¹ Jliadaa piatsa jliaji talricanaati Asuero iáa talricanaati Ester isho njaji Amán inaanipem, jliaji judionai jipomda pia. Jliapodamjite Mardoqueo idenjíi talricanaati isho, ima Ester icaite talricanaati isho coandalrican roshon. ² Njite jliaji talricanaati jipa lricaapirro lricatjinaata shopa nja paperra, lridietandam Amán ioya, lricadaa carroenacjan Mardoqueo ishon, Njite Ester icadaa Mardoqueo carro ianjíi nanaco njaji Amán inaanipem. ³ Niini caaco tseenacja shoaji Ester talricanaati ishó. Showa rooshoawa jiipai nacojle njite roiya rotatjá cádanaco caiwiricotsa lriyaamitá carro Amán Hagagueo tairri iwaopiakjem maatsídalri, ima Amán piaca jliaji iinitalri jliaji iwaopiakjeti maatsidalri nacjoete njaji judionai. ⁴ Njite jliaji talricanaati lripiajleta lripjeeco owirroapo Ester icjaolre, niini shonico roemawa talricanaati ipeyajle. ⁵ Njite roaco lrisho: ''Pioma cadaa, pjia talricanaati, matsia cadaatsa picapaca noso, matsia cadaatsa pisho, njite catiima cadaa picapaca nosho, pinaa nadanaca pada iacoti iyaamitacada njaji iacoti Amán idananda, jliaji Hamedata irrí Hagagueo tairri, njaji paperra lridanaji icaitecada nawayakeetá carro njaji judionai pjiomi iofaacape nerricoda njaji yacaalre macacoepe lripapacawa lrico jliaji talricanaati. ⁶ Ima, corrintja notaita nocapaca coanca nainoca nja nokitsiñape.'' ⁷ Talricanaati Asuero iaco rosho shoaji talricanaati Ester njite Mardoqueo isho tsacja, judio tairri: Icapa coanca noaca Ester isho njaji Amán iyaaropem, njite oopi napapi lrirroa napapi carrona naco inaiki. lrioma capoa pia lriinoca nja judionai. ⁸ Idana pada iacoti nasho nja judionai njite picatjinaataotsa talricanaati icaapirro sho nacatjinaata shopa mana. Ima jliaji iacoti nadanandeena talricanaati iipitana nacó njite nacadaa lrinaco lricaapirro itjinaa corrinatsa nataita nayaamitacan.'' ⁹ Niini jliawajli nawanaca pjiomi njaji idanacape talricanaati isho, madalripi keerri naco pawalria isho leiipitana Siván, ventitre jalredaoca nacó lrinacopitsa keerri. Nadána papoco iacoti icaitecada pjiomi nanaco njaji Mardoqueo inaitjalri nanaco njaji judionai. Nadana nasho njaji talricanaatinai iwapacape nja yacaalre macacoepe, njite nasho tsacja njaji talricanaatinai njite caconaaperri iwapacperri nja yacaalre India ricjoitepe atee Etiopia ricojle, 127 yacaalre. Nadana nja iacoti naaco lricjoite nacoanaa njaji inaiki, njite nadana tsacja nasho njaji judionai naaco lricjoite. ¹⁰ Mardoqueo idana talricanaati Asuero iipitana nacó njite lricatjinaatani talricanaati icaapirro sho. Mardoqueo imeenaca nja iacoti nadananda paperra nainai njaji ideecape iacoti caballo naco, kjeeya perri jiecocao, talricanaati iyape catsa, nataoñanda lrienipena jliaji caballo matsiani pja talricanaati iyaarona. ¹¹ Talricanaati icaite nasho njaji judionai iofaacape nerricoda njaji yacaalre nacoanaa, nataita carro nawacaacawa neema carro nacjoete njaji iomacape iinocana: nawayakeeta carro, nainó carro, njite nawayakeetá carro coca catsa owinai iema nacjoete coandalri cadaa nanaikica, o cjaite dalri cadaa yacaalre can, njaji iomacape neenipe, njaji inaitjepe tsacja, naoma capoantja njetaca naoya njaji nayarroaji. ¹² Nashotsa nanjiica njaji iacoti pjiomi njaji yacaalre macacoepe lriwapampe jliaji talricanaati Asuero, trece jalredaoca naco pikeetemdalri naco keerri lriipitana Adar, pawalria iwayacacaawao. ¹³ Pada nanacjoite nja iacoti nadananda nasotsa nacadaaca cayoji iacoti ianjíicada panaco njite nacapacawa pjiomi njaji inaiki. Njaji judionai nashotsa namatsietaacawa jliada jeecoapica nainó carro njaji njepponda. ¹⁴ Niini njaji ideecape iacoti njeeco cjeya nanaco njaji caballo talricanaati iyaape, njaji caballo icaamitsa nadenjica talricanaati isho. Corri wiáca nadeeca njaji iacoti. Njaji iacoti talricanaati inacjoite dalri náno tsacja talricanaati dapana lricjoite Susa lricoda. ¹⁵ Njite Mardoqueo imoto talricanaati ioya lritsayan talricanaati carroda iapiya jipolrédalri eeno icapacanaa jaalredalri iapiya. Pada corona matsiadalri jliwida naco owirropoco njite pada lritsayan nacoda iirraidalri nanaitjanda lino matsiadalri sho. Njite njaji inaiki Susa lricope nawana cjaida njite catiimana. ¹⁶ Njite njaji judionai juiwi nacapaca cayoji camarrai ioca capisho panaco paofáa cádanaco cadaocaapi ricó, catiimana njite matsia nanjiacacao. ¹⁷ Njite nacoanaa njaji yacaalre macacoepe njite njaji tsoocuepe tsacja, naocacawa lricojle jliaji iacoti talricanaati njité dalri, catiima nacoadataca niini catiima naapiyawaaca njaji judionai. Nainja, njite nacatimataacawa jliawajli. Aima inaiki corripetsa judionaica nadiawa judionai sho, nafio capoa nacapaca nja judionai.