¹ Nejjata Dioso Moisés ittorroba, "táemeya Faraón jumaitsimü tsane; Dioso rakajumaitsi: neto kopatsiarena tajiwi nenawajü kájitsia. ² Ltsa jume jaitsane tanetó kopatsi yéniwa, jjanü kentsia itsinü tsane kobejjae büajai tsane kuáitonü. ³ Kuai yawünükaena pepomene. Potsapaenia ponaena panija bonüjawá, pane májitsi jawá kamajjiya. Jonena nija pianijiwi piajabó jawa niájiwi jamá, nena motsa zeba biabijawá, nenamitsa tsapáka biabi jawá wajji jawá. ⁴ Kuaitonü kaba rajinaena niájiwi pijinenia nija pianiwiata. ⁵ Dioso jumaitsi Moiseta: " Jumaitsimure Aaronta: namajjü yotsia kaweta jjuare nekobena nukae náebota pepomene, pematatú rajji pukanü, pitsapae ejjanare kúai Egipto irráreka." ⁶ Aarón kaweta jjuaba Egipto mene kuai pitsapaina yawünüka Egipto irra. ⁷ Jane baitsi magowi nakuijirü katane piaja majiata naja rapamona nákapitsapa kuai Egiptota. ⁸ Nejjata, Faraón junata Moisés Aarón beje jumai tsijitsai:" Pabarrü kuaikui jamüre Dioso peponae nejja kuai jjanüwekua tajiwi ata. Bá rajané jjua kuijinae kató kopatsianatsi pena wajükae nejja baja raponüta. ⁹ Moisés jumaitsi Faraón jawabelia: Jjamü kaenümü yapütaneme tane jumaitsimü pakuijinae takató barrü kuaikuijai nejja jjamü yabara, nija piánijiwi niajiwi, kuaipeponae nejja jjamü wékua nijabonü ata nakae tuatsiana pepomentalia jinawuna paejitsia. ¹⁰ Faraón jume kanawiata:"Mérrawia", Moisés jumaitsi: "Pakuenia jjamüjumaitsimü, neyapü taenejja ajibi kaenü ata Dioso wekua, Diosonü. ¹¹ Kuitonü rabaja ponaena jjamü wekua, nija bonü wekua nija pianijiwi niajiwi wekua. pepo mentalia pitaya jinawana paena. ¹² Moisés Aarónbeje pitsapaliá beje Faraón jawawelia. Baja rajjua kuijinae Moisés juntajjuaba Diosonü pejúta jjuabiajjae kuai petsitorobiwitsi Faraón. ¹³ Dioso itsi pakuenia Moisés wajüta: Kuai werrewereka bonüjawá, pemüjjünenia jjiya peubi jawá. ¹⁴ Jiwi najumá kaetua tejebeponaya irra tujjutsaeba pónaya. ¹⁵ Itsia pakuijinae Faraón tane piajibijáwa, jamatabü büajai namüjjü jemata Moisés Aarón ata apo namüjjüná ewetsi, pakuenia Dioso tsipaebatsi. ¹⁶ Dioso jumaitsitsi Moisés "itorrobare Aarón:Yota jjuabiana piajanáebo konita jjuabiana irra pepuma pumanáejawa, Wákape pitsapaena itsa jjoyá kopia ruka Egipto piaja irra". ¹⁷ Baja rá ponübeje itsi:baja rajane sibá namajjü yotaba piaja náebota irra kónita jjuaba. Wakape patta jiwijawá pekobe kowü nüanü jawa. Dajjita pepúmabia jjuabijawa náejjana wákape itsa jjoya kopia ruka Egipto piaja irra. ¹⁸ Peyá imüjjü itorrobinüjjinnakuijiru katane itsoata apo kapanepae wákape pená itsijawa piaja magiata ápo kapanepae, pejuma jjiya rubena jiwi dajjita vacá jumá. ¹⁹ Magowi tsipaebatsi Faraón, " Dioso ra kaita ropita pekobesitota." Jané baitsi Faraón bitsó ajamatabü tája, tsiopaebi atatsi barrajané namüjü jemaata.Pakuenia tó ruta Dioaonü pitsi nejja Faraón. ²⁰ Dioso itorrobatsi" Moisés , merrawuá bajayakua nonotapunaename nukata bekáename pitabarráwelia Faraón pakuijinaé nukiponaelia meniá belia. tsipaebare: Dioso ksjumaitsi: nitó kopare tajiwi jamatejema tane nawajükae nejja. ²¹ Apo itsa nepó kopatsimü tajiwi, jjanü Katsitorrobiá natsi pakatsi winowimo jai tsane dainamonaenü, nija pianiwi , niájiwi bótutuju jawá. egipciomonae piajabó jawá wimowimo jai tsane daina . ²² Nejata baja pamatakabi, jjanü yajawanü tsane Gosén piaja irra saokaya, tsipaji baja rajota tajiwi jinawanapa, daina pejoné yeniwá baja rabeli. Majjua itsinü tsaneje paneyapü taénejja Diosonü kuenenü piarra taje. ²³ Nayapütae ejjanaenajü tájiwi niájiwi wekua. paka tsitajütsiánatsi paneyá pütaenejja tásaü mérrawia". ²⁴ Itsi baja ra itsi pakuenia Dioso, daina monaenü patta Faraón piajabó yabelia piaja pianiwi pijabó jjiya. Jjuayá kopia ruka Egipto piaja irra, irra bijiana daina pewimo wimo jaiyabara. ²⁵ Faraón junata Moisés Aarónbeje jumaitsi:" Paponare patobema panija Dioasonü pataja irrata". ²⁶ Moisés júme kanawiata: Apo panetó jjanepanae pajjanü patató itsinejja, tsipsji patató bejawa Dioso pataja Diosonü piatá jitsibijawa Egipciomonae. Itsa pabarruyanü pato tajuitajü pitabü nejewa pá anáe ejjenae jitsipajü Egipciomonae.¿Pané weretsipa iboatonüta? ²⁷ Patasiwá ponaenejja apo akueyabi pamatakabi beje desierto jawabelia patató itsi nejja, pata tsipaebi jawá patató benejja pataja Dioso patta itsi nejja". ²⁸ Faraón jumaitsi: "Gé paponaéname penetó bénejja Dioso panija Diosonü desierto talia. Káejawa rajane pütsa tájü papóname panetona wajütsianame jjanü yabara. ²⁹ Moisés jumaitsi:Pakuijinae baja papona rüküpaenajü nitabarrá wekua jjanü barrü kuaikui janü tsane Diosonü pewimo wimo jaijawa peka jjuabanutsi nejja, Faraón nija pianijiwi niajiwi yajawa mérrawia. Baitsi jané baja pütsa paneyá imüjjü itojó róbame patane wekua asiwamü tsaponae nejja patájiwi peponae yéniwa pebe nejja perrajutsi nejja pataja Diosonü. ³⁰ Moisés pitsapalia pitabarrá welia Faraón, barrü kuakuijai Dioso. ³¹ Diosonü itsi pakuenia wajuta Moisés: Wekua tijjita pewimo wimo jaijawa daina monaenü Faraón wekua, piaja pianijiwi piá jiwi wekua. Kaenü ata aponákopatsi. ³² Nejjata Faraón najamatabü tájata ikatsia apo kopatsi baja rapomonae.