¹ Mardoqueo ioca cádanaco ianjíi pjiomi njaji nanaitjalri, jlipa lritserrenta lritsayan lrinacoda njite jlieta lritsayaniwa natsayanwaca nja cawinanaaperri, lricadaa tsacja jliwida naco palripocjoa. Njitédalri lriawa yacaalre ipamoyoaca lrico, jliemata cjaida niini caiwidalri ricó. ² Jliwacatsa iawa talricanaati ipananoma lricojle, ima corri nacadaa carroca njeewá nirshe njaji jietaacacapewa natsayan waca-sho nja cawinanaaperri. ³ Pjiiomi njaji yacaalre macacoepe naocalri nirshe njaji iacoti nadananda talricanaati inaacalre, iinonaa nacaolre pekirritsa njaji Judionai cayoji mayam capisho pakitsinda, niini maijacacana, naiya tsacja njite njeemata tsacja cjaida. Aima nanacjoite naoshoawa natsayan lricotsa cawinanaa cádanacona palripocjoa lricó. ⁴ Njaji inaitjepe walridarrope njite njaji idenjicape Ester isho naa roicjaolre nacaité carro shomi, njite caiwica lriaca ronaco shomi cádanaco nja iacoti. Njite romeenaca Mardoqueo itsayaniwa lritojloetá carro lrioyao cawinanaaperri itsayan waca, mitsa Mardoqueo corri jliepa. ⁵ Niini Ester iwana jliaji caaconaite Hatac, talricanaati ishodalri lricadanda idenjicaoda rosho. Ronaani lriá carro Mardoqueo icjaolre lritatjá carro jlimio coanca njite coanshopaca jliaji lrinaitjalri. ⁶ Niini Hatac iawa Mardoqueo ideshe yacaalre ipamoyoaca lrico, talricanaati ipananoma icoamjete. ⁷ Njite Mardoqueo icaiteca lrisho coanca. Lricaite tsacja nanaco nja palraata Amán icaiterri, lricadalriotsa talricanaati imatsietacawa lrico nja lripalraatan lricaoña shopa nainó carro nja judionai. ⁸ Lriá tsacja lrisho papje paperra lrinacjoite dalri jliaji iacoti nadananda naaji nashó Susa lrico lricaite cawa nainó carro pjiomi njaji judionai. Lria Hatac isho jliaji paperra lriá carro Ester isho, njite roá carro talricanaati iderse rotatja carro lriinai caiwi ricotsa wadee lriino cano njite njaji rokitsiñape jodionai. ⁹ Ikeena Hatac idiawa Ester icjaolre njite lricaite rosho coanca Mardoqueo icaiteca lrisho. ¹⁰ Njite Ester icaite Hatac isho lriá carro tsenacja Mardoqueo ideshe. ¹¹ Ester iaco Hatac isho: ''Pjiomi njaji talricanaati ishoperri, njite pjiomi njaji inaiki iofaacapeo nerricoda njaji yacaalre macacoepe lriajimpe nacó nanjíi corrica pada atsia o iinarro cadaa corri nataita njeewacao talricanaati iyacalrecoa lrico corri cadatsa nainaidacan, ima cayocadaa, lrishotsa mayamican, icaamitsamtja talricanaati ipiajleta cadaa lricjaolre lripjeeco owirroapo wadee nainocani. Corritoa talricanaati iwanjenca njoa noá lricjaolrewa.'' ¹² Njite Hatac icaite Mardoqueo jimi njaji iacoti Ester ieenacalri lrisho. ¹³ Njite Mardoqueo idieta iacoti Ester isho cayoji: ''Corri pitaita piwaopiaca piofaa capoa talricanaati dapana lrico yoomjeotsa pjia naoya nja pikitsiñape judionai. ¹⁴ Maaco cadatsa pjia njite corri coca pinaitja, matsiadalri, njite manacocalri iocacaotsa nasho nja judionai acjaite catsaji, mitsa pjia njite pjinirri ipaneeta nañaacaotsao. ¿Corri pianjii cayoada cadaa piocawa talricanaatiwa piyomjetá carro faa?'' ¹⁵ Niini Ester idieta iacoti Mardoqueo isho: ¹⁶ ''Washa peda piwakeeta pjiomi njaji judionai iofaacape Susa lrico, njite maijacaca jia noicjaote. Corriotsa injá carroca, corri tsacjaotsa iirraca madalridaa jalredaoca, deepi rico jaalrewe ricó tsacja. Cayo tsacjaotsa njoa naapiya njaji inaitjepe walridarrope noshoperri. Mayamicadaotsa lricjaote, maminaotsa njoa.'' ¹⁷ Ikeena Mardoqueo iawa lrinaitjá carro cayoji Ester inaa capisho lrinaitjaca.