaitjaca njite njaji Lriaco kjaidáperri.
17
Njite Moise iñjawerri iaco lrirso: ''Cotsa matsialrica pirso cayoji pinaitja capishó.
18
Kjeyaotsa maapjica pjia njite njaji inaiki aimadan piinaiperri. Aima calretsa jliaji idejikjeti pinaitjalri. Cotsa pitaitá carroca pjiwacatsa lrikjoete jliaji idenjikjeti.
19
Pjimiotsa norso nocaiteca pjia, njite Dio watsa ikitsindataca pjia, ima pjiaca jliaji naoyawalre njaji inaiki aimadan Dio ipeyajle, pjienaotsa icaite namatsicanaa njaji inaiki Dio irso.
20
Icaamitsaotsa picanantacana lrinaco jliaji Dio inaalri wanaitjaca njite njaji Lriaco kjaidá-perri. Pirsotsa picanantacana coajica nanaitjaca matsia njite jliaji idenjikjeti narsolritsa nanaitjaca.
21
Njite piniwanaotsa njaji atsianai nanakjoite njaji inaiki aimadan canjikjé-perri, inaitjacape matsia Dio irso, ajádalri-perri, corri perri icapa matsia apjetsida irsotsa naoya nja paana. Picadaotsana njewidapó carrona nanaco njaji mil perri inaiki, apepena cien nacó, cincoenta nacó njite die nacó tsakja.
22
Njaotsa icaite namatsicanaa nanacó njaji inaiki aimadan nanaitjalri jalredaoca icoam, mitsa njaji matsinaa perri pjá pjiá watsa icaite nanacó. Njaji imatsicanaati corri perri matsinarri, njatsa icaiteca coajica nanacó. Niniotsa corrin watsa jirrapitina-calre pirso, ima nakitsindataca pjia njaji inaiki pidejicalre ricó.
23
Pinaitja cadaa cayo, njite Dio inaa pinaitjacani, pitaitaotsa lrokjoete jliaji idenjikjeti, njite catiimawatsa nadiacawa njaji inaiki naapana lricojlé.
24
4Moise jimi lriñjawerri irso njite lrinaitja cayoji lricaite capisho lrirso.
25
Moise iniwana atsianai canjikjé-perri nanakjoite njaji Iraelnai njite lricanaadana njewidaapoa njaji mil perri inaiki, cien nacó, cincoenta nacó njite die inaiki nacó tsakja.
26
Nacaite namatsicanaa nacó njaji inaiki, njaji tsodalripetsa. Njaji imatsicanaati pekirri-dalri pja nadeeni Moise ikjaolre, mitsa njatsa icaite namatsicanaa naco tsodalripetsa nanaco njaji inaiki aimadan.
27
Jliapodamina Moise icadaa lriñjawerri idiawa, niini Jetro idiacawa jlipaite lricojle.