¹ Njapodamjite njaji jiyapalrio, jliaji talricanaati Asuero ikasheta Amán, Hamedata Agagueo irri, caconaité carron nanaco njaji paana caconaaperri lrishoperri. ² Pjiomi njaji talricanaati isoperri idenjicape talricanaati ipananoma lrico, caidalri manatsa natoda naoshipada njite nacoanja Amán ipeyajle, ima cayo piatsa talricanaati inaa nanaitjaca. Mitsa Mardoqueo corrí lritoda lrioshipadao njite corri tscja lricoanja Amán ipeyajle. ³ Njite njaji talricanaati ishoperri idenjicape pantinoma lrico naaco mardoqueo isho: ''¿Coadao pimjepata talricanaati iaco?'' ⁴ Caidalritsa caacomanacana lriapiya, mitsa Mardoqueo corri jliepana. Niini caacona lrinaco Amán iapiya nacapá carro coanca nanaitjaca Mardoqueo iapiya, ima mardoqueo icaiteca nasho judiotairri cani. ⁵ Amán icapa cádanaco corrica Mardoqueo itoda ioshipada njite corrím tsacja lricoanja lripeyajle, keerroa Amaán pekirritsa. ⁶ Niini lriwaopia lriinó carro jliatsa jli Mardoqueo, ima pada talricanaati ishodalri icaite jlimi lrinaikica nacó. Amán ioma pia iwayakeetaca pjiomi njaji judionai, Mardoqueo ikitsiñape iofaacape talricanaati Asuero jipaite ricó. ⁷ Nisanpi naco, jiaji keerri pawalria inita carroda, lrishocawena doce walria jliaji talricanaati Asuero lritalricanaatacawa; napeeco jliaji nanjerri Pur-ca, pada nawiaca sopao, njite nanaitjani Amán icapawerrico, nanji carro pada jalredaoca naco njite apapi keerri naco tsacja, niini jliwacao jliaji napeeconda Pur lrinaco jliaji keerri piketendalri pawalria iwayacacawao lriipitana Adar. ⁸ Njite Amán iaco talricanaati Asuero isho: ''Niini apaana inaiki ipocotacapemwa njite naofaa macadatsa nerricoda njaji yacaalre macacoepe pitalricanaatacawa rico jiipai. Njite jliaji iacoti ianjiicada panaco cotsa cayocana nayaada sho nja apaana inaiki, njite corri tsacja njeepa njaji iacoti pidanalri panaitjá carro cayo, niini cotsa matsiaca pisho nja caiperri. ⁹ Niini pioma cadaa, pjia talricanaati, picadaa wainó carrona, nocaoñaotsa njaji caconaaperri ianjíicape piyarroaji naco Die mil talento palraata nadeecarrona namatsietacawa lrico nja pinaani cacoadaperri.'' ¹⁰ Niini jliaji Talricanaati Asuero jita lricaapirro lricaapi ricjoite lriá carron Amán isho, lrirri jliaji Hamedata Agagao tairri, judionai jiponda. ¹¹ Jliaji talricanaati iaco Amán isho: ''Jliaji palraata pjipa pishowaoni njite naapiya njaji inaiki aimadan piofacaweenai. Pinaitjá carro nasho njaji piomalri pinaitjaca.'' ¹² Njite nawaqueeta pjiomi njaji idanacaperri talricanaati ishoperri trece jalredaoca nacó lrinaco jliaji keerri pawalria initacawao, njite nadana pjiomi iacoti cayoji Amán inaa caopisho nanaitjaca pjiomi njaji talricanaatinai iwapacape nja yacaalre macacoepe lrianjimpe inaco jliaji talricanaati Asuero, nasho njaji caaconaaperri yacaalre tsocoepe isho, nacoanaa njaji yacaalre cayoji caaco capishona; nadana nja iacoti talricanaati Asuero iipitana naco, njite nacadaa paperra itjinao lricaapirro iecoa sho. ¹³ Njite nameemaca nja inaiki ideecape iacoti nadee carro nja iacoti nadananda nacoanaa nja yacaalre lri talricanaata cawa jliaji talricanaati Asuero, nawayakeetá carro, nainó carro matsiape pjiomi njaji judionai, iempetipe, pekipenai njite pjiomi njaji inaitjepe tsacja. Nainó carrona trece jalredaoca naco lrinaco jliaji keerri piketemdalri pawalria isho, lriipitana Adar; njite njetá carro nashowao piomi nashiompe. ¹⁴ Nanacjoite njaji iacoti nadananda, njaji iwapacape nja yacaalre macacoepe nacadaa nanjíi nja inaiki nanaitjá carro cayoji lrinaa capisho jli iacoti. Njite nashotsa namatsietacawa nawapá carro nacapa jliaji jiyapalriotsa jliadaa jeecoapica. ¹⁵ Njaji inaiki ideecape iacoti, nakjeyapita nadeeca nja iacoti talricanaati inaalri nanaitjaca. Náa tsacja njaji iacoti nadananda nasho njaji iofaacape talricanaati dapana Susa lricó. Jliaji talricanaati njite Amán naofáa nairra, mitsa njaji inaiki Susa lricope corri nanjíi coanca.