¹ Njite trece jalredaoca naco pikeetendalri keerri naco lriipitana Adar, keerri piketendalri pawalria isho, , tsoomi cádanaco piena jlinaana jliaji iacoti talricanaati idananda, iacoti ianjiicada panaco, nanaitja carroena cayoji naoma caipsho nasho njaji jodionai njaji nacoema, mitsa teecojlenaca lrimotoca nasho ima lridiaca naicjaolre-nacja jliaji maatsidalri. Ima Judionai-nacja iino njaji iomacape pia iinocana. ² Njaji judionai nawacaacawa nerricoda nja yacaalre icoam naofacaawa lrico lriwaji jliaji talricanaati Asuero, Njepá carro njaji iomacape pia iinocana. Corri piatsa coca itaita iemaca nacjoete, ima pjiomi njaji inaiki aimadan nafioca naiwana pekirritsa. ³ Pjiomi njaji caconaaperri nayacaalre ricope, caconaaperri iwapacape yacaalre macacoepe, njaji iwapacape yacaalre tsocoepe, njite pjiomi njaji caconaaperri ikitsindatacape jliaji talricanaati, nakitsindata njaji judionai nafió capoa Mardoqueo iiwana. ⁴ Ima talricanaati cjaidádalrica jliaji Mardoqueo talricanaati dapa lrico, njite njemica lrinaco pjiomi njaji yacaalre macacoepe, ima jliaji atsia Mardoqueo itaoñaca talricanaati sho. ⁵ Naawa njaji judionai nacoema icjoete matseta sho, naino atee nawayakeeta carrona cayoji naoma capisho pia nanaitjaca nasho. ⁶ Lrirricodatsa jliaji yacaalre taimí dalri Susa, njaji judionai naino njite nawayakeeta kiniento atsianai. ⁷ Naino niini Parsandata, Dalfón, Aspata, ⁸ Porata, Adalia, Aridata, ⁹ Parmasta, Arisai, Aridai, Vaizata ¹⁰ njite die Amán ienipem, Hamedata irri, judionai jiponda. Mitsa corri njepa nashowao nayaarromi. ¹¹ Jliadatsa jalredaoca nacaite talricanaati ishó, coshoapaca njaji inaiki nainolri lrirricodatsa jliaji yacaalre taimí dalri Susa. ¹² Niini jliaji talricanaati iaco talricanaati Ester isho: ''Njaji judionai naino kiniento atsianai atsaji yacaalre Susa ricó, njite naino tsacja nainai Amán ienipem, die namaimaca. ¿Coshoapa-pa naino nerricoda nja paana yacaalre macoepe talricanaati iyaape? Njite panaya, ¿Coca pitatja noinai? Nocadaotsa pisho cocatsa pitatjalri noinai. ¿Coca pja pitatja noinai? Nonaitjaotsa pisho njaji pitatjalri noinai.'' ¹³ Ester iaco lrisho: ''Talricanaati ioma cadaa, picadaa njaji judionai iofaacape Susa ricó nanaitja carro tjeewena jliaji nanaitjalri oopica cayoji lricaite capisho jliaji iacoti talricanaati inacjoite dalri, njite nadee carro nadakim njaji Amán ienipen napapí carro nerroa lrinaco jliaji jaico nerroeta carrona inaiki irroa.'' ¹⁴ Njite jliaji talricanaati inaa nadanaca cayó. Niini njaji iacoti nadananda nanaitjani Susa lrico, njite napápi nerroa nadakim njaji Amán ienipem, njaji diede. ¹⁵ Njite njaji judionai Susa lricope nawacaacawa catorce jalredaoca naco Adarpi naco, njite naino tsenacja treciento atsianai Susa lrico, mitsa corrim njepaca nashowao njaji nayaarropem. ¹⁶ Njite nja paana judionai iofaacape nerricoda nja paana yacaalre macacoepe talricanaati Asuero iyaape nawacaacawa tsacja neema carro nacjoete nja njeponda. Cayotsa nainoca naoyao njaji njepondape. Naino setanta cinco mil inaiki maatsiperri icapaca nasho, mitsa corrim njepaca nashowao nainoji iyarroaji cacoada perri. ¹⁷ Cayo pia nanaitjaca trece jalredaoca naco Adarpi naco. Catorce jalredaoca naco nawafeetao, nainja jliadaa catiima capoana. ¹⁸ Mitsa njaji judionai Susa lricope nawacaacawa trece jalredaoca naco, njite catorce jalredaoca naco tsacja. Ima kince jalredaoca