¹ Njite madalridaa jalredaoca jiapodam, Ester jieta ronacoa talricanaati itsayan wacá njite roemawa paniapjida lrico lriwawa lricoda jliaji talricanaati dapana, lricoemjete jliaji panti talricanaati iofacaawa. Lriofá cadanao lritalricanaata carroda lrico jliaji talricanaati, talricanaati dapana lrico, lriofaa lricapa pantinoma icjaolre. ² Njite lricapa cádanaco shoaji talricanaati Ester roemacawa lriyacalrecoa lrico, matsia lricapaca rosho. Niini lripiajletaca roicjaolre lripjeeco owirroapo jlipanda lricaapi ricó. Njite Ester itsoomita ronotá carro lripjeeco jiwidana nacó. ³ Njite talricanaati iaco rosho: ''¿Cocao pioma, talricanaati Ester? ¿Cocao pino pitatja noinai? Notaita noaca pisho pamoyoa jliaji nowapanda jiipai.'' ⁴ Njite Ester jiepani: Matsia cadaa pisho, pjia talricanaati, nooma pínoca Amán iapiya panaya pinjá carro jliaji injaodati nonaitjalri pishowalrepe.'' ⁵ Niini lriaco jliaji talricanaati: ''Idee cjeya Amán noicjaolre, waacarro wainja Ester ideshe.'' Niini jliaji talricanaati iawa Namán iapiya Ester ideshe nainjá carro jliaji injaodati ronaitjalri lrishó. ⁶ Njite napiá cádanacotoa jliaji jaicotjeda ianaa nairraodao nainja cádanaco, talricanaati iaco Ester isho: ''¿Cocao pitatja noinai? ima coca cadaa pitatja noinai, noáwatsa piso. Pitatja cadaa noinai jliaji jiipai nowapanda, notaita noaca pisho pamoyoa lrinacjoite.'' ⁷ Njite Ester jiepani, roaco lrisho: ''Icatsa jliaji noomalrica piinaí: ⁸ matsia cadaa picapaca nosho, pjia talricanaati, njite pioma cadaa piaca nosho jliaji notatjalri piinai, njite pjiepa capoa njoa lrinaco jliaji noomalri, pinoatsa tjeewa Amán iapiya injá carroatsa jliaji injaodati nonaitjalriotsa isho, niiniotsa nocaite pisho cocaca jliaji noomalri piinai.'' ⁹ Jliadaa jalredaocaca Amán imoto njiteo lricaolre catiimadalri-so. Mitsa Amán icapa cádanaco Mardoqueo talricanaati ipananoma icodapi, njite corri mardoqueo jinico iemao lricjoete, corri tsacja lrifióca lriiwana lricapa capoani, niini keeroaca Amán pekirritsa Mardoqueo icjoete. ¹⁰ Mitsa corritsa coca Amán inaitjaca lrisho, icaamitsa lriacawa lriipana lricojle. Njite Amán, lriino Zeres iapiya nawakeeta pjiomi njaji naanjialri. ¹¹ Amán icaite njemi namatsiaca njaji lrinaani, lrienipenaipe imaimaca naco tsacja, njite coanca talricanaati jirreeta manan lridenjicalre ioya pada nacojle matsia capoa lricapaca lrisho; njite coanca lritaoñaca naoya nja paana caconaaperri njite naoya tsacja nja talricanaati ishoperri. ¹² Amán iaco pja nasho: ''Shoaji talricanaati Ester, corri ronai padapjanta inaiki nooya, icaamitsa njoa, noá carro talricanaati iinai wainjá carro jliaji injaodati ronaitjalri washo. Njite roinai tsenacja njoa tjeewa noá carro talricanaati ikitsindao. ¹³ Mitsa corritsa coadaca nosho njaji ronaitjalri niini capoa toa jliaji Mardoqueo judiotairri talricanaati ipananoma icodapi.'' ¹⁴ Njite naaco Namán iino Zeres isho njaji nanjialri: Iemeta apana jaico ventitre metro-dalri iyenonca napapiaca carrona inaiki irroa. Ima cacoatsa jliaji talricanaati piyompinaco toa napápi carroatsa Mardoqueo irroa lrinaco jliada nacó. Njité dalrinaotsa pitaita piacawa catiimawa talricanaati iinai injacarroda lrico.'' Njite matsia Namán jimica jliaji nacaiterri niini lrinaa njerreetaca apana jaico ienondalri napapiaca carronawa.