Capítulo 20 (Njaji die yaacoti kjaidaperri)
1
Njite Dio icaite cayoji:
2
''Icatsa pi-Minalri Dio-ca njoa, jitalri pjia Egipto jipaite rikjoite, lrioya jliaji icadalri lrirsodalri-carro pjia.
3
Corriotsa pirsó carroca apana dionai teecojle Nóya.
4
Corriotsa pinaitjá carroca idolonai njenapjiam njai eenolicojlé perri, o jiipai nacojlé perri o njenapiam cadaa njaji ooni ricóperri.
5
Corrin itaita icoajacawa naikjaolre yaacarrontja narso matsiadalri, ima Njoa, pi-Minalri Dio, Dio cakerriakjédalrica Njoa. Noajintja namatsiacanaa njaji naferrinaipemi niini nocadaaca njerrapitaca namaysicanaa ikjaote njaji neenipe madalricoma njite njaji coatro coma tsakja njaji corriperri pia ioma Njoa.
6
Mitsa matsia nocapaca narso njaji aimadan icoadatacaperri napeyo capoa Njoa njite nanaitja cayoji nonaa capisho nanaitjaca.
7
Macaitetsa IMINALRI Dio ípitana nacó mikjapantsa, ima njorrapitetacaotsa jliaji icaitecada Noipitana nacó midalri ikjaotetsa.
8
Mamawadaca tsaotsa lrioya jliaji jalredaoca pawafeta carroda lrico, shenitaotsani norsowalreo.
9
Sei jalredaoca pirso pidejícarro.
10
Mitsa siete jalredaoca nacó piwafetawa, pjienitanda Norsowaoni, Njoa, piMInalri Dio. Corriotsa pinaitjá carroca pada idejikjeti jliadaa jalredaoca-ca, corrin pjiaca, pirrí cantja, piitó, pirsodalri, pirsodarro, pivacan catntja, corrin jliaca jliaji inocada pada jiipai nkjoite yofacada iinai.
11
Ima sei jalredaoca nacó Njoa, IMINALRI, nonaitja pia njaji eenocoma, jiipai, macapawan njite pjiomi lriitada, njite nowafetacawa siete jalredaoca nacó. Niini Njoa, IMINALRI, nocaite matsiadalrica jliadaa pawafeta carrodao njite njoenitacan Norsowaoni.
12
Pinaitja matsia pjinirri, pjidoa irso irso, yofá carroatsa aima jalredaoca jecoapi ricó, lrinaco jliaji jiipai nocadaalri irso Njoa, IMINALRI Dios.
13
Mainotsa inaiki.
14
Manaitjatsa maatsi idada irso.
15
Mañaitotsa.
16
Macashatsa pikitsinda nacó.
17
Makemitsa pikitsinda irsonda lriipana lrico; makemitsa pikinda iino, corrin tskja lrirsodalri, corrin tsakja lrirsodarro, corrin tsakja lridejishopa buey, corrin tsakja lriborron, o coandalricatsa njaji lrirsonipe.''
18
Pjiomi njaji inaiki nacapa jliaji caolri kjaidadalri njite eeno iperronialre, njemi tsakja trompeta imaolrena, nacapa tsakja itacati imotocawa lrioya jliaji jiipana. Niini nacapa cádanacon, nafiowa, natetjewa njite teecotsa neema lrioya.
19
Naaco Moise irso: ''Picaitenaotsa femi coajica, njite fepaotsa coanjica picaiteca warso; corrin wataita femica caacoca Dio, ima femi cadantjani icaamitsa mayamica fa.''
20
Mitsa Moise iaco narso njaji inaiki: ''Mafietacatsawa, ima Dio inoca waikjaolre lriwí-carro faa, wafió-carro lriiwana yaamí-carro wanaitjaca maatsi.''
21
Niini njaji inaiki neemawa teecotsa lrioya, mitsa Moise itsoomita jliaji cadaocadalri Dio iwapalri niini.
22
Njite Dio icaite Moise irso: ''Cayoatsa picaite njaji iraelitanai: ''Shatsa icapa coajica caacoca Njoa irso eeno lrikjoite.
23
Manaitjatsa irsowao idolonai Nooya inaitjanda owirro shó, palrata shó tsakja.
24
Inaitjaotsa Norso altar nashotsa njaji jalredaoca lricoperri, inocarroatsa Norso maaficalri nanaco ofrenda imjaitaji, ofrenda iofácarro matsia yapiyawaaca, oveja njite buey tsakja. Nonaitjaotsa matsia irso akjerrecawajle catsa ioma iwaadaca njoa inaitjá carro matsia Noipitana nacó.
25
Norrocoatsa ikjaolre njite nonaitjacaotsa irso matsia. Jiipada sho cadaa inaitja jliaji altar, mamatsietatsana idejishopa shó, ima imatsieta cadaana, corrinatsa matsiá carrocan.
26
Corriotsa inaitjá carroca jirracarrona lrinaco jliaji No-altarni; wadentja iñjataca idaki lrinaco.''