naco nawafeetao njite nainja catiima capoana. ¹⁹ Cayoshopa njaji judionai iofaacape yacalreewape rico, njaji inaitjacape naapanao yacaalre inomapiana lrico, nacadaa jliaji jalredaoca kince Adarpi naco nawaada carroa nacatimataaca carroa, nainjá carro tsacja njite naa carro nashowaca regalo nacaiteshopa nashocatsa nacjaidataacawa. ²⁰ Mardoque idana pjiomi njaji nanaitjalri njite lrimeenaca paperra nasho njaji judionai iofaacape yacaalre macacoepe rico talricanaati Asuero iyaape, nasho njaji iofaacape tsoomi njite nasho tsacja njaji iofaacapeo teeco, ²¹ lricaite nasho nashocatsa nawaadaca njaji jalredaoca catorce njite kince tsacja Adarpi naco oonia icoam. ²² Icapiatsa njaji jalredaoca napeeco caojli pia naoyao njepondape njaji judionai. Catiima carro nacaolre nawaada cádanaco coan piaca iinonaacana njite nacatinataaca carroa nawaada cádanaco coan piacatja nainocana. Nashotsa nawacaacawa nainjá carro nacatimataaca carro, njite nameenacá carro regalo nashowaaca nacjaidataacá carroa njite nameenaca regalo nasho njaji kjenaaperri. ²³ Niini njaji judionai nanaitja minitsa jliaji nacatimataaca carroa, corri namaodaca lrioya. Nanaitja cayoji Mardoqueo idana capisho nasho nanaitjá carro. ²⁴ Jliawajli pia, Amán, jliaji Hamedata irri, judionai jiponda, lriwaopia maatsi nacjoete nja judionai, lrioma pia lriwayakeetaca pjiomina. Lripeeco nanaco jliaji nawiaca sjopa lriipitana Pur (Natopitanda oopi nawiaca shopao) lriinó carrona matsiape. ²⁵ Mitsa talricanaati iáa cádanaco ianjíi lrinaco, lricaite nasho paperra lrico lricaitecawa nasho lrinaco jliaji iwaopiakjeti maatsídalri Amán inacjoite dalri nacjoete njaji judionai lrishocatsa lridiaca Amán icjaolretsa, njite njaji lrienipe nashotsa napápica nérroa jaico nacó napápi carrona inaiki irroa. ²⁶ Caishopa nacadaa neepitana njaji jalredaoca Purim, Pur icjaote. Naicjaote njaji nadalri pjiomi paperra lrico, nacapa capoa tsacja pjiomi coanca nanaitjaca nasho, ²⁷ njaji judionai njeepa jliaji walridalri nanaikicao nanaitjá carro. Nashotsa nanaitjaca cayó, njite njaji njapodamperri, njite njaji iofaacape nainai napecolrico. Nashotsa nawaadacani oonia icoam. Cayo mitsa nanaitjaca pacoacatsa oonia icoam. ²⁸ Nashotsa nawaadacani panaya nacapá carro naicawa njaji walricoma, panti icoam, jiipai icoam, yacaalre icoam tsacja. Njaji judionai panayaperri njite njaji nanacjoité perri njaapodamperri nashotsa nanaitja cayoji nacapa capisho nerricoda njaji jalredaoca Purim, wadeotsa maanalrecana lrioya. ²⁹ Shoaji talricanaati Ester, Abihail iito njite jliaji judio tairri Mardoqueo, nadana paperra yamapia shopa, njaa capoa talricanaati nanjíi carro ajádalrica lrinaco jliaji Purim. ³⁰ Nameenaca nja paperra pjiomi judionai isho iofaacape ciento ventisiete yacaalre macacoepe rico talricanaati Asuero iyaape, nanjíi carro njaji judionai ajádalrican wadentja cocaca inaitja nasho maatsi. ³¹ Njaji paperra nacaite ajádalrican nanaco njaji jalredaoca Purim naco jloinaana ioca cádanaco, cayotsa Mardoqueo judio tairri njite shoaji talricanaati Ester inaa capisho nanaitjaca. Niini njaji judionai nacoadata jliaji iacoti nashowao njite nasho njaji njapodamperri, nacoadata tsacja nashowao jliadaa jeecoapica mainjaca cádanacona njite njeemataca cádanaco tsacja. ³² Jliaji Ester inaacalre icaite ajádalrica cocaca jliaji nanaitjalri Purim cádanaco, njite nadana pjiomi paperra macadalri ricó.